#الحضن_الدافي
الحلقة :: 48 ::
خيره مقفل زعما شن صاير معاه ؟؟ .. اتصلت بوليد صاحبي .. رد عليا وصوته مش طبيعي !!؟؟
وليد: آهلين جواد
جواد: كيف حالك ؟؟
وليد: الحمد لله باهي :(
جواد: خيره صوتك هكي شن في؟؟
وليد: لا شي غير غسان اليوم سافر :(
جواد: سافر ؟؟ .. هوا قاللي مسافر الاسبوع الجاي مش اليوم ؟؟ .. شن صار ؟
وليد: قبل يومين دار كشف وتحاليل وطلع عنده السرطان عفانا الله واياكم .. ماتوقعناشي بكل
وبدي صوت وليد يرعش ويبكي في نفس الوقت .. سكرت منه ولبست جاكيتي الشتوية وطلعت جتني مها تجري
مها: جواد خيرك مستعجل شن في؟؟
جواد: ماشي لوليد ** ونلبس في كندرتي **
مها: ان شا الله خير ؟؟
جواد: خوه غسان طلع مريض بالسرطان عفانا الله واياكم :( .. انا ماشيله بنوقف معاه خليك مع الصغار هي مع السلامة
مها: باهي رد بالك ع روحك .. وين توصل كلمني وطمني بالله عليك :(
سكرت الباب وراي .. ولعت سيارتي والحكاية كانت مغيمة والمطر تصب شوي شوي .. اذكرت نظرة غسان لورد هداك اليوم كانت ادل ع حب .. هل غسان يعيش ويحقق مايتمنى ويتزوج ورد ؟؟ .. بس ورد تعامل فيه ببرود تام لدرجة بتخليه يراجيها عاااام كامل .. ليش ياورد بس تكسري بخاطره :(
>>>>>>>>>>>>>>>>>>>>>
لقيت خاالتو مها مقعمزة ع الكنبة وتدعي .. جيت قعمزت جنبها
ورد: ماما شن في؟
مها: شي ** شدت خدي بكفها ** جعتي نحطلك تاكلي ؟؟
ورد: هئه .. انتي مضايقة ؟؟
مها: لالا ** عيونها دمعو وبدت تبكي **
ورد: ماما خيرك ؟؟ .. بابا صايرتله حاجة ؟؟ .. احكيلي خيرك ؟؟ ** وبديت نخض فيها بالشوي **
مها: غسان ياورد .. مريض بالسرطان
انصدمت .. عيوني توسعو .. غسان مريض ؟؟ .. بالسرطان زيادة ؟؟ .. هذا يعني طريقه للموت ؟؟ .. ونسبة الشفاء منه ضئيلة ..
ورد: كيف ؟؟
مها: بوك هكي قاللي والله اعلم :(
ورد: باهي علاش تبكي ؟؟ .. ادعيله ربي يشفيه
مها: ذكرني بخوي الله يرحمه :( ** حطت ايديها ع وجهها وبدت تبكي **
ورد: خوك مات بالسرطان ؟؟
مها: ايه .. مات وعمره 19 العام بس .. صغير في عز عمره الله يرحمه
ورد: الله يرحمه .. خلاص هدي بالك ومعاش تبكي .. ادعيله بس انتي فقدتي خوك وربي عوضك بزوز خوت تانيين بس انا فقدت ماما وشن بيعوض غياب الام :(
مسحت دموعها بكفها .. وابتسمتلي : آسفة حبيبتي نوضت عليك المواجع :(
ورد: لالا عادي بس نبي نوضحلك لما تشوفي مصائب الناس تهون عليك مصيبتك
مها: آها .. الله يرحمهم ويكتبلهم الجنة .. وربي يشفي غسان حتى هوا صغير ياناري عليه :(
