#الحضن_الدافي
الحلقة :: 23 ::
قصي: ءءء لا شي .. شن رايك نرفعو ورد وزين للملاهي ؟؟
جواد: ايه عادي وفي الطريق نهدرزو هههههههه
قصي: ايه ناديهم
ويوم من الايام ::
لقيت أمي مقعمزة بروحها . تشرب في قهوتها وتتفرج ع مسلسل كويتي .. قعمزت جنبها وبنحاول نفتح موضوعي .. ايه ايه موضوعي مع ميس <3 ..
أمي: تبي حاجة ؟؟
قصي: هههههه حاجة زي هكي
أمي: بتخطب ؟؟؟
قصي: هههههههه صح
أمي: مني التعيسة الحظ !!
قصي: بنقولك بس ردي بالك تفكري غلط .. بالله عليك
أمي: ماتقوليش بت عمتك سلوى خللي نخش الخلي توا
قصي: ههههههه .. لالا بعيد السو
أمي: امالا مني !!
قصي: ميس
أمي: ميس .. ميس بنت سعيد .. اخت مرت عمك .. قصدك يللي كانت بتكون مرت عمك :o
قصي: ايه بالزبط :)
أمي: معناها انت مقايل حاجة لعمك ومخليه يسكر الموضوع ولاه !! .. شني تمووو البنات ؟؟.. معاش فيه من تاخد والا خلاص الحاجة اللي في ايدك عمك تحلالك >_<
قصي: لا والله لا .. اصلا مايندري ع شي هوا
أمي: بينك وبينها شي معناها !!
قصي: حشا وكلا .. اقسم بربي حتي عيونا ماتلاقو يمة خيرك ولدك انا :(
أمي: ولدي ايه بس ماعنديش فيكم ثقة .. عيب عليك والف عيب كانك مداير شي من وراي والا مكلم عمك
قصي: بالله عليك يمة ركزي شويا .. انا والله ماقلت لعمي حاجة ولا فكرت اصلا نفتحله الموضوع .. بروحه بروحه كنسل موضوعه
حطت أمي فنجانها وناضت .. وشبحتلي شبحة خفت منها هلبا .. بادلتها بنظرة طهر بس مااهتمتش .. طلعت من الدار وخلتني ندور في مكاني ومافهمتش ردة فعلها ؟؟.. ولا عرفت اجابتها ؟؟.. ليش الحظ جاي عكسي ؟؟.. خايف ترفضها .. بنرجع لنقطة الصفر .. تنهدت وغمضت عيوني وهلة .. ونضت طلعت بنشم الهواء .. مش ح نرجع نفتح الموضوع معاها .. كانها بترفض .. انا والله ماني متزوجها .. بنفس الوقت رضاء أمي أولى من كل شي .. وكانها بتوافق .. انا ح نكون اسعد انسان ع وجه الكرة الارضية
>>>>>>>>>>>>>>>>
جواد يتحدث ::
مقعمز نتسامر انا وصاحبي وليد .. خليت صغاري عند عمي سعيد الليلة .. فجآءة رن تليفوني .. شفت المتصل لقيته خوي ..
جواد: بعد اذنك وليد بنشوف خوي شن يبي
وليد: خود راحتك :)
ابتسمت .. وطلعت من الكافي ورديت
جواد: آلو .. كيف الحال ؟؟
فاطمة: الحمد لله .. انا فاطمة .. كيف حالك انت ؟؟
جواد: اهلين فاطمة .. كيف حال الياس ؟؟.. قصي اليوم ريته ههههه
فاطمة: الحمد لله .. سبب اتصالي هوا قصي
جواد: ان شا الله خير !!
فاطمة: بالله عليك حلفتك بالله .. قصي مقايلك حاجة ع ميس باش انت رفضتها ؟؟
جواد: ههههههه يبي يخطبها ؟؟
فاطمة: معناها مقايلك حاجة ولاه !
