#الحضن_الدافي
الحلقة :: 34 ::
.. وفجآءة !!
انفتح باب الجنان .. وخش منه الياس ورزان وحمودي بينهم .. نضت نجري وقفت قدامهم
ورد: روحتو ؟
الياس: هههه مازال في الطريق
سلم عليا باطراف ايده وسبقنا للحوش .. وانا سلمت ع رزان وتغمرت حمودي ..
ورد: استاااااحشتك حموووودي هلبااااا
رزان: شويا ارخيه ورد تاااعب من السفر وبيرقد
ورد: اوكي الحمد لله ع السلامة مرة تانية :)
رزان: الله يسلمك
وخشت للحوش ..وقربت من باب الحوش تلفتتلي ( عمتي هنا !؟ )
ورد: لا طلعو
رزان: آآآآآآه الحمد لله :)
ابتسمت وخشت لحوشها .. وماخشتش لحوش عمي ..وليت قعمزت .. وطلعت مذكرتي وكملت كتابتي .. شويا وطق الباب .. نضت فتحت الباب خشت ديمة .. سلمت عليها وقلتلها ( تفضلي ) .. خشت معاي وقعمزت مقابلتني ..
ديمة: وين زين ؟؟
ورد: راقد الداخل
ديمة: آممم خسارة
ورد: ههههه تبي تلعبي معاه ؟؟
ديمة: لا بابا شرالي آي باد وبنصور معاه وبنزلها ع الفيس ههههه
ورد: شن هوا الفيس ؟؟
ديمة: facebook
ورد: شن هوا هدا ؟؟
ديمة: ههههه ماتعرفيشي ؟؟
ورد: لا .. لعبة ؟؟ .. والا برنامج طبخ والا شني بالزبط ؟؟
ديمة: مش سامعة ببرامج التواصل الاجتماعي ؟؟
ورد: تقريبا :(
ديمة: ايوااااا .. هدا ياحنة تفتحي حساب فيه واضيفي يللي تبيه وتقدري تهدرزي شات وتنزلي صور وتعلقي وديري اعجابات لهلبا صفحات
ورد: ؟؟؟ والله مافهمت
ديمة: ههههههه ماعنديش نت توا كان هدا وريتك كيف :)
ورد: آها .. يشتغل بالنت هوا ؟؟
ديمة: ايه امالا كيف بتتواصلي مع ناس بعااااااد
ورد: ناس بعاااد ؟؟ .. قصدك حتي المسافرين نقدر نهدرز عليهم؟؟
ديمة: طبعا ياحبيبتي .. ان شا الله حتى في أمريكا تقدري توصليلهم بالبرنامج هدا
ورد: وكيف البرنامج هدا باه ؟؟
ديمة: نشرحلك بالتفصيل حااااضر
واستمرت ديمة تشرحلي في البرنامج بس شفوي مافهمتش بالزبط .. لكن اكيد في العملي ح تزبط معاي .. وفكرت اني نتواصل مع صاحبتي جنى في فرنسا .. بس كيف ح نوصل لحسابها ؟؟!!
>>>>>>>>>>
قصي يتحدث ::
كنت راقد لما خش عليا الياس يقربع ويدوووش باش انووض .. فتحت عين بعين وسألته ( روحت ؟) .. عدلت تقعميزتي ومسحت ع وجهي
الياس: سؤال غبي زي صاحبه
قصي: الحمد لله ع السلامة .. قلتلي راني جيتك للمطار
الياس: مش ضروري .. المهم رزان بتمشي بتسلم ع امها
قصي: آها .. خيركم ماعطلتوش غادي ؟؟
الياس: عمتي لمية اتصلت برزان وقالتلها مريضة وتاعبة وهلبا قصص .. اطريت امس نحجز باش اليوم نروح
قصي: بس امس اتصلت بيا ؟؟
الياس: بعد ماكلمتك الموضوع هدا كله
قصي: آآآه .. ياسيدي تمشي الاموروترجع مرة تانية ع خير ان شا الله
الياس: ان شا الله .. هي سلام
طلع الياس وليت رقدت .. مع الساعة 6:00 نضت خشيت توضيت وصليت العصر .. وطلعت للمطبخ .. لقيت أمي مقعمزة ع طاولة الاكل .. جبدت الكرسي وقعمزت
قصي: خيره وجهك هكي ؟؟
أمي: كيف تبيني نكون متلا .. فرحانة والضحكة من الشق للشق متلا !!
