အမှိုက်ကောင်လေး၏ပျော်ရွှင်ဖွယ်ဘဝ/ အမွိုက္ေကာင္ေလး၏ေပ်ာ္႐ႊင္ဖြယ္ဘဝ

တောဝက်ကြီးများအားရောင်းရန် ဆိပ်ကမ်းမြို့သို့အလည်တစ်ခေါက်-2

သူကဘယ်တုန်းမှ ဒီအိမ်မှာခြေမချဘူးဖူး။ ဒီတောဝက်တွေသတင်းသာမကြားရင် တစ်သက်လုံးဒီကိုလာဖို့စိတ်ကူးလည်းမရှိဘူး။ သူက ပိုင်မိသားစုအလွန်မျက်နှာလိုက်တဲ့ ပိုင်လီကိုမုန်းတယ်။

ကျိုးရှီကလည်း ထူးမခြားပါပဲ။ ဒါကသူရဲ့မတ်လေးပိုင်လီအိမ်ကို ရောက်ဖူးတာပထမဆုံးပဲ။ အိမ်က သူမထင်ထားတဲ့အတိုင်း အရမ်းမွဲနေတယ်။ ပိုင်မိသားစုအိမ်နဲ့ ဘယ်လိုမှယှဥ်လို့မရနိုင်ဘူး။ အဲဒီအချိန်မှာ ဒီချွေးမနှစ်ယောက်က သူတို့ကိုယ်သူတို့ အဆင့်တန်းမြင့်စွာနေရပြီး ပိုင်လီနဲ့သူ့မိသားစုက နိမ့်ကျတယ်လို့ ခံစားခဲ့ကျရသည်။

ပိုင်မိန်က သူတို့ဘေးကပါလာပြီး သူတို့ရဲ့မျက်နှာအမူရာတွေကိုမြင်တဲ့အခါ အလွန်စိတ်တိုသွား၏။ သူမရဲ့ဒုတိယအကိုက အခုတောဝက်ကြီးနှစ်ကောင်ပိုင်နေတာတောင် ဒင်းတို့ကအထင်သေးရဲတယ်ပေါ့လေ။

တုရှီနှင့်ပိုင်ရှီသည်လည်း တခြားလူများရောက်လာတော့ ပြောလက်စများကိုရပ်လိုက်ကျ၏။ ပိုင်လီရဲ့အကြောင်းက ဒီချွေးမတွေနဲ့မဆိုင်ပါဘူး။

ကျိုးရှီသည် အုတ်ကုတင်ပေါ်ဝင်ထိုင်လိုက်ပြီး သူမ၏စူနေသောဗိုက်ကိုမမြင်မှာစိုးသည့်အလား ဝမ်းဗိုက်ပေါ် လက်တင်ထားပြီး...

"အမေ အိမ်ရှေ့က တောဝက်ကြီးကတကယ်ကြီးပဲ တကယ်ပဲဒုတိယမတ်လေး အမဲလိုက်လို့ရတာဟုတ်ပါ့မလား"

ပိုင်အမေဘာမှမပြောရသေးခင်မှာပင် ပိုင်မိန်ကဒေါသတကြီးနှင့်ပြောလိုက်လေသည်။

"ပထမယောင်းမရဲ့စကားက ဘာအဓိပ္ပါယ်လဲ! ကျွန်မရဲ့ဒုတိယအကိုကမနေ့ကလည်း ရစ်ငှက်တွေအမဲလိုက်ရခဲ့လို့ ရှင်တောင်အတော်လေးစားခဲ့သေးတယ်မဟုတ်ဘူးလား!!"

ကျိုးရှီသည် ပိုင်မိန်၏စကားကြောင့် ရှက်ရွံသွားသော်လည်း သူမကအတော်အရေထူသဖြင့်မမှုပေ။

"ယောင်းမလေး အစ်မကမယုံကြည်နိုင်လို့ပါ တောဝက်ကရစ်ငှက်နဲ့မတူဘူးလေ ရစ်ငှက်ကတွေ့ရလွယ်ပေမယ့် တောဝက်ကအန္တာများတယ်မလား"

ပိုင်မိန်က လက်မခံနိုင်ပါ။ သူမက ကိုယ်ဝန်ရှိထဲကစောင်းကြွလာတဲ့ ဒီအမျိုးသမီးကို သည်းမခံနိုင်တော့ဘူး။