اسكربتات

اسكربت³³

= أستاذ أحمد، اتفضل فضفض عن اللي جواك.
_ احم، مبدائيًا أنا مكنتش أتخيل في يوم وآجي لدكتور نفساني وكدا بس الظروف اللي أجبرتني، بصي يا دكتورة أنا مش عارف أبدأ منين بصراحة.
= ايه السبب ورا إنك تيجي العيادة؟
_ هي، هي السبب في كل اللي حصلي، هي اللي دمرتني وكسرت قلبي، احم، أنا كنت معجب بواحدة واتقدمتلها واتخطبنا بس هي مكنتش بتبادلني نفس الشعور بس كنت بقول مع الأيام هتحبني، كنت رايح عند صاحبي كالعادة ودخلت بيته عادي لإنه عايش لوحده فهو ادالي أنا والشلة كل واحد مفتاح لشقته زي أي صحاب وكدا، كنت مخنوق منها ومن أفعالها معايا وكرهها ليا اللي مش محدود وكمان معرفش ليه رغم إني بعاملها أحسن معاملة، المهم فتحت الشقة وكنت بدور على صاحبي دا، فتحت أوضة نومه لقيتها، مش قادر أكمل خلاص خليها المقابلة الجاية، سلام.
= طب، يا....
" مشي وأنا مقدرة موقفه، الخذلان من أعز الناس على قلبك بيكون صعب... صعب جدًا، بس في حاجة شدتني للشاب دا، ممكن مثلا تأثري بقصته، كله رايح"
= دخلي المريض اللي بعده يا سامية.
- حاضر يادكتورة ورد.
_________________
_ روحت يا سالي العيادة عندها بس مقدرتش أكمل الحكاية.
- واحدة واحدة يا أحمد، إن شاء الله خير وربنا هيجعل الدكتورة دي سبب في إنك تتعافى إن شاء الله.
_ يارب يا سالي يارب.
- هقوم أحضرلك لقمة عشان ماما عند تيتة.
_ أكل ايه أنا هطلب دليفري أحسن، أكلك بيكون سكر هههه.
- دا أنا أكلي جميل ياخويا.
_ فعلا جميل ههه باكله من هنا وأدخل على الحمام من هنا، يابنتي الأكل دا فن.
- خلّص اطلب الدليفري وفرت عليا.
_____________________
= ياماما أنا جيت.
- قلب ماما من جوا، عملتي ايه في يومك النهاردة.
= كالعادة، مرضى يخدوا خطوة في بدء علاجهم وفي الجهة التانية ناس اتحسنت وخلصت ومستعدة للحياة من جديد، المهم عاملة أكل ايه النهاردة.
- كوارع.
= يااني خلاص أنا رايحة أجيب بيتزا ألطف وأحسن.
- هههه فلوسك مخلصاها على البيتزا والأكل اللي ميسواش.
= اشبعي إنتِ بقى بالكوارع دي ههه.
__________________
= بيتزا وسط فراخ وكتّر الموتزاريلا والكاتشب.
_ عايز اتنين بيتزا كبيرة بالفراخ يافندم.
بصدمة= ايه دا أستاذ أحمد، فرصة سعيدة.
_ دكتورة إســــراء بدوي! مش معقول هههه هو حضرتك بتاكلي زينا عادي!
= هههه أكيد هو أنا يعني هكون من المريخ!
_ أنا بس مستغرب هههه
= وكمان بتكلم وأضحك كأي شخص ومش بتعامل زي الدكاترة الكئيبة وكدا، أنا أصلا ياسيدي فرفوشة وبحب الضحك والنعنشة.
_ الضحك والنعنشة!
= آه، المهم المرة الجاية تيجي وتكون واثق كدا وتتكلم عشان نبدأ في العلاج علطول، اشطا!
_ هههه إنتِ غريبة، اشطا.
" فرحت جدًا إني بدأت أفرفشه وأضحكه وفرحت إني شوفته... أصدي يعني بيعيش ويتعايش ومش حابس نفسه زي المكتئبين، المهم خدت البيتزا بتاعتي وروحت آكلها في البيت مع لتر بيبسي، أنا بحب الأكل ياجماعة جدًا، خلصت أكل وجاوبت على الأسئلة اللي جاتلي من المرضى"
_______________
_ أنا شوفت الدكتورة بتشتري بيتزا.
