#الحضن_الدافي
الحلقة :: 44 ::
وعدته ووفيت بوعدي .. مرت الظروف سنة وراها سنة .. ماقربت الشجرة ولا الكنز المدفون تحتها .. ابتسمت من جديد .. فتحت باب داري وع طول للجنان .. تحت شجرة الليمون هنا دفنا حكايتنا .. قعمزت ع ركابي وبديت نحفر .. واخيرا لقيته الصندوق .. نفضت التراب من عليه وانا فرحااانة .. حطيته ع جنب .. وفتحته طلعت أول ورقة وكنت انا صاحبة الخط والرسالة هيا
(( يارب احفظ قصي ولد عمي ونحبه .. توا بندفنو كنز وبنقروه لما نكبرو احني الزوز ))
لاني كنت صغيرة فكانت نص الاملاء غلط .. ضحكت طبقتها ورديتها .. طلعت صورة ماما وقريت رسالتي لزين
(( يازين انا نحبك ياخوي الصغير .. وانا بنكون مامتك .. لان ماما مشت للجنة .. ان شا الله تو نكبرو ونمشولها ونتلاقو معاها ياربي .. ديما ادعيلها في سرك وفي صلاتك ))
ضحكت ع كلماتي .. نحساب الموت يجي للكبار بس .. وصلت لرسالة قصي نفضت التراب عليها وفتحتها .. وهنا كانت الفاصلة في حياتي :(
رسالة قصي كانت ::
إلى ابنة عمي ورد الثرثارة .. عمري ماكتبت باللغة العربية الفصحى فلهذا بنترجمهالك بالليبي .. انتي احلا بنية شفتها في حياتي نتمنى تقعدي بنية نظيفة بريئة زي ماكنتي صغيرة .. طيبة وراقية باسلوبك وأخلاقك .. وتكوني حشومية .. ومحترمة .. وشاطرة في الحوش والمطبخ .. وذكية في قرايتك .. وردتي .. بتقعدي العمر كله وردتي يللي نعرفها .. يللي حبيتها من وهيا صغيرة .. انتي تكرهيني لاني نتسهوك ونبصر عليك .. لكن والله من حبي ليك .. تو تكبري تعرفي قداش انا محترمك ونعزك <3 .. ورد ياريت لما تكبري ماتغيريش طباعك الحلوة يللي فيك .. كل مانشوف لعيونك نلقى المحنة للأخ .. انتي صاحبة قلب صافي .. ونية حسنة .. وقلبك معبي حب لامك وبوك وخوك .. لما يولي عمرك 16 السنة نتمنى نشوفك زي مانشوف ورد عمرها 9 سنوات .. ياريت وياريت وياااااريت تقعدي ورد وردتي الثرثارة البكاية والشطانة .. نكتبلك ونضحك وانتي تراقبي فيا زي العبيطة وخاطرك تعرفي شن نكتب انا لكن مستحيل تقريها لين تكبري باش تفهمي كلامي كووويس .. ولد عمك مستفزك قصي :)
سكرت الورقة واتكيت ع الشجرة بديت نمسح ع وجهي وشعري ونفكر في كلامه .. يعني شني ( يللي حبيتها من وهيا صغيرة ) ؟؟؟ .. يعني قصي يحبني ؟؟ .. لالا ياورد هوا قصده حب الطفولة .. قمت تليفوني واتصلت بقصي طوول .. اتأكدت ان باب الحوش مسكر وزين وبابا في الحوش .. ماردت المرة الاولة عاودت مرة تانية رد عليا
قصي: آلووو
ورد: قصي ** وسكتت .. كأنه لساني هرب .**
قصي: من معاي !!
ورد: ورد انا ورد
قصي: ءءء ورد كيف حالك ؟؟ .. من وين تكلمي فيا !
ورد: من رقمي :(
قصي: آها .. خير في حاجة ؟؟
ورد: قصي كنت نقرا في رسالتك :(
قصي: تي كيف رسالتي وانا هدا وين عرفت رقمك .. مرات واحد غالط تحسابين,,,,,
قصيت عليه وعليت صوتي شوي : رسالتك يللي دفنها مع بعض ياقصي تحت شجرة الليمون يوم دفينة ماما .. تتذكر لما قلتلي تليفوني اغلا شي عندي !!
