#الحضن_الدافي
الحلقة :: 41 ::
آووووف .. زعما فسرت مواقفي معاها لحب ؟؟
>>>>>>>>>>>>>>>>
بعدت عن دار قصي بسرعة خيالية .. وصلت لدروج شقتنا كيف قمت كندرتي فتحت الباب يللي تحت الدروج ويدخل لحوش عمي ..
خالتو: شني ورد ؟؟ .. خيرك عطلتي ؟؟
ارتبكت .. وحطيت كندرتي لوطة وكيف بنلبسها : شويا ونلحقك
خالتو: خيره شخشيرك مولي اكحل !! .. ركبتي حفيانة والا كيف !!
سكتت ومارديتش عليها .. جت جنبي بتلبسني كندرتي
خالتو: آووووف ياورد كيف بتخش بهالمنظر ؟ .. بري بسرعة بدليه
ورد: ريتي كيف انا قاعدة صغيرة وتبو تزوجوني ؟؟
خالتو: تي شني انا يللي بنعطيك ؟؟ .. بوك هوا يللي يبي .. اركبي بدلي بلا كثر دوة
ورد: حاضر
ركبت نجري .. وقفت ع روشن الصالون لقيت قصي البرا واقف يدخن .. ضربت جبيني بالخفيف .. آووووف شن درتي ياورد ؟؟ .. علاش هكي تصرفتي ؟؟ .. قصي لميس وميس لقصي .. بس الشيطان يللي في داخلي يقول (( خالتك عمرها ماحباتك .. هيا تبي تزوجك وتتفكى منك وتاخد منك قصي ))
_ لا مستحيل .. مانقدرش نخون خالتو
** لا مش خيانة .. هدا ملكك انتي هدا شي خاص بيك ماتسمحيش لحد ياخده منك بالساهل
_ وخالتو !!!
** تشوف نصيبها .. قصي ليك مش ليها
( وررررررررررررررد )
فقت ع روحي لما سمعت صوت خالتو تنادي فيا .. خشيت نجري لداري لبست شخشير جديد ونزلت
ميس: ليا ساعة انادي فيك .. شن كنتي اديري ؟؟
ورد: كنت في الحمام .. هيا نخشو
ميس: ايه باهي يللي تفكرتي في مرآ كبيرة في السن تراجي فيك >_<
خشينا لحوش عمي .. خشيت للمطبخ لقيت رزان سارحة
ورد: مرحباااااا
رزان فاقت ع روحها : ءءء ورد .. شن الجو ؟؟
ورد: الحمد لله .. نبي امية !!
عبتلي طاسة امية ومدتهالي .. جبدت كرسي من الطاولة وقعمزت
رزان: خيرك متوترة شكلك ؟؟
ورد: يعني .. مش هلبااا
رزان: ههههههه
ورد: علاش تضحكي ؟؟
رزان: تفكرت يوم خطبني الياس .. احلا يوم في حياتي <3
وطار خيالي بعيد .. حط جناحه ع روشن داري في حوشنا الاول .. وانا نساوي في شعري بنستقبل ماما فاطمة وعمي .. مش زيارة عادية .. جايين بيخطبوني لقصي .. ح يكون أحلا يوم في حياتي اكيد <3
رزان: ورد وين مشيتي ؟؟
انتبهت وشبحتلها : ولا حاجة .. نخش توا !!
رزان استغربت فيا بعدين هزت راسها بمعنى ( ايه ) .. نضت بخطوات متوترة شوي .. لين وصلت للصالة تنفست بعمق .. طلعت خالتي وع وجهها الابتسامة عريضة .. خشيت سلمت ع أمه .. وزوز من خواته .. ومرت عمي وليد .. قعمزت ع طرف الصالون .. كنت سارحة لما هما يحكو ع التفاصيل ويتعرفو علينا .. بس انا ماكنتش معاهم بكل .. كنت وين ماكان قصي بالزبط .. حسيت بنخصة ع جنبي من ماما فاطمة ..
ورد: نعم !!
تلفتتلي امه وقالت : كيف حالك يابنتي !!
ورد: الحمد لله خالتي
امه: ربي يحفظك ماشا الله زين وعقل وتباتة
ورد: :)
امه: شني ماطلعتش نتيجتك ؟؟
ورد: لا مازال
امه: آها ربي يوفقك سمعت من وليد انك شطورة :)
ورد: ايه صح :)
امه: حتى غسان ولدي ماشا الله عليه اخر سيمستر في الهندسة الكهربائية .. مداير جهده ومش مقصر
ورد: ربي يوفقه
امه: ايه يابنتي .. انا طلبت نهدرز معاك انتي شخصيا .. ونعرف رايك في الموضوع !!