ابتسمت .. ونضت خشيت لداري .. قعمزت ع كرسي الشكماجة .. واذكرت نظرات غسان ليا .. كلها حب <3 .. ومعزة <3 .. واحترام <3 .. وشوق <3 .. بس انا تجاهلت هذا كله لاني كنت نجري ورى وهم قصي .. في الاخير قصي تزوج .. مسحت دمعاتي يللي نزلو عفويات .. وقمت ايديا وغمضت عيوني وبديت ندعي ربي انه يشفيه ويحفظه مازال صغير والعمر قدامه .. مسحت ع وجهي .. اسوء شي اديره في حياتك تجري ورى شي مجهول الهوية .. مجهول المشاعر .. تجري ورى النجمة والقمر جنبك .. تجري ورى الحلم والواقع جنبك .. تجري ورى الوهم والحقيقة جنبك .. النجم والحلم والوهم قصي .. القمر والواقع والحقيقة غسان .. مواقفي مع غسان ماكنتش هلبااا .. ممكن مرتين تلاقينا صدفة .. هدرزتي معاه عبارة عن اجابة عن اسئلته .. حبه ليا كان من بعيد .. ماصارحني بشي ملموووس .. بس بنظراته ليا باين الحب .. حسيت بقيمتك ياغسان بعد ماقربت نفقدك .. حسيت بحبك ليا بعد ماشبه ضيعتك .. حسيت بيك وانت موجوع ومش قادر توصل للي تحبه .. حسيت بيك لاني مجربة شعورك .. سامحني غسان .. ياريت تسامحني .. ماكنتش مستوعبة حبك ليا .. لاني كنت متوهمة بقصي .. سامحني غسان ..نتمنى تسامحني وتوصلك كلماتي .. توصلك مشاعري المدفونة ..يوصلك عطر حبي لعندك وتستنشقه وترجع تعيش .. تشوف الدنيا بالالوان يللي تحبها .. تشوف الدنيا بعيونك الحلوة <3 .. تزرع ورد حياتك .. وتعيش مع وردة حياتك .. سامحني غسان لاني ظلمتك .. لاني عذبتك .. سامحني لاني مانقدرش نوصلك .. بجد سامحني :(
رجع بابا مع الساعة 11 في الليل وكان متأثر هلبا بوضع غسان .. سافر غسان ومعاه خوه التاني بيعيد التحاليل وبيتعالج .. بس هل ياترى يزرع الأمل من جديد في قلبك ؟؟ .. قعمزت جنب بابا وحطيت ايدي ع رجله
ورد: تاعب هلبااا قصدك ؟؟
جواد: هكي قالولي والله اعلم :(
ورد: ربي يشفيه ان شا الله
جواد: ان شا الله
ورد: ءءء بابا .. هوا يللي يمرض بالسرطان يموت ؟؟
جواد: مش الكل .. السرطان نوعين حميد يسهل استئصاله وخبيث هذا المتعب .. ونسبة الموت فيه كبيرة
ورد: آها .. وغسان من آي نوع ؟؟
جواد: هنا قالوله لازم يدير عملية .. هوا سافر وممكن بيديرها غادي الله اعلم
ورد: آها .. قالتلي صاحبتي لو نفسيته تتحسن ويحاول يتعالج نفسيا من هالمرض ويتآقلم معاه ويحافظ ع روحه ممكن يشفى منه ويرتاح :(
جواد: ايه ممكن
ورد: وكيف الواحد يخلي نفسيته ترتاح ؟؟
جواد: مايتأثرش بالمرض .. ويعيش حياته كآي انسان طبيعي بس يحااافظ ع ادويته
ورد: والعلاج النفسي ادوية بس ؟؟
جواد: العلاج النفسي ماليشي علاقة بالادوية ورد .. تربحي راسي يوجع فيا
ورد: تمام .. تصبح ع خير
نضت من جنب بابا .. بعد مااتكى ع الكنبة وخداه النوم من التعب .. جيت لخالتو مها لقيتها اضم في المطبخ
ورد: نبي نكلم غسان :(
مها: شن قلتي ؟؟ ** تلفتتلي بصدمة **
ورد: وجعني الولد .. عمري ماتخايلت روحي نضعف لغسان في يوم من الايام :(
مها: ادعيله بس توا فات الآوان
ورد: ان شا الله ربي يشفيه :(
طلعت من المطبخ وعرفت خالتو مها مستحيل تساعدني نكلم غسان .. خطر في بالي نفتش تليفون بابا وناخد رقمه .. لازم نكلمه قبل مايموت ونحققله امنيته المرجوة :( .. وفعلا خديت الرقم وخشيت لداري سكرت الباب بالمفتاح .. واتصلت بيه من رقمي ..
