Boss Baby ဟမ်းစတားလေး ဝူယိ

chapter 69

“ကော လား..”

“ငါ့ကို မကြည့်နဲ့..”

ပိုင်မေ့ ထိတ်လန့်တကြား ခေါင်းအား လက်ဖြင့်ကာလိုက်သည်။ မည်သည့်နေရာတွင်မှ ပုန်းကွယ်မရနိုင်တော့သောကြောင့် မြေပြင်ပေါ်တွင် ထိုင်ချလိုက်သည်။ မာနကြီးပြီး ချောမောလှပသူတစ်ဦးမှာ ယခုအခါတွင် အားနည်းပြီး မိမိကိုယ်ကိုယ် နှိပ်စက်နေသည်ကို မြင်ရသောအခါ လောယွင်ဟိုင်၏ နှလုံးသားအား လက်ဖြင့် ဖျစ်ညှစ်ခံရသလို ခံစားမိသောကြောင့် သူသည်လည်း မြေပြင်ပေါ် ထိုင်ချလိုက်ပြီး ပိုင်မေ့အား လက်မောင်းများကြား ပွေ့ဖက်ထားလိုက်သည်။

“အဆင်ပြေတယ်နော်.. မကြောက်ပါနဲ့.. မငိုပါနဲ့ကွာ..”

အစ်ကိုဖြစ်သူ၏ အသွင်သဏ္ဌာန်အား မြင်သည့်အခါ ပိုင်ယွဲ့သည်လည်း ပြိုလဲကာ မျက်ရည်များ စီးကျလာသည်။ နျဲ့ရှောင်တို့ဘက်အား လှည့်ကြည့်ကာ ဆံပင်သပ်တင်လိုက်ပြီး‌နောက် တဆတ်ဆတ်တုန်နေသော နှုတ်ခမ်းများဖြင့် ပြောလေသည်။

“ဘာတွေလဲ.. ခင်ဗျားတို့ ကျွန်တော့် ကော ကို ကာကွယ်မပေးကြဘူးလား. ဘယ်လိုဖြစ်ပြီး ကျွန်တော့်‌ ကော က ဇွန်ဘီအဖြစ်နဲ့ ပြန်လာရတာလဲ.. အားးးးး”

ပိုင်ယွဲ့၏ စွပ်စွဲပြောဆိုသော စကားများနှင့် ရင်ဆိုင်ရသော်လည်း နျဲ့ရှောင်တို့အဖွဲ့မှာ နှလုံးသားထဲ ဝမ်းနည်းပူဆွေးမှုနှင့်သာ ပြည့်နေပြီး ပိုင်ယွဲ့၏ နားလည်မှုလွဲခြင်းအား မည်သူကမျှ ပြစ်တင်ပြောဆိုလိုခြင်း မရှိချေ။ မိမိချစ်ခင်နှစ်သက်သည့် တစ်ဦးတစ်ယောက်၏ ပြောင်းလဲမှုအား မြင်တွေ့ရပါက မည်သူမဆို ခံစားချက်မရှိဘဲ တည်ငြိမ်နေနိုင်မည် မဟုတ်ပေ။

ပိုင်ယွဲ့.. လောယွင်ဟိုင်အား တွန်းထုတ်လိုက်ပြီး ပိုင်မေ့၏ တုန်တုန်ယင်ယင် ခန္ဓာကိုယ်လေးအား ပွေ့ဖက်လိုက်သည်။ ချက်ချင်းဆိုသလို နွေးထွေးသော အဖြူရောင်အလင်းတစ်ခုသည် ပိုင်မေ့၏ ခန္ဓာကိုယ်အား လွှမ်းခြုံသွားပြီးနောက် ပိုင်ယွဲ့သည် သူ၏ ကုသစွမ်းရည်ဖြင့် ပိုင်မေ့အား ကုသနိုင်ရန် ကြိုးပမ်းနေခြင်း ဖြစ်သည်။ ပိုင်မေ့၏ မျက်နှာအား ရှားပါးရတနာတစ်ခုသဖွယ် တုန်ယင်နေသောလက်များဖြင့် အပြန်ပြန်အလှန်လှန် စစ်ဆေးနေသည်။