- ايه دا بجد! هي بتاكل بيتزا زينا!
_ مانا بردو أول ما شوفتها قولت كدا وقعدت تضحك معايا وكدا، لولا التلفون فصل شحن ونزلت أنا أجيب البيتزا مكنتش شوفتها.
- وبعدين ياروميو!
_ ششش، يلا لمي الأكل دا عشان صحابي جايين وجايبين معاهم لب وسوداني وحاجات من دي.
- يبقى سيبلي شوية لإما هصوت عشان انتوا بتاكلوا وتتساهروا وأنا اللي أتدبس في التنضيف لاااا خلاص سالي الطيبة ماتت وهتخرب الدنيا بعد كدا.
_ خدي ٥٠ جنيه أهي واسكتي.
- معاك سالي الخدامة ياباشا، أي أوامر!.
_ ههههه لأ، يلا ادخلي عشان وصلوا... اتفضلوا يارجالة.
- أحمد احنا جايين نصالحك على معتز، بيقول إن البت اللي قعدت تجري وراه وتغويه.
_ قولت لأ وألف لأ، لو هو صدها من الأول مكنتش سمحت بنفسها تاني، خلاص اقفلوا على الموضوع لإن الاتنين ماتوا بالنسبالي، هات التسالي دي.
- هات كوبيات عشان البيبسي.
_______________
= صباح الخير ياسامية، مين أول اسم النهاردة!
- أحمد.
= تمام خليه يتفضل... اتفضل يا أحمد على الكرسي وافرد جسمك كويس وارتاح ومتفكرش خالص لمدة دقيقة كدا.
_ حاضر.
= كمل يا أستاذ أحمد من أول ما وقفت.
_ شوفتها في حضنه وبعدين اتصدمت ومن الصدمة نزلت فيهم ضرب وفضحتهم ولميت عليهم الجيران والكل شاف فضيحتهم، بس في حاجة مكسورة جوايا... في جرح مش هيلم وجرح في قلبي مش بيصحى، أنا عانيت في حياتي كتير أوي... أنا شايل مسؤولية عيلتي من أول ما بابا اتوفى وأنا في تالتة ثانوي وقعدت من الدروس عشان أشتغل وأصرف على أمي وأختي بس كنت بروح عند ولاد عمي بالليل ويشرحولي... وأديني نجحت وبقيت حاجة تشرف بس...
= وقفت ليه كمل متخافش.
_ ينفع المرة الجاية؟
= هو كل ما تتزنق تقول المرة الجاية! ههه لأ هتكمل واجمد كدا وخليك قدها واتكلم.
بتنهيدة_ بس صاحبي أعز صحابي طعن قلبي والتانية بنت ال... اللي كنت هديها عيني وقلبي وروحي كانت بتتلاعب بيا وبمشاعري، اااااااااااااااااااااه ياقلبي ااااه.
= صرّخ وزعّق وطلّع اللي جواك، صرّخ.
ببكاء_ ااااااااااااااااااااااااااه.
بدموع= خلصت!
ببكاء_ ليه عملوا فيا كدا، عملت فيهم ايه؟ زعلتهم؟ دوستلهم على طرف؟ أنا أستحق الخيانة كدا؟ دا جزائي إني حبتهم؟ يارب ردلهم الأذى اللي أذوني بيه أضعاف مضعفة يارب.
= إن شاء الله، كما تدين تدان وكله سلف ودين ومش بيروح بعيد.
_ أنا آسف تلقاه المرضى اتفزعوا ومشيوا.
= لأ متخافش الحيطان مش بتطلع الصوت لبرا خالص.
_ طب دي كل حكايتي يادكتورة، هتعملي معايا ايه!
= بص يا أحمد إنت شخص عادي ومش مريض، كل الحكاية إنك اتخذلت واتكسرت من أقرب الناس ليك بس إنت بتعيش وبتتعايش عادي وبتضحك كمان بس الجرح جوا قلبك، إنت مش هتاخد علاج ولا هكتبلك على أدوية إنت هتيجي كل يوم هنتكلم ونعمل شوية مشاوير وهتبقى زي الفل كمان اسبوعين.
_ مشاوير!.
= أه هنخرج في كذا مكان كدا.
_ تمام يا دكتورة إســــراء، سلام.
= اللي بعده يا دكتور سامية.
- إيمان.
= دخليها وهاتيلها المحاليل بتاعتها معاها.