جواد: ههههه لا والله ماقاللي حاجة .. بالعكس كان من المؤيدين لزواجي
فاطمة: يعني ماليشي علاقة بموضوعك ؟؟
جواد: لا ابدا .. انا مش مرتاح للموضوع من الاساس وحسيت البنت مغصوبة عليا غصب
فاطمة: آآآآآه طمنتني .. والله قريب هبلت لما قاللي بنخطبها .. امالا نبدو في مشواره بعد موافقتك طبعا
جواد: لا انا مالياش علاقة بكل .. انا تزوجت اختها وتوفت الله يرحمها .. اعتبري البنت برانية وتوكلي ع الله واخطبيهاله مش ح يلقى خير منها :)
فاطمة: بارك الله فيك .. جميلك عمري ماننساه :(
جواد: جميل شنو يافاطمة خيرك هههههه .. آي شي يريحكم معناها يريحني .. وآي شي يسعدكم أكيد واكيد يسعدني <3
فاطمة: مشكووور وخيي والله طمنتني
جواد: الشكر لله .. والف الف مبروووك لقصي :)
فاطمة: الله يبارك فيك .. آهو معاك خوك من امبكري يراجي هههه
جواد: تمام هههههه .. آلو خوي شن الاخبار ؟؟
هدرزت شويا ع خوي واطمنت عليه .. سكرت الهاتف ومن قلبي فرحتله هالمنجوه .. دارها وخطب زينة البنات ربي يهنيه ويوفقه .. وليت لوليد وكملنا هدرزتنا ..
.>>>>>>>>>>>>>>>.
قصي يتحدث ::
كنت مقعمز في الجنان واندخن .. كل المواقف واللحظات مرت مع ميس .. وقداش مادمي انحرق لما سمعت بعمي بيتزوجها .. وين ولت حرة طليقة .. أمي رفضتها بطريقة ماتعجبنيش .. قطع تفكيري أمي ..
( تفكر فيها )
قصي: هههههههه من هيا ؟؟
حاولت نتظاهر بطبيعتي الكاملة .. وتصنعت الابتسامة .. بس ماتفوتش ع أمي هالحركات
أمي: قصي ياولدي سامحني ظلمتك
قصي: كلمتي عمي ؟؟
أمي: كنت مطرّة نكلمه باش قلبي يستريح ومايوجعاش خاطره
قصي: كلمتيه وسألتيه كلمك قصي ع ميس والا لا !! ... صح ولاه يمة ؟؟
أمي: لا مش هكي .. قلتله لو موافق ع الموضوع خللي نواصلو المشوار
تلفت لأمي .. نظرتي ليها ماكانتش عادية ..لاني فعلا كنت مضااايق .. وفي قلبي مليون غصة وغصة ع التصرف يللي داراته
أمي: خيرك تشبحلي هكي ؟؟
تلفتت للجيهة التانية .. وكيف شديت دخان تاني بنولعه
أمي: ماتتحشمش ادخن قدامي ؟؟
قصي: آسف
أمي: باهي شن قلت نمشولها البنية ؟؟
قصي: ديري اللي يريحك
ونضت من مكاني .. وبديت نسقي في الغرس .. لحقتني وقعدت تشبحلي وانا فاهم نظراتها .. بس مش مصدق ان في يوم أمي تكدبني وماتوتقش فيا ..
أمي: قصي .. تعرفني الحركات اهيا مانحبهاش .. البنت ليك والا ليا فهمني !!
قصي: وجعتني صدتك ليا يايمة .. وجعتني اكتر وين سألتي عمي عليا
أمي: ماصديتكش .. كان لازم نتصرف معاك هكي باش ماتعطيش أمل ع الفاضي
قصي: وعلااااش ع الفاضي ؟؟.. انا ماتقدمتش للخطوة هادي لين درستها مليح .. وانتي تعرفيني كيف !!
أمي: من واجبي كــ أم نعرف شن يللي يصلح لولدي .. وندرس قرارك مليووون مرة .. تخايل ميس تبيه .. ترضى تتزوج وحدة جتثها معاك وقلبها مع غيرك ؟؟
قصي: لا طبعا .. وانا نعرف كل شي بخصوص الموضوع هدا
أمي: باهي تخايل عمك يبيها .. بالله عليك كيف تبي عمك يواصلك وانت واخد يللي يحبها ؟؟
قصي: تعرفي .. هدا وين حسيت بشعور الياس لما قاللي بنخطب رزان
أمي: كيف ؟؟
قصي: طلعتله ستين عذر وعذر كله باش يمحي هالفكرة من راسه .. تاريته واااااعرة يايمة
أمي شبحتلي باستغراب ومش فاهمة شي !!