قصي: شن في؟؟
أمي: خوك الراجل يللي مافيش زيه تنين سيب اماليه ومشي لامالي المفعوصة يللي معاه
قصي: هههههه بس هوا جي هنا قبل
أمي: ومالقانيش .. ماكلفش روحه حتي يتصل بيا ويخبرني
قصي: آها من قالك روح امالا ؟؟
أمي: لقيت ورد في الجنان وقالتلي
قصي: قاللي عمتي مريضة
أمي: ماتعرفش عمتك وحركاتها امالا .. بالله خليني ساكتة
قصي: اوكي .. انا طالع تبي شي؟؟
أمي: ايه هوا هدا .. انتم دورو وانا نقعد نسحن عليكم بروحي .. نعس ونسهر ونربي ونكبر وتجي بنت ماتسوا قرش تاخدهم ومعاد تسالو عليا
قصي: لا حول ولا قوة الا بالله .. انا مش زي الياس يمة خلاااص سكري هالسيرة
أمي: آآآآآآححح
طلعت من المطبخ للجنان .. وهنا لقيت ورد تسقي في الوردات .. سلمت عليها
ورد: قصي انت طالع !!
وانا كيف لفيت وجهي بنطلع .. تلفتلها ( ايه في حاجة !! )
ورد: شن هوا الفيس بوك ؟؟
قصي: انتي من قالك عليه !!
ورد: ديمة امبكري قالتلي عليه ان نقدر نتواصل مع ناس بعاد
قصي: آمممم نروح نفهم منك كل شي .. غير توا مستعجل اوكي !!
ورد: تمام شكرا قصي :)
قصي: آوووووف شن قلنا ع شكرا !!
ورد: ههههه آسفة :)
طلعت .. ركبت سيارتي وانطلقت .. مشيت لخيمة عرس صاحبي أسامة .. قعمزت في كرسي بين مصطفى وصاحبي لؤي .. تلفتت لمصطفى لقيته يضحك
قصي: خيرك تضحك ؟؟
مصطفى: خسارة مالحقتش لما قالو الاسماء
قصي: ههههه ماتوقعتكش تافه للدرجة هادي
مصطفى: هههههه خيره لؤي سارح ؟؟
قصي: بالك يحب هههههه
مصطفى: مااعتقدش هدا مايمشيش معاه حشومي مايعرفش يقول كلمتين ع بعض لبنت
قصي: هادم يللي يقدو البنات صدقني
مصطفى: غير فوته هدا كله وقوللي ماصار شي مع ميس ؟؟
قصي: نفكر نفوت موضوعها بكل بكل
مصطفى: ايييح ع اساس تقدر ؟؟
قصي: يهون الحب ولا تهون الكرامة
مصطفى: تي وين كلامك اول ماحبيت ** قعد يعلق عليا** مافيش كرامة مع الحب .. والله توا فيك كف خير من الدنيا ومافيها
قصي: ههههههه كلب وواطي والله .. وانت شن صار مع مرام ؟؟
مصطفى: آهو عركة كل يوم ولله الحمد
قصي: علاش !!
مصطفى: والله مش بعيد ياقصي وقعنا في الفخ
قصي: يعني حالك مش اسوء من حالي
مصطفى: المهم التنين نكدنا من لما خطبنا هههههه
قصي: بالنسبة لمرام معاها حق لما تعاركك تي البنت تبي تتزوج ياسرها
مصطفى: وميس !!
قصي: وميس وحق ربي ماهي ميس الاولة لكن نعرف كيف نداويها
مصطفى: نبرة صوتك خوفتني ره
قصي: تي تعرف لو .........
قطع علينا لؤي وين قال ( حاشيين روسكم في بعض زي البنات ههههه )
مصطفى: آهو خش معانا في الهدرزة
لؤي: ع شنو تحكو ؟؟
مصطفى: قصي بيكمل حوشه وياخد في رايي
ابتسمت .. بس بالي مشغول في موضوعي مع ميس .. نسمع في مصطفى ولؤي يحكو ع حوشي واثاثه وانا صاحب الحوش مش هاامني الموضوع بكل .. فتحت قفل تليفوني مالقيت شي لا مسج ولا مكالمة من ميس .. تنهدت ..
روحت انا ومصطفى في سيارتي .. خطمنا ع قهوة خدينا زوز نسكافي ومشينا ع البحر .. درست سيارتي وفتحنا ابواب السيارة القداميات .. وبدينا ندردشو ع عدة مواضيع وماجبدناش سيرة مرام ولا ميس ..
