The Deal With A Demon King

Part 35

တိုင်ကိုမှီလျက် သစ်သားဘောင်တလျောက်တွင်ခြေကိုဆင်းကာ တခဏလောက် အိပ်ရေးဝဝအိပ်နိုင်ဖို့ ကြိုးစားတော့သည်။ မျက်ဝန်းတို့မှိတ်လိုက်သည်နှင့် အတွေးတို့က စတင်နှောက်ယှက်နေတာမို့ ချီယွမ်သက်ပြင်းတချက်ချမိသည်။

“ ဟူးးး…ဘာလို့လဲ…”

မျက်ဝန်းတွေကို ပြန်ဖွင့်ကြည့်မိတော့ သူမြင်ရသည့်မြင်ကွင်းတိုင်းက သူနှင့်ရင်းနှီးကျွမ်းဝင်မှုရှိစွာ အံဝင်ခွင်ကျရှိနေကြသည်။ ငါးနှစ်၊ ခြောက်နှစ်နီးပါးလောက် ဒီနေရာမှာ အချိန်ကုန်ခဲ့တာပဲ။ ဒီနေရာထက် သူ့ကိုပိုလို့ သက်တောင့်သက်သာရှိနေစေမဲ့ နေရာဆိုတာ မရှိနိုင်ဖူးချေ။ ယခုတော့ ဘာကမှားလို့မှားနေမှန်း သူမသိတော့။

ချီယွမ် သူ၏ဘယ်ဘက်ရင်အုံကို လက်ဖြင့်ဖိကပ်လိုက်ရင်း ထိုနေရာအား ငုံ့ကာကြည့်သည်။

“ မတူတော့တဲ့အရာက မင်းထင်တယ်။ မင်းခံစားချက်ကိုသိတာမလို့….ငါ့ကို ခဏလောက်ပေးနားပါလား”

ချီယွမ်သည် သူ၏နှလုံးသားနေရာအား နှစ်ချက် သုံးချက်ခန့် ပုတ်လိုက်ပြီးနောက် သူ၏မျက်ဝန်းများးကို ပြန်မှိတ်ထားလိုက်တော့သည်။

……………………

ခေါင်မိုးအထက်ရှိ အချို့သောမိုးယိုပေါက်များကြောင့် တစွန်းတစ ထိုးထွက်နေတဲ့အလင်းရောင်အနည်းငယ်မှလွဲ၍ ဇရပ်ပျက်သည် နေ့လည်ဘက်တွင်ပါ နေရောင်သိပ်မရပဲ မှောင်မဲလျက်ရှိသည်။ ချီယွမ် စရောက်သည့်နေ့ကတည်းက အိပ်ပျော်သွားခဲ့တာ သုံးလေးရက်လောက်တော့ရှိနေပြီလို့ သူ့ကိုယ်သူထင်မိသည်။ သေချာအိပ်ပျော်သည့်အချိန်ကတော့ ရှားပါးသလောက် သူ၏အိမ်မက်ဆိုးများတွင် သူငယ်စဉ်က အသတ်ခံခဲ့ရသည့် သူ့မိဘများ၏ငိုကြွေးသံများနှင့်အတူ ၎င်းတို့သေဆုံးခဲ့သည့် ဖြစ်စဉ်များကိုမြင်မက်နေခဲ့မိသည်။ ချီယွမ်သည် အနှီအိမ်မက်ထဲတွင်ပင် ယွင်းရန်ကိုလက်စားချေနိုင်စွမ်းမရှိပါချေ။ သူ၏စိတ်ဆန္ဒတို့သည် ထိုလူအားမြင်ရသည်နှင့် ဆက်တိုက်အရှုံးတို့ကိုသာ ခံစားရမိစေသည်။ အိမ်မက်တိုင်း၏အဆုံးသတ်သည် ယွင်းရန်က သူ့နှလုံးသားကိုဖောက်ထုတ်ကာ သူ့အားသတ်ပစ်လိုက်သည့် ဖြစ်ရပ်မျိုးနှင့်ပင်အဆုံးသတ်သည်။ သူသည် ဉီးနှောက်မှပေးပို့သည့် မိမိ၏မိဘများကိုသတ်သည့်တရားခံအားမုန်းတီးကာ လက်စားချေရန်ဟူသော အကြံညာဏ်နှင့် နှလုံးသားမှပေးပို့လာသော ထိုလူအားမြတ်နိုးမိသည့်ချစ်စိတ်တို့က သူ့ကိုယ်ထဲတွင်ချွန်ထက်သည့် ဓားနှစ်ချောင်းကဲ့သို့ အချင်းချင်းတိုက်ခိုက်နေကြသည်။ အလွန်ခံရခက်လှပါ၏။