#الحضن_الدافي
الحلقة :: 13 ::
روحت بيهم طايبين من اللعب .. رقدو ع طووول .. الساعة 2:00 الباب طق .. فزعت .. وجيت واقف .. ان شا الله امي وبوي ماناضوش بس .. مشيت نجري جيهة الباب كانت الحكاية مظلمة مابانش عليا من العين السحرية .. من الاول ترددت نفتح الباب .. وبعدين توكلت ع الله وفتحت .. لقيت انسان مهزوم قدامي .. انسان ضعيف .. انسان واضح من وجهه الشاحب ان ربي خدي منه اغلا مايملك .. وفقدت الطعم الحلو في الدنيا .. عمي جواد يللي واقف قدامي .. وع طول حط راسه ع كتفي وبدي يسترجع في كل موجعة مدسوسة في قلبه .. بدي يبكي بحرقة .. ماعرفتش السبب مازلت ,,
قصي: عمي .. وين .. وين مرتك ؟؟.. وين مرت عمي ايناس وين !! .. تكلم رد عليا قوللي وين !!
قعدت نخض فيه نحاول نفيقه من اللي هوا فيه .. بس دموعه ماقدرش يشدهم عليا .. ع طول اغمى عليه .. حاولت انقص صوتي والدوشة يللي درناها .. سندته ودخلته للمطبخ .. بخيت عليه شويا مية فاق .. وعدلت تقعميزته .. شبحلي ..والشبحة عمري ماننساها ... شبحة هزيمة وفشل .. خفت عليه
قصي: عمي .. حاس بحاجة ؟؟.. فيك شي قوللي !!
جواد: ماتت خلاااص .. ماتت وخلتني .. مشت ايناس بعيد عليا أول مرة .. راحت عليا اغلا مانملك .. قصي مرتي غاليتي وكل شي حلو في حياتي .. مشت وخلتني .. ماقدرتش نشد الموت عليها .. ماقدرتش نديرللها شي .. تعبت انا .. ياااارب نلحقها مانبيش نعيش يوم من غيرها :(
تأثرت بكلامه .. ومن شدة كلامه اللي يوجع .. انهد حيلي ع الكرسي يللي جنبه .. ومش قادر نستوعب .. قعدت نهزي في راسي يمين يسار .. نبيه يقول كلام غير هالكلام .. حلمك ياورد طلع في محله .. حطيت ايدي ع راسي .. ياعمي قول كلام تاني :\
جواد: يااااارب نمووووت ونلحقها يااااااااااارب
حطيت ايدي ع فمه .. وقعدت نرعش في كلامي
قصي: اسسسس معاش تقول هكي .. استغفر ربي ونوض ارتاح في داري والصباح رباح :(
ناض وقف عمي .. ووقفته مهزوزة .. ومشي بالشويا .. ومرة مرة يشد في الحيط .. ع الحال هدا لين وصل لداري .. ع طول طاح ع سريري .. لوهلة حسيته سكران ومش ع وعيه .. تنهدت وغمضت عيوني .. ومشيت لدار خوي .. فتحت الباب بالشويا .. لقيت ورد راقدة ومتغمرة زين .. زي الملاك هما الزوز .. وكيف متغمرين بعض .. حسيت بالنعمة يللي هما فيها .. براءة و حب أخوي نظيف .. قعمزت ع حاشية السرير وقعدت نتأمل فيهم .. وماهيا الا 5 دقائق فتحت ورد عيونها ..جبدت ايديها من تحت راس زين .. وقعدت تحك في عيونها .. وجنبها السهارة فتحتها
ورد: قصي !!
قصي: ءءء جيت بنغطيكم :)
ورد: :)
قصي: ءء ارقدي دودي .. مادورنيش
ورد: بنوض نشرب امية
ع طول تفكرت بوها يللي في داري .. خفت يدير صوت او حركة وتخش تلقاه
قصي: اقعدي تو انوض انا نجيبلك
ورد: لا عادي توانوض بروحي
بدت تتقرب من نهاية السرير باش تنزل وتشرب امية
قصي: خليك .. عادي تو نجيبلك ورد -_-
ورد: اوكي :\
نضت جبتلها امية .. شربت ومدتلي الطاسة .. وقفت ع الباب
قصي: تصبحي ع خير
ورد: وانت من اهل الخير :)
سكرت الباب عليها .. آآآآآآآآه .. يارب <3
اذن الفجر وانا عيوني مفتوحات .. مشيت طقيت الباب ع بوي ..
