اسرار الماضي لبنت ناس(الجزء الثاني)

كشف المستور٤٢

بسم الله الرحمن الرحيم

اسرار الماضي لبنت ناس
بقلم رينا الهادي
الجزء الثاني الفصل الثاني والاربعون
كشف لمستور ٤٢

اتصل مصطفي بمحمد وذهب الية بعد أن يٱسا من العثور علي رضا وركبا عربة مصطفي كي يذهبا الي بيت رقية عل رضا ذهبت إليها أو ستاذهب إليها أو حتي تتصل برقية .
في نفس الوقت ذهبت عزيزة مسرعة لبيت أهل رضا وركبوا واتجهوا لبيت رقية .
فلاش باك flash back
عندما اتصلت نهر برقية وشرحت لها الخطة .
نهر : اسمعي آنة كويس أنا عرفت أبية علي كل الي حصل وحطينا خطة وابية بدأ بتنفيذها وبلغ حد من زمايلة الدكاترة وهيقنع والدة انة يودي رضا عندة في مستشفي حكومي بالمحلة وطبعا هيقنعة يوديها بالليل علشان مستشفيات الحكومة في العادة زحمة والليل ستار و ابلة رضا تكون هديت شوية , حضرتك مش هتروحي معاها منعا لوجع الدماغ منهم وكمان علشان ما ياخدوش اي احتياطات وحاولي تمنعي عزيزة تروح معاهم , في المستشفي الدكتور هيدي نقاب لرضا وجيب طويلة لما يروحوا الدكتور هياخدهم يعملوا الأوراق الاول قبل العملية وهيسب الممرضة مع رضا علشان يطمنهم وهياكد عليها متشبهاش قدامهم علشان يطمنوا ،بعد ما يمشوا بحاجة بسيطة رضا تعمل نفسها تعبانة وعاوزة تدخل الحمام لو الممرضة قالت تدخل حمام غرفة الدكتور رضا تقولها انها بترجع وممكن تبوظ الحمام وتقولها توديها الحمامات العامة في الدور علشان تقدر تلبس النقاب والجيب جوة وبسرعة وتخرج من الحمام تنزل تحت وتسأل عن قسم الطوارئ وتخرج من باب الطوارئ ،هتلاقي عربية هبعت مواصفاتها لما اتفق من حد من الي اعرفهم مضمون ومش هيكون في العربية بس سايب العربية مفتوحة هتدخل ورا وتحاول تنزل تحت كأنها صدفة علشان فية كاميرات للمستشفيات ممكن تاخد رقم العربية فتبان كأنها مش مقصودة لان صاحب العربية هيعمل نفسة بيتشتري سجائر أو اي حاجة ولما يلمح رضا دخلت هيروح ويشغل العربية ويمشي و يدني ليا رضا علي الطريق الزراعي في مكان يكون مفيش فية كاميرات .
رقية : افرضي ماعرفتيش تتفقي مع عربية أو اتفقتي وحصل اي ظرف للعربية أو حتي رضا ما ركزتش من التوتر وماعرفتش العربية هنعمل اية ؟
نهر : حضرتك هبعت لك برنامج علي الواتس تحملية علي موبايلك هيحدد ليا مكان الموبيل فين وهتدي رضا موبايلك وتخبية في لبسها واديها فلوس لو حصل اي مشكلة ومالقتش عربية تاخد اي تاكسي لاي مكان في المحلة بعيد عن المستشفي تقول عاوزة اروح عمر افندي صيدناوي مكان يكون زحمة يعني وانا هطلع علي المكان من تحديد الابلكيشن لمكانها واجيبها وطبعا مش محتاجة اقولك اشحني الموبيل كويس كهربا وهبعت لحضرتك رصيد علشان يشتغل نت كويس يحمل البرنامج ويفضل مع رضا, و قولي لها علي ايقونة الداتا علشان ما تافلش النت واعرف اوصل لها بسهولة وانت ماشية لو ما بعتوش عمر معاك اطلبي يبان معاك يوم علي ما اعصابك تهدي علشان يكون شاهد ان ماكنش فية تواصل بينك وبين أبلة رضا ولو أني علي يقين أن اكيد عزيزة ومصطفي هيبعتوة معاك .
رقية : ماشي يا حبيبتي بس أنا خائفة الي بنعملة دة صح خايفة في الاخر رضا تتضيع مننا وما تقدرش تكمل حمل وتروح فيها .