>>>>>>>>>>>>>>>>>
قصي يتحدث ::
ايه اذكرت ياورد .. شن ذكرك انتي فيهم بس !! ,, سكتت ومعاش قلت ولا كلمة .. بس كان صوتها كأن مبحوح ..
قصي: ههههه بس انا ماكتبتش هكي .. بالك الياس وانتي غالطة هههه
ورد: لا والله لا .. هدا انت .. يخي كاتب ولد عمك ومستفزك قصي نهاية الورقة
قصي: والمطلوب !! ** لازم نستفزها شوي .. ولازم مانصدها باش ماتتوهمش زيادة **
ورد: المطلوب تصارحني بحبك ليا وتفسخ كل شي من ميس شن قلت ؟؟
قصي: انتي اكيدة هبلتي ؟ .. كيف نفسخ من ميس ع خاطرك انتي ؟؟ ..ورد بآي عقل تستوعبي راهو كلامي يللي قلته زمان يقصد حب الآخوة ره .. ماضيعيش ياورد باوهامك واحلامك التافهة
ورد: بس هدا كلام وانت كاتبه !
قصي: لو سمحتي ورد مزقي الورقة واعتبريني زمان كنت اهبل وعبيط وكتبت كلام انا مش فاهمه .. ولا نقولك احرقيها واعتبريني ماكتبت شي .. سلامات
سكرت عليها الاتصال .. وحذفت تليفوني ع الطاولة ومسحت ع لحيتي .. اتصلت بأمي ..
قصي: اهلين يمة كيف حالك ؟؟ .. نبيك تتصلي بأم ميس وتحددي معاها موعد العرس .. تمام .. باي باي :)
كنت فرحان ومضايق في نفس الوقت .. فرحان لان ميس ح تكون ليا خلال هالسنة .. ومضايق ع خاطر ورد .. تتوهم وخايف الاوهام تزيد تورطها
>>>>>>>>>>>>>>>
حطيت التليفون في جيبي وخديت الاوراق في الصندوق دخلتهم لداري .. سكرت باب الدار وبديت نبكي .. مانعرفش سبب بكوتي !! .. هل ع خاطر صدة قصي ؟ .. والا ع خاطر قصي ح يكون لميس مش ليا ؟؟ .. مسحت ع وجهي بايديا .. وقعمزت ع الشكماجة ومشطت شعري الطويل .. كنت حاطة صورة ماما ع الشكماجة .. ابتسمتلها .. ومسحت بايدي اليمين ع الصورة .. وقلت بصوت واضح (( حبيبتي ماما ياريتك معاي راني بكيت ع كتفك .. وماضعتش بأفكاري .. راك وقفتي معاي وحسيتي بيا .. الله يرحمك ياأميرتي <3 ))
يوم الخميس بابا تزوج الابلة مها .. زين رفعه بابا لحوش عمي بحكم انه يتحشم منها .. أما قعدت في داري بروحي .. دارت حفلتها البسيطة بس بابا مادارش لا عرس ولا حوسة .. مع الساعة 11 في الليل خش بابا ومها للحوش .. لبست قفطان بسيط لونه بيج واستقبلتها بيه .. حبيت اللون هدا ممكن نعطيها طاقة ايجابية في دخلتها علينا وحياتها الجديدة معانا .. ومادرتش زي ماقالتلي ندى البسي اسود ماتضحكيلهاش لانها في النهاية زوجة أب ؟؟ ..
ورد: نورتينا ابلتي :)
طبست عليا وباستني يمين ويسار : حبيبتي من اليوم نتمنى تقوليلي خالتي تمام !!