ورد: آي موضوع ؟؟
امه شبحت لماما فاطمة .. ارتبكت شوي ماما فاطمة وقالتلي : خيرك ورد ؟؟ .. موضوعك مع غسان ان شا الله !!
ورد: انا قاعدة صغيرة ياخالتي أم وليد .. مانبيش نتزوج :)
انصدمو كلهم يللي مقعمزين .. وامه شافت يمين ويسار وقالتلي : ايه عارفة صغيرة بس ولدي قال موافقين ع الخطبة ماقالوش عندهم اعتراض ع آي شي
اخته: كيف يعني ماكلمكش بوك ع الموضوع ؟؟
ورد: كلمني ايه
اخته: يمة خلاص نوضي .. شكلها البنية مجبورة عليه ومش فاهمة شي .. انا قلتله غسان صغيرة بس هوا سكر راسه
انا نضت وطلعت من الصالة .. مانعرفش شن صار بعدي .. المهم اني تخلصت منهم .. وصلت للمطبخ ع يميني باب الحوش لقيته مردود نعرف ان قصي البرا .. ومانبيش نطلعله .. ركبت نجري لشقتنا .. سكرت الباب بالمفتاح وخشيت لداري نجري حضنت دبدوبي خايفة من ردة فعلهم كلهم معاي .. مانبيش نتزوج .. مانبيش خطبة .. مانبيش غسان .. نبي بابا .. نبي زين .. ونبي قصي <3 بس مانبيش حد غيرهم :(
شويا وبدي يطق الباب بالقوة .. زدت تمسكت بدبدوبي وبديت نبكي .. نسمع في خالتو تتكلم (( افتحي ورد والله نبي نكلمك ماتخافيش .. افتحي نكلم فيك ))
بعدين سمعت صوت بابا
بابا: خيرها ورد !!
ميس: آآآح قالت كلام مش حلو للحاجة أم وليد
بابا: كيف يعني ؟؟
ميس: قالت مانبيش نتزوج وانا قاعدة صغيرة
بابا: بس انا فهمتها ان الزواج مش توا !! .. انا قلتلها تعطي لنفسها فرصة مع غسان ممكن يعجبها ؟؟ .. وبعدين كيف تقول هكي ؟؟ .. انا مانبيش نزوجها توا عارفها صغيرة .. بس ماقدرتش نرد صاحبي والولد مصّر عليها
ميس: هذا يللي صار .. اقسم بالله حرقتلي دمي .. لين ناضو الناس طلعو متعصبين من كلامها
بابا: يعني حشمتني !!
ميس: مانعرفش تصرف معاها .. انا مروحة
سمعت خطواتها بعدو عن الباب .. بعدين بابا بدي يطق (( ورد افتحي يابنتي نبي نهدرز عليك بس ماتخافيش .. انتي ماغلطتيش انا الغالط .. انتي مازال صغيرة عارفك يابنتي انا غلطت والله سامحيني يابنتي ))
لما سمعت بابا يترجى فيا .. تحشمت .. نضت نجري وفتحتله الباب وع طول انغمست في صدره .. وبديت نبكي .. حط ايديه ع شعري وبدي يمسح ع شعري ويهدي فيا
ورد: سامحني بابا انا غلطت بالله عليك سامحني
بابا: آووووش انا الغالط .. المفروض مانساير حد ع حساب صغاري .. خلاص يابنتي انتي سامحيني
ورد: انا آسفة يابابا
بعدت عن حضنه ومسحت دموعي .. وشديت ايده اليمنى وبوستها
ورد: ربي يحفظك ليا ان شا الله
نزل لمستواي وشد خصلات شعري ..
بابا: انتي أمانة عندي من ايناس .. لازم نحافظ عليك ونصونك .. وح نعيش ليكم لين ربي ياخد امانته
ابتسمت .. وحضنته : بعد عمر طويل ان شا الله
قامني في غمره وخش بيا للحوش .. ودخلني لداري
بابا: عارفك تحبي الحركة هادي .. زمان من كنتي صغيرة ترقدي في الصالة وامك تقيمك وتحط في فراشك .. وانا من اليوم بنعوضك كل يوم بناخدك ونحط في فراشك لين تكبري بعدين تقيميني ههههههههههه
ورد: هههههههههههه
ضحكنا .. بعدين قاللي : ايه نسيت بنعطيك المذكرة يللي عطيتهالي في الحبس .. نجيبهالك تقريها كل يوم رسالة .. اييييه شوفيني قداش عانيت ههههه
ورد: وان شا الله معاد اذووق عذاب وتعيش عمرك كله مرتاااح وفرحااان يااارب <3
بابا: آمين .