قصي: ههههههه ايام كان اسامة كل يوم هارب من المدرسة .. مش عارف كيف نجح
مصطفى: امالا تتفكر لما نزلونا للادارة هههههه .. تي عااااااار
قصي: انا كنت عاقل والله لكن انت هبعت بيا .. وضيعتني في جرتك
مصطفى: ههههه كاني مضيعك راهو هدا مش حالك .. نعتبر انا في الدرجة الاولة في الخبت ره
قصي: آهو ماشا الله اسامة تزوج وعقل تقول مش هوا .. عام تاني ويكون بابا .. ونقعد انا وياك نفس التقعميزة نسكافي وبحر ههههههه
مصطفى: ههههه مرات التقعميزة الجاية اديدش في ولدك معاك
قصي: بالتريس ولاه !! .. والله مامشي معاي جو المسؤولية بكل .. بنقعد عمري كله صايع ههههه
مصطفى: قاعد ماجربتش انت .. لما تجرب تي والله لما تحبها المسؤولية هادي وكلها تسهل وتتبسط عندك .. بس اختيارك من الاول لازم يكون صح باش حياتك تكمل صح الصح
قصي: زي اختياري لميس .. كل يوم متكدر وشايل حمل جبال .. وهيا ولا معبرتني ولا حاسة بيا .. يومين ياراجل حتى مسج ماتفكرتني بيه !!
شبحتله .. نظرات يللي في وجهها كلها حزن وضيق عليا .. اتكى ع كرسي وحول عيونه عليا
مصطفى: ماتعرفش شن ظروفها ياراجل
ضحكت ضحكة هزوة: ظروفها !! .. ظروفها تخليها تبعد وتنساني !! .. ظروفها تخليها تضحك وتلعب مع غيري !! .. ظروفها تخليها تهملني !! .. ظروفها تخليها اضايقني بكلامها !! ..وتتجاهلني ؟؟ ..وووو قداش تبيني نحكيلك يابو صطيف ؟؟ .. بس وحق ربي لو شديت عليها حاجة بس .. بعدها مش ح تشوف النور وقول قصي قالها .. واذكرني بيها .. تمام ؟
مصطفى: والله اللهجة تخليني نخاف عليك اكثر من آي ممكن اديرهولها !!
قصي: ماتخافش عليا انا راجل .. بس هيا لازم تعرف انها بتلعب ع راجل .. وحق ربي لو جيت نذل وواطي وضحكت عليها راهي توا تجري في جرتي وغير شن نبي بس .. لكن لما تحب وتكون راجل مافي وحدة تقدّر هالحب .. ولا تعطيك زي ماعطيتها
مصطفى: قصي اسمعني وخيي .. حاول ماتخليش شعور الانتقام يسيطر عليك اوكي !!
قصي: تي اختها كانت من زينة البنات .. اخلاق .. احترام .. ادب .. حشمة .. وبنت اصول وامها رباية .. مافهمتش تقول مش اختها اقسم بالله .. تقول مش نفس الرباية هما الزوز !!
مصطفى: المتربي من ربي ياخوي ره
قصي: غير هالموضوع كل مانتفكرها نحس في نار في جسمي تحرق فيا
شد ع كتفي وقال: اهم شي راحتك
ابتسم .. رديت عليه بابتسامة ولعت دخاني .. بس هوا كان مضايق عليا .. حتى لو نضحك مستحيل يصدق ضحكتي .. فاتت الليلة .. مافقش من هدرزتي معا هالا اتصال أمي بيا .. نبهتني ع صلاة العشي يللي فاتتني .. وع الساعة كانت 1:00 في الليل .. يعني من 8:00 وانا مقعمز ع البحر مع مصطفى وع طاسة نسكافي لتوا ماكلينا حاجة .. فتحت باب الحوش وخشيت تلقتني أمي
أمي: وين كنت هدا كله !!
قصي: مع مصطفى
سكرت الباب ونحيت السبيدرو .. وخشيت للكوجينا عبيت طاسة مية وشربتها وأمي هدا كله تراقب فيا
أمي: تعشيت !!
