အမှိုက်ကောင်လေး၏ပျော်ရွှင်ဖွယ်ဘဝ/ အမွိုက္ေကာင္ေလး၏ေပ်ာ္႐ႊင္ဖြယ္ဘဝ

မုဆိုးကြီးနှင့်တောဝက်ကြီးနှစ်ကောင်-3

သူ့ရဲ့ခင်ပွန်းက တကယ်ပြောင်းလဲသွားတာများလား။ ထိုသို့ဆိုလျှင် သူသည် သူ့ခင်ပွန်းက ဤအတိုင်းပဲအမြဲပြောင်းလဲသွားဖို့ မျှော်လင့်မိပါသည်။

နောက်တစ်နေ့မနက် ပိုင်လီနိုးလာချိန်တွင် စောသေးသော်လည်း ကုတင်ပေါ်တွင် အသေးလေးများသာရှိတော့ပြီး ရှောင်ဟန်အားမတွေ့တော့ပေ။ သူသည် အဝတ်ဝတ်၍ အပြင်သို့ထွက်ကြည့်လိုက်သော် ရှောင်ဟန် ရေသယ်နေသည်အား တွေ့လိုက်ရ၏။

ရှောင်ဟန်၏အဖျားသည် အနည်းငယ်သက်သာရုံသာရှိပြီး မပျောက်သေးပေ။ သူ၏မျက်နှာသည် အဖျားကြောင့် နီရဲလျက်ရှိပြီး ဤရေသယ်မှုက နောက်ဆုံးဖြစ်ဟန်တူ၏။ ဒါဆို ရှောင်ဟန်ကဘယ်ချိန်ထဲကထနေတာလဲ။ ပိုင်လီခန့်မှန်းချက်အရဆိုလျှင် ယခုမှမနက်ခုနှစ်နာရီလောက်သာရှိလိမ့်ဦးမည်။ သူက အရင်ဘဝမှာလည်း ခုနှစ်နာရီဆိုတာနဲ့ နိုးစက်မလိုပဲထပြီး မနက်ပိုင်းပြေးခြင်းကို လုပ်လေ့ရှိသော​ကြောင့်ပင်။

သူသည် ရှောင်ဟန်အား မသယ်တော့နဲ့ဟူ၍ပြောချင်သော်လည်း အိမ်ရှိရေပုံးများက အပြည့်များဖြစ်နေပြီဖြစ်ကြောင်း သိလိုက်ရသော် မပြောတော့ပေ။ အရင်ရက်တွေက ရှောင်ဟန်နေမကောင်းဖြစ်နေပြီး ရေမသယ်နိုင်ခဲ့သလို မနေ့က သူသည်ချက်ပြုတ်ဖို့ရာအတွက် ကျန်ရှိရေမျအကုန်နီးပါးသုံးခဲ့သည်။ သူ့လို21ရာစုကလာတဲ့သူအတွက်တော့ သန့်ရှင်းမှုကဦးစားပေးဖြစ်လို့ ရေဖောဖောသုံးတာက သဘာဝပဲလေ။ ဒါပေမယ့် ဒါကရှောင်ဟန်ကို ဒုက္ခပေးမိသလိုဖြစ်သွားခဲ့သည်။

မဖြစ်ဘူး။ သိပ်မကြာခင် အိမ်မှာရေတွင်းတူးမှကိုဖြစ်မယ်။

သို့သော် ထိုအတွေးကို ထုတ်မပြောပဲ ရှောင်ဟန်အားပြောလိုက်သည်မှာ...

"အိမ်မှာဆန်နဲ့ ပြုတ်ထားတဲ့ရစ်ငှက်သားတချို့ကျန်သေးတယ် အသားဆန်ပြုတ်လုပ်ပြီး မင်းနဲ့ကလေးတွေစားလိုက် ငါတောင်ပေါ်သွားလိုက်ဦးမယ်"

ပိုင်လီ၏မျက်နှာကအမူယာက တည်ငြိမ်နေသော်လည်း သူ၏စကားသံများကမူ ပေါ့ပါးလှပေသည်။ ဒါက ရှောင်ဟန်မတွေ့ဖူးသည့် ပိုင်လီ၏ပုံစံဖြစ်ပြီး သူသည် တစ်ခုခုပြောချင်ခဲ့၏။ သူက အိမ်မှာရှိသည့်အရာများကိုမြင်ပြီးပြီးဖြစ်သော်လည်း ပိုင်လီ၏ခွင့်ပြုချက်မရပဲ မချက်ရဲခဲ့ခြင်းသာပင်။ အကယ်၍ ပိုင်လီက ဤသို့သူ့အားချက်ခွင့်ပေးမည်မှန်းသိခဲ့လျှင် သူနိုးထဲကချက်ထားမှာဖြစ်ပြီး ထိုသို့ဆိုလျှင် ပိုင်လီတောင်ပေါ်မသွားခင် တစ်ခုခုစားသွားနိုင်လိမ့်မှာပင်။
ရှောင်ဟန်သည် ကျောလွယ်ခြင်းတောင်းနှင့် လေးနှင့်မြှားအားလွယ်လျက် ပေါ့ပါးသွက်လက်သောခြေလှမ်းများဖြင့် ထွက်ခွာသွားသော ပိုင်လီ၏နောက်ကျောအား အချိန်ကြာကြီး ကြည့်နေခဲ့လေသည်။ ပိုင်လီသူ့မြင်ကွင်းထဲမှပျောက်သွားတာတောင်မှ ထိုအရပ်သို့လှမ်းကြည့်နေစဲ...။