#الحضن_الدافي
الحلقة :: 5 ::
قعمزت ع طاولة الكوجينا .. حطتلي دادا طماطم وخيار مقشر قالتلي قرضيه دواير :)
ورد: مني ياكل فيهم ؟؟
دادا: هدا قصي لازم مانحطله طماطم وخيار ودحي معاها -_-
ورد: زي بابا هههههه
اذكرت بابا .. ضاعت الضحكة .. وانا نقرض نشت صبعي .. آآآآآي .. قعدت نبكي :(
دادا جتني تجري: خيرك ورد ؟؟.. قصيتي صبعك ؟
ورد: ايه :(
دادا: خلاص حبيبتي تو نقرضه انا .. وووه يابنيتي نسيتك صغيرة وماتعرفيش ..
جابتلي كينكس: هاتي صبعك ترا وريني :(
مديتلها صبعي وكانت الشهقات مازالت في قلبي .. خش علينا قصي ولقي دادا شادة صبعي وتمسحلي في الدم ..
قصي: آووووو ورد ؟؟.. امتى جت ؟؟
دادا: من امبارح .. انت وين تندري بالله تتصيع ل 2 في الليل -_-
قصي: خيره صبعك :\
جبد الكرسي يللي كنت مقعمزة عليه .. وقعمز كلي الخيارة المحطوطة ع الطاولة
ورد: انجرحت :(
قصي: هههههههه ياناااااري قاعدة صغيرة
ورد: انا كبرت .. لكن مانعرفش نشد الموس :(
قصي: معناها قاعدة صغيرة هههههههههه
دادا: ياسر قصي -_-
حطت الشاهي دادا ع الطاولة .. ومشت بتنوض الياس وزين يفطرو معانا .. قعمزت ع الطاولة .. وخديت طاستي متاع الكاكاو .. شربته في مرة وحدة .. وقصي يشبحلي
قصي: مستعجلة !!
ورد: ايه عندي مدرسة :)
قصي: من بيرفعك ؟؟
ورد: مانعرفش :(
قصي: آممممم باه .. الحمد لله خللي نطلع انا قولي لأمي قصي فطر وطلع اوكي !!
ورد: اوكي :)
غسل ايديه وطلع .. كملت فطوري جي زين .. اذكرت ماما وصتني عليه
ورد: زين حبيبي تبي ممي ؟؟
زين: آبي ماما :(
ورد: تو تجي حااااضر .. هي قعمز جنبي :)
زين: آبي ماما :(
آآآآه يازينو .. حتي انا نبي ماما اكتر منك .. اكيد توا وصلت .. زعما نستنا ماما ؟؟.. لا لا الابلة قالتلي الام ماتنساش صغارها .. قعمزت زين ع الطاولة وصبيتله كورن فليكس .. بعدين سمعت صوت عصفور ع الروشن .. مشيت وقفت ع الروشن .. لقيته طايح .. قعدت نتفرج عليه ..
الياس: ورد شن اديري؟
تلفتتله .. : شوف عصفور شكله بيموت :(
الياس: هههههههه وكيف عرفتي ؟؟
وجي قدم للروشن وشافه ..
الياس: آه هدا شكله رجله مكسورة
ورد: كيف عرفت ؟؟ .. وبعدين كيف يطيح يجي ع الروشن :\
الياس: ههههههه بالنسبة لي كيف عرفت .. وااااضحة شوفي رجله هآآ
وشده بيديه ودخله للكوجينا ..زين جانا يجري ..
زين: شنو هدا :\
ورد: هدا كوكو صغيروون .. شوفه زينو <3
زين: آبي آوفه :)
ورد: ههههههه عادي اطبس الياس شويا خللي يشوفه :)
طبس الياس وراه العصفور .. العصفور مداير دوووشة ..
ورد: كيف نقدر نربيه ؟؟
الياس: ههههههه تبي تربي عصفور انتي ؟؟
ورد: ايه :)
الياس: آممممم شن رايك هدا نعالجه ونشريلك كناري احلا <3
ورد: كيف شكله الكناري ؟
الياس: لونه اصفر وصوته لما يغني احلا من هدا بهلباااااا
زين: حتي انا آبيه :(
الياس: خلاص انجيبلكم زوز .. عصفورة لورد العصفورة ..وعصفور صغير لزين <3
خشت علينا دادا ..