قصي: مش جعان
أمي: صايرة معاك حاجة ؟؟
قصي: لالا
طلعت من المطبخ وخليتها واقفة .. خشيت لداري نحيت سوريتي ولوحتها ع الارض .. وانطرحت ع سريري .. وقمت تليفوني نتمنى بس مسج من ميس حتي لو كان فيه كلمة وحدة .. ولما مالقيتش اتصال ولا رسالة حذفته ع الحيط .. وحطيت ايديا ع عيوني بعصبيه .. خشت عليا أمي ( خيرك ياولدي !! )
ولما شافت تليفوني محذوف وكل طرف في مكان .. وشافت سوريتي ملوحة .. قعمزت جنبي وحطت ايدها ع صدري وبدت تقرا عليا في القرآن .. حسيت براحة داخلية .. قعمزت وتغمرت أمي من غير رادة مني بديت نبكي ونبكي .. حضنتها بقوة .. العصبية يللي فيا كلها تبخرت .. بديت نبكي بهستيريا .. حاولت تهديني بس دموعي مش راضية توقف .. ذرفت بأصعب من الاول .. حوالي ساعة او أكثر وانا في حضنها .. دموع داسهم ليا سنة .. كلها صبيتها ع كتف أمي .. ولما حسيت بيها اضايقت وبدت تبكي معاي .. بعدت شوي من حضنها .. وانحذفت ع السرير
قصي: يمة سكري الضي بالله عليك
مسحت دموعها وحطت ايدها ع وجهي
أمي: خيرك ياولدي شن يللي مضايقك ؟؟
قصي: بالله عليك خليني بروحي .. غدوا بينا كلام
أمي: باهي حاضر .. تصبح ع خير
سكرت الضي والباب وطلعت .. ومعاش نذكر شي بعدها .. الا صوت العصافير اقتحم طبلة وذني وفيقني من نومتي يللي كنت نتمنى انها تكون الابدية باش مانتعذب اكتر من هكي .. فتحت عيوني بصعوبة .. لقيت سوريتي وتليفوني ملوحات .. قعمزت وقعدت نحك في راسي بالخفيف نحاول نذكر شن يللي صارللي امبارح .. هوا صح تعصبت .. بس معقولة عصبيتي وصلت لين نحذف تليفوني هكي !! .. سبق ومقايل لورد ( اغلا شي عندي هوا تليفوني ) .. وتوا حذفته بطريقة مجنونة !! .. وقفت ع المراية لقيت عيوني حمر .. طلعت من داري بسرعة وننصدم بوردتي .. طاحت لوطة بقوة وطاحت منها صفرة كانت جايبتهالي فيها فطوري ( فنجان قهوة _ سندويتش بالتن _ طاسة مية _ طرف كيكة ) .. تبزع يللي فيها كله .. وتخلط كل شي .. وشويا من القهوة جت ع رجلها ..
قصي: آسف ورد مانحسابكش بتنوضيني :(
ورد كانت حاسة بوجع في رجلها لان القهوة كانت سخونة هلبااا .. ماردتش ع آسفي .. طبست عليها ببلاهة
قصي: خيرك ؟؟.. حاسة بحاجة ؟؟
ورد: ايه رجلي ** بعدين قامت عينها فيا وع طول حطت الوشاح ع وجهها ** .. آسفة
استغربت من حركتها .. درت لفة بعيوني ع روحي .. لاحظت اني مش لابس شي من فوق .. ( الشييييت ) .. خبطت بايدي ع ركبتي بالشويا .. ووقفت ( انا آسف مش قصدي تشوفيني هكي )
وخشيت لداري بسرعة .. طلعت سورية تانية .. ولبستها ع السريع ..
>>>>>>>>>>>>>>>>>>>>>>
لما نزلت لماما فاطمة مع الساعة 11:00 .. لقيتها اطيب في الغدي وموتية صفرة فطور صغيرة ..
ورد: صباح الخير ماما فاطمة
ماما فاطمة: صباح الخيرات يابنتي
ورد: انا فطرت وفطر حتي زين ره
ماما فاطمة: ههههه عارفة هادي صفرة قصي امس روح تاعب ومريض قلت نرفعله فطوره لعنده
ورد: آآه باه .. نعاونك في حاجة ؟؟
ماما فاطمة: والله يابنتي بندير رشدة كسكاس قصي يحبها .. ها تشوفي فيا كيف مشنوقة في العجينة .. ارفعي فطور قصي وتعالي عاونيني باهي !!
ورد: حاضر :)
قمت الصفرة وطلعت بيها لدار قصي .. انا نحب نخدمه قصي لانه يحب يخدمني .. وحاجة تانية نبي نعاود نفتحله موضوع الفيس بوك بالك يعلمني عليه توا .. ومنه نطمن عليه لانها قالت مريض .. وانا قاعدة نفكر كيف بنفتحله موضوع الفي سبوك.. طلع ع غفلة وبلقطة سريعة طاحت الصفرة كلها ع الارض والقهوة تبزعت رجلي .. ولاني كنت مش منتبهة طحت حتى انا معاها .. لما طلع وكلمني وتآسف .. قمت عيوني لقيته مش لابس سوريته ..ولاول مرة يطلعلي هكي ..واطيت عيوني طووول وتحشمت .. وين فاق ع روحه خش للدار ... قمت سروالي لقيت مكان تبزيعة القهوة احمر .. تآلمت شويا وبعدين نضت للمطبخ .. خديت فوطة ومنشفة .. سألتني ماما فاطمة
ورد: ءء طاحت مني الصفرة :(
ماما فاطمة: ووووه ياورد ماتهنيش ع حاجة بكل !!
ورد: قصي طلع ع غفلة وانا مش مركزة :(
ماما فاطمة: بسرعة بري امسحي الارضية باهي خير ماتقعد تتلصق
ورد: حاضر
طلعت نجري رغم الآلم يللي حاسة بيه .. قمت الصفرة وحطيت فيها الطواسي والسندويتش المبلول من طاسة المية وبديت نمسح في الارضية ع طلعة قصي من الدار .. قعمز ع ركابه قدامي
قصي: انا آسف ورد
ورد: لالا عادي .. الغلط مني
قصي: هاتي نمسح عليك
ورد: لالا انا بنت والبنت هيا يللي اضم ههههه
قصي: ههههه
شد الصفرة ووقف بيها ..تفكرت موضوعي ( ءء قصي)
تلفتتلي: نعم !!