غسان: آلو !!
سكتت وماقدرتش نتكلم وواضح من صوته تاااعب
غسان: من معاي ؟؟ .. الرقم من ليبيا مني ؟
ورد: انا .. انا ** وبديت نقطع في حروفي ** .. ورد
غسان: آهلين ورد كيف حالك ؟؟
ورد: الحمد لله كيف حالك انت ؟
غسان: الحمد لله
بعدين سكت .. انسان باين طبعه خجول
ورد: حبيت نكلمك ونطمنك
غسان: ع شني بطمنيني ؟؟
ورد: على ,,, ** وقاعدة ماكملتش كلامي فصل عليا الرصيد **
آووووووف مبرده مش وقته بكل .. سكرت قفل تليفوني واتكيت ع فراشي .. شويا وسمعت صوت مسج .. ( معاش يهم تكوني ليا او لا .. المهم سمعت صوتك قبل مانموت )
قبل مانموت ** تخايلتها بصوته .. تخايلتها بوجعه وآلمه .. حسيت الموت تاخد منا آغلا الناس .. ماما .. وتوا غسان .. وخالتو مها خوها .. تغمرت مخدتي وبديت نبكي .. ماوصلتش رسالتي ليك ياغسان .. ياريتك تعاود تتصل بيا .. بس عارفة ماتبيش تكسرني بعد ماوصلت لذروة الحب ليك .. ماتبيش تجرحني بعد ماوصلت لنبرة صوتك الحنونة ..
فاتت الايــــام بسرعة ::
كان بابا يوميا يمشي لعمو وليد ويهدرز عليه .. وانا وصلت لامتحاناتي النهائية .. اجتهدت وشديت في قرايتي احسن .. وغسان ندعيله بالشفاء في آونة الاستذكار .. ماما بدت بطنها تكبر اكثر ووصلت في الشهر السابع .. تعبت شوي بس عاونتها وان شا الله ربي ينوضها بالسلامة .. آما زينو حبيبي عنده امتحانات تاني اعدادي ويجتهد في قرايته .. ويجاوب في كل امتحان يخشله طالع شطور لاخته .. في يوم من الايام .. جي بابا ورفع ماما للمراجعة وقعد زين في داره يقرا ..
خديت استراحة من القراية ودرت مق نسكافيه وقعمزت قدام التلفزيون .. فجآءة رن تليفوني والرقم دولي .. قلبي زاد نبضه .. وحسيت المكالمة هادي بتخبرني وفاة غسان .. دموعي نزلووانا نشوف للرقم .. قمته تليفوني ويديا يرعشو مع بعض .. رديت والآمل فقدته من رجعة غسان ع بلاده ولاحبابه <3
ورد: السلام عليكم
غسان: ورد
ورد: نعم ** صوته خوفني اكثر **
غسان: نبي نصارحك بشي .. بنقولك كلمتين قبل مانخش للعملية .. من كنتي صغيرة سكنتي قلبي .. حبيتك .. ومن لما شفتك وانا نفكر فيك .. عارف ان فات الآوان .. بس انا نحبك <3 .. والله نحبك يابنت الناس .. ومكالمتي هادي مش خيانة لبوك .. لا والله ربي عالم شن في نيتي .. بس انا عارف روحي بنخش ومعاش بنطلع الا في النعش .. فلهذا حبيت نوصلك حبي ليك .. وكلامي يللي سكن قلبي ليه سنين .. ربي يحفظك يابنت الاصول .. لانك بجد تنحبي وتلاقي من يحترم هالجوهرة الثمينة .. بجد انتي بنت خلوقة ومتربية ع صح .. ياريت تعرفي تختاري الانسان يللي يحويك ويصونك .. ومااضيعيش جمالك الداخلي مع حد مايستاهلكش .. انا مانعرف عليك شي الا مقتطفات من بنت خالتي حنين
لما قال حنين اذكرت صاحبتي وزميلتي حنين <3 .. هيا بنت خالة غسان .. وكانت توصله في اخباري ؟ .. وعطاته النبذة عني ؟؟
ورد: حنين بنت خالتك ؟؟ .. تحكيلك عليا ؟؟
غسان: لا والله يشهد ربي ماتحكيلي في حاجة شخصيا .. بس نسمع فيها ديما تشكر فيك وفي اخلاقك وزاد حبي كبر في قلبي ليك .. خلاص توا ورد .. ندعيلك بالخير قبل لنموت ونفقد حياتي كلها .. ورد .. ربي يوفقك ويحفظك ويهنيك <3 .. سلامات
ورد: راجي راجي
غسان: نعم !!