ورد: تمام :) ** ابتسامة ظاهرية بس في داخلي غصة وقلبي مخنووق نبي نبكي وخفيت كل مشاعري باش ماتخافش مني **
كنت موتيتلها صفرة عشي بسيطة .. ودرت تشييز كيك وزينته بالفراولة .. بابا يشبحلي وفخور بيا
ورد: تفضلو خودو راحتكم .. انا بنرقد ماتبو مني شي ** مع ابتسامة ناعمة وصادقة **
شبحتلي خالتي مها وابتسمت .. بابا رد عليا: صحيتي ورد بارك الله فيك
ورد: ربي يهنيكم ان شا الله .. هي تصبحو ع خير
خشيت لداري وخليتهم البرا .. اول ماسكرت الباب .. قابلتني كومة بكاء واخترقت عيني ونزلت دموعي بغزارة .. مانعرفش ليش .. هل لان بابا ح يهتم بيها اكثر مع الوقت وتكون قريبة ليه ؟؟ .. والا ع خاطر خدت مكان ماما اغلا انسانة عندي .. خشيت تحت الورغان ورقدت
>>>>>>>>>>>>>>>
جواد يتحدث ::
بعد ماخشت ورد .. كنت شوي خجول من مها .. وواضح عليها السعادة والفرحة المكتملة بوجودي معاها .. شبحتلها بابتسامة
جواد: تفضلي الحوش حوشك يامها
مها: مشكور جواد .. ممكن بس تسمحلي دقائق نفك تسريحتي ونبدل !!
جواد: اوكي تفضلي :)
خشت لداري .. لا ماكنتش داري .. كانت داري انا وايناس .. ومن اليوم ح تكون داري انا ومها .. قعمزت ع طاولة المطبخ ولقيت ورد منظمة الطاولة .. ع يميني كان في تشييز كيك وجنبه صواني وكلينكس .. وشموع الوان .. واختيار متناسق للالوان .. وع يسار كانت في مقبلات حارة مع رز بالخلطة ومشاوي كباب .. ونوعين من السلاطة .. وكاسين كبار عصير .. ادكرت طاولة عشاي انا وايناس لاول ليلة مع بعض ..
جواد: من وين بنبدو ؟؟
ايناس: براحتك
كانت خجولة هلبا .. وابتسامة خجلها كانت تقتلني عشقا .. شديت ايدها برفق وبوستها .. وقمت عيوني فيها
جواد: من اليوم انتي ملكي .. مانبيكش تتحشمي مني تمام !!
ايناس: ان شا الله
جواد: خلاااص انا جعت خللي نبدو هههه
طلعت مني ضحكة عفوية .. ع وقفة مها
مها: اذكرتها صح !!
استوعبت للموقف يللي انا فيه .. قمت عيوني وهزيت راسي بمعنى لا
مها: مش مشكلة .. انا ح نمشي معاك خطوة خطوة وح نعوضك غيابها
ماكنتش متوقع تقدّر موقفي معاها وتستقبل ذكرياتي الآسية بطريقة لطيفة .. قمت عيوني فيها وابتسمت وقلت بهمس ( ان شا الله )
مها سحبت الكرسي وكانت لابسة بيجاما كمام طويلة وسروال ع اللون الابيض .. استغربت في لبسها بس ماحبيتش نقيدها او نلتفظ بكلمات ممكن تجرحها ..
مها: شوف جواد مانبيش تخاف مني اوكي !
جواد: انا نخاف هههه عمره الراجل مايخاف يامها خوديها معلومة اوكي !!
مها: لا الراجل يخاف واكثر من البنت زيادة
جواد: كيف !!
مها: انا نقصد بتخاف مني يعني خوف الاب ع صغاره من زوجته الجديدة عليهم .. الراجل يخاف لما شي يوصله في اهل بيته وصغاره .. الراجل يخاف من الدنيا كلها لما ممكن تجرح صغاره ولو جرح بسيط .. فهمت عليا معني خوف الراجل ؟؟
ماتوقعتش تكون بالثقافة هادي .. وباسلوبها الراقي استقبلت كلماتها بابتسامة .. قمت كاشيكي وكليت لقمة صغيرة من الرز .. وتأملت ملامحها بعد ابتسامتها الواعية وبدت تاكل برقة وخفة .. ممكن هالبنت ح تفيقني من غفلتي السنينية .. من غفلة الدهر !! ..
الصبح فقت بكري .. لاني كنت بنمشي نجيب زين لحوشنا نفطرو مع بعض ومنا يتعرفو اكثر ع زوجتي المختارة .. لبست سوريتي السماوية وسروالي البيج .. وقفت ع الشكماجة بخيت بارفان وكيف بنطلع فاقت بيا مها
مها: صباح الخير جواد
تلفتلها : صباح النور مها
مها: طالع ؟؟
جواد: ايه بنحيب زين يفطر معانا مش ح نعطل
مها: بس كأنه بكري صح !!
