الساعة ١:٠٠ ظهراً
في الـرياض
فتح باب البيت
رجع من المدرسة بيد مرتجفة وخطوات مهزوزة
من ثلاث ساعات الضيقه كابته على صدره
خوف يجتاحه لسبب يجهله..
بصوت مبحوح/ يايـمه يايـبه‼️!
خالد تو طلع من المطبخ
وبيده كوب ماء/هلا ليث!؟
ليث برجاء/خـالد!؟ وين امي وين ابوي
خالد تقدم له بقلق/وشفيك!؟ وجهك احمر
ليث حرك شفايفه بيتكلم ثم صد عنه بتردد..تخطاه وهو يبحث عن امه وابوه..
دخل للصاله وحصلهم جالسين ..
جلس جنب ابوه بدون صوت
عبدالرحمن بإنتقاد/الواحد اذا دخل يسلم
ليث مسح وجهه ورجفه تجتاحه
العنود بتوجس/ليث فيك شي!؟
خالد اللي دخل ومد كوب المويه لـ ليث اللي شربه دفعه وحده ويهز رجوله بقوه
العنود وقفت بهلع/ليث يمه وشفيك!؟؟
ليث هز راسه بشتات/مدري مدري مخنوق مخنوووووق "ضرب على صدره"كأن فيه جبل هنا
عبدالرحمن /قلبك يوجعك
خالد اللي جالس على ركبته ومسك معصم ليث ورفع ساعته يقيس نبضه /نبضه طبيعي
عبدالرحمن بخوف/أجلل خلينا نأخذه للمستشفى
ليث يسحب يده وبرفض وهو ينحني ويسند جبينه على يده وبصوت مخنوق/لاااا مو تعبان..فيني ضيقه. الدنيا صاكه فيني احس اني بموت مدري خايف احس بيصير شي
العنود حضنته بقوه وبكت/يمه بسم الله عليك جعله بروحي عنك
عبدالرحمن وقف ويده على خصره بتوتر وقلق
خالد/عندك رقم احد من اخوياه في المدرسه يمكن صار له شي وضايقه
عبدالرحمن/لا ماله داعي خليه لين يهدأ ونفهم منه
العنود سدحته لـ فخذها..تمسح على راسه تقراء عليه
غمض عيونه وهو يسحب أكبر قدر من الاكسجين لصدره ويكإبه لثواني ثم يزفره ببطى...
عبدالرحمن جلس على ركبته وشد على يد
ليث وبحنيه ونصح/قول لاإله الا الله..
ليث بدون ما يفتح عيونه/لاإله الا الله
عبدالرحمن/ها قوم وانا ابوك توضى وإقرأ القران واللي فيك من الشيطان ((إِنَّمَا النَّجْوَىٰ مِنَ الشَّيْطَانِ لِيَحْزُنَ الَّذِينَ آمَنُوا وَلَيْسَ بِضَارِّهِمْ شَيْئًا إِلَّا بِإِذْنِ اللَّهِ ۚ وَعَلَى اللَّهِ فَلْيَتَوَكَّلِ الْمُؤْمِنُونَ ))
اعتدل بوقفته و وقف/ابشر
خرج من الصاله ونظرات عبدالرحمن والعنود تتبعه
العنود بعبره/اخذه لشيخ يقراء عليه هذي ثالث مره يصير له كذا
عبدالرحمن يتنهد/هذا اللي بيصير
العنود تمسح بقايا دموعها..بنظره كسيره يكسوها الحزن والحيره..وبفضفضه/قلبي قرصني يا عبدالرحمن على عيالي تكفى دق عليهم يجون
عبدالرحمن بعقلانيه/العنووود!؟ تعوذي من ابليس وش فيك انتي الثانيه وتركي عنك الوسوسه
العنود بفطره قلب الام/بس يا عبدالرحمن..لي ثلاث ايام احلم أحلام شينه فيهم واقوم ابكي وانت شفت بعيونك
عبدالرحمن رفع جواله وقلق بدأ ينتابه/بدق عليهم
فتحت رشا الباب وجيلان من وراها
رشا/اوووف يا الحر والقرف
جيلان/خالتي جهز الغداء!؟ حدي ميته جوع
عبدالرحمن نزل جواله /هاا وذولا قطوتك وصلوا وحلطمتهم وصلت للشارع
العنود ابتسمت براحه..وبصوت عالي/اطلعوا بدلوا ملابسكم والغداء بيكون جاهز على الطاولة
عبدالرحمن يرفع جواله ويتصل بـ مصعب اللي انجبرت العنود على انها توافق على روحته واللي صبرها انه كل يوم يكلمها اون لاين وكل اسبوعين يرجع لـ الرياض/الووو
مصعب يحول المكالمة لفيديو/ارحب ياالغالي
عبدالرحمن جالس جنب العنود ورفع الجوال حتى يوضح وجهها/امك تبي تتطمن عليك
مصعب يلوح بيده/هلا يمه!؟ تو متصله علي فـ الفجر
العنود/تغديت!؟
مصعب يقلب الكاميره على الاكل اللي قدامه/هذاني في اتغدا مع خويي
العنود /يعله عافيه..يالله يمه استودعتك الله "بصوت متحشرج"والله ينصركم يارب
مصعب ابتسم لها/امين اي تكفين كثري من دعواتك..يلا مع السلامة
عبدالرحمن/الله يحفظك ياابوي
العنود وقفت وكان هم وانزاح عنها/بروح اشوف الغداء جاهز وانت روح لـ ليث نزله معك
عبدالرحمن عقد حواجبه بتفكير و تذكر الابن الغائب بلع ريقه الناشف..واخذت الافكار تتصادم براسه..كوابيس زوجته وضيقة ليث تؤمه هل هي دلالة لحدوث مكروه لـ الغائب!؟؟
العنود رفعت حاجبها اليسار بستنكار لتجهمه وصمته/عبدالرحمن!؟
مدت يدها لكتف زوجها/وين سهيت
عبدالرحمن رفع عيونه لها و بنبرة رجاء غريبه/كثري من دعوتگ لعيالك إن ربي يحفظهم وين ما كانوا وإن الله يرجعهم لنا..دعاء الام مستجاب
العنود استنكرت نبرته و لم تفهم مغزا نظرته..اردفت/من غير ما تقول ادعي لهم بكل صلاة
