#الحضن_الدافي
الحلقة :: 21 ::
. طلعت بسيارتي واتجهت لحوشنا
اكيد الدوة خاصة بين عمي وميس .. أو ممكن تكون علاقتهم زادت تقوت بعد موافقتها .. تنهدت .. والتنهيد قلبي ضره .. فتحت المسجل وجتني ع الجرح .. أغنية كنت نتمنى مانسمعها بكل ..وانا في حالتي هادي .. قريباااا بنشوف عمي وميس تحت سقف واحد .. وانا ح نكون تحت اسم ( الضحية ) .. شويا ورن تليفوني ... وكان المتصل ( جواد :) ) .. درته صامت ورديته في مكانه .. ليش اصلا بنرد اكيد ح يعزمني ع فاتحته .. وانا معاش عندي عزم اكتر من هكي .. خشيت لحوشنا .. لقيته مظلم وفاضي مافيه حد .. ناديت .. وناديت .. رد عليا صوت تليفوني من جديد والمتصل المرة هادي بوي .. رديته عليه ( انا في الحوش وين انتم ؟ )
بوي: زين طايح وانكسرت رجله
قصي: لالا .. تي كيف صار ؟؟
بوي: احني توا في المصحة
قصي: جايك هي
سكرت تليفوني وسكرت وراي الباب .. وطرت نجري لسيارتي .. ووجهي ع المصحة .. هذا عمي قاعد ماخدهاش ميس ولهي ع صغاره هكي .. لين زين رجله نكسرت .. ح ينظلمو الصغار في جرت هالموضوع اللي من بدايته فااااشل .. وصلت ع المصحة .. لقيت عمي وميس وبوي وامي وورد الصغيرة تبكي كالعادة .. وزي مانا تعودت عليها لما يصيرلخوها شي حتي لو كان بسيط .. فما بالك بكسرة رجله .. قمتها في غمري نسكت فيها .. لفت ايديها ع رقبتي وقعدت تبكي بصوت عالي .. ومعاش قدرت تتحمل هدوءها اكثر ..
قصي: اسسسس ورد معاش تبكي .. بسيطة جاته
ورد: مانبيشي يمشي ويخليني زي ماما انا :(
قصي: ههههه لا ماتخافيش هادي بسيطة .. معاش تبكي بس
بعدت وجهها من ع كتفي وشبحتلي .. كانو دموعها ع حاشية عيونها .. ع وشك السقوط .. وكأنها اطمنت لكلامي .. ممكن واثقة فيا لدرجة تصدق اي كلمة ممكن نقولها
ورد: قلتلي قبل ماما بترجع وتعيش معاك زي قبل واحسن .. معاش رجعت بكل :( .. انا خايفة ع زين ياقصي
عصرني قلبي .. ماكانش ثقة سكوتها .. كان اعتياد ع كذبي وبس .. بس المرة هادي مانكدبش معاها وفعلا الكسر ماهو بشي خطير
قصي: ءءء شن رايك ننزلو شوي
ورد: لو ماما كانت معانا رآهو ماصارش هدا كله
كلماته اهما كنت متوقعهم .. عصرت ع قلبي .. وشبحت لعمي يللي كان مقعمز ع كرسي قريب منا .. قام عيونه فيا وتنهد .. وحاول مايبينش ضعفه وعدم قدرته ع المسؤولية قدامنا ..
ميس: ورد حبيبتي تعالي معاي
فكت ورد ايدها من خالتها يللي كان نفسها قريب حتى مني .. وحطت راسها ع كتفي .. ولفت ايديها وعصرتني بمسكتها لرقبتي ..
ميس: ورد .. خيرك !!