دادا: وين خوك؟؟
الياس: مانعرفش كيف خشيت بنفطر
ورد: ءء قاللي قولي لأمي بنطلع
دادا: لا حول ولا قوة الا بالله .. نبيه يوصل ورد مشي تقول الحوش مدايرليه مسامير
ورد: :(
الياس: اشي اشي كيف زعلت ههههههه تونوصلها انا :)
دادا: ايه باه .. هي زين تعالا انبدلك واطلع العب برا مع ديمة باهي !!
ورد: دادا مني ديمة ؟؟
دادا: هادي بنت جيرانا بنية صغيرونة زي زين .. بالك 3 سنين عمرها علاش تسألي ؟
ورد: ماهو ماما ماتخليناش نطلعو للشارع :(
دادا: لا مش في الشارع .. هيا ديما تجي تلعب في جنانا ع خاطر الدرجيحة يللي دارها عمك المدة يللي فاتت :)
ورد: آمممم باه :)
دادا: هي بري بنيتي البسي حوايجك وجيبي مشطك نمشطلك شعراتك :)
ورد: حااااضر :)
>>>>>>>>>>>>>>>>>>>>
قصي يتحدث ::
كنت مقعمز مع الولاد مع الساعة 5:00 العشية .. خدتنا الدوة .. واصلا خللي تاخد ماعندي ماندير .. وشويا رن نقالي .. أمي <3
قصي: نعم يام
أمي: قصي انت وين ؟
قصي: مع الولاد
أمي: عارفة امالا مع البنات
قصي: هههههه ياريت :\
أمي: شن حسك قلت ؟؟
قصي: شي شي .. شن كنتي تبيني ؟؟
أمي: روح بورد .. كمل دوامها :)
قصي: شني يمة راك فاهمة غلط انا مش سواق الخاص بيها
أمي: وشن فيها بنية عمك الصغيرة .. شن تبيني نقول للجيران متلا ؟؟
قصي: باهي باهي .. هي باي >_<
سكرت من أمي لقيت مصطفى يشبحلي .. ويللي هوا صاحبي راس ..
مصطفى: ان شا الله خير
قصي: بنمشي نروح بورد .. اقسم بالله من قبل نكره الصغار وزادتني توا -_-
مصطفى: هههههههههه طالع عليك دور المربي :)
قصي: والنبي ماتزيدنيش .. هي نتلاقو باي
خديت مفتاحي ونقالي وتسقدت .. يعني لازم منها التشحويرة هادي .. استغفر الله .. المشكلة الياس يخدم في الصحراء ويقعد بشهور فيها .. واليوم وصل ورد وتوكل .. وبوي يطلع بكري للشغل .. يعني مافيش سواق غيري -_- .. المسافة كانت طويلة باش نوصل لورد .. ان شا الله غير ماتزيدنيش حتي هيا وتبدا تنق وتهتري كالعادة -_-
بعد قريب ساعة وصلت قدام المدرسة .. لقيتها مقعمزة قدام باب المدرسة شنطتها قدامها .. ساندة ايديها ع ركابها .. وحاطتهم ع خدودها الحمر من الشمس .. بنت عمي الصغيرة .. كانت قنينة ممكن طالعتلي ههههه .. مدايرة شعرها ضفرة زوز قرينات مع قصتها الحفاري .. ينخاااف عليها تقعد بروحها في الشارع تراجي .. أشرت بايديها بس مانتبهتش .. درت كلاكس .. قامت عيونها لقتني .. فرحت جت تجري .. ركبت السيارة
ورد: عطلت عليا :(
قصي: اصلا عارفك بتدوي .. اسمعي الطريق الطويلة ومادابيك ترقدي راسي يوجع فيا ماتزيديش عليا اوكي !! -_-
ورد: باه
سكتت .. واتكت ع المرش .. وبما أن الجو سخون شويا فتحتلها الروشن .. وبدي نسيم الهوا يخشلها ويغازل في خصلات شعرها .. اطير يمين يسااار .. كأنها تصور في فيديو كليب .. لبست نظاراتي الشمسية وكملت طريقي .. واخيرا سكتت الثرثارة وريحتني
ورد: قصي
قصي: الله اكبررر .. كيف كنت نحمد ونشكر في ربي انك سكتي !!
