#الحضن_الدافي
الحلقة :: 49 ::
وصلنا قدام حوشنا لقيت سيارة عمي جواد .. حسيت بميس توترت .. شديت في ايدها بقوة وبنظرة طمنتها ان كل شي ح يمضي بسلام .. نزلنا وفتحنا باب الحوش لقينا بوي وامي والياس ورزان وحمودي وطبعا اخته الصغيرة ليونة .. وعمي جواد ومها وورد وزين .. خشينا بإسم الله .. سلمنا وقعمزنا .. في البداية كان الجو هادي وحلو ومش متوتر من جيهة ميس ..
ورد رن تليفونها استاذنت من الجلسة وطلعت .. ونا عيوني عليها معاش وردتي الصغيرة يللي نقدر نحضنها وندللها .. ونطيرها في الهواء ونرجع نحضنها .. معاش ورد يللي شفاي يلمس خدها .. كبرتي ياورد .. وليتي صبية وعندك خصوصيات :)
لحقتها ميس .. وانا قعدت مبتسم ومخفي الغموض الداخلي يللي فيا .. ماهي الا دقائق ونضت لحقتها .. لقيت ورد تبان من مسافة بعيدة وشادة تليفونها وتهدرز وتضحك .. آما ميس واقفة بعيدة شويا وتراقب في ورد
قصي: ميس .. شن في؟؟
تلفتتلي ودمعتها في عينها .. هزت براسها بمعنى ( مافي شي )
قصي: باهي علاش تراقبي فيها ؟؟
ميس: تشبه لامها هلباااا
قصي: ايه صح :( .. الله يرحمها
ميس: تعرف ياقصي .. انا نادمة ع كل شي درته في حياتي :(
قصي: ماهيش نهاية الدنيا .. تقدري تصلحي وضعك وتراجعي حسااباتك مع ورد وتمت
ميس: زعما تسامحني ؟؟
قصي: ماتخافيش ورد تربيتي وانا متأكد ح تسامحك
ميس: ومها ؟؟ .. وجواد ؟؟ .. ورزان ؟؟
قصي: ابدي بورد وبعدين كل شي ح ينحل ان شا الله مع الايام
ميس: انت معاي يعني ؟؟ ** شدت في ايدي ** بس انا خايفة ياقصي
قصي: وانا عارفك قدها وقدود .. تي وين ميسوو الصلبة القوية وين ؟؟
ابتسمت .. وحطت راسها ع صدري .. تمسكت فيها ولفيت ايديا عليها
قصي: طووول ماعيني حية مش ح نخليك بروحك في هالدنيا .. ونواجهو كل شي مع بعض آوكي !!
غمضت عيونها وهزت براسها : ان شا الله
مشت بخطواتها البسيطة وورد كيف كملت اتصالها تلفتت لقت خالتها جايتها وقفت .. آما انا انتهت وظيفتي وخليت القلوب ترجع لبعض صافية ونظيفة
>>>>>>>>>>>>>>>>>
اخترقنا الحدود انا وغسان وبدينا ع تواصل مرة مرة .. ماتعمقناش في بعض هلبا .. مازلنا ع السطح .. لما كملت مكالمتي مع غسان لقيت خالتو جايتني .. وقفت
ميس: كملتي مكالمتك !!
هزيت راسي بمعنى ايه
ميس: ممكن نتكلم معاك شويا ؟؟
ونفس الشي هزيت راسي بمعنى ايه
ميس: ورد !! .. علاش خايفة مني ؟؟
عيوني جمدو في مكان مجهول وسرحت شويا واذكرت مواقفي السيئة معاها .. سكتت .. قمت عيوني فيها
ورد: لا مش خايفة
ميس: تسامحيني !!