ورد رفعت راسها وشبحتلها .. حواجبها مقرونات .. وعيونها يشعلو غصب أو كره مافهمتش لحد الآن شن بالزبط
ورد: انا نكرهك .. مانبيش وحدة تجي مكان ماما .. انتي ماتحبيناش انتي فرحتي ماما ماتت .. باش تاخدي مكانها .. انا معاش نحبك ياخالتو معاش نحبك .. انا نحب ماما بس ومانبيش حد ياخد مكانها
عيوني ماعاد قدرت نرفعهم في ميس .. ولا قدرت انزل وردمن غمري .. ولا قدرت ندير آي ردة فعل غير عيوني المصدومات .. ميس رخت ايديها بالتدريج ع ورد .. وشبحت لجواد .. آما عمي قبض ع ايده بقوة .. ووقف
رفعت عيوني فيه .. نزلت ورد من غمري .. في بالي قلت بيحضنها بوها وبينسيها الاوهام يللي عايشتها البنت بكلماتها العصبية .. والغير منطقية .. والعفوية اكثر .. بس كانت ردة فعلها غير المتوقعة .. ضربها كف ... ميس مادارتش اي ردة فعل .. دموعها ع خدودها وبس .. انا رديت ورد لغمري ونزلت بيها لوطة .. خليت بوي يهدي في عمي جواد .. وميس واقفة تراجي في حد يواسيها .. وانا متأكد ان أمي توا حارقة روحها وضميرها أنبها لانها هيا صاحبة الفكرة :\
قعمزتها ع كرسي وقاعدة تبكي .. مشيت خديتلها عصير وكيكة وجبتهملها
قصي: خلااص ورد عاااد معاش تبكي .. بابا يحبك هدا علاش ضربك
ورد: كان يحبني راهو ماخلاناش اليوم بروحنا لين زين طاح وانكسرت رجله
قصي: ماهو لاهي باش يجيبلكم فلوس وتاخدو يللي تبوه
ورد: مانبوش فلووس احني نبو ماما وبس
قصي: باهي آهو بيتزوج خالتو ميس باش تولي أمكم
ورد: خالتو ميس اصلا بتتزوج بابا ع خاطر حلو بس
قصي: ههههههه حلو ؟؟.. من قالك الكلام اهوا !!
ورد: عمتي
قصي: عمتي !! .. من عمتي ووين لقيتيها ؟؟
ورد: اليوم اتصلت بينا ع الارضي .. انا عمتي نحبها قالتلي ماتخلوش بابا يتزوج تو تعذبكم خالتكم
قصي: ومن قاللها اصلا انه بياخد ميس هوا ؟؟
ورد: انا قلتلها .. ماهو قالتلي كان تقوليلي كل شي تبدي صاحبتي ونشريلك حوش فلة الكبير .. وانا ياقصي خاطري فيه .. بندير هكي باش تشريهولي :)
قصي: تقوليلها كل شي ؟؟.. ورد .. كيف اديري هكي .. تعرفي كان يسمع بوك يقتلك
ورد: هيا عمتي تحبنا اكتر من بابا .. وتعرف مصلحتنا لان عندها صغار وتعرف وخالتي ميس ماعندهاش صغار ماتعرفش معناها الام
وقفت قدامها مصدووم . هادي شن تقول ؟؟.. وكيف عمتي استغلت ضعف وطهر وبراءة هالطفلة باش توصل للي تبيه .. حطيت ايدي ع راسي ومعاش قادر نتخيل كيدها وحقدها .. ثنيت ركابي مقابلها وحطيت ايديا ع ركابها .. وشبحتلها مع ابتسامة صدمة
قصي: ورد .. انتي كبيرة وتعرفي الصح من الغلط ولاه !!
ورد: ايه صح :)
قصي: خلاص .. ماما زمان مش مقايلتلك ماتقوليش اسرار الحوش لحد
ورد: ايه
قصي: معناها علاش تقولي لعمتي كل شي ع خاطر حوش فلة ؟؟!!
