အမှိုက်ကောင်လေး၏ပျော်ရွှင်ဖွယ်ဘဝ/ အမွိုက္ေကာင္ေလး၏ေပ်ာ္႐ႊင္ဖြယ္ဘဝ

တောဝက်ကြီးများအားရောင်းရန် ဆိပ်ကမ်းမြို့သို့အလည်တစ်ခေါက်-3

တကယ်တမ်း ပိုင်လီရဲ့အမှားကမှန်ပါတယ်။ ဒါပေမယ့် ဒီလိုလယ်သမားတွေရဲ့ဘဝမှာ ပြေလည်ပါတယ်ဆိုတဲ့မိသားစုတွေတောင် သတို့သမီးတင်တောင်းကြေးက ငွေတစ်ချောင်းသာရှိပြီး အများဆုံးက ငွေငါးချောင်းမကျော်ပါဘူး။ ချမ်းသာတဲ့လူတစ်ယောက်ဆီရောင်းရင်တောင် ရှောင်ဟန်အတွက် ငွေချောင်းသုံးဆယ်အထက် ပိုသုံးချင်ကျမှာမဟုတ်ဘူး။ လဲ့ရှီက တမင်သပ်သပ်ပိုင်အိမ်ကိုငွေညှစ်ခဲ့တာသိသာပါတယ်။

ဒါပေမယ့် ဒီအမှုကရုံးတော်ကိုရောက်သွားရင် ပိုင်လီရဲ့ဘဝကရှုံးသွားတော့မှာဖြစ်လို့ ပိုင်အိမ်ကအသည်းနာနာနဲ့ ထုတ်ပေးရခဲ့ပြီး မော့ရှီက ဒီငွေမက်လွန်းတဲ့ လဲ့ရှီကိုမုန်းပါတယ်။

ဒီနေ့ လဲ့ရှီရောက်လာတာကလည်း ကောင်းတဲ့ကိစ္စမဖြစ်နိုင်ပါဘူး။

ထင်သည့်အတိုင်းပင် လဲ့ရှီက မျက်နှာပြောင်တိုက်စွာဖြင့်...

"အစ်မ တုရှီလည်းရောက်နေတာကိုး ကျွန်မကခမည်းခမက် မော့ရှီနဲ့စကားပြောဖို့လာခဲ့တာပါ မိသားစုကိစ္စဆိုတော့ နားထောင်ချင်ရင်တော့နားထောင်ပါလေ"

လဲ့ရှီဆိုလိုချင်တာက တုရှီက ရွာအကြီးကဲရဲ့ဇနီးမလို့ နှင်ထုတ်လို့မကောင်းပေမယ့် မိသားစုကိစ္စမို့ဝင်မပါသင့်ဘူးတဲ့။

လဲ့ရှီက ကျေးလက်သူဖြစ်ပေမယ့် အနည်းငယ်စာတတ်ပြီး ရှောင်အိမ်က လယ်မလုပ်တာဖြစ်လို့ ကြမ်းကြမ်းတမ်းတမ်းဖြစ်မနေဘူး။ အသက်ရွယ်တူ တုရှီနဲ့မော့ရှီတို့နဲ့ယှဥ်ရင် သူမက အတော်ငယ်တယ်လို့ထင်ရတယ်။ တကယ်တော့ သူတို့သုံးယောက်လုံးက ယောင်္ကျားကောင်းတွေနဲ့လက်ထပ်ခွင့် ရခဲ့တဲ့လူတွေချည်းပါပဲ။

ပိုင်ကျန်းကကြွယ်ဝပြီး ကျန်းရန်ကရွာအကြီးကဲဖြစ်တယ်။ ရှောင်လျို(ရှောဟန်၏အဖေ)ရဲ့အလုပ်ကလည်း ငွေရွှင်ပြီး ပင်ပန်းတာမျိုးမဟုတ်လေဘူး။

တုရှီကလည်း ဒီတော်တတ်သယောင်ဟန်ဆောင်တတ်တဲ့ ​မြေခွေးမကိုမုန်းတယ်ရယ်။ သူမက နှာခေါင်းရှုံ့လိုက်ပေမယ့် ဘာမှတော့ဝင်မပြောဘူး။

ထို့ကြောင့် လဲ့ရှီက...

"ဒီနေ့ သမက်ပိုင်က တောဝက်ကြီးနှစ်ကောင်ရခဲ့တယ်လို့ သတင်းကြားပေမယ့် သူ့ယောက္ခမအိမ်ကို လာမခေါ်ခဲ့ဘူး ခမည်းခမက် မော့ရှီ ဒါကဖြစ်သင့်တယ်လို့ရှင်ထင်လား"