بقايا شغف

انتحار

دعاء:
وكفت امشط بشعري على طول ضهري حده كملت تمشيط اباوع الكاع وايدي والمشط كلهن شعر انقهرت عليه راح يخلص من التفكير والقهر ..

لميته وشربكته وشايلته بكف ايدي اتمثله واحس حالتي النفسية على شفى انهيار وكاضيتها مناحه لشوكت اضل من وراه بهالعذاب اني؟...

طلعت من الغرفة لكيت حوراء وماما ديلفن كبة اني ما الي واهس بشغل اابيت بس لان عطلتي واتهزم من الضوجة والتفكير كعدت وياهن الف بالكبة ....ديسولفن بتفاصيل الجهاز والعرس اللي تأجل مره اخرى والحمد لله عمو معد كال الهم ياجلون هو ملتهي بعمة فرحة ومرضها اللي لهسه محد ديعرف شنو سببه بس انهيار عصبي حاد واسقاط وهوايه امور صارت الها رغم هي جانت وحدها بالبيت ولاكيها واكعه بغرفتها ولان هي عدها سوابق كالوا احتمال تبعات حالها القديم نفسه ...ابويه مشغول عليها وعمامي كلهم مثله خطية عمه ما تستاهل هيج اذية بحياتها

وكفت كلت لامي رايحه يم عمه وطلعت اگلب بموبايلي وامشي لابسه شال امي حياكة فوك اكتافي... بيجامتي لان شويه ضيقة ونص ردان بيت عمة فرحه بصفنا ونادرا ما اصادف احد ...وصلت لحديقتهم لكيت مجيد واخوانه واكفين ميثاق واثنين اولاد عمو محمد ...صديت اريد ارجع لان استحيت من ملابسي بس شعدهم جايين بعدني توني فتت الركن مالت الحديقة لحك بيه
-تعااااي
انداريت اله عيونه جاحظات والله يخوفن هاي اني وين جان عقلي من حبيته
-عبالي ماكو احد
-ليش هيج جايه ما تكولين احد شافج وين حجابج يولي
-دنيا مغرب وبعدين هاي مو لابسه الكبوس.. اني ما ادري بيكم هنا ..شعدكم هنايه كلكم
-يكون ناخذ اذن منج ست نجي لاخونا اذا هو مرابط يمكم حتى لبيته ما يفوت وشغله عايفه والدنيا احتركت وهو ولا يمه حاير بعمتج
-فدوة لعمره عمو معد ...كلتها بهيام زاد ضوجة الواكف كدامي
-اي هم لو فايد الاهتمام بزيادة بيجن
-لا تشملني بالحجي اني شكو
عقجت وجهي مو راضية
-يولي اشو لا حال المخطوبين ولا يمهم راشد مو امج تعزمه شنو اني ربي وحد
-استغفر الله !! تره عزمته جان جايب غراض وجلبوا بي عالعشا ما عازمين احد وهاي ثاني مره تحجيها
-واني محد يتذكرني بعشا ...زين اني اعزمج مو لازم انت تعاي نطلع نتصخم
ماجاوبته صاده بصفحة ما الي واهس اسولف وياه
-راح تضلين گالبة خلقتج عليمن شمسويلج اني
-وتسأل والله اتعجب عليك
-يولي لو ما هالفترة ومرض عمتج جان هسه انت ببيتي تريدين بهذا حالنا نتزوج
-وانت تريد اتصافى وياك مجيد؟؟
-مو لازم يطبج مرض يولي ليكون عبالج راح اموت

سكتت وصديت عنه واستفزه فعلي جرني من ايدي عليه وكام يغلط ويسب بكل شي جمعنا من يوم انولدت لهاليوم وختمها يهدد بيه نتزوج ويعرف شلون يتصرف وياي ....تركني ابجي واجتنا مسرة سامعين هوستنا

-خيركم هااا؟؟؟
مجيد:تعاي شوفيها شلون مو ادمية وتكولين عاملها زين تعاي شوفي بعينج التعاتبيني عليها وتكولون حرام عليك عساها بالجهنم بعد اذا احد جاب سيرتها اشك حلكه بعد اطلع اطب شسوي بيها محد يعاتبني خلصت وياج بعد لهنا ةاشوفج يا دعاء اكسر هاي عينج الوكحة والصلافة العندج