جواد: هههههه هداكا هوا ماوصلت ماهدرزت شويا ع قصي لين تكوني انتي وورد تعرفتو ع بعض عن قرب ووتيتو الفطور تمام !!
مها: تمام :)
طلعت من الدار .. خطمت ع دار ورد اطمنت عليها راقدة زي الملاك .. غطيتها وبوستها ع جبينها وكلمتها بهمس ( ربي مايحرمني منك ياقطعة من ايناس انتم <3 )
وواصلت دربي لزين .....
>>>>>>>>>>>>>>>>>
فقت من نومي الساعة 9 الصبح .. تكسلت وقمت راسي كان روشن داري فوق سريري بالتمام .. فتحته وشفت الشمس صبحت عليها .. ونزلت من سريري ضميته .. وقلت اذكار الصباح وطلعت من داري بهدوء .. شميت ريحة حلوة .. آآآآآه ياسلام يامحلى الشعور لما تكون أمك حية وع راسك .. توتيلك فطورك مع بوسة صباحية .. اطمني خالتي مها مش ح نحسسك بابنة الزوج العاقة .. خشيت المطبخ لقيتها لابسة قفطان بسيط لونه ازرق لنص الساق ..
ورد: شن الريحة الحلوة هادي !!
ابتسمتلي خالتي مها وقالت: من اليوم وغادي ح تنوضي ديما ع الريحة الحلوة هادي :)
ورد: الله !! .. ربي يخليك ان شا الله :)
شويا وطق الباب .. شبحتلها باستغراب : تراجي في حد يجيك ؟؟
مها: لا هدا بابا .. بري افتحيله مشي بيجيب زين
فرحت .. مشيت نجري للباب فتحته وتغمرت زين ..
زين: تي حولي خلاص خنقتيني .. حي ع الصنة مانقدرش نتحمل جعاااااااااان
لوح شنطته ع الجنب وخش يجري للمطبخ
سلمت عليه خالتي مها بكل حياء .. وقعمزنا ع الطاولة مع بعض .. ضحكنا وهدرزنا .. وتعرفنا ع بعض عن قرب .. وكنا منسجمين معاها وهيا منسجمة معانا .. وماحسيتش ابدا بالخوف من الايام الجاية معاها .. وهكي كانت زوجة بابا الحنونة .. كانت نعم الزوجة
مرت الايام بسرعة .. وكانت الأم والأخت ليا ولزينو حبيبي .. وتمنيت لو بابا تزوجها من زمان .. بدت القراية .. خش علينا فصل الشتاء .. فصل هادي وناعم .. اكثر فصل نحبه .. لان فيه تنزل المطر وتغسل خطانا .. وتمسح دموعنا اليتيمة ..
نضت الصبح ع صوت خالتي مها .. تكسلت وتوضيت صليت الصبح .. وبدلت حوايجي .. خديت شنطتي وطلعت لقيت زين مقعمز وتفطر فيه خالتي مها
ورد: ماتنسجمش رانا تأخرنا اليوم -_-
زين: باهي -_-
ناض زين غسل يديه وشد شنطته وقاللي : انا ركبت للسيارة ماتأخرينيش -_-
شبحت لخالتي مها وشديت ضحكتي .. قالتلي : بري بسرعة خير مايولي عليك ههههه
طلعت من المطبخ .. ودعتها بابتسامة .. وصلت لباب حوشنا تلفتت لقيتها واقفة مقابلة الباب بتسقدني .. وليتلها وشديت ايدها وبوستها .. فرحت بيا وقالتلي : ورد !!
قمت عيوني فيها وابتسمت : خالتي مها .. شكرا <3
مسحت ع شعري وقالتلي : هذا واجبي .. ردي بالك ع روحك غزالتي <3
ابتسمت وقمت شنطتي وطلعت نجري لقيت بابا كيف جايني
بابا: هيا خيرك عطلتي ؟؟
تلفتت لباب حوشنا .. ودعتني خالتي مها بايدها .. رديت عليها الوداع وشديت في ايد بابا ومشينا للمدرسة .. وصلنا زين .. بعد ربع ساعة وصلت لمدرستي .. ودعت بابا ببوسة ع جبينه ونزلت نجري .. لقيت الطابور بادي ..
