بقايا شغف

رفض قاطع

دعاء :
بعد اللقاء بمجيد ما عاد يهمني اشوفه لو نتقابل احس شويه برد گلبي من تعاركنا وتعاتبنا ولو ما وصلت لحل وياه بس ما عاد اكو عندي هاجس الخوف نفسه بالليل من دنرجع ابويه كال لجدو ساري راح نبقى اكثر حتى نكمل اجراءات الطلاك وطلب منه هو يحضر ويجيب مجيد وياه بالمحكمة وجدو جان موافق ومساند ابويه عدا اعتراضات منا ومناك اخوانه يريدون الصلح وجدو ساري اصلا ما انطاهم اذن ولا سمع وخاصة عمو معد هوايه لح عليهم لحد ما زعل وسكت

اني ماخذه اجازتي يومين بس ما اكدر اتغيب اكثر واصلا اني قبلها تغيبت ... حجيت ويه ابويه ترزلت يكول خل نخلص زين هي مستقبلتنا عطلة نهاية الاسبوع والمحكمة ماكو يعني هاي هم يوم طار بعد وراها ومن كلام مجيد ماكو مجال ما اظن يقنع بهاليومين ويروح يطلك

رجعنا لبيوت عمامي ملتمين وهذيج التعاليل الحلوة وجمعة عمامي وبناتهم صح اصغر مني بالعمر بس بيهن المخطوبة وبيهن اللي تزوجت جديد والبنات الصغار من عمر متوسطة وهي صاعدة كلنا التمينا عالواهس بحديقة بيت عمي الصغير ونلعب بات المحيبس وعياطنا رج الدنيا عمي احمد يرزل بينا ولا يفيد من يطلع المحبس كلها تكمز وفد عيطة بات على واهس ضحكنا التموا الكبار وصرنا فريقين والشباب انطبكوا كلهم بفريق واحد ونسه ما بعدها ونسه يمكن احلى عيد مرني مدري لان هو صدك الاحلى مدري لان كومه انحرمنا من لمتهم

بهاي الهوسة موبايلي يدك وارفضه رقم غريب موتني كل شويه يدك بالاخير مشيت شويه عن اهلنا ورديت اجاني صوته
-شنو هالضحكة القرج ...
-حرام نضحك !
-كومي فوتي للبيت ولي نامي
-وانت شعليك بيه
-والقرأن ابتلي بيج اذا عاندتيني ...فوتي جوة
-منين شفتني انت وشمدريك
-ولج النفس اللي تتنفسيه دير بالج منه تره مشاركج اني بي...تكومين لا تخليني اجي واتخزى واخزيج والله وانت تعرفيني
-وشتريد هسه
-ولد عمج
-تره كلهم صغار اصغر مني صدك تحجي انت طول عمري بنصهم
-انعل ابوج لابو كل ك....منكم عمامج الك....يردون اطلكج ويزوجوج لفلان انعل ابو خيرهم خل يصبرون على مجيد
-لاتسب
-انعل حتى اصلج
-والله عليك وعالخلفوك
بجيت وارجف وره البيت وحدي
-باجر اشوفج شسوي بيكم كومي ولي جوه انطمي اذا المح خيالج وياه الا ا.......اثنينكم ما اطلك وخل جبيركم ينطح صغيركم وانت ما ترحين بعد منا افتهمتي ما تولين لاربيل لا اهجم الدنيا على راس ابوج

يعيط باذني كل قوته

-تره ما الك كلمة عليه بعد وانت مطلكني عوفني شتريد مني اتطلك اهج اتزوج اموت شلك عليه بعد كسرت فرحتي وكسرتني مطلكه عروس يا مجيد هذا وعدك؟وهو هذا الحب تره انت ندمتني على ساعة انولدت بيها وفيت بوعدك وتهديدك

هو سكت ويتنهد بقوة ورجع حاجاني بغير اسلوب
-ليش ما ترجعين ونسد السوالف طلاك ما اطلك تره ابوج يحجي بكيفه اني احبج

-يا حب هذا تريد ترجع ...ذاك ابوي منك اله بعد اني شنو ورأي شنو تدري ابويه خيرني بينك وبينه ولو توكع وصله من السما ما اكسره وانت تعرف هالشي
-ابوج حاسم امر ويريدج ل...