ورد: انت علاش تكره الصغار ؟؟
كانت الطريق زحمة .. شبحتلها ونحيت نظاراتي فوق .. لقيتها تشبحلي وعيونها البريئة .. مانعرفش شن يللي خلا هالعيون اضعفني .. ممكن مش متعود ع عيون نظيفة .. من لما كبرت معاش قدرت انميز بين العيون النظيفة والعيون مليانة خبث .. انفتحت الطريق .. رجعت لوضعيتي وكملت طريقي من غير مانرد .. شبحة العيل بروحها تخليك تندم انك في يوم قسيت عليه .. بس هيا مايأست ورجعت تسأل من جديد
ورد: علاش ماتحبش الصغار ؟؟.. نسال فيك قصي :(
قصي: لانهم دوشة .. يسببو الصداع
ورد: حتي صغارك ؟؟
قصي: لا حول ولا قوة الا بالله .. أما صغار فهميني ؟؟
ورد: قصدي يللي اديره في صغار الناس بديره في صغارك ولاه !!
قصي: ايه .. ارتاحي وريحي -_-
ورد: تو تشوف شن ندير في صغارك -_-
عيوني قريب طلعو لما قالتها الكلمة هادي .. تهديد من نوع طفولي ههههه
قصي: وشن بديري ياحلوة ؟؟
ورد: زي مادير معاي
قصي: كيف ترا !!
ورد: لما انت تسافر زي بابا مش ح نروح بيهم صغارك من المدرسة .. وبنعطل عليهم مرات .. آممممم وبنكشخ عليهم .. ونمشي لصحابي ومانطلعهمش معاي .. ومش ح نعطيهم حلوة ولا شكلاطة .. و.....
قصي: ياااااسر هدا كله بديريه في صغاري .. حرام عليك ههههههه
ورد: اصلا هما صغارك بيكرهوك :(
قصي: ههههههههههههه ... هي وريني ورد السمحة كيف ترقد ؟؟
ورد: :)
سبحان الله العيل ماعنداش ذرة حقد في قلبه .. اول ماسمعت كلمة سمحة مني .. سمعت الكلام ورقدت .. ياريت تقعدي هكي عمرك كله .. بس الدنيا قاااسية ياورد .. وممكن تتغيري .. وممكن تكبري ..وتكبر معاك الصفات الشينة .. بس ندعي من كل قلبي تبقي حلوة وطيبة وسمحة الاخلاق .. حتي لو ماكانتش الدنيا هكي تبي :)
تلفتت بنتأكد رقدت او لا .. لقيت الشمس جاية ع وجهها .. وعيونها تعصر فيهم بالقوة باش ماتخترقش الشمس عيونها الحلوات .. شديت راسها بالشويا وحولته .. اول ماشديته شدت في ايدي ع طول واتكت عليها
ورد: ماما معاش تسيبيني :(
كانت راقدة .. وتنادي في أمها .. الله مابعده العيل وين يستاحش .. يوجعلك قلبك .. لما اتكت ع ايدي معاش قدرت نحولها .. خليتها راقدة .. لأول مرة في تاريخي نجرب شعور الابوة من غير مانتزوج .. حسيت بشي في داخلي يقولي لازم تتأهل باش تكون الاب .. بدايةَ مع الموقف هدا ..
كــاااااااآآآآآآآآآف
قصي: تي خيره اهوا ؟؟
واحد خش في السيارة من التالي .. جبدت ايدي بالقوة من ورد ونزلتله .. عاركته .. بس لما شفت السيارة ماصارلها شي .. وليت ركبت .. لما قعمزت لقيت المفاجآة ورد تبكي .. بصوت عالي ومبحوح
قصي: ورد خيرك ؟؟
ورد: شي خفت بس :(
قصي: معاش تخافي .. هدا واحد خش فيا عادي ره
ورد: نحسابك تعاركت معاه . انا نخاف من العراك :(
قصي: ههههههه امسحي دموعك هي ربع ساعة ونوصلو :)
ورد: باه .. آآه اذكرت :)
جبدت شنطتها القدام .. وفتحت الجيب الصغير البراني وانا هدا كله نراقب فيها .. طلعت صورة أمها وبوها مع بعض .. ماركزتش بالزبط شن المضمون ..
