العذراء والذئب

البارت السادس

اسفة تاخرت عليكم جان عدنا ضيوف

كوُن مَافاتح رسَالة
ولا قبلَت بيوم ظرفك
كَوُن أرَد ذاك ﭑلغريب ﭑلمايعرفَك

#خمائل ال شمر

سراب:  هلو شلونج عيني
شيماء:  هلة حبيبتي ام مهدي بخير تفضلي
سراب:  بزيد فضلج

ام حسين:  حي الله من جانة شلونج يمة
سراب:  هلة يمة بخير وانتي شلونج
ام حسين:  اني هم الحمدلله رجلج شلونج عيالج شلونهم
سراب: والله زينين حبيبتي شيماء عذريني ماجيت عليج من جبتي بيت عيالي خبصة جانت توفة عمة لرجلي وسوو فاتحه النسوان بيتنة وخبصة وكلت بعدين اجيج شنو جبتي ولد لو بنية

شيماء:  سراب شسولفلج جبت بنية وصارلي اسبوع زعلانه يم اهلي اليوم يلا رجعت

سراب:  ليش شصار احجي

شيماء: كعدت سولفتلها على كلشي سراب كلش حنينه مثل امها سولفتلها على عفاف شسوت بقت تحجي عليها ورادت تكوم تكتلها وماخليتها كتلها عوفيها تبقة جاهل الله يهديها انتي سولفيلي عنج شكو ماكو
سراب:  والله كتلج صارت الفاتحه يمنة وجناينهم بس يتامرن عليه شكلج3 ايام شفت الويل من ورهن بس اني مارد عليهن شيحجن شيسون مارد الله موجود

شيماء:  الله كريم همزين جيتي اليوم امج سوتلنه دولمة تلوك لهل حلك

سراب: الله شكد مشتاقة لدولمة امي صدك وين بنتج
شيماء:  نامت وديتهة بفراشها اروح اجيبها

صعدت وسمعت سراب تحجي وية امها تكلها ديري بالج عليها خطية وذيج عفاف وكفيها عد حدها شنو مالها رداد ندري هي زغيرة ومدللة مو لهل درجه سمعتهن هيج يحجن وكلبي ارتاح اكو احد وياي وما ضالمني دخلت للغرفة اخذت جميلة ونزلت
هاي جميلة
سراب:  اووي فدوة شكد حلوة عبالك ملاك صدك جميلة
كامت وخلتلها فلوس بالكماط مالتها ماقبلت كتلها جيتج كافية بس هي كالت اني عمتها قابل غريبة جيبيلها بيهن شي بوستها وعافتها بحضنها صار وكت اذان راحت صاحت جهالها من درب عدها 3 ولد وكحين عباس واسامة وقتيبة كمنة صلينة اني وجاي اصلي واسمع صوت جهال يصيحون خالو حسين جا وهو يبوس بيهم ويلعب وياهم هو يحب الولد ميحب البنات ويحب يلعب وياهم من شفتة يلعب وياهم وعايف بنتة عيوني دمعت صلينة وكملنة
ام حسين: يلا خلي نجهز العشة سراب كعدي اختج من نوم لا صلاة ولا دراسة بس نوم مخلصتها كعديها حتة تتعشة

كمنا اني وعمتي جهزنة العشة واجن سراب وعفاف كدنا كلنة ناكل حسين مخلي عباس بحضنة وقتيبة يم امة ومهدي كاعد يم حسين اباوع عليه شلون يوكل عباس يكلة اكل اريدك تصير، بطل مهدي وقتيبة يكلولة احنه ابطال لان ناكل مهدي يكلة خالو شوف صار عندي عضلات ويطلع ايدة وهو ضعيف هههههه خلانه نضحك اكلنة وكملنة شلت المواعين وديتهن للمطبخ وصبيتلهم جاي ورجعت اغسل المواعيين
كملتهن غسل اجت عفاف جابت الستكانات وشمرتهن يمي وكالت لتضلين تحركين باختي عليه اكبر واحد ميهمني وضحكت باستهزاء وراحت
كلت ياربي صبرني عليها على فكرة عفاف صف سادس اعدادي صارلها 3 سنين بي متنجح اجوهة نصيبين وحسين ما قبل كال مو خوش ناس وبعد محد اجاهة كل يوم ادعي يجي نصيب ليرضي حسين حتة تزوج واخلص منها غسلت الاستكانات وطلعت كعدت يمهم لكيت عمتي جاي تكمط جميلة وتلولي بيها سراب كاعدة وكالتلي تعالي يمي نسولف عفاف كامت من يمنة راحت لغرفتها كالت راح اكعد ارسم تحب الرسم وهي رسمها حلو عمتي كالتلها اكعدي اقري كتبج احسن من الرسم تأفأفت وراحت للغرفة حسين كاللها يمة لضغطين عليها اذا متريد تدرس خلي تبطل
ام حسين:  شفايتلي لا هي عايفة دراسة ومساعدتنا بالبيت ولا هي قارية دروسها عذبتني هل بنية

كعدنا نسولف اني وسراب هي تحجي على حياتها واني احجي على حياتي صارت ساعة 10 تقريب اجة رجلها عليها اخذها حسين طلع وياهم واني صعدت بغرفتي عمتي هم تعبت ونامت خليت جميلة بفراشها ونمت حسيت على طكطكة مالت الجرباية حسين اجة ونام كبل دار ظهرة علية واني هم تعبانة بقيت ادعي حتة الله يهدي

اللهم لا طاقة لي بالجهد ولا قوة لي على البلاء فلا  تحرمنى العافية والرزق ولا تكلني إلى خلقك بل تفرد لى بحاجتي وتولني برحمتك فإنك إن وكلتني إلى نفسى عجزت عنها وإن وكلتنى إلى خلقك ظلموني وحرموني وقهروني ومنوا علي ، فبفضلك يا الله أغننى وابسط لي واكفني وخلصني من حسدهم وحقدهم واجعل رضاي فيما يرد على منك وبارك لى فيما رزقتني وفيما خولتني واجعلنى في كل حالاتي محفوظ مجار واقض عني كل ما عليا لك في وجه من وجوه طاعتك أو لخلقك فأنت تعلم عظم ضعفي وكثرة ذنوبي وضعف بدني وقوتي وغفلتي فأدي ما لهم علي عندي يا عظيم فإنك واسع كريم رحيم لطيف 🤎

لحد ما تعبت ونمت
..... يتبع