واقعة العشق المؤلمة 🦋 زهرة الفردوس

🦋 الفصل الخامس 🦋

" قصدك ايه يا صابر بيه .. موضوع ايه " قالها سيف وهو يصب كافة تركيزه علي حديث صابر الذي شعر بالقلق لوهلة..

تحدث صابر قائلا : زينة بنتي من كام يوم جابتلي ملف فيه اسامي لمرضي في المستشفي هنا .. المرضي دول كانوا داخلين المستشفى يعملوا مثلا عمليات بسيطة يعني مش بتحتاج وقت طويل .. بس المشكله مش في كده ..

صمت صابر لبرهه ليقول سيف له : كمل يا استاذ صابر .. ايه المشكلة بالظبط..

تابع صابر قائلا : المشكله ان زينة لاحظت ان اعداد المرضي المتوفيين الفترة اللي فاتت في المستشفي زادت يعني ممكن يكون فيه حالات وفاة ودا أكيد حاجه طبيعية بس بيكونوا بمعدل قليل ..
انا اقنعتها ان ممكن يكون الناس اللي بيتوفوا ممكن يكونوا كبار في السن او ممكن يكون مرضهم كان خطير.. وبالتالي مستحملوش العملية ...

بس انا كان عندي شك تاني لأن الموضوع دا لما درسته في خلال اليومين اللي فاتوا لاحظت انه بيتكرر كل شهر واكتر من مرة ..

صمت لبرهه ثم رفع نظره الي سيف وادهم وتحدث قائلا : انا شاكك انه ممكن يكون تجارة اعضاء .....

انصدم سيف وادهم مما قاله وعلي الفور حولوا نظرهم لبعضهما ليكمل صابر :

_ كل حاجه وصلت لها بتوحي بكده بس انا مكنتش مقتنع في البداية لكن انا لما درست الملفات دي حسيت ان فيه حاجه غريبة .. انا دورت علي ملفات لمرضي كانوا موجودين قبل كده في المستشفي بس لقيت اني بعد ما يعملوا عملية بسيطة بيختفوا .. او ممكن مثلا يخرجوا من غير اذن الدكتور المعالج ليهم او ممكن اهلهم ميعرفوش طريقهم بعد كده....

تحدث سيف قائلا : طب وحضرتك ازاي اتأكدت انه ممكن يكون تجارة اعضاء او شكيت ازاي

تنهد صابر وهو يكمل : اخر مريض حصل فيه الموضوع ده كان قبل شهر .. انا قدرت اوصل لاهله من خلاص المعلومات اللي جمعتها .. بس كل اللي اهله قالوه انهم ناس علي قد حالهم ووالدة الشخص دا كانت محتاجه نقل كلية .. وراحوا المستشفي فعلا والعملية تمت ... بس اللي اكتشفته بعد كده ان العضو اللي ابن الست دي كان هيتبرع بيه ليها فعلا مش موجود ف جسمها بمعني تاني متنقلش لجسمها ببساطة الست اتحطت تحت تأثير المخدر وحصل لها جرح مكان العملية بس استغربت ان الجرحودا مش جرح عملية او بمعني تاني الوجع مكنش زي اي وجع لعملية نقل عضو

واسترسل قائلا : لما جمعت معلومات من الست دي اكتشفت ان ابنها من يوم العملية وهو مش موجود .. بعدها بأسبوعين اتبعت جواب ليها باسم ابنها واللي كان فيه ان هو سافر وسابها ومش هيرجع ..

نظر لسيف ومن ثم اكمل : انا كل اللي بقوله دا بناء علي توقعاتي وتحليلاتي بس .. انما انا معنديش اي دليل او شيء يثبت كلامي .. بس برده اتمني ان الموضوع ميكنش كده ... الدكتور اللي كان مسئول عن العملية دي اختفي بعدها وحاولت اوصله بس مفيش اي اثر له...