ارتبكت شويا .. وبعدين وقفت ومسحت ايديا في سروالي
ورد: ماما فاطمة قالتلي مريض .. ان شا الله لا باس عليك
قصي: آآه الله لا يوريك باس
وكيف بيمشي .. قلت كلماتي بسرعة ( شن صار في الفي سبوك ؟؟ )
بعدين سكتت وغمضت عيوني .. ولالي .. وضحك ع لقطتي
قصي: ههههه فكرتيني فيه .. نفطر فطوري المبلول ونجي نعلمك اوكي !!
ورد: بجدياااات !!
قصي: يس :)
فرحت ونسيت وجعي .. وطبست كملت باقي الارضية وهوا طلع للمطبخ .. بعد ماكملت .. لحقته ع المطبخ لقيته يدير في نصه بروحه .. وقفت مقابلة ماما فاطمة
ورد: في شني نساعدك ؟؟
ماما فاطمة: جيبيلي الدقيق نقص عليا .. وبعدين شوفي المرقة كانها خترت رجعيها بمية يللي في البكرج
ورد: حاااضر
شبحلي قصي وانا ابتسمتله .. وبعدين شبح لامه
قصي: تي يمة صغيرة البنت رجعي مارجعي وين تعرف !!
ماما فاطمة: وين صغيرة ؟؟.. عمرها 15 السنة تقوللي صغيرة ؟
قصي: حتى ولو .. قاعدة صغيرة .. توا وقت لعبها مش تخش للكوجينا
ماما فاطمة: شن لعبها ؟؟.. تي عام تاني وبتاخد راجل تقوللي لعبها .. حتى انت عايش في اوهام المسلسلات ياوليدي
قصي: ويللي عمرهم 16 يعطوهم لراجل ؟؟؟
ماما فاطمة: انا تزوجت بعمرها هكي وقمتكم انتم وبوكم والحوش وحتي عماتك وعمك وحناك وجدك مني كان واقفلهم غيري آآآه !! .. وتوا تقولي تلعب ؟؟
قصي: زمانكم مش زي زماننا .. الزمان يتغير يايمة
ماما فاطمة: والله ماقصة زمان ولا شي .. لكن انت ديما تشوف في ورد صغيرة وعمرها ماتكبر .. بس الواقع يقول غير هكي البنت بتكبر وبتاخد راجل وهدا وقتها باش تتعلم كل شي
قصي: آآآآخ الواحد شن بيقول بس !!
ماما فاطمة: مايقول شي ** وتقرض في الرشدة .. وقفت ايديها وشبحتلي ** .. كيف حالك انت توا !! .. ان شا الله احسن ؟
قصي: ايه الحمد لله .. كبرتي الموضوع يمة
ماما فاطمة: هوا كبير من الاول .. جايني بعد نص الليل وتبكي وحالتك حالة مازال في اكبر من هكي؟
وانا كنت واقفة بيناتهم ونقرض في السلاطة .. شبحتله .. شبحلي بعدين فنص في ماما فاطمة
قصي: يعني لازم تشهدري بيا !!
سكتت ماما فاطمة شويا وبعدين قالتلي : ورد بري جيبي ليم من الجنان
حسيت بانها توزع فيا لانها غلطت وفتحت الموضوع قدامي .. هزيت براسي بمعنى ايه وطلعت للجنان .. وقلبي مازال في الكوجينا ونفكر شن بيقولو ؟؟ .. وعلاش كان يبكي قصي امبارح؟؟ .. تلفتت وعلقت عيوني ع باب الحوش .. بعدين مشيت نجري للشجرة ولقطت تلات ليمات .. وخشيت نجري .. وقفت ع باب الكوجينا وسمعتهم يقولو
قصي: البنت صغيرة مانبيهاش تعرف المواضيع هادي
ماما فاطمة: لآمتى بتقعد هكي انت ؟؟
قصي: كيف يعني؟
ماما فاطمة: سارح .. ومدهوبة شيرتك .. وقالب الليل نهار والنهار ليل .. امتى ياولدي بترتاح وتريحني
قصي: شن تبيني ندير باه ؟؟
ماما فاطمة: تزوج .. دير عرسك ياولدي وارتاح من الشقا هدا كله
قصي: المشكلة ماتنحلش بالزواج .. وبعدين اصلا ميس مازال باش تروح
ماما فاطمة: اول ماتروح حدد العرس وتزوج
قصي: غير تروح وبعدين ساهل .. انا بنخش ندوش
ماما فاطمة: قصي !!