ورد: ع شنو ؟
ميس: ع كل شي
ورد: ربي يسامح مني انا باش مانسامح
ميس: بجد سامحتيني ؟؟
ورد: اهآآ
حضنتني بقووة .. البرود في حضنها زمان .. كان توا حرارة .. والحرارة في حضني زمان .. كان توا برودة .. مافهمتش ليش معاش نبادلها المشاعر نفسها .. نحس فيها غريبة عليا مش خالتي ولا ح تكون في يوم من الايام أخت اغلا انسانة عندي .. وخدتها مني الدنيا .. بركازة جسمي .. وعيوني السارحة .. سحبتني من حضنها
ميس: ورد شن فيك ؟؟
ورد: ولا شي
ميس: مش قلتي سامحتيني ليش معاش ورد الاولة
ورد: نخاف نتسرع في فرحتي ونكون غالطة .. انتي متأكدة ؟؟
ميس: ايه متأكدة .. انا غلطت فيك هلبااا وجاية توا بنرجع علاقتي معاك احسن من قبل
ورد: وماما ؟؟
ميس: الله يرحمها :( .. خيرها ؟؟
ورد: مانحكيش ع ماما ايناس .. نحكي ع ماما مها :)
ميس: بديتي تقوليلها ماما ؟؟
ورد: لانها فعلا مع الايام ثبتتلي انها الام .. حضنها حنون ودافي .. وين تلقاني في مشكلة توقف معاي لين نحلوها .. لما نبكي نبكي ع كتفها .. أمي ولدتها ليا الايام .. وتمنيت بابا من زمان تزوجها راهو ماتعذبتش العذاب الماضي كله :(
حركت عيونها خالتو فوق ولوطة بعدين رجعتهم ليا .. وقالتلي بنبرة صارمة : آوكي خلينا منها
ورد: كيف تبي ترجع علاقتنا مع بعض احسن اذا كان مش متقبلة ماما ؟؟
نفخت شويا وبعدين حضنتي : انتي حطي روحك في مكاني .. مها خدت مكان اختي وتقربت ليكم وبديتو تنادو فيها ماما .. يللي داخلي توا نوع من الغيرة بس ع اختي
سحبت روحي بالشويا منها .. وشبحتلها بنظرة حادة: واختك هيا أمي الله يرحمها .. خالتو فيقي شويا .. ماما مش ح ترجع .. تمنيتك كنتي أمي في وفاة ماما وغياب بابا .. بس انتي كنتي انانية وتوا جاية تلوميني كيف حبيت مها .. وناديتها بماما ؟؟
ميس: اختصري عليا ؟؟ .. مش ح تسامحيني لين تسامحني مها يعني ؟؟
ورد: لا ماقلتش هكي .. انا سامحتك .. بس قاعدة نقولك الواقع ونفيق فيك بس
ميس: اصلا قاللي قصي ان ورد حنونة وح تسامحني :)
ورد: هئ .. قصي يعرفني اكثر منك يعني !!
ميس: ههههه كيف عاد ز يخوك
ورد: توا طلع خوي .. بس قبل كان حبيبي ونبي ناخده منك !!
ميس: آووووف ياورد قداش ماقلبك اسود
ورد: مش اسووود لالالا .. قلبي مش اسووود .. بس كنتي انتي والحياة عليا .. ظلمتيني هلباااا وقعدتي سنين ماتكلميش فيا ولا تقربيني .. حتى في عرسك سلمتي عليا ببرود لان مها كانت معاي .. قلبي مش اسود .. ماتلومنيش .. العذاب يللي شفته خلاني نحاسب كل واحد رسم في حياتي نقطة سودا .. انا مسامحاتك خالتو من قلبي والله .. بس الانسان يتعلم .. ** شديت ايدها وابتسمت ** وح تقعدي انتي خالتي وزوجة ولد عمي الغالي قصي .. يللي تربيت ع يديه .. وكبرت بين عيونه .. نضجت بكلامه .. تعلمت منه .. حبيت الدنيا منه .. رسم الآمل في قلبي .. ** رخيت ايدها والابتسامة ع وجهي ** ابتسامته كانت تعطيني طوق النجاة في بحر مشكلتي .. ضحكته تفرحني .. صوته يردلي الروح .. حركاته .. كلماته .. حتي من عصبيته كانت ترزقني القوة .. بس تشوفي في المشاعر هادي كلها كانت آخوية .. آخوية صادقة .. ومن يوم ماكلمتيني عليه .. ولدت في عقلي فكرة .. وولد في قلبي الحب .. حب ماكنت نبيه بس انتي اقنعتيني فيه .. بديت كل شي حلو في حياتي نشوف فيه قصي .. ** نزلت دمعة عفوية مسحتها بكمي ** كنت متهورة بحبه .. متوهمة بعلاقة فاشلة ماليهاش اساس .. وفي يوم فرحكم .. كانت دمعة خسارة .. يللي نزلت مني دمعة وفاء ونتيجة فاشلة .. دمعة حطمتني .. دمرتني .. لما نزلت حرقت خدودي .. خشيت للحمام ع المرآية كل الايام يللي بينا ارتسمت .. ربي يهنيكم مع بعض .. انا من هداك اليوم سكرت باب اسمه قصي .. وبقدر المستطاع حاولت نتخلا عن آي شي ممكن يفرقنا ياخالتو .. انا كنت الضحية بينكم .. وصلتو للي تبوه .. بس انا ماقدرتش نرجع شي من حياتي السابقة .. حسيت روحي في حفرة وماحد طلعني منها .. يأست .. وتمنيت الموت لما وصلتو لبعض .. يللي شدت ايدي ورفعتني هيا ماما مها .. بعد الضيق يللي عطيتهولي .. ربي بعتلي الفرج عن طريق ماما مها ** كانت ساكتة طوول الوقت ودموعها في عينها ** آآآآآآه .. انا ح ننسحب من حياتكم .. مش لشي .. بس لاني كنت ح نخسر بابا وخوي قصي .. وكذلك خالتي الوحيدة .. وماما مها .. كنت ح نخسر الكل لو استمريت في العمى يللي كنت فيه .. خلاااص .. توا فتحت عيوني ع حياة جديدة .. ح نبنيها انا وغسان .. وبنخلي اوهامي واحزاني كلها وراااي .. ح نفض غبار حب قصي .. ونحط وردة باسم غسان .. ** رجعت ابتسمت من جديد ** .. صدقيني سامحتك والله .. وياريت تسامحيني حتى انتي ... مرات جرحتك بكلماتي ** تلفتت يميني لقيت بابا وزين وماما يأشرو بايديهم بمعنى هيا بنروحو ** شكلهم بيروحو .. ههههه تمت زيارتنا ** مديت ايدي ** خالتو تسامحني !!
خالتو سيبت ايدي وحضنتني بقووة .. وقعدت تبكي .. القلوب صافية وتوقعت ان كلامي ح يكون ليه نتيجة ايجابية لصالحي وصالحها .. حضنتها والدمعات ع خدي .. بعدين تباعدنا .. قمت ايديا ومسحت دمعاتها
ورد: خالتو ميس انا نحبك <3 والله والله نحبك <3
ابتسمتلي : وحتى انا وردتي يشهد عليا ربي كل يللي فات ندمت عليه .. انا يللي نحبك يابنت الغالية <3
ضروري من الصراحة في هالحياة .. ضروري من المواجهة .. هكي القلوب صفت وارتاحت .. ياريت كل شخص يواجه شخص اللي مضايق منه والا زعلان .. والحبايب يتلاقو .. والعيون تلألأ بالحب والصفاء ..
رجعنا اصحاب واحباب .. وارتسمت الحياة الوردية من جديد في عيونا .. مرّ شهر بطوله وعرضه .. وبدت امتحاناتي النهائية للشهادة الثانوية .. وشديت مليح في امتحاناتي .. وصلت في مادة الميكانيكا .. آآوووف مادة ماحبيتهاش بكل .. كنت نقرا وسكرت الكتاب شديت تليفوني وفتحت ع رقم غسان واتصلت بيه .. لقيته مقفل .. عاودت مرتين وثلاثة مرة تانية مقفل .. استغربت .. سكرت قفل تليفوني وفتحت الكتاب من جديد وبديت نقرا .. شويا واتصل بيا من جديد .. بس صوته متغير .. خوفني هلبا
ورد: شن في غسان ؟؟
غسان: حاس روحي تااااعب ياورد .. شكلها موتتي قربت ولا نجاة منها
ورد: لالالا ماتقولش هكي بالله عليك
غسان: انتي شدي في قرايتك . واهتمي بروحك .. كان متت بالله عليك عيشي حياتك بس ماتنسينيش ادعيلي ديما
ورد: ياااااسر غسان عاااد .. برا دير كشف تطلع بردة غير انت مكبر الموضوع
غسان ان شا الله .. خلاص كان تبي رضاي وضحكتي اقري كووويس وماتشغليش بالك .. اتصلت بيك باش نطمنك وماتخافيش عليا .. سلامات
ورد: رد بالك ع روحك .. سلام
في شويا خوف داخلي .. غطيته بالقوة باش استمريت في قرايتي وكنت لازم نجيب معدل وانافسه لانه شاااطر في قرايته ويبيني زيه .. شويا وسمعت عيطة من ماما .. طلعت نجري لقيتها حاطة ايديها ع الصالون وتصييح .. بابا ناض من نومه مخلوع ..