________________
- طمني عملت ايه.
_ ارتحت جدًا النهاردة إما خلصت كلام.
- طب الحمدلله.
_ تخيلي يا سالي إنها عيطت عليا؟
- ما هي رقيقة وسكرة.
_ خليتني صرخت صرخة قوية أخرج بيها اللي جوايا وبعديها أنا عيطت راحت عيطت عليا.
- طب ما توصفهالي كدا يانجم يمكن أكون عارفاها.
_ هي طويلة بس أنا أطول منها ب١٠ سم ولا حاجة، وشها مدور زي البدر وبشرتها بيضة وعيونها عيون غزلان لونها بني فاتح وواسعة ورموشها طولها متوسط وتقيلة وبقها صغير ومناخيرها وسط، تبصلها كدا قلبك يكون مرتاح ومش شايل هم.
- أيوا بقى هههه.
_ ايه؟ يلا يابت إنتِ غوري من هنا ههه.
- دا إنت بتموڤ أون في شهر ما شاء الله عليك هههه.
_ موڤت أون ياستي ما إنتِ ماشوفتيش إســــراء دي.. نسيتني نفسي والله ههه.
- أجهز الفساتين يعني!
__________________
= ماما عريس مين دا، لأ طبعا مش هتجوز دلوقت، أنا حيالله ٢٣ يعني القطر لسة مبدأش عشان يفوت.
- يابنتي ريحيني بقى المرادي.
= ياماما إنتِ اللي ريحيني، حرام عليكِ اتظلم مع واحد باقية عمري الجاي، حرام لإني مش قابلاه ولا مرتحاله ولا هبسطه ولا هعرف أعيش معاه، لو جه اللي يستحقني مش هستخسر فيه نفسي ياماما، اقفلي النور عشان هنام لإن بكرا عندي مريض مهم لازم أبدأ معاه علاج بكرا.
- عليه العوض ومنه العوض، نامي ياختي نامي.
= أتجوز! هه! ومن ابن عمي كمان ياااه يا قرمط كله طمعان فيك ههه إما أنام لاحسن أتجنن وأبقى أنا اللي أروح لدكاترة مش المرضى اللي يجوني ههه.
________________
_ ها نبدأ في الخطوة الجاية يا دكتورة!
= هتعرفني بنفسك كويس بمميزاتك بعيوبك لإن دا هيديك طابع الثقة عندك وتقبل العيوب وكدا.
_ اسمي احمد وعندي ٢٥ سنة طولي ١٧٢ وزني ٨٠ بس مش باين عليا بسبب عضلاتي، عندي غمازة في خدي الشمال ومسمسم وحلو.
= هههه وايه كمان، يابني بقول مميزات وعيوب مش توصفلي نفسك ههه.
_ سيبيني أكمل بس، عندي أخت اسمها سالي ودي زي القردة كدا وبت مش سالكة بس بحبها، عندي أمي ست الكل وست الناس كلها، عندي صحابي بيحبوني بس كان فيهم الواد معتز الحربوء دا وخلاص راح في داهية، عندي بنت عمتي هتموت عليا هههه بس هي مش ذوقي خالص، عيوبي بقى ياست الطيبة الزيادة وشكرا.
= لا ياراجل! هههه.
_ هو القمر دا يبقى عنده عيوب!
= لخص واتكلم لإما ه...
_ خلاص هقول، عيوبي إني أناني بحب اللي يحبني يحبني أنا بس وكمان حب التملك وبحب أي حاجة تخصني، سرعة التعلق والعطاء الوافر للي بحبه من غير أي سبب بدّيله زي مثلا أخرجه وأفسحه وبحب أعيشه بس المشكلة إنهم بيحسبوا إنك ضعيف وإنك متقدرش تعيش من غيرهم بس لأ أقدر جدًا كمان.
= تمام اتفضل على كرسي المساچ لحد ما أشوف المريض التاني وهاجي.
" بعد ساعة"
= أحمد، هو إنت نمت!
_ ها؟
= صحصح يلا، أنا جيت.
_ احم، أنا آسف، الكرسي دا جميل وبيعمل مساچ وحاجة كدا آخر امموااا.
= إنت كدا خلصت النهاردة، تعالي بعد أربع أيام بدري على الساعة ٦.٥ كدا عشان هنروح مشوار.
_ تمام يادكتورة، سلام.