ورد: نحبك <3
وقلبي دق مع هالكلمة لاول مرة .. فعلا طالعة من القلب .. هذا الشخص يللي يستاهل نفرحه قبل مايموت ..
غسان: احلا كلمة سمعتها في حياتي <3
ورد: خللي ايمانك بالله قوي .. انت ح تعيش وتخطبني وانا ح نوافق .. انت تستاهل كل خير وانا غبية ماعرفتش قيمتك .. انت يللي تستاهل كلمة نحبك <3 .. وتستاهل الحب كله <3
غسان: شكرا :)
ورد: ع شنو ؟؟
غسان: كلماتك هادم رفعوني للسما من الفرحة .. آهم شي ورد صوني نفسك لين يجي ولد الحلال .. سلامات
سكر عليا .. ومع التسكيرة هادي ايديا رعشو وبديت نبكي .. خلاص تمت قصة غسان معاي ؟؟ .. انتهت بموته ؟؟ .. لا ياربي اشفيه يااارب .. طول الوقت تفكيري فيه امتحاني ماقدرتش نركز فيه .. نراجي منه في المكالمة يطمني .. بعد ماطقت الساعة الفاصلة لليوم فقدت الامل وقلت انه توفى وغاب عن حياتي من ارادة الله .. والمرة الاولة بارادتي انا :( .. بس ارادته كانت قوية لتكون ورد ليه .. النوم ماجانيش .. مرة مرة نفتح في تليفوني نتأكد بالك في مكالمة او رسالة منه .. بس مافي شي .. سكرت قفل تليفوني وغميت روحي بمخدتي .. مافقتش الا ع رنة نقالي الهادية .. فتحت عيوني لقيت الدنيا شوي مضوية .. شفت الاتصال لقيته رقم دولي .. آووووووف علاش رقدت بس اكيدة حد من طرف غسان .. بس ليش اتصل بيا ؟؟ .. زعما سجل رقمي وحبو يخبروني ؟؟ .. بس حوشنا هادي مافيشي صوت كان هذا بابا راهو مشي لعمو وليد لمراسم الوفاة .. نضت للحمام .. لقيت ماما البرا
ورد: صباح الخير
مها: صباح النور ورد
ورد: في حاجة !!
مها: ايه بوك مشي لعمك وليد اتصل بيه
قلبي وقف وخشيت نجري لداري قمت تليفوني .. ودرت رنة لندى وعاودتلي
ورد: ندى محتاجة رصيد بالله عليك
ندى: صبح يافتاح
ورد: بالله عليك اوقفي معاي
ندى: تي شن في؟؟
ورد: ضرووووري بالله عليك بعدين نحكيلك
ندى: باهي باهي .. زوز دينار يسدوك؟
ورد: ايه ايه
سكرت مني وبعتتلي رصيد .. ع طول ع رقم غسان وسكرت الباب وانا متوترة .. سمعته نادى بعدين فتح الخط
ورد: غسان !!
غسان: نعم
ورد: انت عااااايش الحمد لله ياربي الحمد لله
غسان: هههههه ايه نجحت العملية وكان مش منتشر في جسمي .. التحاليل طلع فيها خطأ
ورد: الحمد لله ع السلامة .. توا بابا مشي لعمو وليد خفت كلمتك طول
غسان: خفتي عليا !!