ورد: خيرك ماما ؟؟ .. شن في؟
مها: جوااااد ولع سيارتك بسررررعة بالله عليك
مشيت نجري ورا بابا وهوا يولع في سيارته .. وبعدها خداها وسندها ورفعها معاه .. وانا وزين شادين في بعض وخايفين .. لاول مرة نشوف وجع الولادة !!
قعمزت ع الكرسي .. دورة دورة يسأل فيا زين : خيرها شن في؟؟
ورد: مانعرفش .. مريضة هلبا
زين: ورد ! ** قعمز مقابلني ** كان تموت ؟؟
ورد: لالالا بعيد السو عليها
زين: خااايف تموت ونرجعو ايتام زي ماكنا
ورد: لالا ان شا الله خير
شويا وسمعت رنة تليفوني مشيت نجري لداري قمت تليفوني لقيت المتصل ( بابا <3 ) .. رديت عليه
ورد: حي بجدياااات !! .. مبروووووك علينا <3 .. اوكي مع السلامة
جاني زين يجري : شن في ؟؟
ورد: ماما جابت بيبي .. جابت بنية صغيرونة تهبل <3
زين: وين شفتيها -_-
ورد: الله ع الذكاء .. تي بابا حكالي
زين: آووووف خفت تموووت .. زعما تحب البنية اكثر منا ؟؟
ورد: خيرك تفكر هكي انت؟؟
زين: مش عارف .. نبي ماما وبابا ليا انا وياك خاااايف تاخدهم البنت هادي
ورد: ههههههههه غيووور .. انت المفروض تكون خونا يللي نعبو عليه مش تغار من بنوتتنا الجديدة
زين: ان شا الله خير .. امتى يروحو ؟؟
ورد: قاللي بتبات في المستشفى بعدين جاينا بيرفعنا ان شا الله
زين: وامتحانك !!
ورد: تي فووووته .. امشي اجري بدل حوايجك
زين: هههههه آوكي
مشينا نجرو لديارنا بدلنا حوايجنا .. فرحانين بالبنوتة الجديدة .. ماهي الا ساعة وبابا كان قدام الحوش .. وفي عيونه الفرحة .. مشينا للمستشفى .. خشينا نجرو لغرفتها لقيت باقة ورد جنبها شكلها من بابا .. بوستها ع خدودها وقلتلها: آلف مبروووك علينا البنوتة .. والحمد لله ع سلامتك <3
مها: الله يسلمك حبيبتي
زين جي يجري وقعمز جنبها ع السرير لين توجعت وقالت: آآآي
ورد: زين انزل عيب >_<
مها: لالالا خليه فرحان زيك بوخيته ولاه !!
زين: ايه طبعا .. لمني تشبه !!
مها: والله ماشفتها .. برا قول لبابا يجيبها :)
زين: آوكي
نزل زين ومشي يجري لبابا يللي كان يبشر في عمي وصغاره بالبنوتة الجديدة <3
تلفتت لماما يللي كانت متوجعة شويا : موجوعة !!