ورد: هدا مش سر اصلا .. بابا قال يوم الاثنين بتجينا خالتو وبتسكن عندنا .. ومازال 4 ايام بس
قصي: تي كيف مش سر .. هادي حاجات من تخص ؟؟.. تخص عمتي ؟؟.. والا بابا بس ؟؟
ورد: :(
سكتت وواطت راسها
قصي: خلاص ورد .. معاش تعاوديه الكلام اهوا .. ويللي يصيرفي الحوش يقعد في الحوش .. تعرفي يسمع بوك يعاقبك معاش يشريلك شي وحتى حوش فلة من عمتي مش ح تحصليه
ورد: لالالالالا معاش نعاودها خلاااص
قصي: شطووورة ورد .. توا بري اغسلي وجهك وخللي نمشو نشوفو زين كيف حاله ؟
ورد: حاااضر :)
نقزت من الكرسي وماشية جيهة الحمام .. وبعدين ولتلي تجري
قصي: آها شن نسيتي ؟؟
ورد: عمتي مش اخت بابا ؟؟
قصي: ايه صح
ورد: باهي كيف يعني زين يدس عليا حاجات لما يكبر ويدير عرسه ؟؟
قصي: وررررررررررد >_<
ورد: هههههه خلاص انبصر عليك .. آمممم قصي
قصي: هآآآ
ورد: بابا قال لما واحد يسكتكم لما تبكو .. ويراضيكم لما تزعلو .. ولما يجيبلكم يللي تحبو .. ولما يكشخ عليكم باش تولو حلوين .. معناها لازم نقوله .. نحبك <3 .. ياااا... قصي :)
شبحتلها وضحكت .. ع شطانتها ولسانها الطويل .. وحداقتها .. الا ان قلبها ابيض .. وبريئة ..
ورد: خيرك تشبحلي هكي -_-
قصي: ههههههه ماهو انا نتحشم
ورد: هههههههههههههههه
قصي: خيرك هكي تضحكي ياهبلة ؟؟
ورد: شي :)
قصي: خلاااص هي بري اغسلي وجهك خللي نمشو
ورد: قصي !!
قصي: آآآآه يرزيك فيه .. شن في تاني ؟؟
ورد: جيبلي كيكة تانية لزين
قصي: نخدم عليك وع خوك انا اصلا .. غير بري سقديني توا
ورد: انت شرير وفيسع ماتتعصب .. لكن تحبنا ولاه ؟؟
قصي: ههههههههههههههههه ايه يابنتي هيا
ورد: باه :)
واخيرا مشت .. شريت لزين كيكة ومشيناله .. لقيت ميس مقعمزة جنبه وتمسح ع شعري .. وأمي ع يساره .. وبوي وعمي واقفين يبصرو عليه .. ورد اول ماخشت قرنت حواجبها لخالتها .. عمي شبحلي متعصب منها .. وبعدين أشر عليها وع ميس .. فهمت مقصده .. انه يبيني نقوللها تتأسف من ميس .. وشوشتلها في وذنها .. وكيف بتتكلم رسمت بايدها ع الهواء حوش .. فهمت ع حوش فلة يللي خاطرها فيه .. مشت تجري لخالتها وتغمرتها وتأسفت منها .. الصغار فيسع ماينغرو .. ويفهمو مقصدنا ع هيئة رسمة خيالية .. ويبدو يحلمو بيها .. مش ح نخليه مجرد حلم ..
بعد اسبوع زين تحسن شوي .. بس مازال مايقدرش يمشي .. والصغير يتحمل ومايتكلم .. طقيت ع باب حوش عمي .. فتحتلي يللي قلبي نبض باسمها .. يللي رسمت كل شي من غير ماتقولي آي كلمة تدل ع حبها ليا .. اضايقت هلبااا .. ومانعرفش كيف تصرفت وشن قلت انا ع الباب .. يللي عرفته انه قابلتني بابتسامة صغيرة .. خشيت للمربوعة وين مايقعمز عمي وزين .. دخلت صندووق كبير .. وقفت ورد تشبحلي وتراجي في المفاجآءة .. ضحكت وأشرتلها ع الصندوق تفتحه
بدت تتسلق باش توصله وبدت تفتح فيه بالشويا وانا نراقب فيها ونضحك .. عمي وزين يراجو في الهدية
عمي: غير شن تكركر انت بس ؟؟
ورد: حيييييييييييييييي
وقف عمي مخلوع .. وزين قاعد مستغرب !!
قصي: ههههههه شن رايك فيه ؟؟
ورد: شكرا قصي .. انا نحبك <3
وجت تجري تغمرتني .. في هادي اللحظة خشت علينا ميس بالعصير .. لما نزلتها ,, ابتسمت لميس ولت ورد للحوش وقعدت ترتب فيه بالشويا .. ركبتهولها وساويتهولها ..