بوي: قصي !!.. نايض الفجر بتصلي ماشا الله ههههههه
قصي: بوي في موضوع لازم تعرفه
بوي: شن في !!
شديته من ايده ودخلته لداري .. اول مافتحت الباب بوي تفاجأ واتلكمس ومعاش عرف ينطق بحرف ..
بوي: جواد .. جواد .. خيره خوي شن في !!
ع طول نقز ع سريري .. لأول مرة نشوف بوي بهالخفة هادي .. طبس ع وجه خوي وقعد يفيق فيه .. فاق بيه عمي ووجهه احمر وعيونه منفخات .. آآآه ربي يفوت هالايام ع خير
جواد: وهدا يللي صار ياخوي
بوي: يعني ايناس توفت ؟؟
جواد: ايه توفت .. مشت وخلتني .. ومش هكي بس .. خلت صغارها يللي 24 ساعة تدويلي عليهم لما كنا غادي :(
بوي: باهي كيف ماتت !!
جواد: مانعرفش مانعرفش .. تعبت عليا غادي رفعتها للمستشفى .. قعدت في غرفة الطوارئ قريب ساعتين .. بعدين طلع الدكتور وقاللي العمر ليك !! .. ماصدقتاش .. لما خشيت شفتها مافيش حاجة حية فيا .. كل شي مات .. كل شي ياخوي مااااات معاها ومش ح يرجع مستحيل مستحيل
بوي: الله يرحمها .. انا لله وانا اليه راجعون :(
جواد: الله يرحمها ويوسع عليها .. وان شا الله تسامحني .. كانت طووول الوقت تقوللي روح بيا نبي نموت بين صغاري .. سكتها وقلتلها مستحيل تموتي .. انتي ح تعيشي بين صغارك وتكبريهم معاي .. بس ربي هكي راد .. وكأنه يقولي مافيش كلمة مستحيل تموتي لبشر زيك زيها .. الموت حق ع الجميع .. حتي في الحلم ماكنتش متوقعها .. تي حتي خيال ماقدرتش نتخيلها تموت وتخليني .. سيبتلي الصغار ومسؤولية كبرها كبر .. وحملها حمل جبال :(
بوي: وكل ربي .. واستهدى بالله .. قوللي توا وصل النعش هنا !!
جواد: ايه رفعتها للطبي .. غدوا باذن الله الدفينة :(
بوي: ان شا الله
الصبح بوي رفع عمي وطلع .. وانا قلت لأمي ع وفاة مرت عمي .. يللي تمنيت ماتموت وتعيش لصغارها .. هكي بيضيعو الصغار .. أول ماسمعت امي قالت لميس وامها .. وهكي التمو الناس في حوش عمي .. أمي مشت .. وقعدت بروحي مع الصغار .. زين فطراته امي وطلع يلعب .. أما ورد ومش دارية ع شي .. تلعب وتجري هنا وهنا .. وتبني حوش بالرمل .. وبنت احلامها معاه .. مايخلاش من الاسئلة ( ماما فاطمة وين !! .. عمي وين !! .. خيره وجهك هكي !! .. علاش قاعد في الحوش ؟؟.. علاش من الصبح وين طلعو !! ) وهكدا .. مليت من اسئلتها ورغم هدا ماحبيت نجرحها .. لانها توا تحت اسم #اليتيمة .. يلي مايتمنى حد يملكه اللقب هدا .. ربي يعوضك ياورد خير ان شا الله .. قطع تفكيري اتصال أمي
قصي: نعم يام
أمي: جيب ورد لحوشهم
قصي: علاش !!
