عيونك شوكة في القلب توجعني وأعبرها//للكاتبة : أديم الراشد

37

.... 37 ....

عند اديم اللي كانت جالسه على مسلسلها المعتاد وفزت لما فتح الباب : سهااام اشبك فجعتيني
سهام سكرت الباب : اديم احتاج مساعدتك
اديم : وش فيك
سهام: جالي خاطب
اديم رجعت انسدحت : وش الجديد
سهام : وجع قومي اسمعيني
اديم : نفس السالفه تحوسين وبعدين ترفضين
سهام : انتي ما تعرفين مين
اديم :مين يعني
سهام: ابو عادل اللي امس جاء اللي زوجته متوفيه وعنده عيال
اديم صكتها فجعه مو طبيعيه صرخت وهي تقول :ايييش
سهام :اشبك فجعتيني
اديم :مين عيدي
سهام : ابو عادل
اديم لطمت خدها لما تذكرت فيصل وحست برجفه بعظامها
سهام : اديم وش فيك
اديم :هااه ولا شي بس ارفضيه
سهام :ليش
اديم : بس ارفضيه صاحيه تاخذين واحد شايب وعنده عيال
سهام: بس مو شايب هو اكبر مني ب ٦ سنين
اديم طق عقلها: حتى ولو عياله كل واحد بشنب
سهام: شدخلني في عياله
اديم : انتي سمعتي عمتهم كيف قالت شقيين
سهام :وانا وش ابي فيهم ما بربيهم وبعدين الحلو انهم كبار لا بيأذوني ولا بأذيهم
اديم :الا بيأذونك سهام ارفضيه
سهام : انتي انهبلتي وش فيك عرقتي تراني فتحت السالفه
اديم مسحت وجهها وهي تقول في نفسها ( عشانك ماتعرفين وش المصيبه اللي بنطيح فيها كلنا ) : انفجعت
سهام: مدري بقوم استخير واشوف
اديم سحبتها: من دون استخاره ارفضيه
سهام : اووف اديم وش فيك عادي بستخير وبعدين وش مخوفك لذا الدرجه
اديم :ولا شي عشانك
طلعت سهام وتركت اديم غرقانه بخوفها ورعبتها وهي تفكر وش ممكن يسوي فيصل بسهام والاهم كيف بتكون علاقتهم
٠
٠
مرت يومين لكن مو اي يومين كانت لها فارق التفكير من جميع النواحي فيصل اللي كان فيه ضيقه ولكن مايدري ليش ضايق وصار له يومين طايح بفراشه ولا له خلق احد وحنينه لامه زايد بشكل فضيع ولا يدري وش السبب لكن خمن انه من طول المده اللي هي بعيده عنه او بالاصح يحس بالغربه من فقدها ويحس انه لحاله رغم وجود ابوه واخوانه وهالاحساس ما تجسد الا هالفتره
اديم اللي كانت ملاحظه غياب فيصل ومع ذلك خايفه من ارتباط سهام بأبو عادل اللي مو بس بيسبب حزازيات احتمال كبير تصير كوارث وهي اكثر وحده سمعت من فيصل نفسه عن اللي سواه ومستعد يسويه عشان محد ياخذ مكانها وقلبها معورها حيل من احتمال بعد فيصل وتغيير نفسيته كانت نفسها تفركش هالزواج او تقول لفيصل يفركشه بس ما قدرت ما جتها الجرأه وتكلمت ولا بتقدر وخافت من غيابه اللي يحط احتمال انه عرف عن الخطبه
٠٠٠٠!
عادل كان شاغل تفكيره قصة ريمان ومصر الا يتزوجها ولو كلفه الامر اشياء كثير وينتظر ابوه يعطيه رد
٠٠
٠
سهام اللي كانت طول الفتره تستخير واخيرا قررت وتوجهت لابو مشاري وهي تعطيه الرد اللي كان مرضي وجميل بالنسبه لهم
ابو عادل كان مشغول باله على فيصل وبسالفة عادل واشياء كثير ومنها زواجه وكيف عياله بيتقبلونه وصله خبر عن الموافقه وفرح لكن خاف بنفس الوقت
٠٠
٠
منى اللي كانت فرحتها بالموافقه مو طبيعيه ولا صدقت واستانست حيل بس اللي كان منكد تعب فيصل اللي مجهول سببه
٠٠
٠
رائد اللي كان ما يطلع من عند فيصل ابدا الا اذا بينام او بيبدل ملابسه وكان يحاول يحاول قد مايقدر ما يدخل بيتهم اللي صار يغث والسبب مشاكل ابوه وريمان اللي انضم لها محمد بعد والكل تكاثر على ريمان اللي مرات يحسها مسكينه ومره ينكر تصرفاتها
٠٠

اما نسرين اللي تعبت وهي تنتظر عادل لكن مصره تنتظر وتنتظر وهي ما تركت دعوه ما دعتها ولا رجاء ما رجته ربي عشانه وهي تشوف فيه الزواج الحبيب
٠٠

في بيت ابو عادل وصلت من البيت وهي تشوف ابو عادل جالس بالصالون : طلال كيفك اليوم
ابو عادل : الحمدلله انتي كيفك
منى : بيني وبينك طايره من الفرحه بس أخذت حيلي فيصل كاسر خاطري وقلبي عليه نار
ابو عادل : ااااخ ليتني ادري وش علته
منى: انا بطلع اشوفه عنده احد
ابو عادل : لا رائد تو طلع
منى: زين انا طالعه
طلعت منى وقابلها عادل : عميمه وصلتي من زمان انتظرك ميت جوع
منى: زين ي حبيبي انزل وانا اشوف فيصل واجي نواف وين
عادل :عند فيصل
منى: زين انزل
كملت طريقها وتوجهت لغرفة فيصل فتحت الباب وشافت فيصل مسدوح ومغمض عيونه ونواف منسدح بجنبه وهو ضامه دخلت وقربت لفيصل وهي تحط يدها على جبينه: فيصل حبيبي
فيصل فتح عيونه بشويش : هممم
منى: تعبان ي حبيبي
فيصل رجع غمض : روحي تعبانه ي عميمه
منى : بسم لله عليك وش فيك ي حبيبي قولي ..

يتـــــــــــــــــبــع
يرجى التصويت للبارت💙