نهر : صح آنة ، أبية علي أكد أن حالات نجحت انها تعيش هي والبيبي وهو بنفسة هيتابعها من بعيد وهيجي يولدها كمان لما الامور تمشي ، ربنا ما بيقدرش حاجة عبث وربنا أراد يسعد قلبها بعد صبر كتير اهدي انت وحاولي تهديها وتفهميها المطلوب منها بكل دقة سلام أنا بقي لاني لازم ادخل أناقش المشروع وهاجي جري إن شاء الله .
رقية : لا الة الا الله حبيبتي ربنا يوفقك يا رب وما تزعليش علي الطير الي مات .
نهر : انا ربنا كرمني اليومين الي فاتوا من وفد تركي كويس قوي واخر حاجة بفكر فيها الفلوس , بس صعبان عليا الطير يموت كدة ,سلام آنة .
علي طريق زراعي بين طنطا والمحلة تقابلت نهر مع عربة بها رضا الخائفة من أن تجلس علي كرسي باستقامة فجلست وهي منخفضة الرأس حتي لا يراها احد رغم إنها تلبس النقاب وقف صاحب العربة مسعد عندما راي نهر أمام إحدي العربات الميكروباص .
مسعد : الأمانة بتاعك في العربية يا بنتي بس من وقت ما طلعت بها علي الطريق وهي ما بطلتش عياط إنت وخدها غصب عنها ولا إية ؟
جرت نهر وفتحت باب العربة لتقول : أبلة رضا قومي خلاص وبلاش تتعبي نفسك .
رضا ببكاء : معليش يا نهر علي فلوسك اللي ضيعتها والله كانوا إمبارح بخير .
نهر وهي تمسح عيون رضا : ولا يهمك يا أبلة أنا الحمد لله ربنا رازقني كويس اليومين دول أنا صعب عليا بس تعبك ومجهودك لاني متأكدة أن حد عمل في الطيور حاجة هو منة لله لكن أنا عارفة إنك ماقصرتيش والأهم من دة كلة إنك بخير بطلي بكا واهدي علشان عتريس ما يضرش إنت تعبانة من الصبح .
رضا : اللي قاهرني أن مفيش حد معاة مفتاح الطيور غيري انا واخويا يعني اخويا اللي مربياة وباقف ديما في ظهرة هو اللي يعمل فيا كدة و في نفس اليوم جوزي عاوز يسقطي بعد حتي ماعرف اني ما ينفعش احمل ثاني هو لية الناس اللي مني قاسية عليا قوي كدة والله أنا خدمتهم بعيوني وبنفس راضية أنا هموت من القهر ، حتي الوحدين اللي ساعدوني ضرتهم إنت خسرتي فلوسك وآبلة رقية الله اعلم هيعملوا فيها إية ؟
نهر : مش أخوك دة اللي عارفتيني علية مرة لما روحت معاك اشوف المكان وقابلناة كان بيان علية طيب ممكن يكون اضحك علية .
مسعد : لا حول ولا قوة الا بالله أهدي يا بنتي .
نهر : إتفضل يا عم مسعد فلوسك اللي إتفقنا عليها .
مسعد : لأ مش هاخد حاجة انت مش اجدع مني يا نهر وربنا يستر علي ولايانا أنا كنت هاخد علشان شغل بعملة بس كدة إنت بتنقذي ولية ولسة قدامك مصاريف انا كمان عاوز ثواب من ربنا (نظر لرضا ) متخافيش ربنا هواقف لك ولاد الحلال ما دام إنت ما بتعمليش غلط او حرام .
نهر : طب بقول إية  يا عم مسعد رضا شكل وشها اصفر ما تيجي معانا ناكل لقمة مع بعض علشان يكون عيش وملح يا راجل يا طيب وبرضو هتاخد فلوسك .
مسعد : والله ازعل منك هو انت شايفة نفسك ارجل مني ولا اية؟ تصدقي بأية اليوم الي بتركبي معايا فية بيبقي وشك حلو عليا وربنا بيرزقني من فضلة وانا اقول مال البت دي وشها سمح اتاري علشان جدعة وبميت راجل عموما انت عارفة رقمي لو عوزتي أي حاجة اتصلي بيا .
نهر : عمو انا مش عاوزاك تضر فلو حصل وعرفوا انك الي اخذت رضا من اي كاميرا فأنت هتقول انك مشيت بالعربية من غير ما تبص جواها وما تعرفش حاجة .
