#الحضن_الدافي
الحلقة :: 7 ::
ربعت ايديها واتكت ع كرسي.. زين خداه النوم ..تقول السيارة فيها منووم .. كملت طريقي والمسجل ع الهادي .. واحسن شي ورد ع الصاامت :)
ممكن ساعة او اقل وصلنا لحوش عمي .. تلفتت لقيت ورد واخدها النوم وسايحة ع الكرسي .. تلفتت التالي لقيت زين راقد بالعرض في الكرسي الاخير .. نوضتهم بشويا .. حسيت كـ حنان الام هههه .. اول ماشافت ورد حوشهم نزلت تجري .. لحقها زين لكن ماقدرش يفتح الباب .. نزلت فتحتله
قصي: انزل يابطل هي
نزل زين ولحق اخته .. خديت مفتاح الحوش من السيارة .. قعدت نجرب في المفاتيح ..
ورد: قصي شوووف
تلفتتلها لقيتها تشبح للوردة جنب الباب .. ذابلة .. فقدت اهلها وفقدت الايد يللي تواسيها .. ذبلت او شبه ماتت .. حسيتها تحكي قصة ورد بنت عمي .. متأثرة هلبااا بأدق تفاصيل حياتها
قصي: تو تجي غيرها
ورد: مانحكيش ع الوردة انا :\
قصي: امالا شني !!
تلفتت لقيتها مطبسة ع حوض يللي فيه الوردة .. طبست معاها .. دفني زين جيت طايح في الجدولة .. تمرمدت سوريتي البيضاء .. هذا مااستفزنيش زي ضحكات زين وورد ع منظري .. وقفت وقعدت انفض في سوريتي وننقد مانحاول انقاده .. حواجبي مقرونات .. بعدين مدت ايدها وطقت ايد زين بقوة ومعاها ضحكة استفزاز ..
قصي: ياااسر ورد -_-
ورد: حتي تمسخت السورية
قصي: هيا غير السورية .. انتي تتصرفي بلا عقل
ورد: آسفة
قصي: دوري وين تصرفيها .. قسما بالله ياورد لو اديري حركة تانية مش مزبوطة لما نقول للغولة تجيك في الليل .. ولما نحطك في دار مظلمة ومامعاك حد .. فهمتي ولاه !! .. انا من قبل نكرههم الصغار يابال توا منك ياورد .. انا مانعرفش علاش أمي تبكي كل ليلة تبي تجيب بنية .. تي شن بدير بيهم البنات بس .. تي صغرهم هم وكبرهم هم بالزايد .. والله صدق يللي قال هم البنات للممات .. سووووس البنات وحق ربي .. تو زين عاقل قبل لما وسوستله هالشطانة هبلاته .. والله أمي مرتاحة واحني مرتاحين معاها بس هيا مش حاسة بالنعمة .. تي المفروض تحمد ربي وتشكره ان ربي ماعطاهاش هالمكلوبات هدينا >_< ..
انا انقرز وفتحت الباب .. تلفتت وراي لقيتهم الزوز خاشيين للحوش وكل واحد مشي لداره .. باهي وانا يللي نعارك .. كلامي ماليشي اي قيمة عندهم . بعد مارونو سوريتي يللي فرحان بيها الطرحة انا .. حسبي الله -_-
خشيت للحوش كل شي زي ماخلاه عمي .. نظيف .. ومرتب .. ربي يرزقني بزوجة زي ايناس .. انسانة مثالية بكل المواصفات .. ابتسمت .. وكملت طريقي وقعمزت ع الصالون مقابل التلفزيون .. جنبه طاولة صغيرة وعليها تلات صور .. الصورة الاولة كانت لعمي ومرته في تركيا .. ماحاولتش نقيمها ولا نركز عليها لان عمي شديد الغيرة .. فخليتها ..واتجهو عيوني لصورة تانية لقيتها لورد .. لابسة تاج وشعرها الذهبي ع كتافها .. بالفيلو الابيض والوجه كيف أحمر .. كانت فيها ميزة انها خجولة هلبااا .. بس عنايدية ومكلوبة .. ضحكت وين تفكرت كيف طحت في الجدولة كان موقف بجديات يضحك ولا يحسد عليه .. بس لو كانت هيا مكاني انا مش ح نقصر في الضحك .. رديت الصورة في مكانها لقيت جنبها صورة تانية لزين في العيد اللي فات لابس زبون .. صغار عمي الطروف طالع عليهم رسمي والعربي ري يحفظهم .. حطيت الصورة ونضت بنشوفهم وين وصلو في تنكيتهم .. قربت لجناح النوم لقيت زين يلعب بالكورة .. قدمت شويا لقيت ورد عاطية بالظهر وشادة دب لونه ابيض وع بطنه قلب أحمر .. في وذنه اليمين فيوكة حمرا .. طبست بالشويا لقيتها تهدرزله ..
