Boss Baby ဟမ်းစတားလေး ဝူယိ

chapter 62

Chapter 62
November 23, 2023

🐹အခန်း ၆၂

ဝူယိလေးနှင့် စစ်သူကြီး မော့ယန်

“ကော...”

ပိုင်မေ့ စိတ်ပိုင်းဆိုင်ရာ ပြင်ဆင်မှု မလုပ်ရသေးခင်မှာပင် ရုတ်တရက် ပြေးထွက်လာသော ပိုင်ယွဲ့သည် သူ့အား တင်းတင်းကြပ်ကြပ် ပွေ့ဖက်လာသည်။ ထို့နောက် သူ၏ လည်ပင်းမှာ တစ်ဖက်လူကြောင့် စိုစွတ်လာသည်ဟု ခံစားမိသည်။ အနည်းငယ်တုန်ယင်နေသော ခန္ဓာကိုယ်လေးကြောင့် ပိုင်မေ့သည် ညီငယ်လေးထံမှ အစစ်အမှန် ပျော်ရွှင်မှုနှင့် စိုးရိမ်ပူပန်မှုတို့အား ခံစားမိလာသဖြင့် နှလုံးသားထဲတွင် စိတ်ခံစားချက်တို့ မြင့်တက်လာရသည်။

သူ၏ မျက်လုံးအား အနည်းငယ် အောက်သို့ နှိမ့်လိုက်ပြီးနောက် ပိုင်မေ့သည် လက်တစ်ဖက်ဆန့်ကာ ပိုင်ယွဲ့၏ လည်ပင်းအား တိတ်တဆိတ် ညှစ်လိုက်သည်။ သူ၏ မျက်လုံးများ ထိန်းချုပ်မရနိုင်အောင် နီရဲလာပြီး ညီငယ်လေး၏ နာမည်ကိုသာ တဖွဖွ ခေါ်နေမိသည်။

အရပ်ပုသည်ဟု မဆိုသာသော ဉာဏ်ကြီးရှင် ကောင်ကလေးသည် အစ်ကိုကြီးဖြစ်သူ၏ ရင်ဘတ်တွင် ခေါင်းမှီထား၏။

ရက်ပေါင်းများစွာအတွင်း ပထမဆုံးအကြိမ်အဖြစ် ထိုသို့တွေ့လိုက်ရခြင်းကြောင့် ဝေ့ဟန်မင်နှင့် အခြားသူများ အနည်းငယ် အံ့အားသင့်သွားမိကြသည်။ ဤတစ်လျှောက်လုံးတွင် ပိုင်ယွဲ့သည် တောက်ပ ရွှင်လန်းကာ အားကိုးအားထားပြုနိုင်သော လူငယ်လေးတစ်ဦးဟူသည့် အမြင်ကိုသာ ပေးခဲ့လေသည်။ ငယ်ရွယ်သေးသော်ငြား ပတ်ဝန်းကျင်ရှိ လူများအား တက်တက်ကြွကြွ အားပေးဖေးမလေ့ရှိသည်။

ဉာဏ်ကြီးရှင်တစ်ဦး၏ ဉာဏ်ပညာနှင့် စွမ်းရည်အပြင် လူကြီးများထက် မနိမ့်လှသော တည်ငြိမ်မှုများနှင့် ကောင်လေးတစ်ဦး ဖြစ်နေသောကြောင့် အခြားသူများသည် ပိုင်ယွဲ့မှာ အသက် တစ်ဆယ့်ခြောက်နှစ် အရွယ်သာ ရှိနေသေးသော ဆယ်ကျော်သက်လေးတစ်ဦး ဖြစ်သည်ကို မေ့လျော့နေခဲ့ကြသည်။

ပိုင်ယွဲ့သည် ခေါင်းမော့ကာ ရဲရဲနီနေသော မျက်လုံးများဖြင့် ပိုင်မေ့အားကြည့်နေသည်မှာ သူ၏ အစ်ကိုကြီး ဟုတ်၊ မဟုတ် စစ်ဆေးနေသလိုပင်။ ညီငယ်လေး၏ ရိုးသားပြီး တောင့်တမှုအပြည့်ပါဝင်သော ရိုးရိုးရှင်းရှင်း မျက်ဝန်းတစ်စုံနှင့် အကြည့်ခံရချိန်တွင် ပိုင်မေ့သည် အမြဲတစေ ချုပ်တည်းထားခဲ့ရသော ကြောက်ရွံ့ထိတ်လန့်မှုများ ပေါ်ထွက်လာပြီး အကူအညီမဲ့သလို ခံစားလာမိသည်။