#الحضن_الدافي
الحلقة :: 35 ::
( قصي سلم ولدي نوووض مش عندك دوام ولاه !! )
مسحت وجهي بايدي لقيت أمي واقفة ع راسي .. من غير ولا كلمة نضت للحمام طوول .. غسلت وجهي وتوضيت صليت الصبح .. وخشيت للمطبخ شميت ريحة القهوة معبية المكان .. تلفتت لقيت ورد واقفة تبتسملي ..
قصي: صباح الخير :)
ورد: صباح النور قصي .. قهوتك تلقاها في الجنان
قصي: ههههه انتي صدقتي !
ورد: انا نخدمك ومرتاحة لانك تستاهل كل خير :)
تلاشت الابتسامة بسرعة .. وبعدها ابتسامة اكبر وبينت سنوني
ورد: ان شا الله ادوم يااحلا خو في العالم كله
قصي: شن مناسبة الكلام الحلو هذا ؟؟
ورد: ههههههه مافيش مناسبة بس الاخت ديما تحس بخوها :)
قصي: اوكي ** حك خشمي بالشويا وبعدين ابتسمت ** .. ربي يحفظك ليا يااختي الصغيرة ياثرثارة
ورد: آوووووف ياقصي .. علاش تسمي فيا ثرثارة ؟؟
قصي: ههههههه
طلعت للجنان وانا نضحك ع تصرفاتها العفوية يللي تخلي فيا نفرح وتعطيني طاقة ايجابية .. مشيت لطاولة الجنان لقيت قهوتي وبريوش مدلع .. كليته ورفعت معاي مق القهوة وركبت سيارتي ولعتها .. وتوكلت لخدمتي <3
>>>>>>>>>>>>>>>>
مانبيكش تزعل .. مانبيكش تتضايق .. ونكره اي حد يضايقك والا يغلط فيك .. انت خوي الكبير مانرضا شي فيك .. ركبت لشقتي وفتحت اللاب توب وكتبت ( ربي يحفظك ياأحلا اخ للثرثارة :) )
ووبديت في رحلتي االمنزلية .. كملت مع الساعة 2:00 نزلت لحوش عمي باش نساعد ماما فاطمة في الغدي .. خشيت للكوجينا لقيت معاها رزان وكانو يهدرزو في موضوع ولما خشيت سكتو .. حسيت روحي في موقف أخخخخي .. ارتبكت شوي وجيت طالعة وقفتني رزان بكلماتها ( وين ماشية ؟؟ )
ورد: ءءء كنت نبي نساعد ماما فاطمة في الغدي لكن شكلكم تحكو في موضوع خاص شوي
رزان: ههههه لالا مش خاص .. خشي خودي علي السلاطة بنوض نشوف حمودي
ورد: آوكي
خشيت خديت منها الموس وكملت باقي تقريض السلاطة .. وماما فاطمة طفت ع الطناجر وقالتلي ( وريدة كان كملتي السلاطة ديريلنا كيكة من تحت يدياتك )
ورد: حاضر ماما فاطمة :)
ابتسمت وردت عليا الابتسامة وطلعت من الكوجينا .. كملت السلاطة غسلت الموس .. شويا وجتني رزان شادة تليفون ماما فاطمة في ايدها ..
رزان: هاك ورد صاحبتك ندى تبيك
فرحت واتصالها جي في وقته لاني نتحشم نطلب من ماما فاطمة تليفونها باش نتصل بصاحبتي ..
ورد: شكرا رزان
رزان: العفووو
خديت منها التليفون ورديت بكل فرح وسعادة
ورد: ندوووو حبيبتي ليك وحشة يابنت
ندى: انتي اكثر والله .. شن جوك !!
ورد: الحمد لله انتي كيف حالك ؟؟
ندى: الحمد لله .. قولي بوك روح والا قاعد مسافر ؟؟
ورد: ءءء علاش شن تبي فيه !!
ندى: نبي نتزوجه هههههههآآآآي .. ضحكتيني وحق ربي هبلة .. شن نبي في بوك متلا !! .. انا عازمة صاحباتي كلهم ونبيك تجي
ورد: آآآآه عادي تو نقول لقصي يرفعني :)
ندى: قصي والدك وناسيك ؟؟؟
ورد: آووووف ندى انتي شن تبي في من يوصلني ؟؟ .. المهم كان قدرت تو نجيك
ندى: مش كان قدرتي .. نبيك تجي ضرووووري
ورد: وليييش !!