قصي: شن اديري؟
ورد: هادي صورة بابا وماما بنخليها ديما معاي :)
قصي: هههههههه
حطت الصورة ع صدرها ونعسها النوم من جديد ورقدت ..
قصي: ورد ..هي نوضي وصلنا :)
ورد: قصي
قصي: هآآآآآ
قربت من كرسيا وباستني ع خدي <3
ورد: شكرا :)
مافهمت شي ..اصلا هيا تكرهني كيف تبوسني ههه .. ديما انضايق فيها .. مانعطيهاش فرصة بكل في الدوة .. ماتعرفش الكره غير انا عقلي صغير ..
>>>>>>>>>>>>>>>>>>
خشيت لقيت زين يلعب بالقطار .. اول ماشافني جي يجري تغمرني
ورد: زينووو انا روحت نبدل حوايجي ونلعب معاك :)
زين: :)
خشيت لقيت دادا تتفرج ع قناة اكل .. سلمت عليها
دادا: عطل عليك قصي؟؟
ورد: ايه شويا
دادا: هالقرد كلمته بكري .. تو يخش نوريه
ورد: :)
دادا: جعانة ؟؟
ورد: ايه
دادا: تو نوض نحطلك غداك انتي وزين ماباش ياكل معانا يبيك انتي توكليه :)
ورد: ههههههه
ناضت دادا خشت للكوجينا لحقتها .. حطت صونية وبدت توتيلي في صفرتي
ورد:ماما كلماتك اليوم ؟
دادا: ءءءء ايه تسلم عليك :)
جيت تجري جنبها: داادا .. امتى بيروحو ؟
دادا: آمممم بالك الاسبوع الجاي
ورد: آوووف .. باهي امتى كلموك ؟
دادا: الصبح بعد ماطلعتي :)
ورد: باهي قداش تبي الطيارة توصلهم ؟؟
دادا: آمممم بالك ساعتين مانعرفش
ورد: دادا .. اعطيني نكلمهم :)
دادا: ءءء :(
ورد: بالله عليك بالله عليك
شديت قفطانها ونهز فيها .. خش علينا قصي
قصي: ووووه قاعدة تنقي انتي !!
ورد: نبي نكلم ماما
قصي: ورد انتي كبرتي .. شوفي زين كيف يلعب وساكت
ورد: زي مايعرفش
قصي: يمة شن غدانا اليوم ؟
دادا: كسكسي :)
قصي: آآآآه جعااان جوعة مش طبيعية
شبحتلهم الزوز كيف نسو موضوعي .. قمت شنطتي وطلعت بنبدل حوايجي .. تو نفكر كيف نكلمهم :(
>>>>>>>>>>>>>>
لماطلعت ورد لحقتها بعيوني .. تأكدت خشت لدار تبدل .. تلفت لأمي
قصي: يمة .. علاش ماتبيهاش تكلمهم ؟؟
أمي: ماكلمونيش ومشغولة عليهم حتي انا :(
قصي: تو نشوفه ع الفايبر بالك اونلاين
أمي: ايه شوفه سلم وليدي والله الصغار يقطعو القلب
قصي: ايه .. آهو متصل خللي نشوفه
أمي: شن قالك ؟؟
قصي: راجي شوي بعتله
طلعلي Jawad يكتب الان ....
جواد: اهلين قصي
قصي: وينك ياعمي
جواد: موضوع طويل
قصي: احكيلي انتم وصلتو ؟؟
>>>>>>>>>>>>
خشيت لدار الضيوف يللي وتتهالنا كــ دار لينا .. فتحت الدولاب لونه وردي صغير بابا خداهولنا قبل ليسافر .. فتحته وخديت توتي .. طاحت صورة ليا انا وماما قبل مايجينا زين .. قعدت نتفرج عليها .. وبعدين قمت راسي لقيت التقويم يللي فيه الايام والشهور .. نزلته وخديت قلم قلبت الصورة .. وكتبت عليها ( ذكر 12\9 . من ماما لورد ) ..
ابتسمت .. ورديت الصورة بين حوايجي في دولابي .. وسكرته .. بدلت حوايجي .. لبست بيجامتي عليها دبدوب احمر وتيشرت ابيض وسروال احمر .. فتحت الباب لقيت قصي ودادا يهدرزو .. بس بين هدرزتهم سمعت اسم باابا ( جواد <3 ) :o
#Dudu