قصي: نعم ؟
ماما فاطمة: شن يللي صار معاك امبارح وخلاك تبكي ؟؟
قصي: لما نبي نحكي انتي اول وحدة ح نفكر نحكيلها اوكي !!
ماما فاطمة: باهي طمنلي قلبي عليك بس !!
قصي: مافي شي مهم .. مضايق بس زي ماقلتلك ع الشغل
ماما فاطمة: ان شا الله يكون هكي بس
قصي: ايه طبعا
سمعت خطواته يقربو من الباب .. بعدت شويا .. طلع من المطبخ وابتسم .. رديت عليه بابتسامة .. وخش للحمام .. انا رجعت للمطبخ وقلتلها ( انا جبته الليم شن بديري بيه ؟ )
ماما فاطمة: للسلاطة
ورد: حاضر :)
حطيت الليمات في اللافيندينو وكملت تقريض السلاطة .. وكملت الغدي مع ماما فاطمة .. مع الساعة 2:00 الظهر كان كل شي تمام .. ومرة مرة نحول في عيوني لممر حوش عمي بالك قصي يطلع ويكلمني ع موضوع الفيس .. بس هدا كله قاعد في داره ماطلعش ..
ماما فاطمة: امالا وين زين ؟؟
ورد: ءءء اكيد قاعد فوق يلعب بالبلايستيشن
ماما فاطمة: باهي بري ناديه بنحط الغدي توا
فرحت وين سمحتلي نطلع من المطبخ .. مشيت ومرة مرة نتلفت مرات تلحقني والا حاجة .. قربت من دار قصي وطقيت الباب بالخفيف .. ماسمعتش صوت جاوبني .. فتحت الباب بالشويا .. حسيت بايد جبدتني من التالي .. قلبي وقف .. وعيوني نفلتو .. وماقدرتش حتى نزمط ريقي من الخوف .. تلفتت بالشويا وكنت نرعش وخايفة .. لقيته قصي .. تنهدت وارتحت كنت نحسابها ماما فاطمة .. تقتلني بعدين .. شبحتله بنظرات براءة ..
قصي: ههههه ع نفس الموضوع ولاه !!
ورد: ءءء ايه كل مرة تمشيني وتنسى بعدين
قصي: بس توا وقت غدي
ورد: انا .. بس .. نبي .. نفكرك .. سلام
مشيت من بحداه وركبت لشقتنا .. ناديت ع زين ونزلنا تغدينا .. الياس ومرته وولده تغدو في حوش عمتي .. وجبتلهم فواكه وكلو .. وانا قعدت مقعمزة في المطبخ .. شويا وجاني قصي وجايب معاه اللاب توب .. قعمزمقابلني ع الطاولة وفتحه .. وانا هدا كله مركزة مع كل حركة يديرها .. رفع عيونه فيا وقاللي ( تعالي جنبي :) ) .. ابتسمتله وع طول جبدت الكرسي جنبه
قصي: شوفي ورد انا توا درتلك حساب برقمي طبعا .. وسميتهولك ( Wared Jawad (
ورد: وكيف بنفتح ونتواصل مع صاحبتي جنى ؟؟؟
قصي: آمممم ** شبح للفي سبوك ودار فيه لفة ** ماتعرفش رقمها او اي شي يوصلنا ليها ؟؟!
فكرت وفكرت بس مافيش شي يوصلني ليها
ورد: امهئه :(
قصي: زيدي فكري
اذكرت ابلتي مها .. ( آآآآه ابلتي مها ممكن توصلني ليها )
قصي: من مها ؟؟!!
ورد: قرتني صف رابع وخامس تتفكرها ؟؟
قصي: آآآآه ابلة الرسم ولاه ؟؟
ورد: ايوااا
قصي: مبردها
ورد: وعلاش !!
قصي: كانت تمووت ع الارض يللي يمشي عليها بوك
ورد: كيف !!
قصي: مش مهم .. باهي كيف بنوصلولها مها هادي ؟؟
ورد: مسجلة رقمها في مذكرة صديقاتي زمان
قصي: بري دوريها وجيبيها
ورد: حاضر
نضت نجري وركبت لشقتنا .. دورت في دولابي لين لقيتها .. قلبت وراقيها وصلت في صفحة مكتوب فيها ( احلا ابلة في الدنيا هيا الابلة مها .. تحبني وادير كل شي ع خاطري .. وتراجي لين بابا يجيني .. واديرللي كيكات يللي خاطري فيها .. ومرات تجيبلنا في غدانا .. ربي يحفظها ونبي لما نكبر بنولي زيها <3 .. ونسيت نقوللكم اعطتني رقمها وانا فرحانة هلبا لاني بنتواصل معاها ## ## ### 092)
خديتها ونزلت نجري لقصي .. لقيته يدير في قهوته بروحه .. مديتلها المذكرة .. خدي الرقم وكتبته في تليفونه واتصل بيها .. ومدلي التليفون ..
