بقايا شغف

صدمة!!

دعاء:
ركض مجيد لبس ملابسه واخذ المفاتيح وطلع يركض واني وراه بوجهي على عمه فرحه ما لكيتها بالبيت الجبير ونسوان عمو معد يريدن يكتلنها يدورون عليها ماكو فص ملح وذاب مدري وين راحت بلحظة الحادثة مختفية بس حوراء تكول مو بوعيها...طلعت ام راشد للبيت الجديد كسرت الباب وفاتن نفشوا بيتها ماكو

بقينا مصدومين يعني شنو وين راحت تضربه وتنهزم بعد هالعمر !!وكلنا دنشوفهم شكد واحد حاب الثاني اجا بابا وخوالي وبيبي يمنا يسالون بينا محد يعرف وينها بابا هيج باستفسار كال اخاف راحت لبيتها القديم ...ركضنا الكل لهناك لان هو فارغ وغراضه كلهن حولتهن للبيت الجديد واللي ما ينفعها باعته والبيت فارغ ومقفول
.....

وصلنا لهناك نحاول نفتح الابواب مقفلة وسكتة ماكو اي صوت مرن ساعتين والقلق حاف الكل والخوف الاكبر من عمو ابو راشد اذا ضاعت فرحته وما لكاها معناها البيت ينهجم سنين وسنين صابر عليها ...اني كمت ابجي خايفة على عمه وعلى سمعتها

دخلت السيارة مالت مجيد وكلنا وكفنا نتلكاهم حتى نسوانه انخلسن جدو ساري رزلهن يريدون يأذوها يموتوها ومدري شنو يهددن العكارب ....نزل من السيارة وجهه دباغ اصفر وتعبان نازف هوايه طعنات بكتفه زين ما واصله لقلبه وطعنه ثانيه بايده عرضية صادها بزنده والاخيرة شامره السجينة عليه جايه برجله جرح خفيف ...محققين وياه الشرطة كايل الهم عركه وما يعرف اللي ضربه وطالع على مسؤوليته..

التمينا عليه كلنا نشافي اله وكلنا بوقتها كارهين فعل عمة فرحة ذاك وحتى جان خلصت عليه ومتأكدين الكل من جنونها الرسمي ثبت هي مريضة وتحتاج علاج اقوى  ...والحظ هو اول ما يسال وكوه يحجي وين فرحة جدتي جاوبته بعصبية
-يا يمه هاي شمسويه بيك كسر بيدها ان شاء الله
معد:وينها هي؟؟
يباوع بوجوهنا يدورها حجت ام راشد
-انهزمت العايقة بس كون الله يعثيني بيها اذا ما اصلخها

صاح بيها رغم كوه واكف
-فكري بس تطخيها ...وينها شسويتوا بيها احد اذاها
جدو ساري تقرب يمه وسنده
-تعال بويه مدد مو زين عليك وين تروح بهالبيوت ما تكدر تطلع منا
مجيد:قابل وين تروح وهي متيهة اول وتالي

التفت عليه عمو معد وخزره سكت ودنك وصاح بولده يدوروها والكل يكول دورناها ما يقنتع ....ما قبل يفوت على البيت الجبير وراح لبيتها القديم ما لكاها وهاي كلنا وياه نمشي وابويه وعمامي طشوا ببيوتهم يدوروها بالاخير هو تعب وكعد بحديقة البيت الجبير وكعد يمه جدو يواسي بي عاف جرحه ويون عليها ويلوم بنفسه على ماكو سبب لان هو ما بيده شي هي عمه فرحة واح مرضها النفسي وصل مراحل متقدمة

.... واحنا مختبصين وااجهال ولا يمهم ديلعبون طردوهم من يمنا همه وهوستهم ....شويه صاح ابن مشتاق من يم المخازن شايفها والكل ركضوا يمه المخازن تصير بجانب الكراج بيها عدد ومكاين وشغلات خاصة للبستان والكاع ....وصلنا هناك عمه فرحه مقرفصة ونايمة عالكاع بثوب خفيف مو ساتر جسمها .. بس شافوها الكل رجع اني وماما ركضنا نستر بيها وعمو معد ويانا حست علينا كامت تبجي وتهذي كتلته لمعد اني كتلته وتلطم على راسها ....كمشها وضمها قوي من الكل من عيونهم وكلامهم اللي كله عبارة عن تهديد وترهيب ...اني ابجي عليها وعلى ما وصلت اله التفتت اشوف شي يستر ..ركضت جبت ساران الاخضر مالت الزرع لفاها عمو معد وكعد يمها هي استوعبت هو هذا اللي يمها انهارت تبجي وتبرر اله وهو اصلا ما عنده اي رد فعل ضدها نفس المكان اللي يكولون جان يحبسها بي لگاها خاتله بي منه واول شخص امنت من شافته هو وهدأت كاعدة وراه محتمية بي من اهلنا!!