خشينا لفصولنا .. قعمزت جنب ندى كالعادة .. وبدينا في رحلة تفاصيل حياتنا الصغيرة
ندى: شن جو الابلة مها معاك ؟؟
ورد: يهبل <3
ندى: ايييح ؟؟ .. عمرها ماكانت مرت البو باهية -_-
ورد: سكري ع الموضوع وقوليلي كيف حليتي السؤال هذا ؟؟
كنت نحاول نبعد بين ندى وخالتي مها بقدر المستطاع .. مانبيهاش تودرني بافكارها زي ماودرتني مع قصي .. آآآخ قصي ليه وحشة .. ليا شهور معاش شفته ولا سمعت صوته .. بعدت عليه نهائيا بس قلبي معاه وعقلي يفكر فيه .. نخصتني ندى ع جنبي .. تلفتلها ( آآآآي )
الابلة: نوضي ياطالبة وقوليلي شن كنت نقول ؟؟
ورد: انا !!
الابلة: ايه انتي .. تكلمي >_<
كيف بنتكلم قصت عليا ندى بكلماتها استفزتني بيها
ندى: ماتواخديهاش ياابلة .. البنت كيف تزوج بوها وقاعدة مضايقة :(
الابلة شبحتلي بنظرات كلها عطف .. وقالت: خلاص قعمزي وركزي مرة تانية معاي
قعمزت وشبحت لندى نظرات حادة .. وتهديد >_<
رن جرس الاستراحة .. ضميت ادواتي وطلعت .. نزلت من الدروج ونسمع في صوت ندى ينادي فيا ( ورد .. ورد وقفي نكلم فيك )
شدتني من ذراعي ولفتني ليها: مش انادي فيك؟؟
ورد: شن تبي ؟؟
ندى: خيرك زعلانة مني ؟؟
ورد: انتي عاجبك الكلام يللي امبكري قلتيه ؟؟
ندى: كنت لازم نقول هكي باش ننقذك من الموقف
ورد: باهي مشكورة .. بعدي من طريقي -_-
نزلت نجري للساحة .. واستمريت في استكراد ندى .. لين جتني رؤى وحنين وجوري وميسم .. هدرزنا وغيرنا جونا .. ماكانوش معاي في نفس الفصل بس كنا ومازلنا صحبات <3
رؤى: خلاص فكيها ورد .. البنت غلطت ومنك السماح
ورد: سكري الموضوع
حنين: اوكي شن رايكم يابنات نغيرو الموضوع ونهدرزو شوي
جوري: ايه صح .. كم حصلتي في اختبار الرياضيات ورد ؟؟
ورد: سكرت الدرجة
مليت من مواضيعهم .. موضة وازياء وقراية وعلاقات .. نبي نحكي لحد يفهمني ونهدرز معاه ويغيرلي جوي .. كانو يهدرزو بحداي وكنت مش معاهم بكل .. بعد تم دوامي .. جاني بابا وروحت .. اول ماوصلت للحوش تلاقيت مع خالتي مها سلمت عليها وخشيت لداري بنبدل حوايجي .. تفكرت تليفوني فتحته وخطر في بالي نتصل بقصي لان الوحيد يللي يسليني ويغيرللي جوي .. اتصلت مرتين ماردش .. بعتله رسالة ( ارجوك قصي رد انا محتاجاتك :( ) .. اتصل بعد ماقري المسج طول ..
سكرت باب داري بالمفتاح وقعمزت ع سريري وفتحت الخط
ورد: آلو قصي
قصي: شن صاير ؟؟ .. في حاجة ؟؟
ورد: لا ماصاير شي .. بس انا مضايقة وانت الوحيد يللي تفهمني
قصي: احكي شن مضايقك هي ؟؟
ورد: حاسة روحي وحيدة :(
قصي: لا مش وحيدة .. بالعكس انتي بين بابا وزينو وخالتك مها ماشا الله عليها .. ماااعتقدش ح تحسي بالوحدة لو سكرتي مني وقعمزتي جنبهم صح ولاه !!