طووووط ... طوووووط .. طوووووط
مها: آلوو
ورد: اهلا ابلة مها كيف حالك ؟؟
مها: اهلين بيك .. مني معاي !!
ورد: انا ورد جواد تفكرتيني ؟؟
مها: جوااااد !! .. كيف حاله ؟؟.. وينه هوا مختفي ؟؟
ورد: الحمد لله .. ابلة مها .. انتي مرة قلتيلي عندك رقم ام جنى يللي في فرنسا صح ولاه !!
مها: ايه صح
ورد: عادي تبعتيهولي في مسج ؟؟
مها: حاااضر .. بس قوليلي بوك وين ؟؟
( هياااا ياورد شن صار ؟؟ )
حطيت ايدي ع السماعة وقلتله ( شويا بس )
ورجعت التليفون ع وذني ..
ورد: آها .. ابلة مها شن قلتي ؟؟
مها: هدا بوك ؟؟
ورد: لا هدا ولد عمي :)
مها: باهي بوك وين ياورد ؟؟
ورد: مسافر
مها: ومخليكم ؟؟
ورد: آلوووو ابلة مها .. معاش نسمع فيك
مها: معاك ياورد معاااك
ورد: آلووووو شورها التغطية .. نرجع ونكلمك ان شا الله مع السلامة
سكرت الاتصال وحطيت ايدي ع قلبي يللي كان يدق بشكل مش طبيعي .. بسرعة جنونية .. مديت التليفون لقصي
قصي: خيرك عرقتي وحالتك حالة ؟؟
ورد: سألتني ع بابا
قصي: قلتلك هادي تموووت في حاجة اسمها جواد ** مدلي طاسة امية ** اشربي وسمي بالله
ورد: كيف يعني تموت في حاجة اسمها جواد ؟؟ ** شربت المية جرعة وحدة ** .. رد عليا
قصي: يعني تحبه .. خلاااص سكري ع الموضوع ** وصل لقصي مسج قام التليفون وشبحلي ** آهو وصل رقم أم صاحبتك
ورد: اتصل بيها توا توا
قصي: ياعبيطة خللي نشوفو فرق التوقيت
ورد: آووووووف
قصي: خلاص ماتبكيش ههههه آهو بنتصل بيها
اتصل بيها قصي .. مرة وتنين وتلاتة ماشدش الخط معاه ..
قصي: غدوا ان شا الله نحاول نتصل بيها .. مانعرفش خيرها التغطية اليوم !!
ورد: آوكي .. المغرب اذن توا بنمشي نصلي .. تبي حاجة !!
قصي: ارفعي اللاب توب معاك مابين مادبرتلك في لاب توب تاني
ورد: قصدك بتخليه معاي !! .. يعني نقدرنفتحه الفيس بروحي !!
قصي: ايه طبعا .. وشوفي هآآ حتى ضفت روحي عندك ههههه
ورد: قصي عادي نقولك حاجة !!
قام عيونه فيا وابتسم ..وهز راسه بمعنى ( ايه ) .. شبحت لعيونه مباشرة
ورد: ربي يحفظك لينا قصي .. انت ماما وبابا في نفس الوقت
واطى عيونه ومدلي اللاب توب ( مانبي منكم شي غير تدعولي بالخير بس )
ورد: حاضر :)
وخدي تليفونه مفاتيحه وطلع .. آما انا شديت في غمري اللاب توب وعصرته بقوة خفته يطيح مني أمانة .. وركبت لشقتي لقيت زين يلعب بالبلايستيشن .. قعمزت جنبه ع الصالون وبديت نقلب في صفحتي ع الفيس .. بعدين لقيت قصي منزل صورته مع مصطفى صاحبه .. لقيت تحت الصورة ( اعجاب. تعليق . مشاركة ) .. درتله اعجاب .. وكملت تصفحي بكل فرحة <3
>>>>>>>>>>>>>>>>>>>>
جواد يتحدث ::
فاقد راشد .. فاقد وجوده جنبي .. فاقد طبطبته ع كتفي وقت اوجاعي .. فاقد حضنه وقت دموعي .. فاقد كلماته يللي تهون عليا .. فاقد صحبته ورفقته .. فاقد صاحبي وعزيزي .. جمعتنا اوقات عصيبة وفرقتنا اوقات اصعب .. مازلت مستمر كل يوم نكتب في رسالة لبنتي وولدي وشن علمتني الدنيا .. وشن تعلمت من السجن .. وكنت كل مانتضايق مانلقاش لمن نحكي .. نصلي وندعي لربي .. ونكتب في مذكرتي كل شي مضايق منه .. تعودت ع قعدتي في السجن .. نحس في روحي لو طلعت برا ممكن نهبل .. او يجيني مرض معاش نقدر نفارق الظلمة .. كل يوم مشاكل وعراك من زملائي في السجن بس متجاهل كل شي حولي .. نومي .. صلاتي .. مذكرتي .. وهذا بس مايشغلني هنا !