ناض جابلي المذكرة .. وبعدين قاللي : انا طالع لقصي بنهدرز عليه تبي حاجة قبل مانمشي ؟
ورد: لا سلامتك :)
طلع بابا .. وانا مشيت نجري تأكدت من تسكيرة الباب .. وخشيت بدلت حوايجي واتكيت نتفرج ع سبيستون <3
>>>>>>>>>>>>>>>>>>>
جواد يتحدث ::
أبداآآ بنتي مادراتش الغلط انا يللي استعجلت بخطبتها وهيا صغيرة .. وانا كيف وصلت للجنان رن تليفوني وكان صاحبي وليد ..
جواد: عارفك شن بتقول !!
وليد: هههههه لا والله ماك عارف
جواد: تضحك وجوك مليح شن في !!
وليد: أمي كيف حكتلي الموقف ضحكت بدموعي .. البنت مازالت صغيرة وانا لما طلبتها لانك كنت محبوس ماكنتش نحساب الحقيقة بتطلع بهالسرعة وتطلع انت براءة .. ع العموم ربي يحفظهالك البنية وخوي ان شا الله يشوف غيرها
جواد: ايه والله .. كله نصيب .. ماتندريش مرات مع الايام ربي يجمعهم تحت سقف واحد .. وربي يرزقكم ع قيس نيتهم
وليد: آمين .. هي وخيي جواد خلينا نشوفوك :)
جواد: ان شا الله .. بالله تأسفلي من امك وخواتك
وليد: عادي ولا يهمك مادور شي .. البنت معاها حق قاعدة كتكوتة ههههه
جواد: هههههه هي سلامات :)
سكرت منه وكملت طريقي لقيت قصي مقعمز ع الجلسة وقدامه مق قهوة ودخانه في ايده .. قعمزت مقابله وقلت: في شن تفكر ؟؟
عدل تقعميزته .. وابتسم : مافي شي .. كيف حالك ياعمي ؟؟
جواد: الحمد لله تشوف فيا قدامك .. اموري تمام التمام :)
قصي: ان شا الله دوم .. عمي نبي نطلب منك طلب !!
جواد: تفضل
قصي: نبيك تسامحني .. ماقدرتش نوقف زي وقفة وليد معاك .. بالله عليك سامحني
ضحكت بصوت عالي .. نضت وقعمزت جنبه وحطيت ايدي ع كتفه : ماتتأسفش مني لاني مقدرّك وعارف شن درت ع خاطري وعارف ان هذا مش ذنبك
قصي: تبي الحق ولاه !!
جواد: اكيد :)
قصي: يعني أول مرة نبوح بمشاعري لحد
جواد: آها :\
قصي: وحق ربي ياجواد استاحشتك .. استاحشت كلامك معاي .. وهدرزتك .. شكاويك .. والله حتي تهزيباتك استاحشتهم .. ليك وحشة مالاخير :)
تغمرنا بعض والضحكات تتعالى ....
>>>>>>>>>>>>>>>>
راقبت بابا وقصي كيف يضحكو ومنسجمين مع بعض .. وكيف بابا فرحان .. اكيد ح يزيد يفرح لما يكون قصي نسيبه <3
تاني يوم الصبح .. فزعت من فراشي بسرعة .. ضميت الشقة .. وخشيت للمطبخ وتيت فطورنا .. وخشيت لدار زين لقيته راقد جنب بابا .. حسيت بشويا غيرة .. مشيت اتكيت ع جنبه التاني .. بابا فاق بيا .. ابتسم وشاف لجنبه التاني لقي زين شاد ايده بقوة وراقد .. لما بابا تحرك ناض زين .. حك عيونه .. بابا فتح ايديه وحطنا ع صدره .. #الحضن_الدافي .. يللي فقدناه سنين وسنين .. #حضن_الشوق .. يللي نتمنو الساعة توقف ونحنا مازلنا في حضنه .. #حضن_الأب .. #حضن_الامان .. يللي مستحيل تفقده آي بنت بوها حي <3 .. تمسكنا فيه بقوة .. #انفاسه ادفينا .. #دقات_قلبه تحسسنا بالحب الضائع .. #نظرات_عيونه تحسسنا بالثقة .. #مسكة_ايده تحسسنا بالأمان .. #بابا مش ح نلقى حد يخاف عليا ويحبني زيه <3 .. انا مع #بابا عمري ما ح نخاف من آي يصيرلي في هالدنيا ..