_________________
_ ايوا بتعالج فيها ايه ياماما يعني.
- بتتعالج؟ إنت مجنون عشان تتعالج؟
_ العلاج النفسي مش للمجانين بس.. دا بردو للي قلوبهم اتهلكت.
- براحتك ياحمد، براحتك خالص، أغيب أسبوع عند تيتة آجي ألاقيك بتتعالج، الصبر من عندك يارب.
_ أنا قايم ماشي دي بقت عيشة تقرف.
- ياماما الصدمة اللي اتعرضلها مش قليلة بردو هو هيتخطى الصدمة بالعلاج النفسي وخلاص، متعمليش من الحبة قبة بقى.
- ماشي يا سالي بيه، ماشي يالمضة.
- أحلى ماما دي ولا ايه.
_________________
_ يادكتورة هنروح فين بدري كدا.
= هنروح البساتين اللي آخر الشارع دي نقعد فيها شوية ولو عايز تتكلم في حاجة.
_ الله دي جميلة أوي ومليانة ورد والمكان ريحته حلوة أوي ومريح للأعصاب، إنتِ بجد أحلى دكتورة.
= نعم؟
_ أقصد أشطر دكتورة، كنت عايز أقولك إني شوفتها امبارح وأنا بتمشى بالليل، مش عارف واحدة زيها شرفها بقى في الطينة بتتعايش زينا ولا كإن في حاجة، هيتجوزوا هم الاتنين بعد الفضيحة دي بس تعرفي! أنا مبقتش أحس بأي مشاعر تجاههم، حتى الكره مبقتش بكرههم لإني خلاص اتقفلت منهم وقرفت، المهم ياستي أمي مكنتش تعرف إني باجي لحضرتك وكدا فاتضايقت بس راقت علطول وبس.
= ثواني يا احمد هشوف الطفل دا بيعيط ليه..... بتعيط ليه ياجميل؟
- أخويا خد مني الورتة بتاعتي.
= طب بص ايه رأيك فيا!
- حلوة.
= حلوة بس!
- حلوة أوي وإما أكبر هتكوزك.
= ههههه طب وأنا موافقة بس تعرف أنا اسمي ايه!
- اسمك ايه.
= اسمي ورد، يعني إنت معاك الورد كله أهو، بتعيط على ورداية أخوك خدها ليه! اتفضل الوردة دي مني.
- أنا بحبك أوي ياطنط هاتي بوثة عثان بحبك.
بغيرة_ حبك برص يالا إنت.
= وآدي البوثة أهي، روح عند ماما بقى.
بغضب_  عمالة تلعبي مع الواد وسيباني؟
= ايه حبك برص دي؟ دا طفل حرام عليك تكسر بخاطره وبعدين مالك متعصب وغيران كدا؟
_ مش غيران علفكرا بس الواد استفزني.
بفرحة مكتومة= ماهو باين.
_ هو إنتِ اسمك ورد بجد!
= أيوا، بينادوني ورد بس اسمي الحقيقي إســــراء.
_ اسم حلو، هو... هو ليه بيقولك هتجوزك إما أكبر؟
= تاني! يلا نروح العيادة.
_ لأ خلاص أنا آسف، بقولك يا دكتورة أنا ممكن أصحى على كام يوم كدا.
= كام يوم ايه انت أساسا مفيش فيك أي حاجة وإنت زي الفل خلاص، ممكن على بكرا وتبقى فل الفل.
_ طب ممكن تاخدي مني وردة الفل دي بقى ههه؟
= ممكن وماله.
_ شكرًا ليكِ.
= على ايه!
_ على إنك بتسمعيني وتفهميني وتحاولي تخففي عني تعب الأيام.
= دا واجبي يا أحمد.
_ ممكن نروح مشوار تاني بمإن الظهر أذن!!
= لأ مش ممكن، أنا هروح العيادة أصلي الظهر وأشوف مصالحي وإنت اللي عليك تسمع النهاردة بوكاست كيف تنجح العلاقات "فنجان" تسمعه كله وجمبك كوباية قهوة كدا واقعد وسط الزرع اللي في البلكونة واستنشق الهوا الرطب وكل دا يكون بالليل، سلام بقى عندي حالة مستعجلة في العيادة.
_ الوردة.
= أهي متخافش هحطها في العيادة عشان تبقى قدامي علطول.
_ شكرًا، سلام.