برائتي نحس فيها كل يوم تبعد عن قبله .. ونحس في الموت يتقرب مني .. ونحس في ال 15 السنة بناخدهم بطولهم وعرضهم ومش ح يعفوني من حتى شهر او يوم بس :(
وصغاري !!
آوووووف .. وقفت ع باب الزنزانة وبديت نخبط ونعيط بصوووت عالي .. ( طلعوووووني .. بنشووووف صغاري طلعوووووني .. ياويلكم من ربي والله مظلوووووم مظلوووووم .. حسبي الله ونعم الوكيل فيكم .. حسبي الله ونعم الوكيل فيكم .. حسبي الله ونعم الوكيل فيكم ) .. جسمي معاد حملني بالقوة يللي خبط بيها الباب .. ع طووول طحت ع الارض وحطيت ايديا ع وجهي وبديت نأن ونتآلم وجع يللي في قلبي أحر من وجع ايديا يللي حاس بيه توا .. وين حولت ايديا لقيتهم يصبو في الدم .. وقفت ع حيلي وحدة وحدة وتجاهلت ضحكات الحراس برا والرجال يللي معاي .. وطحت ع فراشي .. ومشيت في غفوة طوووويلة وياريت الابدية تكون :(
>>>>>>>>>>>>>>
كانت صورة بابا بين ايديا وكلام قصي ع ابلة مها يزن في وذني .. زعما حق الابلة مها كانت تعامل فيا بلطف وحب كله مصلحة باش تتقرب لبابا .. الله .. من كنت صغيرة كان تفكيري عليها يختلف ع تفكيري الحالي .. حطيت الصورة جنبي .. ومشيت لدار زين لقيته في سابع نومة .. ومتعري .. غطيته بالورغان ومشيت لروشن الصالون .. لقيت قصي مقعمز ع الجلسة وفاتح ضي الجنان .. وكان يدخن .. في شني تفكر ياقصي ؟؟ .. وليش كنت تبكي امبارح ؟؟ .. باهي شن يللي صاير معاك ومخلي الرجل الحديدي يدمع !! .. نزلت الستارة وليت لسريري ... وخدتني نومة
>>>>>>>>>>>>>>
قصي يتحدث ::
بما أن ميس مالقيتش منها آي استجابة .. سكرت تليفوني وحذفته في القجر .. حسيت الاكسجين تم في حوشنا .. طلعت للجنان .. وبديت اندخن .. الاول والتاني والثالث وممكن نوصل للعاشر لو ماوصلتش للحل مع ميس !! .. شن يللي يغيرها ؟؟ .. تفكيري مشي لبعيد .. وكلام مصطفى يتردد كل مانفكر فيها .. مش عارف كيف بنتصرف .. ممكن ننهي كل شي معاها .. بس هكي ح نعطيها فرصة للضياع اكثر واكثر .. باهي انا ليش قلبي عليها .. تي اضييع والا تنحرق .. انا مالياش علاقة بيها ابدا .. لا .. بس انا حبيتها ووفيتلها .. ودرتلها كل شي تحبه وتبيه .. مش ح نسمحلها اضيع كل شي بنيته .. بس هوا ضاع ياقصي .. ضااااع ومستحيل يسترجع .. لا .. نقدر نرجعه مع انسانة تستاهل .. بس والله صعب .. ميس اول بنت نحبها ونبني كل احلامي معاها .. بس طلعت ماتستاهل ياقصي .. ايه هيا صح ماتستاهلش .. لكن صعب نبدا من الصفر مع بنت تانية .. لا نقدر نبدا .. آووووووف .. هوا عمي توفت مرته وماقدرش يبدا حياته مع مخلوقة غيرها .. ايييح .. عمي حبها وحباته .. هيا انسانة تستاهل كل خير منه .. كانت مريحاته ومدللاته وغير شن يبي بس !! .. من ناحية ان خداها القدر منه .. فـ هادي صعب الواحد يوقف في وجهه .. ولان مابداش حياته مع غيرها لانه كان وفي ليها ولحبها وخاف ع صغارها .. باهي وانا ؟ ؟.. ليش بنكون معاها وفي متلا !! .. هيا مش عاطيتني ابسط حقوقي .. آوووووف .. نوووض نرقد خير حاس الدخان مع التفكير بيضيعلي عقلي وبنطيح في الهاوية :(
#Dudu