بابا: ماتبوش تفطروني ؟؟
بعدت عن حضنه وابتسمت : وتيته ونراجي فيكم تنوضو
زين: بابا !!
شبح لزين وابتسمله: نعم يابابا !!
زين: مش ح تخلينا مرة تانية ولاه !!
بابا: لا مستحيل باذن الله <3
نضنا وفطرنا .. وكانت عيون مانزلت من ع بابا .. فرحان بيه ومشتاقله <3
بابا: انا بنطلع شويا .. في حاجات ناقصيني بنشريها
زين: بنمشي معاك
بابا: لا يابابا بنمشي مع صاحبي وليد
زين: لا انا من اليوم مش ح نخليك تمشي بروحك .. انا بنكون حارسك الشخصي يابابا
ابتسم بابا .. ناض وقف ع كرسي زين .. وشدله ايديه : حشاك يابابا .. انت ولدي .. خلاص انا موافق تمشي معاي
تغمّر بابا بقوة .. وانا فرحانة بيهم <3
طلع زين وبابا مع بعض .. وانا قعدت بروحي في الحوش .. آوووف شن بندير !! .. خاطري نهدرز ع قصي .. آمممم .. خشيت لداري نجري لبست شورت جينز لتحت الركبة ومعاه تيشرت وردي وعليه حرف W باللون السماوي .. ومعاه سبيدرو خلفيته بيضا وعليه وردات ألوان مختلفة .. وقمت شعري ذيل حصان .. أذن الظهر صليته ودعيت من كل قلبي (( ربي يسّر أمري .. وأحلل عقدة من لساني يفقه قولي .. يارب أحفظ بابا وزين ..يارب وفقني في قرايتي وننجح من الاوائل ع المدرسة )) .. بعد ماكملت الصلاة وطبقت الصلاية ..قلت ننزل لماما فاطمة نساعدها في الغدي .. لبست عبايتي ووشاح .. لفيت ع روحي بالمرآية وفتحت باب الشقة ونزلت .. وصلت للمطبخ لقيتها لاهية .
ورد: ءء ماما فاطمة تبيني نساعدك ؟؟
ماما فاطمة: لا
حسيتها ماتبيش تكلمني .. وبدت متجاهلتني ..
ورد: آوكي انا في شقتنا كان تبي شي ناديني
ماما فاطمة: باه
جيت بنركب لشقتنا .. خطرت في بالي نشوف قصي اليوم ..بخطوات خفيفة وبدون ماحد يحس بيا وصلت ع باب دار قصي تنفست بعمق .. فتحته بهدوء .. لقيته راقد .. شكله كيف مروح من العمل وتاعب .. انا ح نريحك باقي عمرك ياقصي .. خشيت وسكرت وراي الباب بالشويا وقعمزت ع طرف السرير .. كيف قعمزت رن نقاله والمتصل (( ميس <3 )) .. درته في البداية صامت وبعدين سكرت عليها ورديته ع الطاولة .. وصله مسج منها .. وكان قصي مداير رمز لتيفونه .. بس نتفكر مرة قاللي عليه وهوا عبارة عن 4 أصفار .. فتحته .. وخشيت ع الرسائل لقيت خالتو يللي باعته المسج وهوا (( قصي اليوم نراجي فيك مع الساعة 6 في الحوش عازماتك ع عشي )) .. قرنت حواجبي ولعت نار الغيرة في قلبي .. تبيت اخد مني قصي الليلة بيتعشو مع بعض في حوش جدو واكيد معاهم جدو واميما بس بعد العشي بيهدرزو بروحهم اكيد >_< .. مسحت المسج ورديت التليفون في مكانه .. وقربت من سرير قصي .. وتأملت وجهه كيف راقد .. تأملت ملامحه .. ولحيته .. وغمازته .. واسموريته المملحة .. كل شي فيه كان حلوو <3 .. بعدين وقفت بنطلع .. سمعت صوت خطوات البرا .. معاش عرفت وين نهرب ؟؟ .. وكيف بنهرب اصلا ؟؟ .. ركزو معاي في تفصيلة دار قصي .. اول ماتفتح الباب تلقى ع يمينك سريره ومقابل الباب طاولة عليها تليفونه وشويا وراق وكتابات .. وع يسار الطاولة دولابه .. وع يمينه علاق الملابس ..