أمي: آآآه لازم تشوف امها قبل مايدفنوها .. هكي خير
قصي: يايمة راهي صغيرة وين تعرف .. وبعدين علاش نرفعها تقعد طول عمرها تتفكرلها اللقطة هادي .. تو نقوللها مسافرة او أي شي
أمي: انا قلتلك جيبها .. هادي أوامر حناها وجدها وبوك وعمك .. مش كلامي انا سلام
سكرت عليا الخط أمي .. اتصلت بالياس .. وقلتله الموضوع بس حسيته نفس الشي مش معارض ..
( ورد .. ورد .. تعالي )
جتني تجري وايديها مرونات بالتراب والمية .. وزين نفس الشي
ورد: نعم !!
قصي: بدلي حوايجك بنمشو لحوشكم شويا
ورد: علاش ؟.. ماما روحت !!
غمضت عيوني بقوة كنت نتمنى ماتقولاش السؤال هذا .. وجعتلي قلبي .. تراجي في امها تروح ع رجليها .. بس روحت في صندوق مسكر .. صندوق معتم .. صندوق مظلم .. وماهيا الا ساعات وتكون في حفرة .. وتكون بين يدين الله .. وروحها تصعد ..
ورد: آلووووو قصي !!
قصي: ايه هيا وتي روحك بسرعة :(
ورد: هييييي ماما روحت يازينوووو
زين: هيييي
جوني الزوز يتجارو ويتغمرو في بعض .. انا انسان فاشل مانعرفش نتصرف .. خليتهم يتخايلو ويعيشو اوهام ان امهم روحت .. هيهآآآت هيهآآآت
وصلنا قدام حوشهم .. شافت الخيمة وماقدرتش تشد روحها فتحت الروشن وطبست .. معاها صدمة في عيونها
ورد: قصي .. شن في حوشنا زحمة !!
قصي: نعرفش
ورد: ننزل !!
قصي: انزلي
نزلت تجري .. وزين كان واخده النوم في السيارة مابيتش انوضه ..
>>>>>>>>>>>>>>
نزلت من سيارة قصي نجري .. زحمة هلبا اول مرة تصير .. حتي لما اختي توفت ماصارش هكي .. خشيت لقيت خالتي ميس تبكي .. لقيت الناس كلهم يبكو .. مطبسين ع حاجة .. خشيت بيناتهم وشفتها الحاجة هديكا .. ماما كانت راقدة في صندوق قهوي كبيرة .. وفي سيارة كبيرة جنب الخيمة وفي رجالة ومنهم عمي .. تلفتت يمين يسار .. طبست ع ماما وبوستها ..
ورد: الحمد لله ع السلامة ماما .. علاش راقدة هنا !!
شافتني خالتي قامتني طووول وخشت بيا الداخل .. نشوف في اميمة وخالتي يتعاركو ويقولو لبعض
ميس: تي صغيرة يايمة لاش جايبينها ؟؟
اميمة: خليها تشوفها اخر مرة .. تو لما تكبر والله ما ح تسامحنا .. وتقول ياريتكم خليتوني نشوفها .. قداش ليها ماشافتهاش وخاطرها تشوفها
ميس: لما تكبر تو تعرف ان هدا لمصلحتها
اميمة: مادخلكش انتي .. لازم تعرف البنت ان امها مش ح ترجع من جديد .. لازم تعرف انها ماتت خلااااص .. مشت لربها
ماما !! .. مشت لربي !! .. يعني مشت للجنة !! .. يعني خلتنا انا وزين !! .. بعدت عليهم نجري للصندوق .. لقيتهم حاطينه في السيارة وماشيين بيها .. قعدت نجري ورا السيارة نبكي ( ماااااااااااااماااااااا .. خلوني نشوفها .. خلولي ماما ماترفعوهاش .. حرام عليكم قداش ليا نراجي فيها .. ماما )
خالتي تغمرتني وقعدت نبكي .. ماما مشت للجنة
ميس: حبيبتي خلاااص .. آهو بابا عايش وبيعوضكم ع كل شي ان شا الله
ورد: وماما !!
