بقايا شغف

ف

-اكوم اولي لبيتي احسن ما ابتلي بيج هسه
-على شنو تبتلي بيه شتسويلي تضربني ؟؟؟ اضرب ..وكفت مقابيله احاول استميله بجسمي اللي ظاهر منه هوايه وعيونه فعلا استقرت عليه تأمل تفاصيلي بحسرة وبعدها بساع
-فرحه اني مو غبي تره بالج عن دربي مو ناقصج هسه وحق الله

-موتريدني انت ؟؟
-اي وهاي هسه كمتي تنطين عندج لعبة اني لو شايفتني شنو
-معد لا تخليها تتزوج والله شتريد اصير الك بس امنع زواج بنتي مثل ما تكدر تمشي كلمتك كل مره ليش من وصلت لفرحه تكول ما اكدر

-ابويه مسؤول عنها وهو ولي امرها واليشوفه هو الصح ما راح يذب بنتج بالشارع تره

ابتعد عني ديطلع واني عيطت وراه
-جبان !!
اندار عليه فاتح عيونه باستغراب ورجع الي ..شكلتي ؟؟
خفت منه واجيت اتهرب منه رجعت امشي للكنتور مستعجلة اريد اطلع هدوم اليه ما احس غير باب الكنتور انشالت من مكانها ووكعت مخبل مدري شسوالها اني ختلت ويه الزاوية وهو يريد يوصلني غمضت وخليت ايدي على وجهي احميه منه بس ما وصلني ولاطخني صاير مو مخبل مثل قبل  ..فتحت عيني لكيته عاض ايده بقوة متحلف عليه ..اندكت باب الغرفة فتحها بعد ما سمعني كلمتين كانت مسرة ... خايفة مستفسرة عيونها مدمعه
مسرة:اسفة عمو والله بس صوتكم واصل بره والله ميصير يسمعون صوتكم عفيه كافي اني بطلت

هدأ وحضنها لصدره وباس راسها
-يابه ماكو شي ومعليج بينا مشاكلنا ما تنتهي اني وهاي ..اشر عليه يشمر بايده وطلع عافنا اني وبنتي

مسرة:ليش هيج تسوين
فرحه:شمسويه صوجي خايفة عليج لا تضيعين حياتج عبالج العرس بدلة وحلقة وزفة

مسرة:وعمو شعليه ماما هي هاي جزاتها عمي صار سنين حاير بينا اني ما عرفت اب غيره ولا شفت ابويه كل هالسنين واني عايشة بخيره هو وجدو ما قصروا ولا وياج قصر بشي هسه تريدين مشاكل وتريدين منه يوكف بقسمتي زين مو انت عشتي حياة جبر وظلم تكولين تريديني اعيش نفسها ؟؟

-والله عاد عيشي بجبر ولا عيشة فگر
-هسه منو يكول تصير وهلكد عرضة بيها اصلا اني بطلت
-جذابة باجر اذا اجا توافقين
-ماما ليش هالحرب هسه انت عرفتيه لو شفتيه ليش كارهته
-وما اريد لا اشوفه ولا يشوفني عساه لا اجا
-براحتج

تركتني وطلعت واني كعدت الم بغرفتي واحجي على معد لان كسر الباب ...ثاني يوم من الصبح اجا يصلحها لا اني احجي وياه ولا هو ومسرة ويانا تلملم بالغراض هم ما احجي وياها هي هم وبس ادردم عالغرفة ما تحمل بالاخير نطق

-مو هاي صلحتها الج مو كافي عاد تدرمين عليه
-شيفيد التصليح الغرفة انعدمت بابها توطوط من وراك شوفوها وط ..ووووط .. احرك بالباب واقلد الصوت مسرة تباوعلي وتصد وادري بيها السفيهة تضحك عليه واني ميته قهر على غرفتي احبها هو اشتراها اليه من عقدنا محكمة عود صار رجلي وجابلي اثاث