مها: شويا :(
واطيت عيوني واذكرت ماما وين جابت زينو وقتها كان عمري 4 سنوات .. تعبت هلبااا .. وماكانتش تحكي .. وبما اني صغيرة وماحسيتش بيها كنت نطلب منها في المستحيل .. كله بسبب غيرتي الصغيرة من زين لانه حلّ ضيف علينا جديد .. ولما كبر شويا ماما شعرها طاح .. ولما طلعو سنونه ماما صارتلها هشة في سنونها .. سبحان الله الانسان كل مايكبر كان ياخد من آمه حليبها باش تقوا صحته ويتغذى .. واسنانها باش يقوي آسنانه .. عظامها باش تقوا عظامه .. وشعرها باش يتكاثف شعره .. سبحان الخالق .. ولما يكبر ويسببلها المشاكل كانت تتحمل بس تتعب نفسيا .. وكانت تجي ع صحتها باش هوا يرتاح .. رغم تعبها طوول اليوم إلا انها توفرله الراحة الكاملة حتى لما يكون شاب .. يعني الآم تفني عمرها وحياتها لتوفير حياة وردية لصغارها .. بس أو مايكبرو يتعلو عليها ومايتحملو عصبيتها عليهم .. ومايقدّروش ظروفها لو قصرت معاهم .. آآآآه .. لو ماما حية عمري ما ح نقدر نرد جميلها عليا .. وعمري مانقدر نعوضها تعبها عليا براحة بيا .. ان شا الله تكون راضية عليا .. لان الجنة تحت آقدامها .. لان الله وصى بيها في كتابه الكريم .. لان الله قال رضاها من رضاي .. الام لما تسكن تحت التراب يعني باب كبير من ابواب الجنة تسكر علينا .. الام لما تبكي والسبب منا كانت الملائكة تلعن فينا في كل خطوة نخطوها .. الام دمعتها حااارة .. زعلها نهانا عليه ربي العالمين .. لما ترضى علينا .. وتبتسم في وجوهنا .. وبكلمتها النابعة من القلب ** راضية عليك ** تحس الدنيا كلها تبشرك بالخير .. حياتك حلوة .. لما تشوف ضحكة أمك تحمد ربي ع النعمة يللي عندك .. لان ضحكة أمك تسوا هالدنيا ومافيها .. تسوا كنوز العالم كله .. لا شي يغنيك عن ابتسامتها الصادقة .. ابتسامتها الجذابة .. تعرفو !! .. التجاعيد يللي ع يد أمك كنت انت سببها .. شعرها الخفيف كنت انت سببه .. سنونها الطايحات كنت انت سببها .. رجليها التاعبات كنت انت سببها .. هشاشة عظامها انت سببها .. الدوالي يللي ع رجليها انت سببها .. سرحانها .. تفكيرها .. وجع قلبها .. انت السبب .. لو في يوم امك مرضت لا سمح الله ماتلومش الدنيا .. لا .. لوم نفسك كيف مااهتميت بيها !! .. لو ربي خدا منك هالنعمة .. لازم تندم ع كل لحظة وجعتها فيها .. امك الحنونة .. الطيبة .. مهما زعلت منك ح تقعد تدعيلك بالخير .. مافيش من أحن منها عليك .. مافيش واحد يتحملك في هالدنيا زيها .. مافيش حد يستاهل حبك وكلامك وضحكتك غيرها .. مافيش حد يستاهل حنيتك غيرها .. مافيش في الدنيا حد يستاهل آسمى معاني السعادة غيرها .. مافيش حد يستاهل تفكر فيه وتشغل نفسك بيه غيرها .. طول ماأمك معاك في نفس البيت وتحت سقف واحد هادي اكبر نعمة عطاهالك ربي <3 .. طول ماامك حية وتكلم فيك آضحك .. ابتسم .. احمد ربي .. اشكر ربي .. آسعد قلبك .. آرمي كل همومك وراك .. تعرف مني عنده هم كبير في هالدنيا ؟؟.. اللي فاقد امه .. وحنانها .. وعطفها .. وكلامها .. وصوتها .. وحتى عصبيتها .. وحضنها .. وقفتها معاك .. ابتسامتها .. ضحكتها الحلوة .. هذا ممكن ح يتعوض بشي آخر يسعده .. بس الايام يللي كانت معاك فيها مش ح تتعوض .. اللحظات يللي خليتها مقعمزة وشديت تليفونك وتحكي مع صاحبك اكيد مش ح تتعوض .. كل لحظة حلوة معاها مش ح تتعوض .. حتى لما تتعصب عليك لمصلحتك .. حتى لو ضرباتك الشي هذا لصالحك اكيد .. لا ماتبكيش .. لو توفت ادعيلها بالرحمة .. وادعي ربي يجمعكم في الجنة .. ولو مازالت حية وتتنفس نوض بوس ايدها واستسمحها .. وكون معاها في اسوء لحظات ممكن تمر بيها .. مافيش حد يستاهل غيرها <3