سكتت وتحشمت
غسان: هههههه تي ربي يحفظك ورد انا تاعب من العملية
ورد: قداش ليك طالع ؟؟
غسان: 4 ساعات تقريبا .. نكلمك بعدين
ورد: آوكي سلامات
سكرت وبكامل نشاطي خشيت لامتحاني وجاوبت اجابات النجاح ههههه لاني ماقريتش باهي .. اول ماطلعت للساحة .. مشيت نجري وتغمرت ندى
ندى: ياهبلة بتقتليني هههههه
ورد: غسان طلع من العملية الحمد لله
ندى: ايه الحمد لله :)
ورد: كلمته الصبح قبل مانجيك
ندى: عاودتي الغلط ياقردة وكلمتي ولد؟؟
ورد: آوووف مش غلط ياندو .. بس ماحسيتش بقيمته الا لما فقدتها -_-
ع وقفة حنين علينا : ورد !! .. فرحانة ؟؟ .. جاوبتي !!
تلفتت لحنين وقلتلها: نونة علاش ماقلتليش ع غسان ؟؟
حنين: ماكنتيش متقبلتيه علاش بنحكيلك عليه :(
ورد: مشكووورة حبيبتي بجد <3
حنين: ياحبيبتي انتي تستاهلي كل خير .. بس قصي عامي ع عيونك وقلبك كان
ورد: انسي .. ربي يخليك ليا <3
تغمرتها وندى تشبحلنا : دووووم الصحبة
تغمرنا بعض بحب .. وصحبة القوية .. حبيباتي صديقاتي لهنّ دور كبير في حياتي <3
>>>>>>>>>>>>>>>>>
قصي يتحدث ::
حياتي مع ميس كل يوم تسوء .. حاولت نرطب معاها الجو .. مش حاسة بيا .. في يوم من الايام نتفرج ع تلفزيون جت وقفت قدامي
ميس: قصي !!
قصي: آمممم
ميس: مضايقة
قصي: شن فيك ؟؟
ميس: نبي نتغير
قصي: ايه تغيري شن فيها !!
ميس: كانه مش هامك الموضوع ؟
وقفت شديت ايدها وقعمزتها ع الكرسي : اسمعي ميس .. انتي لازم تتغيري .. تغيري من حياتك وتمسحي اوهام ورد من بالك .. وتهتمي بحوشك وراجلك ونفسك وولدك يللي جاي .. درتي هلبااا غلطات في حياتك وماشعفتيش مازال الحقد يجري في دمك .. شوفي ورد غلطة مرة معاي ولتوا حتى نمشيلهم للحوش ماتطلع تسلم .. وتجينا هنا ماتطلعليش يللي قبل كانت ماتفارقني رمشة عين .. آوعي ميس .. شوفي شن صايرلك متبهدلة في حياتك .. اوثقي فيا وانسي ان كان شي بينك وبين ورد .. تعيشي حياتك .. آما لو تقعدي تشديها في جرت ورد ورزان وامي وجواد وحتى مها ملحقة عليها والله ماك عايشة وبالك مرتاح .. ح تقعدي طوول عمرك شاقية ومتعصبة .. وحياتك ماشية عكس .. انسي انسي .. ربي عطانا نعمة النسيان باش نعيشو بأمان .. حبيبتي ميسوو .. انا حبيتك انتي وماحبيتش غيرك .. انا لما كلمت ورد ليلة فرحنا لاني شفتها تبكي ومانحبش نشوفها تبكي .. مش حب يللي في بالك انتي .. لا حب آخوي .. حبيها ورد وصدقيني مش ح تلقي زيها صديقة وحبيبة وبنت اخت .. حبيها وصفي نيتك من جيهتها وياااسرك حقد واوهاااام .. تتعبي والله تتعبي .. وجربي يللي قلتلك عليه وشوفي الراحة يللي ح تكوني فيها ** ثنيت ركابي قدامها ** آكبري بعقلك ياعيوني .. انا مازلت معاك وح نشد في ايدك لين نوصلو للحياة يللي كنا نتمنوها قبل 6 سنين .. ** حطيت كفوفي ع خدودها ** نعيشو في راحة البال .. وترتاحي من التوتر والاعصاب .. ومعاش تقعد حياتنا مشحونة طاقة سلبية .. ** شديت ايدها وبوستهم ** مانبيكش تبكي .. نبيك تفهمي كلامي بس :)
ابتسمتلي .. وحطت ايدها ع لحيتي : باذن الله نكون زي ماتبي <3
#Dudu