ميس: ادعيلها ربي يرحمها .. هيا اصلا بتسمعك كل يوم كان تبي تقوليلها حاجة .. واصلا هيا بتقعد ديما تشوف فيك
ورد: وانا مانقدرش نشوفها ولاه !!
ميس: في احلامك ح تشوفيها واحكيلها يللي خاطرك فيه .. حبيبتي ماما ح تقعد معاك طووول عمرك
ورد: مني بينوضني للمدرسة ؟؟.. باهي غدوا عندي تطبيق مني بيقريني !!
ميس: انا .. انا تو نديرلك كل شي ماتخافيش
ورد: قصي قاللي ماما روحت .. ماقاليش بتسيبك بكل :(
ميس: ءءء من قالك بتسيبك ؟؟.. ماما ديما معاك
ورد: يعني حلمتي تحققت خالتي ولاه !!
ميس: حبيبتي
تغمرتني وقعدت تبكي بالقوة .. وعيطت بصوت العالي .. وانا ماقدرتش انزل دمعة .. زي ماشفت في الحلم توا صار .. بس في الحلم ماما ضحكتلي ومشت وكلمتني اصلا .. بس توا مشت وماردتش عليا ولا كلمتني .. ولا حتى تغمرتني وشافتني .. هيا مش مستاحشتني ؟؟ .. هيا مش تحبني ؟؟.. علاش بتخليني ؟؟.. وعدتني انها ترجع وتقعد معاي للابد ؟؟.. وهكي انا بنولي بلا أم ؟؟.. تغمرت خالتي بالقوة
ورد: انا نحبها ماما وح ندعيلها ديما .. وح نشوفها في الجنة مع الرسول صلى الله عليه وسلم .. هكي مرة ماما قالتلي .. يللي تحبيه ويمشي للجنة تو تشوفيه مع رسولنا .. ولاه خالتو !!
خالتي بعدتني شويا عليها .. ومسحتلي دموعي .. وباست ع جبيني
ميس: حبيبتي اكيد بتشوفيها ماما في الجنة .. توا لازم تكوني قوية .. وترضي بابا وتعاملي زين كويس .. لين تكبري وربي ح يعطيك حياة حلوة .. وماما ح ترضى عليك وتكون فرحانة بيك :)
ورد: ايه ايه .. يااارب خللي الماما ترتاح .. ارفعها معاك انا نحبك واكيد ماما ح ترتاح معاك :)
ميس: قولي يارب ارحمها ونور قبرها
ورد: آميــــن ياربــ العالمــــين :)
تغمرت خالتي وغمضت عيوني .. تخايلت ماما مقعمزة في الجنة وفرحانة تضحك ..
تاني يوم الصبح ..نوضت نلعب مع صغار جيرانا استاحشتهم .. وخديت خوي زين وقعدت نلعب فيه .. واحني كنا نلعبو .. شفت قدامي واحد انا مستاحشاته هلبااا .. شفت بابا حبيبي .. نقزت في رقبته وزين يجري وتغمرنا مع بعض وهوا مبتسم .. بس كان ضعيف وعيونه حمر
ورد: استاحشتك يابابا
بابا: حتى انا .. شن تلعبو !!
ورد: قصي علمنا كيف ندير وحوش صغير بالرملة توا نلعب في صغار جيرانا هههه
بابا: ههههه شاطرة بنتي الحلوة .. ردي بالك ع خوك اوكي !!
زين: آين ماما !!
سكت بابا وقعد يشبحله بعدين قامه في غمره .. انا شبحت لبابا
ورد: ماما في الجنة ولاه !!
بابا: ايه صح :)
زين مايعرفش شن الجنة لانه صغيرون .. بس كان فرحان ببابا وتغمره هوا يضحك .. ماما في الحلم قالتلي ردي بالك ع زين .. ح نحطه في عيوني ياماما وانتي ارتاحي .. خشيت نجري للحوش .. لقيت النساوين قاعدين يبكو .. خشيت لدار ماما .. لقيت خالتي متكية ع سرير ماما وتبكي .. فتحت القجر متاع الكامدينو .. لقيت صورتها .. خديتها وطلعت نجري
#Dudu
