The Deal With A Demon King

Part 50

လွန်ခဲ့သောနှစ်တထောင်ကျော် သူချုပ်နှောင်ခံခဲ့ရတဲ့အချိန်အတောအတွင်းက တိဟွနှင့်ပိုင်ယင်းချွီတို့နှစ်ဦးကြားဖြစ်ပျက်ခဲ့သည့် ကိစ္စတွေကို သေချာရှင်းရှင်းလင်းလင်းမသိနိုင်သော်လည်း စစ်နတ်ဘုရားပိုင်ယင်းချွီသည် တိဟွအသက်အန္တာရာယ်ကြုံသည့်အချိန်တွင် ရောက်လာမည်ဖြစ်ပြီး ထိုနတ်ဘုရားနှင့် တိဟွတွေ့ဆုံကြသည့်အခါ တိဟွသည် အသ​က်ခံရမည်မဟုတ်သည်ကတော့ သေချာသည်။ ထိုအမှတ်အသားမျိုးက သူကိုယ်တိုင် ချီယွမ့်ကိုကိုက်ကာ အမှတ်အသားပြုခဲ့သည့် အရာမျိုးလိုပင်။

အမုန်းတို့ဖုံးအုပ်ထားသည့် အောက်ရှိတစ်လွှာသည် ချစ်မြတ်နိုးခြင်းတို့နှင့်သာ အမြစ်တွယ်နေသော အမှတ်အသားပင်ဖြစ်ရာ၏။

..........................................

" အဲ့တော့ မင်းက ဒီအတောအတွင်း ဘယ်တွေကိုပျောက်နေတာလဲ။ အဘိုးကြီးက တကယ်ပဲ မင်းကို ဘယ်တွေလွှတ်ထားတာတုန်း"

ချီယွမ်နှင့် တိဟွတို့နှစ်ဦးလုံး မိစ္ဆာတိုင်းပြည်ရှိ နန်းတော်၏ခပ်မြင့်မြင့် အဆောင်တစ်ခုပေါ်တွင် ထိုင်ကာ သေရည်သောက်ရင်း စကားစမြည်ပြောဖြစ်ကြသည်။ အပြာနှင့် အနီရောင် ရောယှက်ထားသော အခိုးအငွေ့အနည်းငယ်နှင့် ပတ်ဝန်းကျင်၏လှပမှုက ချီယွမ့်ကိုအမြဲလိုလို နှစ်သက်သဘောကျစေသည်။ သေချာပေါက်ကတော့ နျူး၏ခံစားချက်တွေကြောင့်လည်း ပါသလို သူကိုယ်တိုင်လည်း ဤနေရာကိုသဘောကျနှစ်သက်သည်။

ချီယွမ်၏အမေးကြောင့် တိဟွက ချီယွမ့်ကိုဘေးစောင်းကာ ကြည့်လိုက်ရင်း သေရည်ကို တကျိုက်မော့လိုက်သည်။

"ဒီအတိုင်း အရေးမကြီးတဲ့ကိစ္စတွေပါပဲ။ "

ချီယွမ်က တိဟွသူ့ကို အသိမပေးချင်မှန်းသိလိုက်တာမို့ စကားလမ်းကြောင်းလွှဲရန်ဆုံးဖြတ်လိုက်သည်။ တနည်းပြောရရင် တိဟွက မိစ္ဆာတိုင်းပြည်၏နေရာတနေရာတွင် တာဝန်ယူရသူဖြစ်ပြီး သူက ဒီအတိုင်း သာမန်လူတယောက်သာဖြစ်သည်မို့ တချို့သောမိစ္ဆာတိုင်းပြည်နှင့်သက်ဆိုင်သည့် လျို့ဝှက်ချက်များက သူ့ကိုအသိပေးရန် မသင့်တော်လောက်ချေ။