بقايا شغف

اتفقنا على ان لا نتفق

مسرة:

انقضت ايام خطوبتنا واحنا كل ما نتفق على شي يخرب بالعقد اني جنت مريضة وكوه لما عقدنا محكمة وما قبلت نروح اي مكان غير يرجعني لبيتنا بعدها صرت زينة عزمونا لبيتهم ما كدرنا نروح لان بذاك اليوم طلعت تحاليل ضيو وكضيناها ببيت خالي والتهينا وياهم وبالايام اللي عكبتها بقينا ببيت خالو يم بيبي وحوري وااجهال خالي موصي عليهم  ...

واليوم متحضرة وانتظر زياد  يجي ياخذني نروح نشتري اثاث للمطبخ والغرفة واطيت خبر لماما من الصبح ما جاوبتني لا اي ولا رفضت وهي اصلا لازم تجي ويايه ....

طلعت م غرفتي لكيتلكم فرحة مطلعة اثاث الصالة بالممر وتجلف بيها ومنزله بردات وفراشات تارسة الكاع ...شافتني مبدله تجاهلت الموضوع وامرتني

-يلا تعاي عاوني اخذي هالجراجف للغسالة وطلعي منها الوجبة القديمة
-ماما مو كلت الج زياد حيجي
-امشي امشي هو احنا بحاله هسه اكول الها بيتنا مزعبل منو ينظفه.. كولي اله يأجل جيته
-ماما صار اسبوع نأجل وقبلها جانت عملية ضيو وهو اصلا مراعي ظرفنا
-واذا طايرين خما طايرين باجر عود نطلع
-عوفي هالشغل ومن نرجع بالليل نشتغله
-لا والله ست مسرة لخاطر الاستاذ نعوف كل شي ما عدنا شي بعد نسفط
بين كلامنا دك موبايلي وجان هو... شكد محرجة شنو اريد اتعذر واكول اله
-ماما هاي وصل
-اي خل يروح اني كلت نروح شكو جبتيه

دمعت عيوني من تصرفها وما اكدر اعاندها ...الموبايل يدك رديت بعجز والعبرة خانكتني
-هااا عيوني
-وينج اني بالباب تعالي
-اني ما اكدر اروح
-شنو شبيج دتعالي افتحيلي خل افتهم ...هاي عمج معد اجا روحي خل اسلم عليه

شويه ودخل عمي بوحده صاح علينا
-وينجن مسرة هاي خطيبج جاي بره يكول تروحين وياه تشترون اثاث ؟شبيج

جاوبته امي بحدة
-ما تروح عدنا شغل كوام وين نطلع هسه
معد:فرحه الولد جاي ويكول عندي خفارات ايام التجي وما عده مجال بعد عوفي الشغل
فرحه:واحنا قابل يومية مسوين تعزيلة هي هاليوم

عمي عرفها دتماطل باوع بوجهي اني مبدله ومتحضرة كال الي بحزم
-روحي ويه الولد يلا اطلعي لزوجج يابه عيب من الولد جاي هالطريق والازدحامات... واني اساعدها عالشغل وكف بيني وبينها وهاي اول مره عمي معد ناعم وياها حيل وما يغث خاطرها ابد

فرح:وين تطلع شبيك معد
معد :شتريدين اغسل وياج روحي مسرة

فرحه:والله اذا طلعتي انسي بعد عدج ام يا مسرة

-ماما عفيه
معد:روحي يابه وانت اهجعي عاد

خفت اتحرك وهي رجعت على عمو تحجي باسلوب مو حلو ابد ولا لائق بي ولا بعمره...صار عصبي عليها لا ساندها طول الفترة الفاتت وسكت وهي منعت جية زياد الي وسمعته حجي اكثر من مره واستغلت عملية ابن خالو حجة حتى تفشله بعد يجي لو يجهز للعرس وهو كبل الفترة المضت متحمل ويصبرني الي هم يكول حقها امج وتخاف عليج لو يكول صدك عيب الظروف حكمت ويراعي احساسها وهي ابد ولا انطت مجال عزمنا اني وياها رفضت مرات راد يجي ياخذني نطلع مطعم تخبلت علينا واتصلت بعمو معد خلته يعصب عليه وكفت الي سجين خاصرة ورغم هذا زياد ابد ما اهتم يكول حقها ولو عندي بنية اسوي اكثر ....