عمي: علاش اتعب في روحك بس؟؟
قصي: هههههه تعبكم راحة .. المهم ورد عجبها
ورد: ايه هلباااا
طبعا في هدا الوقت ميس مش معانا .. شبحت لعمي
قصي: شن قريت عليها الفاتحة ؟؟
عمي: هههههههه مافيش واحد متشوق للفاتحة غيرك ياقصي كان تقولي السر بس؟؟
قصي: لا مش هكي بس استغربت وجودها معاكم ؟؟
عمي: لالا .. انا كيف جيت اصلا .. زين مانقدرش نخليه بروحه قعدت معاهم .. اصلا كانت بتروح هيا مانعرفش شن يللي أخرها ؟؟
قصي: ممكن جيتي انا :)
عمي: اشمعنا يعني ههههههه
قصي: ع شن تلمح انت ؟
عمي: هههههه شي شي .. ع العموم بنبشرك
قصي: بشني ؟؟؟
عمي: ترقيت في الشركة والحمد لله :)
قصي: آآآآه
عمي: خيرك مافرحتليش شكلك ؟؟
قصي: ههههه لا كيف عاد مبرووووك عليك بالهلباااا
اتكيت ع الصالون .. تمنيت البشارة بان الفاتحة تتكنسل .. ومايصيرش منها .. ويحن عليا ربي ونرجع لموضوعي الاول ..
قصي: آآه عمي بنقولك ع موضوع خاص شوي
عمي: آها قول .. من اول ماخشيت حسيت فيك شي
قصي: لالا مش ليا الموضوع لالياس
عمي: قول
قصي: الياس يبي يخطب بنت عمتي لمية .. رزان
عمي: آمممم من خيرة البنات والله .. زين مااختار
قصي: -_-
عمي: ههههه خيرك حاسده ؟؟
قصي: لا مش هكي .. بس عمتي لمية ره !!
عمي: وشن دخل الام ببنتها ؟؟.. بياخد لمية والا رزان هوا ؟؟
قصي: يعني نفهم منك مش معارض ع الموضوع ؟؟
عمي: ابدااا .. علاش بنعارض .. لو هوا يبيها مايوقفه عليها شي .. خللي يتزوج ونفرحو بيه وبعدين رزان مش زي امها ره
قصي: بالك عمتي وين كانت بنت حتي هيا نفس الشي !!
عمي: لالالا عماتك من يومهم لساناتهم اطول منهم .. ومش هكي بس متمرسات في التلقيح .. وتعويج الكلام .. وغيره عاد من كيدهم وحسدهم والحقد يللي عندهم ماعند واحد
قصي: آآآآه .. ان شا الله خير :)
عمي: وانت امتى بنفرحو بيك ؟؟
قصي: ربي كريم ان شا الله
عمي: عارفه ربي كريم .. بس مافيش وحدة في بالك ؟.. قول الحق ؟؟
قصي: هههههههههههه .. شني ورد عجبك الحوش ؟؟
ورد: ايه يهبل شوف بابا
ضحك عمي .. وانا بهكي قدرت نهرب من الموضوع .. كان خاطري نقولك ياعمي نبيها يللي انت تبيها .. لكن مانقدرش نفرق بين تنين .. هيا تبيه وهوا يبيها .. ومافيش حد أجبر حد .. روحت ميس واختلى الحوش لينا معشر الرجال ومعانا بنوتة عسل #ورد .. طلعت للبلكونة ندخن .. شويا وخش عليا عمي ..
عمي: في شن تفكر ؟؟
قصي: ءءء شي
عمي: مانعرفش علاش حاسك داس عليا شي؟؟
قصي: شن بندس يعني ؟؟
عمي: الموضوع ليه علاقة بالزواج ولاه !!
قصي: ههههههههههه خيرك عمي مازلت صغير انا
عمي: لما كنت في عمرك عندي ورد
قصي: انت مستعجل تحساب الشباب كلهم زيك؟؟
عمي: من هيا يللي تبيها وسيباتك ؟؟
قصي: هئ
عمي: ضحكتك الباردة هادي .. تدل ع برودك العاطفي فعلا
قصي: ايه صح
عمي: من هيا ؟؟
قصي: عمي وحق ربي مافي وحدة سيبتني ولا واكل روحي ع خاطر بنت ولا شايل همهم اصلا
عمي ضحك ع جنب بنفس ضحكتي الاولة .. وشبح القدام .. كان في مباني واشجار مطلة ..