ندى: بنكيد بيك بنات خالي ههههه
ورد: مافهمتكش ؟؟
ندى: عبيطة .. المهم دبري لازم تجيني وبعدين نفهمك كل شي
ورد: تمام .. الساعة كم ؟؟
ندى: الساعة 6 العشية اوكي!!
ورد: اوكي ... ءءء ندى اذكرت .. قصي امس دارللي حساب ع الفي سبوك اعطيني نضيفك :)
ندى: بجديات ؟؟.. احلا قصي والله .. اعطيني اسمك تو نضيفك
ورد: اسمي ورد جواد
ندى: والصورة ؟؟
ورد: صورة قطوسة
ندى: ههههههه ياحبيبتي هادي صورة شخصية .. انتي قطوسة متلا !!
ورد: آووووف ياندى قصي قاللي ماديريش صورتك عيب
ندى: اهم شي عيب مش حرام
ورد: عيب والا حرام .. المهم يللي يقوللي عليه قصي انا بنرد بحاااضر وأمرك مطاع
ندى: باهي يابنتي المطيعة .. لما بتجيني تو نخلي باابا يعطيكم النعتة بالزبط اوكي !!
ورد: تمام :) .. سلامات
ندى: سلامات
سكرت من ندى .. ورديت التليفون لماما فاطمة .. ومن قجر المطبخ طلعت مذكرة للاكلات وقلبت صفحاتها لين لقيت كيكة التمر واكيد ح تعجب ماما فاطمة وعمي .. طلعت مطاليبها .. عشر دقايق وكملتها حطيتها في الكوشة ..وقعمزت ع طاولة المطبخ .. خش عليا الياس
الياس: شن اديري !!
ورد: ندير في كيكة
الياس: آمممم وين زين ؟؟
ورد: مانعرفش ممكن فوق
الياس: بعدين اخطمي عليا في الحوش بنعطيك هديتك انتي وخوك من سفرتي
ورد: اوكي
طلع من المطبخ .. وكلمته بكل برود لاني معاش نطيقه .. كل شي لولده وكان غلطنا في ولده ولو حاجة بسيطة يبدا يعيط ويكشخ علينا وممكن حتى يضرب .. بعد ماطابت الكيكة طلعتها ومشيت لدار المعيشة لقيت عمي متكي يتفرج وماما فاطمة تلعب في حمودي وجنبها رزان
قعمزت جنب عمي وقلتله : عمي صاحبتي كلمتني وتبيني نجيها للحوش !!
عمي: حوشها بعيد ؟؟
ورد: مانعرفش وينه ؟
عمي: شوفي قصي يرفعك
ورد: انا نبي ناخد موافقتكم بس
عمي: بري عادي
يكلم فيا بكل برود .. ماكلفش روحه حتي يشبحلي .. زعلت من الداخل وقمت عيوني في ماما فاطمة ورزان لقيتهم مش مهتمين بكلامي بكل .. وممكن حتى مايعرفوش شن كنت نحكي :(
استاذنت وركبت شقتي .. تلوحت ع الصالون وقعدت نبكي ونبكي ونبكي .. وينك يابابا !!
>>>>>>>>>>>>>>
جواد يتحدث ::
انا هنا يابنتي .. بس مش لاقي مني يطلعني .. عارفك محتاجيتيني .. وعارفكم انتم الزوز في أمس الحاجة ليا .. نبهني صوت الحارس ( جوااااد عندك زيارة )
قديمة الكلمة صح .. بس كنت بحاجة ليها نبي نعرف كل الاخبار ع صغاري .. طلعت نجري ودخلني لغرفة .. لقيت فيها شخص عريض وطويل لابس سورية سودة وسروال اسود جينز .. وسبيدرو ابيض واسود .. حاولت نسترجع ذاكرتي من هالشخص يللي قدامي !! .. بس ماقدرتش لين تلفت وعرفته .. ليا سنين عليه وع حكاويه .. وليد صاحبي <3
تغمرنا بعض والقلوب تكلمت .. قعمزت
وليد: كيف حالك ياجواد ؟؟
جواد: الحمد لله .. كيف حالك انت !!
ومن بعد 5 دقايق هدرزنا ع الحال والاحوال نطق بجوهرته
جواد: قول ياصاحبي انت تمووون
وليد: انت عارف انا عندي خوي شاب صغير يعني عمره تقريبا 27 سنة
جواد: ربي يحفظه ان شا الله
وليد: الله يسلمك .. الموضوع هدا يخصه
جواد: يخصه كيف !!