حتي البابا ليه دور كبير في حياتي .. بعد ماتوفت ماما كان أمي وبوي في نفس الوقت .. سندي وظهري في هالحياة .. طيبته تسوا هالكون .. عصبيته يللي تهد حيوط كانت في قلبه عطف وحنان .. يشتغل .. ويتعب .. باش لما نطلبو المتسحيل يوفره .. لما نطلب شي فوق من طاقته كان يزيد من طاقته وانا نرتاح .. لما نبكي لاني جبت درجة ضعيفة يمسح دمعتي ويقوللي ** عارفك شاطرة وتقديها ** .. لما كنت نخاف من الدنيا كلها نوقف ورا ظهره بس نطمن .. لما نشد في ايده نحس بالامان ولا يمكن جيش دولة كامل يحسسني بيه .. لما يروح والعرق ع جبينه ونقوله ** وين يللي وصيتك عليه ** يحط ايديه ع خدي ويقووللي ** حااااضر ** .. ويرجع يجيب يللي نبيه .. لما نشوف آي رجل في العالم ونقارنه ببابا يطيح من عيني .. الاب الحب الاول والعشق الاول للفتاة .. كل فتاة بآبيها معجبة <3 .. رجال الدنيا كلها مايعوضوني ضحكته .. يعطيني الحب بلا ثمن .. يعطيني نصيحة ومايحسابني .. يعلمني .. ينصحني .. يدفعني للقدام بلا مقابل .. يحببني في الدنيا .. يلون معاي اللون الابيض ع لوحة حياتي .. يعطيني ثقة نندم لو يوم نخونه .. لما نشوف ضحكته في وجهي نستحقر روحي لو يوم غلطت في حقه .. لما نشوف كلمته الطموحية ليا نبيع الدنيا كلها ونتمسك في حضنه .. آيواااا .. بابا حبيبي ولا يمكن حد يعوض مكانه .. آول مايقولو اسمي في آي مكان وزمان كنت نفتخر لانه اسمه بعد اسمي .. اسمه رافع راسي للعالي فوق .. اسمه منجم الذهب يللي مستحيل نبيعه .. غالي عليا .. نحس بالفخر الكبير آول ماينطقو اسمي واسمه ورا بعض .. الآب يقسا ظاهريا وفي داخله حنان يملا الدنيا كلها ويفضل .. في داخله يبيك احسن منه .. في داخله حب مايقدر حد يعطيهولي .. ربي يخليه ليا ويخليلكم آبائكم .. ولو توفى الاب .. ضاع السند والظهر .. والحضن القوي .. والآمان .. بس يقعد اسمه ترفع راسك بيه .. ولما تبكي وتتضياق عليك الدنيا تتذكري بوك تمسحي دموعك وتبتسمي .. كلهم يخلوك ويبيعوك وهوا يشريك .. يتخلا ع الدنيا كلها وياخدك في حضنه .. مافيش شاب في هالدنيا يكون زيه .. ولا يمكن يعطيك ماعطاك .. وربي عطاك نعمة تمسك بيها واحمد ربي عليها .. وادعيله لو توفى بالرحمة .. ويجمعكم ربي في الجنة .. مات وخلالك اسمه يكون سندك .. افتخر بيه .. ولا تخلي حد في يوم يجرحه وانت حي .. اوقف معاه .. شد ايده بقوة لما تكبر .. زي ماشد ايدك بقوة لما انت صغير .. تحمل لعثمة لسانه ياما تحمل اسئلتك وكلامك المهمش .. لما يمرض احفظ مواعيد ادويته زي ماكان حافظ مواعيد دواك من غير منبه .. آول ماطيح بيه الدنيا انت وقفه .. تتذكر لما طحت وانت تتعلم كيف شدك في غمره وباسك ع جبينك وطمنك بانك ناجح وتقدر تجتاز كل العوائق !! .. تتذكر لما تتعلم في السواقة ع سيارته وضربتها ؟؟ .. كيف استقبلك ؟؟ .. في داخله شوية غضب كيف ح يصلحها والمصاريف عليه هلبا .. بس في وجهك ابتسم وقالك * تعيش وتاكل غيرها * .. تتذكر في يوم العطلة كان ياخدك للملاهي ويلعبك بلا كلل ولا ملل رغم انه عارف مصاريفك هلبااا وهوا تاااعب عليهم شهر كامل .. رغم هذا ماقصرش معاك .. في العيد .. لما يتآخر ومايشريلك بدلة وتقعد تبكي ** صغار عمي شرو .. صحابي لبسو كنادر جدد .. ولد جيرانا من بداية اسبوع شاري بدلته .. امتى دوري انا !! ** .. كان يبتسم في وجهك ويقولك ** ايه حاااضر غدوا تكون عندك ** وانت تفرح وهوا يضايق لانه عارف هالشي مستحيل .. رغم هذا ماحبش يصدك ويخليك ترقد بدموعك .. وفي العيد الكبيرة كنت تحكيله كيف شكل خروف جيرانكم وهوا مركز معاك .. ويقولك ** اكبر خروف بتاخده انت هي بحبح هي ** وحتى الابتسامة في هادي ماغابت .. تتذكر لما بتمشي زردة انت وصحابك وكل واحد بيدفع 30 ممكن يعاتب شوي ع الرقم يللي اتفقتو عليه لكن مايكسرش خاطرك ويعطيك .. وعمره مايواطيلك راسك بين صحابك .. بالعكس كان يفضل انه يلبس كندرة مشروكة من القدام وانت تاخد سبيدرو جديد .. يفضل يلبس بيجاما قديمة ومشركة وانت تلبس ارقى سورية تشوفها .. يفضل يقعد بلا تليفون وانت تاخد آخر تليفون نزل في السوق .. والى أخره من متاع الدنيا .. ارفع راسك فووق انت ولد بوك .. وارفعي راسك فوق انتي بنت بوك
حفظ الله لنا آبائنا وآمهاتنا <3
ابتسمت ابتسامة عفوية وطلعت من سرحاني لقيت بابا وزينو والبنوتة في حضن امها مها ..
ورد: شن تبي تسميها !!
شبحتلي ماما وابتسمت بعدين شبحت لبابا وقالت : ايناس :)
كانت مفاجآءة لينا كلنا .. ابتسم بابا وقال: والله انك بنت اصول ربي يحفظك <3
زين: شوفيها ماما تشبهلي ولاه ههههه
مها: ياريت والله :)
ورد: ربي يحفظهالنا نوسة الصغيرة <3 ** بوستها ع خدها بحب ** ريحتها تهبل ** مع استنشاقة لريحتها الطاهرة **
بابا قامها بالشويا وبدي يأذن في وذنها ( الله اكبر الله اكبر الله اكبر الله اكبر .. اشهد ان لا اله الا الله .. اشهد ان لا اله الا الله .. اشهد ان محمد رسول الله .. اشهد ان محمد رسول الله .. حي على الصلاة حي على الصلاة .. حي على الفلاح حي على الفلاح .. الله اكبر الله اكبر .. لا اله الا الله )
وبدت نفوسنا ترتاح بنفسها الهادي .. وبدت ارواحنا تشتاق لو غفت عينها ونامت .. وبدت قلوبنا تحب قلبها الابيض الصافي .. وبدت عيونا ترحب بعيونها وين تضوا .. ايناس الصغيرة .. آهلا وسهلا بيك بين عيلتنا الصغيرة <3
كملت امتحاناتي بسلام والحمد لله .. بابا وماما يخططو لاسبوع نوسة .. وغسان رجع سافر لالمانيا لاعادة تحاليله وان شا الله ربي يشفيه ويطلعه من هالازمة ع خير .. آما انا إلتهيت بمستقبلي .. وحايرة في آي كلية ح نخش ( طب , هندسة , فنون واعلام , علوم , اقتصاد , لغات , ادبية ) آوووووف هذا الموضوع موترني في يومي :( .. خشيت للمطبخ لقيت ماما توتي في الغدي ..
ورد: نساعدك !!
مها: لا حبيبتي .. بري ديري دورة ع نوسة بالك فاقت وماسمعناش صوتها :)
ورد: حااااضر
مشيت لدار ماما وبابا يللي كانت نوسة راقدة فيها في هدوء ودفيء .. لقيت الباب مردود وسمعت صوت بابا الداخل وقفت ..