مسعد : ماشي بس هي لابسة نقاب هيعرفوا منين إنها هي الي ركبت ما تحمليش هم .
نهر بابتسامة: تشكر يا عمو بس مش هتنازل ناكل مع بعض لقمة وطمعانة في خدمة تانية منك .
مسعد : اؤمري .
نهر : عاوزة اطمن عليأامي وفي نفس الوقت ما ينفعش اخد أبلة رضا معايا ينفع تكون معاها علي ما اروح اطمن عليها وارجع ثاني .
مسعد : عندي فكرة احسن أختي جوزها مسافر وقاعدة في البيت مع عيالها تعالي ورايا تقعد عند اختي تطمني علي الست الوالدة وترجعي تاخديها من عندها .
نهر : تمام نروح بقي ناكل لقمة مع بعض الاول وعلشان خاطري وافق علشان يبقي عيش وملح .
مسعد ماشي .أكلوا وذهبوا لاخت مسعد واوصت نهر رضا أن تنام قليلا الي ان تاتي وأخذت منها تلفون رقية لتغطية لها وفي الطريق اتصلت بموبيل عمر.
نهر :ايوة يا عمر أنة فين ؟
عمر : كويس إنك اتصلتي بابا إتصل سألني عنها برضو وكان عصبي قوي وقال جاي في الطريق وببص من البلكونة لاقيت عمتي مع ناس تحت تقريبا مستنية بابا ويطلعوا , أعمل إية ؟ ماما قالت هتدخل تريح أصحيها ولا اعمل إية ؟
نهر : ما تخافش يا حبيبي أنا شوية وجاية أنا قربت أصلا لكن بابا ماقالش هو جاي لية؟ مش هو في المستشفي مع عم محمد و أبلة رضا ولا إية ؟
عمر : المفروض بس هو قال جاي مع عم محمد , انت عارفة هو مش بيقولي حاجة بس انا خايف المشاكل ترجع تاني مع ماما حاولي تيجي الله يخليك بسرعة .
نهر : طيب صحي أنة لو نايمة علشان ما تتخضش لما تلاقيهم فوق راسها وسلام وخالي باب الشقة مفتوح علشان الجيران يلحقوا أنة لو حصل حاجة.
أسرعت نهر لتلحقهم كانت تتوقع أن يذهب اليها مصطفي ومحمد وعزيزة ما يقلقها الان من هم الناس الموجودين مع عزيزة اسفل البناية.
بعد قليل كانت عزيزة تصعد مع اخواتها واهل رضا لتدق الباب ويفتح عمر بعد ان حاف ان يوقظ والدتة خوفا من ابية .
مصطفي : أمك نايمة لسة زي ما قولتلي ولا صحيت ؟
عمر : لا نايمة هدخل اصحيها .
رقية : وقد فتحت باب غرفتها ملاوش داعي يا عمر الي دق البا ب عمل دوشة وصحيت خير نظرت لهم باستفهام مين الناس دي وانتم هنا لية مش المفروض تكونوا في المستشفي( ثم ابتسمت بفرحة ) ولا غيرت رائيك يا ابو علي وهتسيب رضا تحتفظ بالجنين .
عزيزة : من غير لت وعجن كتير انت هتحلفي علي المصحف إنك ما تعرفيش ماكنها ولا ساعديها في الهرب لاني متاكدة إنك وار كل البلاوي دي .
رقية بهدوء : مش أفهم الأول مين اللي بتتكلمي عليها دة أنا حتي لسة قايمة من النوم ولو إني مكملتش نصف ساعة وراسي واجعني .
مصطفي : رضا يا رقية بنتكلم عن رضا .
رقية : هي هربت منكم والله برافو عليها لأ قوية وقدرت تتصرف وتحافظ علي ابنها بس يا رب ما يجراش لها حاجة وتقوم بالسلامة ويوقفلها ولاد الحلال يكون عندهم ضمير ودين ويحافظوا عليها قولوا أمين .
عزيزة بغل : تهرب من جوزها وتقولي يوقفلها ولاد الحلال اما انك بجحة انا معايا قران هتحلفي والا هنبلغ عنك ونقدم التحاليل والاشعة ونتهمك إنك قاصدة تموتيها .