وكل ماالصوت يتقرب تزيد دقات قلبي .. حتى التنفس انقطع .. تلفتت يساري لقيت السرير يللي كانت في مسافة بسيطة بينه وبين الحيط لانه بينهم الكامدينو .. خشيت نجري لبدت وراه .. ماما فاطمة فتحت باب الدار وقالت: قصي وليدي نووووض الغدي واتي .. قصي .. قصي
قصي: نعم يااام !
ماما فاطمة: نوض هيا الغدي واتي ,, مش قلتلي جعان ؟؟
قصي: ان شا الله تو نجي
حسيت بيه ناض وقعمز وانا قلبي يدق قريب نموووت خوف .. لو شافتني ماما فاطمة والله لما تقتلني .. طلعت ماما فاطمة وسكرت الباب وراها .. ناض قصي من ع السرير وانا طلعت من ورا السرير .. عيط عيطة قووووية (( وااااااااااااااااااااااااااااااااااااااك انتي مني ))
ورد: ههههههههههههههههههههههه انا ورد
قصي: اعوذ بالله من الشيطان الرجيم .. اعوذ بالله من الشيطان الرجيم
وحاط ايده ع قلبه ومغمض عيونه .. بعدين فتح عيونه وفنص فيا وتنهد
قصي: شن اديري هنا ياورد !
بعدت عن السرير وقفت قدامه : انا جيت بنهدرز عليك لقيتك راقد وخفت ماما فاطمة تشوفني لبدت ورا السرير
قصي: باهي اخر مرة تخشي لداري اوكي !!
ورد: حاضر .. فكرت في الموضوع ؟؟
قصي: موضوع شني ياورد ؟؟
ورد: قلتلك انا نحبك <3
وشبكت ايديا في بعضهم وبديت نلعب بصوابعي بخجل
طبس راسه ليا : ترا بالله عليك عاوديلي
ابتسمت وقمت عيوني فيه : انا نحبك <3
قصي: وراس بوك اخطيني .. راك قاعدة صغيرة شن عرفك في الحب بالله !!
ورد: الحب هوا انت <3
قصي: ورد .. الكلام اهوا كبير عليك بالله عليك معاش تعاوديه
ورد: انا كبرت معاك .. شوف هآآ
وفتحت شويا من عبايتي دوب مابان حرفي <3
ورد: هذا التيشرت شريتهولي انت .. وحتي السبيدرو انت شريتهولي .. انت كل شي درته ع خاطري .. وقفت معاي .. علمتني كل شي في الدنيا .. حتى وشاحي علمتني كيف نلبسه .. انت تحبني غير متحشم تقولها
قصي: ههههههههه
ورد: وحق ربي .. حتى لما مرضت ورقدت في المستشفى قعدت معاي .. حتى لما ماما توفت شديت ايدي .. ماتتفكرش يوم بعت العابي .. باهي ماتتفكرش عيد ميلادك لما شريتلك هدية من فلوسي يللي نلقط فيهم ؟؟
قصي: تبيني نردلك الفلوس !!
ورد: لا .. بس انا نحبك <3
قصي: حافظتيها جديد صح ! .. ورد انا خاطب خالتك **حط صبعه السبابة تحت ذقني ورفعه فوق** .. لما درتلك هدا كله لاني نعتبر فيك اختي الصغنونة للي ماحد ياخد مكانها .. واظني عيب ياوردتي تخشي لداري من غير استئذان .. وعيب برضو تقولي كلام كبير اهوا .. تو تكبري تقولي قصي معاه حق .. اخر مرة نشوفك في داري ورد اوكي !!
ورد: قصي نسألك سؤال ؟؟
قصي عدل وقفته : نعم !!
ورد: باهي علاش تقوللي وردتي هي !!
قصي: قلتلك لانك وخيتي <3
ورد: لالا .. الياء الاخيرة تعني ياء الملكية .. وانا اسمي ورد .. وتقوللي وردتي معناها انا ملكك صح ولاه !!
قصي: لا مش صح
ورد: باهي شني هي !
قصي: اسم دلع وبس .. وانا آسف في الجديد نقولك ورد وبس .. وتوا اطلعي خير مايشوفك حد
(( قصي .. قصي .. هيا خيرك عطلت !! ))
وترني صوت ماما فاطمة .. فتحت باب الدار وطلعت نجري من الباب الخلفي .. لشقتي وانا ع الدروج لقيت ماما فاطمة .. شبحتلي واستغربت !!
#Dudu
