بقايا شغف

في ما بعد....

بارت للسهرانين متابعيني اللي اني قصرت وياهم
وللبعض
واني اريد مقابله غش من انا العذباء اكبرها لو كافي 😏

ما لقَلْبي كلّما هبّتْ صَبا
عادَهُ عيدٌ منَ الشّوْقِ جَديدْ
كانَ في اللّوْحِ لهُ مكْتَتَبا
قوْلُهُ إنّ عَذابي لَشديدْ
جلَبَ الهمَّ لهُ والوَصَبا
فهْوَ للأشْجانِ في جُهْدٍ جَهيدْ

مسرة:
مرت ايام
كاعدة ببيتي وساده الباب كامشة كتابي عود اقرا ولا كلمة كاعد تفوت بدماغي من وره المشاكل الصارت وشطت وصخنت من التفكير اللي اكل گلبي من تزوجت لهسه ما تهنيت بين غيرة وتفكير وحرگة اعصاب حتى حملي ما تهنيت بي واحسه صار ثكيل عليه وكمت افكر شلون وشسوي لو زياد صدك تزوج مشاكل اني وياه دائما صرت اتجنب احجي وياه او الاصح ما احب وما اريد اتخيله بكل لحظه ممكن يكول الي اتزوجها شوطة بروحي وقهر رغم هو من يوم الصارت ملازم البيت ومكابلني ويطمن بيه بس جيب اليسكت دماغي ....

وكفت لحيلي جسمي يرجف البارحة واليوم تعاركنا عركه قوية واعصابي تلف مشيت خطوات حسيت بطني كطعتني كعدت ابجي دا اكذب نفسي واكول ما بيه شي ...فات للمكان من شافني مقرفصة وابجي كام يحجي اكثر ويغلط وطبعا ولا كأن هذا زياد اللي عرفته واللي حبيته كومني غصب جانت مغربية وداني لطبيبة يعرفها سوينا سونار والحمد لله ماكو شي بس تقلصات يمكن بسبب وضعي ..رجعني ااطريق كله يرزل ويحجي عليه وكلمة زعطوطة ما تنزل من لسانه من تزوجني ما جنت زعطوطة! اطباعي هاي ما بيه اغيرها بيوم وليلة

دخلنا لبيتنا وهو اندار يم امه شكد مغثوثة وضايجة الكل يكولون اله تزوجها عدا عبير ما تأيدهم وحسيته حتى هو غير رأيه عن اول ايام وصار يميل للفكرة ....

بين هالايام وعددها اللي ما اتذكره امي ودعاء وبيبي ما تركوني يتصلون بيه ويصبروني وكلهن ينصحن بيه اكسب ود زوجي ومحبته واحافظ عليه بس وين واني كمت انفره ولا كأن بينا حب ومودة وزواجنا جان مثالي لحد هالمشكلة ما اعرف شبيه مثل واحد وانسدت نفسه وهو هم ابد ما ساعدني اتخطى الازمة بالعكس اشوفه يبتعد ويختار جانب عائلته ومصلحتهم .....

مثنية رجليه وابجي فات هو يستغفر ربه ويركع بوب الكنتور ويحجي عليه وعلى فهاوتي بالشغل ملابسه وصخات ويوصف روحه بالجرب من يوم تزوجني عنده دوام واني ولا قميص غاسلة ما الي خلك اي شي ريحة ملابسه ما تطيقها نفسي ولا هو ولا اريد اسويله شي يريحه ابد وبنفس الوقت من يبادلني المثل اتخبل واتعارك وياه

اخذهن وطلع لبيت اهله وبات هناك يمهم ولد اخوه يبجون على امهم ويروح هو يسكتهم ويه اخواته

..يوم ثاني وتركت بيتي وطلعت لاهلي من دوامي كبل اتصل مهبوط لان ما خبرته بس ما حاجاني تمنيته يعاركني والكي حجة ولحكني لهناك بدون اي نقاش

صاحت امي عليه كالت رجلج بره جنت نايمه نومه كلش عميقة ومن كعدت جن ضاربيني توثية بنهاية راسي مواني وجع يمكن قلة الاكل والحمل ومنا البجي   ...وكفت امشي بملل طلعت لكيته بالصالة يمه عمو مجيد وعمو معد والظاهر صار هوايه هو هنا من صواني التقديم واحاديثهم سلمت ورد بس منشغل بحديث ويه عمامي عن المشاكل ...عمو مجيد يستفسر منه عن اهل مروة ومعلوماتهم كلت انلاصت راح يروح يخطبها وضحكت بنفسي هو بيا حال واني وين افكر وجهه متغير ملامحه واطباعه وكل شي بي سودة عليه ابد مو عمو الاعرفه اكثر واحد متأذي من كل شي طلع خسران والكل مستغرب اطباعه من تزوج لهسه مو مجيد القديم ووره طلاكه تغير بالزايد