بقايا شغف

حب ولكن

دعاء
بقيت ايام على ذمة التحقيق ما اعرف اليصير ويه الباقين بس الاعرفه مجيد وياي بكل لحظة ابد ما ترك المكان هوايه جنت اشوفه من يجيب الي اكلي وعاملوني غير شكل لحد ما طلعت بس شنو من طلعت احس توني انولدت من فرحتي ... اللي فهمته بيت جدو دافعين مبلغ جبير يطلعوني منها ...طلعنا من باب المركز عمامي بره ومجيد كامش ايدي من كثر فرحتي حتى ما منتبهة اله او الاكثر كان امتناني لموقفه وهو صار اله ايام مكابلني شغله سمح اله يكدر يبقى يمي

بعد هاليوم كمت اخاف من ظلي واستمرت القضية والتحقيق اشهر مو على كد هالايام اعترافات وادلة وكومه مصايب طلعت واني بكل شغلة اصفن لو ضاله اكثر وين اوصل وياهم مراد كان خطر على كل حياتي واني ما استشعرت خطره يمكن انعمت عيني لان مجيد كان بالسالفة وهو موقفه من اول ضد شغلي وبهالوقت يلا عرفت صدقه وكلامه عنهم وحتى لاهلي شكد راد يخليهم يبطلوني ما كدر واني اصلا ما انطيت مجال حتى اسمع منه

اول ما طلعنا للبيت وصلت هناك لكيت اهلنا كلهم ملتمين وبيت جدو ذابحين وعازمين لسلامة بابا وطلعتي ....طبيت بنص هالجمع وبديت اسلم بوست عمامي بالسره وجدو واكفين يمه عمو معد واخوه عمو محمد بوستهم وباخير السرة وصلت مجيد تعديته وبوست اخوه الواكف يمه

بس راشد وعمار ما بوستهم بصفتهم شباب من عمري حتى الاصغر مني هم اللي صافحته واللي باسني شكد كنت ممتنة لوكفتهم وياي وشكد تشكرت منهم حتى ابويه وعمامي ما جان كدروا يطلعوني لو ما جدو يحشد كل اولاده واقاربه ومعارفه للقضية.وعمو معد وعمو محمد متشايلين ويه ابويه القضية كلها  ...

كعدنا شويه تغدينا والبنات التهوا بالغدا اني كعدت بين جدو ابو معد وبيبيتي ما قبلوا اكوم ابد وياهم وجدو فرحان حيل واخيرا عمو معد وعمه فرحة متفقين راح يبنون بيت داخل سور كاعهم وتتحول تسكن بي بس يكمله   ....مسرة سكتت وحسيتها ابد ما فرحانة حتى طلعت وتبعوها راشد وحوراء

اني اريد اروح وراهم بالممر الوسطي انجريت بوحشية
-اريد احجي وياج تعاي
-شنو شبيك
-من هاليوم اي طلعة اي شغل ماكو اخاف تروحين هناك لبيتكم لو يجي ببالج
-وين اطلع مثلا ...اشرت لايدي اللي قابض عليها بكفه.... ممكن تفك ايدي اذيتني
حلها واني كمشتها لصدري اذاني فركتها من يم العكس وهو عينه على حركتي بس كلامه سم
-شعندج تبوسين الكل...اشر براسه قاصد سلامي عليهم
-منو عمامي؟؟
-عمامج  همه لو اخواني ؟؟
-عمو معد وعمو محمد
-مو عمامج تره وعيب وحرام تبوسيهم
فتحت عيوني على وسعها مستغربة اني دائما ابوسهم وين ما اشوفهم اصلا عمو ابو راشد من اطفال معتبريه العم الفعلي
-اصدقاء بابا ومن عمره وعمامي اشوفهم عيب اصلا عليه ما اسلم
-اني اخوهم هم جان بستيني عالواهس لعد اني كلت عالسلام لو طريقة سلامج حرام وعيب ..كالها معصب تقرب خفت منه والله هم يريد ابوسه امدايه!!.....كمل كلامه ينتر