قصي: ماتقدميش ولا خطوة توا لين نقولك اوكي !!
أمي: وين ماشي ؟؟
حطيت الطوبو ع الشجرة ومشيت طفيت الشيشمة .. وليتلها
قصي: مش بعيد
أمي: باهي خللي نكلمها ونشاورها ع الموضوع شن رايك ؟؟
قصي: آممممم تو نعطيك الاخضر لما نسأل عليها مزبوط
أمي: الصبر ياربي مش قلتلي نعرف عليها كل شي ؟؟
قصي: في شي في راسي توا فكرتيني فيه خللي نتأكد منه قبل
أمي: آآآآح ربي يهديك -_-
طلعت من الحوش .. قدام مقر المحكمة درست وراجيت ميس لين تطلع .. هدا وقت نهاية دوامها ..
طلعت ميس وكانت حايسة في كتاباتها .. ووراق وعالم حايس .. فتحت سيارتها وحطت الوراق كلها للخلف .. وكيف بتركب جي وقف عليها شاب .. وهنا انا ولعت وقعدت نراقب فيها .. تبتسمله ويبتسملها .. تنهدت وخرت راسي ع الكرسي .. غمضت عيوني .. المواقف اهيا مانحبهاش .. شويا ورجعت شفتها لقيتها ركبت لسيارتها .. وبتطلع .. طلعت واستمريت في مراقبتها .. لين وصلتها للحوش .. واستمريت في هالموال لين طق اسبوع .. وفي هالاسبوع الياس خطب رزان .. وفرحان بيها .. وبدي يخدم ع حوشه كل مرة يضيف حاجة ليه .. يحاول يكمله قبل مااطق السنة باش يتزوجها .. وأمي كانت راضية وخايفة في نفس الوقت .. عمتي صعبة ولسانها احرف ..
موضوعي مع ميس كان ناجح .. والحمد لله كانت بنت قمة في الاخلاق .. من حوشهم للشغل .. بس قصة الشاب لحد الان مانعرفهاش .. ممكن لو خطبتها نفهم منها كل شي .. انا طبعي صعب .. غيوووور لدرجة لا توصل .. مانحبش الانسانة يللي انا اخترتها يشوفها حد والا تشوف حد .. نبيها ملكي الخاص .. ممكن يمشي هالطبع مع ميس ويمكن مايمشيش .. لازم ماتعرف طبعي قبل مانتزوجها .. ممكن مايساعدهاش ..
أمي: بارك الله فيك .. ههههه .. لا الشرف لينا .. عاد عندنا قبل بنيتكم مايحتاجش نسألو .. هههه صحيتي سلم وخيتي .. باهي ان شا الله .. سلمك سلمك .. سلمي عليهم .. بالسلامة :)
قصي: هآآآ شن قالتلك ؟؟
أمي: خيرك مستعجل ؟؟
قصي: غير يمة بالله عليك قوليلي شن قالتلك ؟؟؟
أمي: هههههههههه ماقالت شي بتسأل بوها قبل
قصي: آآآآآح
أمي: خيرك تلحلح ؟؟؟
قصي: تي انا بناخد البنت والا بوها ؟؟
أمي: هههههههه امالا كان عندك اخت وجي واحد خطبها تعطيها وخلاص ماتسألش عليه ؟؟.. ايه حتي هوا بياخد اختك مش انت هههههه
قصي: غير يايمة فكينا من الامثلة .. وقوليلي امتى قالت بترد عليكم ؟؟
أمي: الصبر ياربي .. غداي ع النار بنمشي نشوفه كان بنزيد شويا بيسمعو صوتي الجيران
قصي: -_-
أمي: ههههههه رمض عيونك مستحيل نقولك لين يجي بوك ههههه
وهكي كانت أمي تلعبلي باعصابي :(
#Dudu