______________
- دكتورة ورد في حالة طارئة لازم تيجي.
= اعمليله الاجراءات يا دكتور سامية وأنا طالعة في الأسانسير أهو.
- تمام يادكتورة.
= في ايه يا أستاذ مصطفى، راجع لنقطة الصفر تاني ليه برجلك؟
- مش قادر أعيش من غيرها، كل ما أنساها وأفتكرها بتعب وببقى عايز أشم وأشرب وأرجع مدمن تاني.
= طب خد الوردة دي كدا شمها.
- الله، ريحتها حلوة.
= إنت زيها كدا يا مصطفى، يادوب ١٨ سنة لسة شباب زيها، الفرق اللي ما بينكم إنها بتسعد الناس اللي حواليها بريحتها أما إنت فبتزعل اللي حواليك منك خصوصا أهلك، مش بتبص لأهلك اللي بيعالجوك وهم مش لاقيين ياكلوا! مفيش أي شفقة تجاههم! إنت لازم تكمل الطريق للآخر مش يادوب في ربع الطريق ومش عايز تكمل لأ إنت كدا بتستسلم ومش بتثبت نفسك ولا رجولتك، شوية برشام صحاب السوء دلّوك عليهم بوظوا حياتك خالص، كمل الطريق للآخر وغيّر من نفسك وخليك نسخة تشرف بيها أهلك واخواتك وصحابك المخلصين مش صحابك السوء اللي ينتقم منهم ربنا، إنت قدها يامصطفى وهتدخل الكلية اللي عايزها بس يلا بقى اتعالج عشان تبدأ دروس وترجع شاطر وزي زمان.
- شكرًا لوجودك يادكتورة، هو أنا ممكن أحضنك!
= لأ مش هينفع للأسف، روح احضن أمك وطمنها إنك هتكمل العلاج وهتتغير للأفضل، روح فرحها ودخل السعادة لقلبها، هات الوردة عشان من شخص عزيز عليا وخد من سامية شوكولاتة وإنت ماشي.
- ربنا يجبر بخاطرك ويسعد قلبك يا دكتورة إســــراء يارب، ربنا يرزقك بابن الحلال اللي يستاهلك، يلا سلام.
_______________
_ سالي الحقيني.
- ايه في ايه!
_ الدكتورة بعتالي على الواتس إن آخر يوم ليا بكرا.
- طب وفيها ايه مالك زعلان كدا، بدل ما تفرح!
_ يعني أنا كدا خلاص مش هشوفها تاني ولا أتكلم معاها تاني ولا أتأمل في جمال عيونها.
- اممم وايه تاني!
_ مش بهزر يا سالي، أنا اتعودت على وجودها في يومي واتعودت على كلامها ونبرة صوتها الدافية وفي لحظة كل دا يطير!
- يطير ايه دا إنت يادوب بتروحلها أديلك أسبوع لحقت تتعود!
_ أصلك ماشوفتيهاش يا سالي.
- أحمد اهدى كدا وادخل خد دوش وبطل تفكير فيها، أصلك بتقول اتعودت يعني محبتش ففي فرق يابابا تمام!
_ الكلام معاكِ مفيش منه فايدة يلا غوري.
- إنت بتحبها ياعبيط مش متعلق بيها.
_ فعلًا حبيتها.
_________________
_ دكتورة هو أنا كدا خلاص!
= خلاص ايه!
_ يعني خلاص مش هشوفك تاني! اصدي يعني خلصت علاجي!
= إنت سليم ومُعافى أساسا يا أحمد.
_ طب هنروح فين.
= هنروح كافيه في الزمالك هادي وجميل ورقيق وكمان فيه من التراث القديم.
_ بس عربيتك حلوة.
بخجل= شكرًا.... ووصلنا أهو.
- أجبلك مشرب حضرتك يافندم!
= آه ياعبدالرحمن واحد واحد لأستاذ أحمد.
- تمام.
_ ايه هو مشروبك!
= قهوة ايطالي وبفضّل جمبها طبق كوكيز.
_ دا كدا عظمة أوي، أنا يادكتورة مش عايز أخلص علاج على طول.
بخبث= ليه دا كل المرضى بيحتفلوا إما بيخلصوا علاج عندي.
_ بس أنا اتعلقت ب....
- الطلب يافندم.
=اتعلقت بإيه يا أحمد!
