الساعة ٣:٠٠ قبل آذان العصر
طلع من البيت بعد
الغداء مع اولاده…
فالسائق بإنتظاره…
فتح الباب الامام بجانب السائق
وقبل ركوبه إلتفت لصوت نداء
ليث له وهو يمشي بإتجاهه وساحب معه عمه خالد…
فهم ان ليث يحتاج لشيئ منه واخذ خالد معه ليساعده في اقناعه…
عبدالرحمن تقدم منه/ها وش به من علم
ليث بتردد وتمهيد/وين بتروح يا ابوي!؟
عبدالرحمن وعينه على اخوه الصغير خالد إللي يبتسم/بروح لمعرض جدك اسلم عليه ثم عندي كم شغله بخلصها…تخاويني!؟؟
ليث يدق خالد يحثه على الحديث/خوتك تنشرا يا ابو ليث بس ما يصلح اركب ورى والسايق يسوق بك هذا عقوق مفروض اني انا اللي اسوق بك
خالد بصراحه/عبدالرحمن من الاخر ولدك يبي سيارة بتشتري له..ايه ولا لااا من امس مزعجني يقول اقنع ابوي يشتري لي سيارة ..
ليث بعصبيه من اسلوب خالد/لااا صراحه اقنعته يا ابو الاسلوب
عبدالرحمن مسك ليث من طرف تيشيرته وهو يهزه /وانا اقول امك واختك عروب من امس يلمّحون انك كبرت ويبي لك سيارة…هذولا كلهم وازهم علي!؟ يقنعوني بشي منتهي!؟؟؟؟
ليث بحلطمه/يبه تكفى طلبتك الترم هذا بخلص ثاني ثانوي وانا ما معي سيارة اخوياي كلهم معهم سيارات
وانا لـيـث ال عــازم ما معي!؟؟ما يصير
عبدالرحمن بهدو/والنعم بك “بنفس نبرته” يا لـيـث ال عــازم بس سيارة ما فيه حتى تخلص الثانوية مثلك مثل اخوك وعمك خالد ..تخرج من هنا وخذ المفتاح والرخصه من هنا…
ليث بـمحاوله اخيره/يـبه هذاك اول..وانا اصغر عيالك مفروض تدلعني
عبدالرحمن بجديه/دلع اكثر من كذا!؟ انت تعرف ان منعي لك منها ما هو إلا خوف عليك من خطرها هذا و انا يا ابوك ما سلمت منها وفقدت اخوك بسبب هذي السيارة” ضرب بكفه بقوه على سيارة لتردد صوت ضرباته عليها بنغمه قطعيه””والى يومك ما اقدر امسك الدركسون وامشي فيها لو كيلو وحد
خالد يتدخل لانهاء النقاش/ليث انتهى روح استعد لصلاة العصر …وانت يا عبدالرحمن بخاويك لي ثلاث ايام ما شفت ابووي
عبدالرحمن ركب السيارة
وركب خلفه خالد
وانطلق السائق بالسيارة متوجه للمعرض
عبدالرحمن/انت مقصر يا خالد مع ابوي المفروض كل يوم وانت عنده هذا وبيته مقابل بيتي
خالد وهو يتقدم بجسمه بين المرتبتين/والله اني ادري اني مقصر غير من الصباح الى الساعة ثلاث في الدوام والعصر ارجع انام للمغرب وبعد المغرب اخلص اشغالي هذا اذا ربي فكني من عاصي و ما مسّكني المناوبه في المستشفى…وانت تعرفني ما احب اروح له في بيته عنده زوجتين نسرات
عبدالرحمن /استحى على وجهك انت وعذرك البايخ وبعدين الحريم هذول زوجات ابوك احترامه من احترامهم ما انت بمراهق عشان اعلم فيك
خالد/ ههههههههه يا رجل هي وقفت على حريم ابوي اخوك عاصي مدري وش اللي حده وبنى بيته في نفس الحوش . قلت الاماكن!؟ اخر مره رحت حصلت زوجات ابوك يتهاوشن وزوجة عاصي المسكينه هند تفرق بينهن ههههههههههههههههه عبدالرحمن/يا وش عليك منه هاا!؟ خلك بعيادتك وطبك ابرك لك
خالد سكت للحظه ثم اردف بتسآؤل/عبدالرحمن!؟
عبدالرحمن /همم
خالد/ما اشتقت للمستشفى ومهنتك كدكتور اطفال!؟
عبدالرحمن ركز نظراته على ابعد نقطه في طريق وسؤال خالد يضرب بالصميم
خالد كمل كلامه بعد ما لاحظ سكوت اخوه/العائلة كلها اطباء..واكثر واحد من بين افراد العائله خلاني اعشق مهنة الطب واستمتع فيها هو انـت وفجأة كذا وبدون سابق انذار تترك الطب وتستقيل!؟ انا اذا غبت عن المستشفى اسبوع اشتاق له فـكيف بك اللي لك اكثر من ١٢ سنه من تركته
عبدالرحمن بعد صمته اردف بمراره/وانت الصادق لـي تارك الطب ١٥ سنة و ٥٨ يوم
خالد بتعجب /وحاسب الايام! !؟ تدري اني بحثت في سجلك اذا كنت ارتكبت خطأ طبي قبل استقالتك ما حصلت شي!؟ قلت يمكن اتخذت هذا القرار لفشلك في علاج طفل
عبدالرحمن بتهرب /وصلنا انزل
خالد انتظر للحظه بإنتظار جواب من اخوه لكن الصمت جوابه …
فقرر النزول وهو يدرك ان عند اخوه سر يخفيه عن الجميع لا
هو لم يدرك الان فقط بل الجميع يعلم بـ ان عبدالرحمن الـ عازم
يخفي امرًا عن الجميع
بسبب تغيره المفاجِئ
قبل سنوات حينما ترك مهنة الطب
وإعتزل قيادة السيارة
وبدأ بمراجعة طبيب نفسي لفتره من الزمان ثم تحسن بفضل عزيمته على العلاج…
ربما هذا السبب مرتبط بوفاة ابنه
ولكن عبدالرحمن رجل صبور ومؤمن بالله وبالقضاء والقدر
ادرك بأن فقدان الابن كـفقدان جزء من الجسم او اشد المًا
وفقدانه لإبنه لم يكن اول فقد له
فقد توفي صديقة العزيز وكان صبور
وتوفيت امه بعد وفاة ابنه فكان ايضًا صبور …
اذًا لماذا لم يكون صبور حينما توفي طفله الذي لم يبلغ إلا ثلاث سنوات من عمره فقط !؟؟؟ .