رقية بسخرية : لا خوفت أنا قوي يا إسمك إية جايين بيتي وعاوزينبي أحلف علي المصحف وأحلف كدة علي طول ولا أتوضي الاول يعني علشان المس القران وأنا طاهرة ولو حلفت زور ربنا ينتقم مني ؟
مصطفي : إنت هتهزري مش باين عليك خايفة علي صاحبتك ودة بياكد انك ضبطيها صح .
رقية : أيوة مش خايفة علي صاحبتي لان مهما كان مش هتقع في ناس اسوء منكم انتم أهل رضا صح ( شاورت علي رجل وامراة وشاب صغير ) اب عمرة ما ضم بنتة ولا حامي عنها وزوجة أب شغلت بنت ضعيفة غلبانة ليها ولاولدها واكيد إنت اللي حطيت للطيور بتاع رضا اللي موتهم مع إنها وثقت فيك وتعبت وربتك اكثر من امك وانت يا ابو علي اخدت غرضك من الجوازة وحميت إبنك واعتديت عليها وعاوز تخلص وتقول كان اتفاقنا كدة, يا تري ممكن تروح لاوحش من كدة ناس طبعا لا ربنا مش هيسبها وأنا وبنتي هنلاقيها وهنحميها باذن الله .
دخلت نهر وهي تنهج من الجري علي السلم .
نهر : أنة انت كويسة ؟
مصطفي : أهلا أهلا كدة بانت الرؤية حبيبة أمها يبقي إنت الي روحتي المستشفي وقابلتي رضا في الحمامات صح يا بنت التمرجي .
لتهز نهر راسها بإستفهام لامها .
رقية : رضا هربت منهم قبل ما يعملوا لها العملية وجايين علشان يحلفوني علي المصحف إني ماسعدتهاش او اعرف مكانها .
نهر : بجد إية البجاحة دي لا ومن مين من واحدة بتعمل أعمال حتي لأقرب الناس ليها بتعرفي ربنا في أوقات غريبة صراحة .
عزيزة : غنوا وردوا علي بعض و إحنا مش هنتحرك خطوة إلا لما أمك تحلف ولما تحلف إحنا هنفضل لأن رضا ما تعرفش حد غيرها فأكيد هتيجي هنا .
رقية : وهي بقي غبية زيك علشان تيجي علي هنا وهي متاكدة إن دة أول مكان تدورا عليها فية , أأأأأة علشان كدة أخدت الفلوس اللي باعت بيها طير إمبارح معاها وهي خارجة , أصلها يا عيني أخدت الفلوس اللي المورد إدهالها إمبارح معاها الصبح وكانت ناوية تشتري النهاردة كتاكيت جديدة وعلف بس صدمتها لما لقيت الطيور ميتة ما خلهاش تصرف حاجة فأخذت فلوسها معاها غير تقريبا لابسة حلق وخاتم يا تري يا نهر دول يخلوها تأجر أي شقة في أي مكان قد إية ؟
نظر بعضهم لبعض وقال مصطفي : وإنت ما سألتهاش لية و اخدة فلوس معاها وهي رايحة عملية ؟
رقية : أسالها لية ؟ أختك قالت تقوم من العملية تروح لاهلها هترجع تاني عندكم إزاي تاخد فلوسها إنتم مش أمناء عليها هتكونوا أمناء علي فلوسها ؟
عزيزة وقد فاض بها وهمت بمسك يد رقية فعاجلتها نهر بقوة ووقفت أمامها : إيدك يا حلوة بدل وعزة جلال الله اقطعها لك وماليك عندي دية بتتهجمي علينا في بيتنا ؟
رقية وهي تزيح نهر برفق : عاوزة إية يا عزيزة ؟
عزيزة تيجي تتوضي ادامي علشا تحلفي علي المصحف ؟
رقية : موافقة بس بشرط صغير حاجة بسيط تعمليه ليا انت واخوك مصطفي ومش صعبة ولا هتتعبكم هناخد منكم دقايق بس .
عزيزة بغيظ : قولي عاوزة إية ولو نقدر نعملها هنعملها.
رقية : بالضبط زي الي طلبتوة مني إنت وأخوك مصطفي هتتوضوا وتحلفوا برضوا علي القرأن ( نظرت لمحمد ) مش كدة يبقي عدل برضو يا أبو علي .