عمي: نفس كلامي لما حبيت ايناس وحسيت بروحي عاجز نوصلها :(
قصي: مافيش وحدة تخليني عاجز نوصلها
عمي: هيا وحدة بس .. وانا سبق وقلتلك انا حاس بيك
طلع عمي من البلكونة بعد طبطب ع كتفي .. طفيت دخاني .. وطلعت اطمنت ع زين وورد .. وطلعت لحوشنا .. وكلام عمي يرن في وذني .. ( هيا وحدة بس ) .. آآآآآه :(
>>>>>>>>>>>>>>>>>>>>>>>>
جواد يتحدث ::
في شي مخليني مش مرتاح لموضوع ميس .. ممكن لبكة قصي لما يسمع اسمها .. والا نظراته ليها لما تفوت .. أو ممكن تركيزها ع اي موضوع هيا فيه .. الحب باين في عيونه .. ويحاول يخفيه بآي طريقة كانت .. ليلة من الليالي جي عمي سعيد بيطمن ع زين .. قعمز وهدرز عليه وكانت ورد فرحانة بيه وتوريله في الحوش .. بعد حوالي نص ساعة رقدو الصغار .. حطيتهم في سرايرهم .. كل يوم يرقدو في حضني .. ومايجيهم النوم ع سرايرهم طوول .. ع قولتهم نخافو يجي حد يخطفك منا .. ويخافوك دلك من الظلام والوحدة .. وهدا كان تأثير سلبي عليهم من وفاة أمهم ..
وليت للمربوعة لقيت عمي شايل حاجاته وكيف بيروح
جواد: قعمز ياعمي نبيك في موضوع
قعمزت جنبه .. رجع قعمز وشبحلي
عمي: ان شا الله خير
جواد: نبيك تصارحني بخصوص ميس
عمي: آها حددت يوم للفاتحة ؟؟
جواد: لا .. نبيك تصارحني بس .. ميس موافقة عليا من غير آي ضغط عليها ؟؟
عمي: كيف ضغط عليها ؟
جواد: يعني من نفسها وافقت عليا ؟؟
عمي: ايه طبعا .. كيف عــ.....
جواد: لحظة عمي .. انا مش ح نسامحك لا انت ولا هيا لو دسيتو عليا شي زي هدا
عمي: ياولدي
جواد: ايه فاهم عليك .. الخالة زي الأم .. قلبها يرفع ويضم .. بس لو مغصوبة ميس تتزوجني باش تربي صغار مش صغارها .. انا مش ح نسامحكم ره
عمي: انا ضغطت عليها .. لان هدا لمصلحة ورد وزين
جواد: مش مصلحتهم وحدة تربيهم مجبورة عليهم .. عمي بطريقتك حاول تفهم ميس انا معارض ع الزواج من الاساس .. بس حتى انا صارللي ضغط من خوي ومنك ياعمي .. وكنتو ح تتورطو في شي عمركم ما ح تسامحو نفسكم .. الزواج قسمة ونصيب .. مش ضغط وكبس ع كلام يللي في قلوبنا .. انا حبيت ايناس وكنت وفي ليها لين مااتت وحبيت صغاري وح نكون وفي ليهم لين نموت انا .. ح نكرس نفسي وحياتي وكل شي ليهم وبس .. هما الشي الوحيد يللي يربطني بالحياة ومستحيل نفرط فيه .. ومستحيل نخليهم يعيشو عمرهم كله مكبوتين .. ومش طايقين حياتهم جديدة .. انا تعبت هلبا باش تأقلمو ع غياب أمهم .. مانبيش نعودهم ع حياة انا نفسي مش قدها .. وسامحني ياعمي بالله عليك
عمي: لا معذور ياوليدي :(
طلع عمي مع توديعة بابتسامة خيبة من اللي خططله .. ومااعتقدش ح نندم ع كل كلمة قلتها .. وح يجي اليوم يللي كل الاباء ح يرفعولي القبعة ويقفولي وقفة احترام .. لاني كنت ولازلت الاب المثالي .. ومش ح نفكر في مصلحتي الشخصية .. همي الوحيد صغاري ... وح نوقف معاهم وح نتجاوزو كل الصعاب .. وح نأهلهم ليكونو قدوة لكل الابناء .. #ورد .. #زين .. #أنتما_فرحتي_ودمعتي
#Dudu