ورد: خليتك بروحك !!.. سامحني مانحسابش روحي بنعطل عليك هكي .. تو بنرفعك معاي اليوم بترقد جنبي .. آممممم تبي حتى خواتك حاااضر تو نرفعهم معانا .. هي نوض حبيبي هي نمشو .. خللي نشوفو عمو قصي قبل
قصي: ههههههههههههههههههههههههههههه
تلفتتلي وحطت ايديها في نصها وقرنت حواجبها .. وانا نضحك نتني ركابي ونوقف ونأشر بصبعي ونضحك .. مش قادر نشد روحي .. وهيا تفنص وفي عيونها شرار .. حتى من دموعي نزلو من الضحك .. شهقت بدت تتواطى شبحتلها
قصي: خيرك تشبحيلي هكي !!
ورد: -_-
قصي: والله هبلة انتي .. هناك وحدة بعقلها تهدرز للعبة !!
ورد: هدا مش لعبة اصلا
قصي: امالا شني هههه
ورد: هدا هدية من بابا وماما في عيد ميلادي الاول .. ديما يرقد جنبي
شبحتلها .. حسيتها بتبكي .. وندمت لاني جرحتها بضحكاتي .. عطيتها بالقفى
قصي: نراجي فيك البرا ماتعطليش اوكي !!
ورديت وراي الباب وطلعت .. مشيت للمطبخ نشرب في مية .. لقيت ورقة ملصقة ع التلاجة ( بابا جيبلي شكلاطة انا وزين ) .. ورقة تانية لونها اصفر مكتوب فيها ( يارب يسر الأمور ونرجعو لحوشنا سالمين .. ايناس ) .. تلاشت ضحكتي ع الورقتين هدينا .. وحسب مافهمت ان ورد كتبت الورقة لما قرروا ماليها يسافرو .. وايناس كتبتها قبل ماتطلع من الحوش .. كيف اختلاف التفكير .. الاولة ماتحسابش بوها مش لاقي مايصرف غادي .. والأم تفكر في رجوعها لحوشها وصغارها .. مافيش حد يفكر في نفسه .. والوحيد يللي يقدر يحقق هالامنيات هوا شخص واحد بعد الله طبعا .. يللي هوا عمي <3
قعد واقف قدام عتبة الحوش .. نراجي فيهم .. جاني زين يجري بالكورة .. أما ورد جت حاملة ومحملة
قصي: هدا شنو ؟؟
ورد: العابي
قصي: عارفهم العابك امالا العاب الجيران -_- .. قصدي شن بديري بيهم !!
ورد: بنلعب بيهم .. ( قامت دبدوبها قدامي ) .. برا حبوبي لعمو قصي يحطك في السيارة
قصي: هاتيه وهيا عاد عطلنا
ورد: شويا بس نسيت حاجة
قصي: وااااااااااااااك البنات مافيكم من تعطيل .. حتي وانتم صغار شغلتكم تشحورونا -_-
مشت وجت تجري ..
ورد: هيا هيا معاش تكشخ
قصي: هيا -_-
<<<<<<<<<<<<<<<<
في الليل بعد ماتعشيت .. خشيت لدارنا .. بدلت لزين حوايجه .. وطلع مع قصي لصحابه .. وانا شديت كتاباتي وقعدت نكتب في واجبي .. لين خداني النوم
دادا: ورد .. دووودي .. بنيتي .. نوضي ماما نوضي
ورد: دادا .. وين زين !!
دادا: ياروحي حتي راقدة تفكري في وخييك .. قاعد مع قصي .. كملتي واجبك ؟؟
ورد: ايه خللي انضمهم
دادا: نجيبلك طاسة حليب دافي تشربيه وترقدي
ورد: مانبيش انتعبك انا
دادا: لا مافيهاش تعب .. ماداما ماما مهناش اعتبريني انا امك باهي !!
ورد: باه
مشت دادا جابتلي طاسة حليب .. وانا ضميت ادواتي .. ورتبت العابي يللي جبتهم من حوشنا .. ولقيت صورة ماما وبابا يللي خديتها من وسط الحوش .. بوستهم وحطيتها ع الكامدينو .. شربت حليبي .. وخشيت لفراشي .. جت دادا
دادا: بنيتي .. تبي نقرالك قصة ؟؟
#Dudu