محمد : عدل بس هما هيهربوا رضا لية ؟
رقية : مين قال إنهم هيحلفوا إنهم ساعدوا رضا مع إن دة مش بعيد عليهم علشان عارفين الحمل خطر عليها والتوتر فممكن يقتلوها بالبطء أصل إخواتك دول بدماغ أبالسة .
مصطفي بابتسامة مستفزة : عاوزة تحلفينا علي إية يا رقية وأحنا مستعديين .
رقية : مستعدة يا عزيزة ولعلمك هتحلفوا قبل مني, إنت عارف يا أبو علي كلمتي واحدة لكن هما ما اضمنش .
عزيزة بتفكير : ماشي عاوزنا نتوضي ونحلف علي إية ؟
رقية : تحلفي علي إنك ومصطفي ما عملتوش علي أبو علي لعبة علشان يجي البيت يوم السوق الكبير بدري وحاطتي لة منشطات علشان يغتصب رضا كنتي عارفة إن رضا يوم السوق بتتعب مع الطيور فهتيجي تاخد حمام وتاخد راحتها خاليتي مصطفي يجيب أبو علي وعطيتية منشط في العصير وخالتية يطلع لرضا علشان رضا تطلع من البيت ست ومش بس كدة إنت إتفقتي مع أهل رضا علشان تموتوا طيور رضا وتحسريها , زي ما هتحلفوا هحلف بس إنتم الأول .
بهت كل الموجودين حتي نهر التي فتحت فهها بقوة حتي كاد يصل للأرض وهي لا تصدق ما يحدث أمامها لحظات من الصمت يقطعة محمد : إنت بتقولي إية إنت واعية لكلامك ؟
رقية بقوة : واعية قوي قوي ومش رضا اللي أغرتك يا ابو علي وأنت عارف إنت عملت إية يومها وامتي ؟
عزيزة : عمل اللي أي زوج بيعملة مع مراتة حلالة .
رقية :هههااااة بجد ؟ مش مهم هتحلفوا ولا لأ ؟ أصل أنا بصراحة يا زوز ناوية إنك تتوضي وتحلفي علي القران علشان أما تتشلي إن شاء الله بسبب حلفان زور غير إنك سحرتي لناس قوم الناس ترتاح من شرك إنت وأخوك , يلا يا حلوة ندخل نتوضي .
مصطفي : مش هنتوضي ولا هنحلف و أعلي ما في خيلك اركبية ومش عاوزين زفتة اهي غارت في داهية وهتبقي زي امها تموت وهي بتولد .
سفقت رقية بمرح : أنا كدة إتفاجئت طلعت بتخاف ربنا يا درش وبالنسبة لحمامة السلام هتقوي قلبك وتحلفي ولا هتنسحبي .
نهر : فية حاجة كمان علشان الكل يبقي علي نور أنا حاطة كاميرا ضعيرة كدة عند الطيور حاجة digital بتسجل الي بيحصل وممكن من علي تلفوني اشوف الي عاوزاة والكاميرا سجلت ( واشارة الي الشاب) انت اللي حطيت للطيور حاجة هودي التسجيل للقسم وهيجوا يرفعوا البصمات ويعملوا تحليل وهتروح في داهية تاخدك علشان تبقي تخون اختك يا دكر و بدل ما تكون خريج كلية تبقي خريج الومان .
سعدية بسرعة : أنا إبني مالوش دعوة بحاجة عزيزة الي اداتني ازازة وقالت دي مقويات علشان الطير يكبر بسرعة حتي اسألي دكتور الصيدلية بتاع البهايم هي الي راحت لة وجابت القزازة من هناك وقالت لة علشان العرس والفيران .
اغمضت عزيزة عينها بصدمة وهي تقول : يخربيتك يا شيخة .
نهر : طالما عارفة جابتها منين وقالت إية ؟ يبقي عارفة إنة مش مقويات وكنتي قاصدة تأذي رضا إحنا نسيب الحكومة تحقق براحتها بقي ولا إية رائيك آنة ؟
رقية : اللي تشوفية يا حبيبتي دة مالك إنت وتعب رضا .
أبو رضا : يا أم نهر ما يرضيكيش إبني يروح في الرجلين هو فعلا كان فاكرها مقويات .
وقفت نهر امام الشاب وهي تنظر لعينية بقوة : اللي عارف كويس أمة وعزيزة بيكرهوا رضا قد إية و يسمح إن يضحك علية يستاهل أكتر من كدة ولا إية ؟
الشاب : صح, أنا حتي ما هنش عليا أفكر رغم إني عارف إن أبويا وأمي هيموتوا ويرجعوا رضا البيت .