ورد: آآآخ ياقصي .. استاحشت الايام يللي جمعتنا مع بعض .. كل لحظة حلوة عشتها معاك من كنت صغيرة وعمري صفر لتوا .. قصي كل يوم نفكر فيك ونتمنى ترجع ساعة بس تجمعني بيك
قصي: ورد يللي اديري فيه غلط .. شوفي ورد انا نحبها ميس ونمووت فيها ونبي نتزوجها .. انتي ياورد نصيبك شخص تاني مش انا .. توا كبرتي وبديتي تفهمي صح ولاه !! .. وانا شن مقايلك قبل .. ماتجري ورا شي مستحيل يكون ليك :( .. كوني صاحبة شخصية قوية .. وردتي لما كانت صغيرة اقوا من توا .. انا يللي درته معاك كله مش بجميلي .. بالعكس لانك وخيتي الصغيرة الحنينة .. يللي نسأل عليها وتسأل عليا .. وردتي ارجعي لشخصيتك الحقيقية وياسرك أوهام ع روحك مش ليك بكل هالحركات
ورد: صاحبتي اليوم نشرتها للفصل كله ان بابا تزوج ابلتي :(
قصي: وهذا الشي يعيبك ؟؟؟
ورد: لا طبعا .. بس كلهم بدو يشوفولي بنظرات عطف ويتسخفو عليا :(
قصي: هدا الشي مايهزكش .. هذا سنة الحياة يموت واحد وياخد مكانه واحد تاني .. الحياة مستمرة والاشخاص عندهم ساعة مكتوبة من ربي .. ولو حد جرحك بكلمة خليك قوية واقتليه بابتسامتك الواثقة .. ورد زي ماعلمتك زمان .. تبي تقهري عدوك ردي عليه بابتسامة رأفة .. وماترديش عليه الجرح يللي جرحهولك تمام !!
حسيت روحي ارتحت شويا .. ابتسمت .. ضحكت بهمس
قصي: ايوآآآ هكي ورد يللي نعرفها ابتسامتها جبارة .. انا بروحي لما نستفزك وتبتسميلي زمان كنتي تقتلي فيا بالعرق هههههه .. انتي من يومك قوية وفظيعة يابنت ماتحاوليش تغيري شي من شخصيتك ولا تخلي كلمة تهزك .. خليك زي الصقر ديما فوووق ماينزلش :)
ورد: قصي !!
قصي: نعم ؟
ورد: شكرا بجديات .. انا ارتحت بعد ماسمعت كلامك
قصي: ولا يهمك نحن في الخدمة ههههه .. خلاص توا سكري وامشي تغدي ياشينة
ورد: انا شينة هههههههه
قصي: انتي شينة زي خالتك ههههه
تلاشت الابتسامة ليش بس ذاكرها ع لسانك .. انساها لما انا معاك بالله عليك انساها .. قلتها في سري ماقدرت نبوح بيها .. تنهدت .. وودعته وسكرت تليفوني :(
في الليل صبت المطر قوية .. خشيت لداري الدافية وقعمزت ع سريري وقمت راسي للروشن وشفت قطرات المطر ع الروشن تهبل .. قمت عيوني للقمر وكانت صورة ماما عليه .. ابتسمت .. بدي خيالي يسرح بعيد .. هل يكون قصي من نصيبي ؟؟ .. يااارب انت أعلم بحالي :(
سمعت طقات باب خفيفة .. ( ادخل ) .. خشت ابلة مها وجايبة معاها برتقال .. قعمزت ع سريري
مها: تجي تاكلي معاي ؟؟
ورد: وين ؟؟
مها: في دار التلفزيون :)
ورد: اوكي :)
مشيت معاها وقعمزت ع الصالون جنبها .. سكرت صوت التلفزيون .. شبحتلها
ورد: ليش سكرتي الصوت ؟؟
مها: حابة نهدرز معاك .. نصارحك وتصارحيني شن رايك ؟؟
ورد: كيف ترا ؟؟
مها: بما ان الشباب طلعو وقاعدين عنصر نسائي فقط فـ حبيت نفتح مواضيع خاصة بيا عمري مافتحتها لوحدة :)
ورد: آها . احكي :)
مها: نسألك سؤال قبل !!
ورد: تفضلي :\
#Dudu
