بقايا شغف

علاقات اخرى

دعاء:
تحملت ودايسة على مشاعري وساكتة خانسة انتظر زواجه اكثر من الكل حتى اكثر منه يمكن ....يوميه ادعي ربي يبرد گلبي ويغسله اسمع عنه منا ومنا اخباره حتى السطح عفته وفلشت الجلسة المسويتها بس اتبع اخباره  ....بوقتها كنت اتجنب شوفته نهائي لا ارجع احن وخاصة احنا بعملية ضيو كلش تصافينا ...الاطفال اللي جنت ادرسهم من بيتهم

كلهم بطلتهم وهو اصلا لان التهيت بعملية ضيو ما عاد الي وقت وواهس فاعتذرت من اهلهم اللي ضلوا يستفسرون ليش بطلت جهالهم ما كلت لاحد اني اريد ارجع لشغلي وكلت هم منها اقطع علاقتي بالكرايب كلهم هي بس مسرة ورايحه تتزوج هالايام ....

ابويه اخذني لبيت استاذ زاهد وابنه حتى نتفق وارجع وياهم....  من شافوني خطيه هوايه رحبوا بيه وتحمدوا بسلامتي وعاتبني ليش بطلت من يمهم ورحت لذولاك وتأذيت منهم اكلتني هاي الملامة صدك شكد جنت مرتاحه بس من رفضت ابنه استحيت بعد اضل يمهم اني وما جنت مرتاحه ...

انطوني موعد دوامي واتفقنا على التفاصيل وحتى الراتب انطوني من اول يوم انحسب ..اولاد استاذ زاهد كلهم خوش ناس  وهو حقاني حيل كلهم ماخذين نفس الشهادات والنهج والعمل عائلة كانت مناسبة حيل بس بعد الروح وما تهوى

برجعتنا شفت بابا ساكت وباله مو يمي ولا اصلا مركز واني احجي وياه مديت ايدي وكمشت لحيته اتلمسها من صغري اسوي هالحركه من ما ينتبه الي اعرف بي ضايج ...التفت وكبل ابتسم لو هموم بكد الجبال على ضهره من اسوي هيج يتغير ...

لو بيدي اشيل عنه كل هم بس مدا يطلع بايدي اسوي شي والدنيا عكست بينا حيل ما كدرت اسال لان اكيد الاجابات واضحه

رجعنا للبيت ضياء بيومها مصخن وكلنا شايلين همه وضايجين هو الطبيب يكول عادي بس احنا نخاف حيل عليه وكلنا منتبهين لصحته ونداريه حوراء عكب ذاك التذمر من شغل البيت وتتعاجز جانت هسه النهار كله بالمطبخ تطبخ النا صح طبخها مو طيب بس دتتعلم وشايله عن ماما وهم وراها دراستها تحتاج وقت ....

من فتنا جانت تغسل بالطرمة بابا فات عالبيت هي تباوع عليه بقهر واني وكفت يمها اسولف الها شصار لان سألتني
-اي ان شاء الله اداوم من بداية اسبوع اليجي وانطاني راتبي واليوم عازمتكم

-مبروك
-بس مبروك يمعودة اكولج عزيمة
-ما اريد اطلع اني ابقى هنا
باوعت بوجهها عيونها دامعات سألتها
-شبيج صاير شي ضيو بي شي
-لا
-لعد شبيج
-ماكو عفيه دعاء لا تلحين مثل كل مره عوفيني ذبت الصوندة والماسحه من ايدها وراحت واني مستغربة شبيها هاي
انتبهت بينها وبين بابا مشحونة الاجواء ويكعدون وحدهم وتسولف وياه ومن نجي احنا تسكت !!

مر يومين واني مكيفة تحضرت للدوام من الصبح واريد اطلع لكيت عمي الصغير كامش بابا ويحجي معصب وياه وبابا يهز براسه ساكت سمعت طراطيش من الحجي مجيد والفلوس وجدو ساري بس ما ركزت ولا ااهتميت هو اصلا عمي يساعد بابا بالتسديد وحاير وياه حيل خطيه اكثر عمامي بعد مجيد ساعدنا وهو ومجيد شكد اصدقاء بس ما يريد يضل اله دين على بابا انتظرتهم يخلصون كلامهم