نهر : ممكن ما ابلغش وخصوصا إنة مش هيرجع اللي راح .
أبو رضا : والله ما معنا حق الطيور .
نهر : لأ عاوزة أفهم لية عاوز تخرب بيت رضا وترجعها مكسورة هو إنت مش أبوها ؟ لية راضي بمرماطتها لية حتي مستكتر عليها تخلف لية مش واقف معاها ؟
أبو رضا : دة قدرها هي كبرت خلاص وقالوا الحمل هيكون تعب عليها وممكن تموت زي أمها وتسيب ليا عيل أصرف علية منين وأنا يدوب مكفي عيالي ، بلاش دي من ساعة ما مشيت من البيت لا عارف اكل لقمة حلوة لا انا ولا إخواتها مرات أخوها حامل ما ينفعش تتعب وسعدية كبرت مش حمل شغل وأخواتها البنات عندهم عيال وهيطلقوا لانهم مش قادرين علي شغل البيت لو جت هتشيل اخواتها زي زمان والبيت يتملي خير زي الاول اضحي بواحدة بدل ما اضحي بكلة .
نهر : تفكير غريب طب لية ما فكرتش تخلي بناتك يتحملوا مسئولية بيوتهم هي مش خدامة عند اخواتها الاضغر منها ومراتك ما كبرتش ولا حاجة هي طول عمرها مشغلاها بلقمتها في البيت وبرة عند اخواتها وانت برضو مشغلها في الغيط ما فكرتش انها بني ادمة من حقها تعيش زي اخواتها مراتك بتقسي عليها علشان مش بنتها إنت اية؟ ما بتصعبش عليك دي يتيمة وربنا قال فاما اليتم فلا تقهر والنبي قال انا وكافل اليتيم كهاتين وضمت السبابة والوسطي , لو عاوزها تخدم يبقي بالتراضي مش الإجبار إنت خاليت جوزها وأهله يبيعوا فيها ويشتروا علشان مش شايفين لها سند ( نظرت لاخو رضا ) ما تخليش حد يستغلك تاني وإن كنت مش هقدم بلاغ فدة علشان أبلة رضا إنت مش هتهون عليها تروح تفتح المكان عند الطيور وتتصرف فيهم للزبالة علشان بيوت الناس ما تبقاش ريحتها طالعة وأنا هتصل بيهم وافسخ عقد الإيجار تروح وتنظف المكان دة اقل حاجة تعملها علي عملتك السودة في حق اختك .
الشاب : أصحاب البيت بعد ما رضا تعبت جم البيت عندنا وقالوا ما نعرفش حد بيطلع ويدخل غيرك أنت واختك واختك تعبانة و إحنا عاوزين الشقة نضيفة ومش عاوزين اقرف فيها وقالولي لازم تنظف المكان , قالوا كدة وهم بيبصوا ليا بقرف كانهم متاكدين إني أنا الي موتت طيور اختي وانا روحت ونظفت المكان علشان أستاهل ومااثقش بعد كدة في حد تاني حتي لو أمي الي بتضحك عليا عادي وخلت منظري قدام البلد كلها الواد الجبان الي غدر باختة, انا كنت جاي معاهم علشان بس أطلب من رضا تسامحني أنا معرفتش قيمتها غير لما سابت لنا البيت ( إمتلات عيناة بدموع ) أكيد هتوصلي ليها قوليلها إني ما كنتش أعرف وإني غبي إني حطيت حاجة من غير ما اشورها .
رقية نظرت للجميع : أنا تعبانة اليوم كان طويل ومتعب إتفضلوا كلكم من غير مطرود ومش عاوزة أشوف وش حد فيكم كفاية كدة وجلست علي أقرب كرسي بإنهاك .
كادت أن تتكلم عزيزة ولكن محمد قال بصوت عالي : ولا كلمة يا عزيزة ولا نفس قدامي كلكم كاد يخرج الجميع لتهتف نهر : عمر خاليك مع أنة لاني هخرج كمان شوية ادور علي رضا ومش عارفة ممكن ارجع امتي وأنة تعبانة وما تفتحت لحد وانا كدة كدة هبلغ النقطة وهخلي حد يقفل بوابة العمارة من تحت .