" للحظة شوفت دموع في عيونه بس هو رافض إنها تنزل، ملامحه اتغيرت فجأة وبدأ للأسف يبكي، قلبي وجعني عليه... أنا أول مرة قلبي يتحرك لمريض عندي، أول مرة أعيط مع حد وأول مرة قلبي يحب كدا، آه حبيته وكل شوية أفتح صوره في الملف عندي، شخص فيه كل شيء محتاجاه زي الحنية والغيرة ليه ماحبوش! أنا عارفة انه بيحبني عشان كدا جازفت بقلبي ليه"
بلهفة= مالك يا أحمد فيك ايه!
ببكاء كالطفل_ مفيش بس لازم أمشي دلوقت، سلام.
" مشي وأنا قاعدة مذهولة خالص من اللي حصل، أكيد في حاجة، حاولت أتصل بيه وبسالي أخته... احنا كدا كدا كنا على تواصل لقيت الموبايل مغلق طب أعمل ايه، علطول كنت أهوّن على اللي قدامي دلوقت مين يهوّن عليا! بدأت أعيط على أحمد وإن كدا مش هشوفه تاني لإنه كدا كدا خلّص، شربت قهوتي وحاسبت وركبت العرببة وسافرت اسكندرية أريح نفسيتي شوية"
__________________
_أنا تعبان يارجالة تعبان أوي.
- إنت بتعيط يا أحمد هو في راجل بيعيط!
_ حسوا بيا، أنا حبيت واحدة مستحيل تكون بتحبني، جيت اعترفلها حسيت إني ممكن أخسر صداقتها وإنها ممكن تفتكر إني بلعب عليها بس أنا حبيتها ومن كل قلبي أنا كنت عارفها من شهر وقربت منها من أسبوع ونص واتعلقت بيها وحبيتها جدًا ومش عارف أعمل ايه ساعدوني بالله عليكم.
- بص ياصاحبي، اتقدم في الحلال وشوف حظك.
- لأ ياعم بص، إنت اعملها جو حلو كدا في مكان هي بتحبه واعترفلها... وافقت تمام موافقتش افضل وراها لحد ما توافق، ياصاحبي الحب دا مش بيتباع ولا بيتشحت... الحب دا شعور نابع من جواك بيحسسك بالطمأنينة والدفء، تحس إنك بتملك الدنيا وما عليها، خليك متمسك بيها ياصاحبي واوعى تسيبها لإنك حبك حقيقي مش شهواني أو كدا، روحلها يلا.
_ تسلمولي يا رجالة، هجرب حظي كدا.
________________
" بعد أسبوع"
_ ياسالي، حاولي تتواصلي معاها أنا قلقان عليها.
- جاية النهاردة وهتنزل على الكافيه اللي بتحبه.
_ تمام انا رايح
- ربنا معاك ههه ورد أحمر ها!
_ اشطا، سلام يا شعنونتي.
______________
- يافندم في حد اكتشفنا موهبته في الغنا، ممكن نسمعهولك!.
= تمام بس بسرعة قبل ما القهوة تخلص عشان أول ما تخلص همشي.
بصوت عذب_ على حسب وداد قلبي يابويا راح أقول للزين سلامات... سلامات سلامات سلامات، على حسب وداد قلبي يابويا، ضيعت عليه العمر يابويا دَ أنا ليا معاه حكايات.
= أحمد!!!!
_ أيوا أحمد اللي كان خايف من الحب وآدي خوفه بيتحقق، أحمد اللي بيحبك واتعلق بيكِ وشاريكِ وبايع الكون بحاله، ممكن تتجوزيني!
بصدمة= بتهزر!، أنا هصلي استخارة الأول وأبلغ أهلي وأشوف بس أنا مطمنة يعني وكدا.
_ ههه ربنا يسهل ياحبيبي.
بخجل= طب هروح أصليها بقى، سلام.
" مش مصدقة نفسي، ربنا يقر عيني بيك ياحمد لإني فعلا مرتاحة ومطمنة وأنا بكون معاك"
_____________
_ ها طمنيني!
= موافقة أكيد، أنا كدا كدا كنت معجبة يعني وكدا وإنت بتتعالج عندي بس مشكلتي إني مش بحب أبوح بحبي لحد وكدا.
_ ياستي دا يوم الهنا والمُنى، بحبك.

"تمسـك بقلـبي فإنـه يُـحبك"
بقلم/ إســــراء بدوي|وَرد.