>>>>>>>>>>>>>>>>>
جواد يتحدث ::
(( الله ياايناس قداش غيابك طوّل عليا واخيرا رجعتي ورسمتي في وجهي الابتسامة .. سبحان الله مازلتي صغيرونة وماتفهميش بس عيونك معلقات فيا .. نتمنى تكبري وتكوني زي ايناس الله يرحمها .. وتفرحي عيوني وتسري قلبي .. ايناس حبيبتي ربي يحفظك ليا ومايحرمني منك <3 ))
بوستها ع جبينها .. وهيا مازالت تشبحلي .. عارفك مافهمتيش شن قلت وع شن نحكي .. بس لما تكبري ح تفهمي قداش نحبك ونشوف فيك ايناس يللي غابت عليا سنين طووويلة .. ربي يحفظك انتي مع ورد وزينو وحبيبتي مها <3 .. سمعت حركة قدام الباب قمت عيوني لقيتها ورد .. جت قعمزت جنبي ع السرير ونوسة بيناتنا ..
جواد: خيرك ورد ؟؟ .. في حاجة ؟؟
ورد: هئه .. بس كل مانشوف ايناس تخطر في بالي ماما الله يرحمها :(
جواد: الله يرحمها ** نزلت عيوني في ايناس بابتسامة ** شوفي كيف تشبحلي ؟
نزلت راسها ورد لايناس وباستها وضحكت: بشرتها حمرااا وناااعمة تهبل <3
جواد: ههههه قاعدة بيبي .. واتي الغدي !!
هزت راسها ورد بالايجاب .. قمت ايناس في غمري
ورد: بابا وين طالع بيها !!
جواد: مانتحملش لحظة بلاها .. هي تعالي تغدي
ورد: انت قاعد تشوف فيها ماما ولاه !!
صدمني سؤالها .. شبحتلها وانا مصمت
ورد: بس هكي ماما مها ح تزعل .. وتندم انها خلاتك تتذكرها بمجرد اسم ره
والله كبرتي ياورد وبديتي تفهمي في لغة العيون
جواد: في وحدة تزعل من راجلها ع خاطر يحب بنتها !!
ورد: لالا .. في وحدة تغار لما اغلا شي عندها متشبت بغيرها
جواد: هههههه بس هادي بنتي
ورد: اسمها ايناس .. والاسم هذا يعنيلك وحدة تانية مش بنتك
يللي قطع حديثنا بكاء ايناس .. قعدت نهز بيها شوي شوي .. لين سمعتها امها وجتها تجري
مها: نوسة خيرها ؟؟
ورد قامت عيونها فيا وبعدين طلعت وهيا زعلانة مني .. اما مها خدت ايناس وبترضعها .. انا طلعت من الدار والى دار ورد طول
فتحت الباب لقيتها تبكي .. سكرت الباب بهدوء وقعمزت جنبها
جواد: علاش تبكي ياورد ؟؟
ورد: استاحشت ماما بس
جواد: ادعيلها توا بس
ورد: الله يرحمها ويجمعني بيها في الجنة :(
مسكت راسها بحنية وحضنتها .. وبديت نمسح ع شعرها وهيا تبكي
جواد: انا اسف مش قصدي نذكرك بيها
ورد: انا مانسيتهاش اصلا .. بس ماما مها عوضتني غياب ماما ايناس .. وسمت حتى بنتها ع ماما باش ماتزعلناش وتمشي ايناس وتجينا ايناس .. عيب علينا نضايقوها ياباابا ولاه !!
جواد: ايه صح .. مش بايدي .. كل مانشوف ايناس الصغيرة نشوف في عيونها مرتي الله يرحمها
ورد: شن ذنب مها !!
جواد: ذنبها رئفت بحالتي والله .. ** بعدتها عن حضني ** ورد تغار من ايناس معقولة ؟؟
ورد: ههههه لا .. انا نحبها ماما مها من قبل وزدت حبيتها لما سمت بنتها ع اسم ماما <3
جواد: خلااااص خلينا ننسو ماما ايناس ونحبو ايناس الصغيرة .. مش قصدي ننسوها بكل لالا ندعولها لكن معاش نبكو عليها باش ماتتوجعش في قبرها اوكي !!
هزت راسها وابتسمت : حاااضر .. هيا نتغدو !!
شديتها من ايدها ورفعتها
#Dudu
