" كيف ما احبك وانتي كل ما تشوفه عيوني "

2

ما ظهرت اي رده فعل لأن هاذي عاده رغد تنام اذا شبعت من الاكل
طلعت ليان جوال رغد من مخباها ( جيبها ) لأن رغد اعطته لليان يوم كانو ياكلون
وحطت الجوال عند راس رغد و راحت لسريرها
واخذت جوالها و دخلت الواتس بس شافت ان محادثتها هي وموضي انفتحت قبل مده قصيره
خافت ليان ان رغد شافتها وجلست على سريرها تناظر رغد بقلق
ليان كانت متأكده ان رغد فهمت غلط ان ليان كانت بتغصب رغد تروح الديره وبس قعدت تفكر كيف بتعلم رغد ان رساله ليان كانت كذبه بس عشان ماتسوي موضي شي ما يعجب رغد ولا يعجب ليان
بس ما طولت تفكر ونامت بدون ما تحس

صحت على صوت ام هادي تقومها تصلي الفجر
وراحت توضت و قومت ليان تصلي
بس ليان ما صحت ابدا ولا حتى تحركت
راحت رغد لأم هادي
رغد : خاله ليان ماقامت
ام هادي : ليش؟
رغد : مدري اهزها اناديها ما ترد
ام هادي : خلاص روحي صلي وانا بروح اقومها
رغد : طيب
راحت رغد وفرشت السجاده و بدت تصلي
بعد ما سلمت رن جوالها وكان المتصل مسلط
فتحت رغد الخط : هلا فيك شي
مسلط : لا بس حبيت اتطمن عليك
رغد : اخخ ادري انكم ما تقدرون تعيشون بدوني بالذات انت يا اخ سلطان
عصب مسلط وندم انه اتصل عليها : يا شيخه الشرهه علي انا الي دقيت اتطمن عليك
رغد : امزح يا ولد لا تشدها وصلتو الديره ولا للحين
مسلط : اي وصلنا والله لا يوريك العزايم و الذبايح لنا حنا
رغد : الله يكون بعونكم
مسلط : ليه
رغد : بنصرع من هروج الشيبان
مسلط : اي والله
رغد : امي و ابوي صاحين ولا لا
مسلط : كلهم نايمين الا نوره صاحيه
رغد : اعطني اياها بكلمها
راح مسلط وعطا الجوال نوره
نوره : الو؟
رغد: ليه نسيتوني ما عطيتوني خبر انكم وصلتو الله يهديكم
نوره : شذا الحب المفاجئ للديره خابرتس ما تحبينها
رغد : اي ما احبها بس اشتقت لفوفو
نوره : قصدتس الهنوف؟
رغد : اي الهنوف بس وش فيك تتكلمين بالسين ؟
نوره : عماتي حلفو ان ما تكلمت بالسين انهم بيتبرون مني
رغد : وجع مو لذي الدرجه؟!!
نوره : عاد وش اسوي لهم ذا تفكيرهم الخايس
رغد : صدقتي
نوره : ما اطول عليتس سلميلي على ام هادي و ليان
رغد : ابشري
قفلت رغد الخط وراحت للغرفه وشافت ليان تصلي
سكتت رغد واخذت ملابسها وراحت
للحمام ( عزكم الله ) تتروش
طلعت من الحمام ( عزكم الله ) وجففت شعرها وربطته
وراحت للمطبخ تسوي فطور
شافها ابو هادي وراح يساعدها
ابو هادي : ماذا تفعلين
رغد : اني اصنع الفطور
ما توقع ابو هادي انها بترد عليه بالفصحى وضحك : حسبتك مانك هارجه فيها
رغد : تبيني اخرب وناستك
ابو هادي : وناست وش
رغد : وراك شي مخبيه عن خالتي صح؟
ابو هادي بصدمه : يويلي كيف عرفتي لا يكون هي بعد عارفه
رغد : لا لا معليك محد يعرف الا انا وليان
ابو هادي : يانعنبو ذي الليان
كملت رغد الفطور وجلست تسولف مع ابو هادي

ملاحظه : رغد اخت ليان من الرضاعه لأن ابو هادي وابو فهد اصدقاء من زمان ونفس الشي مع ام هادي و ام فهد فأم هادي رضعت رغد وصارت اخت ليان من الرضاعه فابو هادي وام هادي يعتبرون اهلها و ما تتغطى عنهم