وليد: جايك طالب انك تعطينا بنتك
جواد: نعطيكم بنتي !!
وليد: ايه ورد لما حسبت عمرها توا 15 السنة ولاه !!
جواد: ايه هوا عمرها 15 السنة صح .. بس البنت ,,,,,,
وليد: ماتقولش صغيرة .. بنتك توا قاعدة في حوش عمها وتقريبا خوك عنده ولد شاب وعزابي ولاه !!
جواد: خاطب ليه 4 سنين .. انت شن القصد في كلامك ؟؟
وليد: البنت عايشة في حوش خوك من غير محرم
جواد: خوها معاها وبعدين مرت خوي وخوي مايقصروش
وليد: انا مشيت لخوك وقاللي اخبار ماتسرّش بكل
جواد: ماتسرّش كيف ؟؟
وليد: انت ماتندريش ان بنتك وخوها في شقة بروحهم ؟؟
جواد: شقة بروحهم وين ؟؟
وليد: الموضوع اهوا يحكيلك عليه ولد خوك انا جايك في موضوع ومن صالحك توافق
جواد: تي كيف انت تقوللي نبي بنتك ورد الصغيرة لخوك ؟؟ .. راهو كبير عليها
وليد: لا يعتبر بينهم سنين بسيطة يعني 12 السنة تقريبا
جواد: تشوف فيها شويا ؟؟
وليد: الولد شافها وعجباته واعطي لبنتك فرصة بالك يعجبها ؟؟
جواد: وين شافها بس !!
وليد: لما مشيت سألت عليهم رفعته معاي لان كنا قبلها في مشوار انا وياه .. وشافها هيا خاشة للحوش
جواد: وين كانت هيا !
وليد: شن تسال فيا !! .. المهم لو حاب تسأل اكثر ع خوي تفضل والله مافي حاجة تردك .. وامتى مانجيك المرة الجاية نبي منك الرد ونتمنى ناخد الموافقة
جواد: انت تتكلم بجديات ؟؟
وليد: انا لما جيت خطبتها لان هدا من صالحك .. البنت اولها واخرها بتتزوج .. والراجل الباهي عمره مايرتد .. وبعدين بنتك عايشة في شقة بروحها وياااعااالم انت امتى تطلع وتعيش معاهم .. لازم ماتضمن لبنتك حياة الراحة اظن ياسرها عذاب يللي شافاتها من وهيا صغيرة .. وركز في كلامي ماتضمنش خوك ممكن يعاملها كويس يمكن يوم يقسى عليها .. وخوها صغير ع الاقل حتى لو قعد مع عمه عادي في النهاية راجل يكبر ويتمرمد عااادي .. بس البنت ؟؟ .. ولد خوك تقريبا قاعد عزابي والشطان ماماتش .. وتوا خود راحتك وفكر .. انا قلتلك نضمنلك خوي عمره ما ح يغلط فيها ولا يأذيها .. لانه الولد من لما شافها وهيا يقووللي نبيها صغيرة ونربيها ع ايديا ونعلمها كل شي وعااادي متقبل حتى لو بوها محبوس وبآي تهمة مايهمش المهم البنت تكون ليا :) .. وبيني وبينك فكرت ان نمشي نخطبها لخوي ونقرو الفاتحة باش يكون حلالها ويخش ويطلع عليها ويقضيلها حاجاتها .. فهمت عليا ولاه !!
سكتت ومعاش عرفت نجاوبه .. كلامه لو بتجي بالمنطق كله صح .. بس قصي ولد خوي عمره مافكر غلط في ورد .. يحبها زي اخته ويدللها وتدلل عليه .. آووووف بدي الشيطان يلعبلي في عقلي .. كنت مقعمز في فراشي وكلام وليد يرن في وذني رنة تسبب الصداااع ومش مخليتني نفكر في غيرها .. بنتي صغيرة شن تعرف من مسؤولية راجل وحوش ؟؟ .. عمرها 15 هادي سن النضج وكيف تتعلم تتصرف مع الناس وكيف تتعامل معاهم ؟؟ .. هادي السن يللي بتكتشف فيها كل شي بقلبها قبل عينها .. نبيها تكبر اكثر باش ترسم فارس احلامها وتراجيه .. مانبيش نغمها بسبب الظروف يللي عاشت فيها .. صغيرة والله صغيرة .. باهي انا شن يللي يضمنلي انها مرتاحة في حوش خوي ؟؟ .. يااارب كون في عوني <3
#Dudu
