#الحضن_الدافي
الحلقة :: 6 ::
ابتسمت .. ورديت الصورة بين حوايجي في دولابي .. وسكرته .. بدلت حوايجي .. لبست بيجامتي عليها دبدوب احمر وتيشرت ابيض وسروال احمر .. فتحت الباب لقيت قصي ودادا يهدرزو .. بس بين هدرزتهم سمعت اسم باابا ( جواد ♥ ) :o
قربت جيهة المطبخ ولبدت ورا الباب .. وكملت استماعي :(
قصي: شن الحل باهي برايك ؟؟
دادا: انا وين نعرف ياوليدي .. مبلغ زي هدا مانقردوش نوفروه حتي بعد سنة .. وووه عليها ايناس زعما شن فيها .. وليش كلفها العلاج الرقم هدا كله ؟؟
قصي: انا مايهمني شي قد مايهمني عمي كيف بيطلع من الورطة هادي .. مادامه وصل غادي المفروض مايرجعش فاضي .. تو نشوف مصطفى بالك يقدر يساعدني :\
دادا: تي هوا مصطفى بطالة زي حالاتك شن بيساعدك ؟؟
قصي: جده مورثه الخيرات كلها .. وبوه ماشاء الله ربي فاتحها عليه :(
دادا: باهي امالا شن تراجي كلمه وشوفه كان يقدر يسلفك
قصي: مانقدرش نتسلف منه المبلغ كله .. صعب يايمة شن بيردهولي بعدين :(
دادا: ياااارب كون في العون .. خللي نمشي نكلم بوك ونعلمه بالموضوع
قصي: ايه وكلمي حتى الياس بالك فيها كيف :\
دادا: ياسره الياس .. معاشه متاع تلات شهور كله حطه
قصي: توا احني في أزمة عاطفتك بيه اهيا يمة فوتيها مش وقتها -_-
دادا: باهي باه -_-
سمعت دادا تقرب من الباب .. مشيت نجري خشيت لدارنا وسكرت الباب .. قعدت نبكي .. بابا ماعنداش فلووس باش ماما تعاين ويبدا حالها كووويس ..يااربي كيف بنساعدهم :( .. شويا وفتحت دادا عليا الباب .. لقتني مقعمزة ع السرير ومغطية وجهي ونبكي :( .. جت قعمزت جنبي .. ونحتلي يديا .. شبحتلي مستغربة :\
دادا: خيرك دودي ؟؟
ورد: امتى بتروح ماما ؟؟
دادا: ءءء توا كلمتها راجيتك تجي تكلميها معاش جيتي :)
ورد: دادا .. عادي نسألك
دادا: تفضلي بنيتي :)
ورد: ماما كيف حالها ؟؟
دادا: الحمد لله :)
شبحت القدام .. وتغمرتني .. انا هديت شويا .. لأن خطرتلي فكرة وح نفذها باذن الله .. قمت راسي وشديت يدين دادا
دادا: :)
ورد: عادي نقول لقصي يرفعني لحوشنا ؟؟
دادا: حوشكم !!.. علاش مستحقة حاجة تبي حاجة ؟؟
ورد: ايه نبي العابي .. وكراساتي :)
دادا: حااااضر تو نقوله .. هي نوضي اغسلي وجهك وتغدي وتو يرفعك العشية انتي وزين :)
ورد: باه <3
نضت وخليتها مقعمزة ع سريري .. خشيت للحمام غسلت وجهي وتوضيت .. خطمت ع الدار يللي فيها زين لقيته قاعد نفس التقعميزة يتفرج ع توم وجيري .. بوسته ع جبينه .. ولبست بدلة الصلاة يللي بابا شراهالي عيد ميلادي يللي فات باش نتعلم الصلاة :) ..
وبديت نصلي <3
>>>>>>>>>>>>
قصي يتحدث ::
كنت مقعمز في الكوجينا .. بعد ماكلمت مصطفى وقاللي نأمنلك المبلغ .. شاد تليفوني وفاتح الفيس .. خشت عليا أمي
أمي: قطعتلي قلبي :(
قصي: كالعادة الدوة ع ورد
أمي: ايه
جبدت الكرسي جنبي وقعمزت ..
أمي: تعرف خشيت لقيتها تبكي .. البنت حاسة بأمها مش عارفة كيف بنتصرف معاها بس :(
قصي: ماتقوليلها شي وماتبينليها شي .. كله كله 3 شهور وتروح أمها
أمي: ايه حق نسيت
قصي: هآآآ شن في تاني ؟؟
أمي: نبيك ترفعها لحوشهم
قصي: لا بااااس !!!
أمي: قالت العابي بنجيبهم
قصي: ايه عندها الحق من لما كبرت انا معاش خشو الالعاب حوشنا ههههههه
أمي: ههههههه .. ايه قوللي شن قالك مصطفى ؟؟
قصي: طبعا انا قلتلها ع نص المبلغ .. والنص تاني بنمشي نقول حتي لعماتي بالك يساعدونا :)
أمي: عماتك هئه .. تي مايحبوهاش ايناس ولا يطيقوها كيف بيساعدوها توا !!
قصي: انا مادخليش بنقوللهم .. بالك يرق قلبهم ويعطونا
أمي: والله انا قاطعة الامل فيهم
قصي: أوكي يمة خاش بندوش انا تبي مني حاجة !!
أمي: ماتبيش تتغدا؟؟
قصي: لا تغديت مع الولاد :)
أمي: باهي صحة :)
قصي: سلمك :)
خشيت الداخل .. ح نحكيلك ع حوشنا كيف .. اول ماتخش من الباب تجي ع يسارك الصالة .. تقدم شويا تلقى دار تانية ويللي هيا غرفة المعيشة .. وع يمينك يجي المطبخ .. مقابلك تلقى درجتين تركب منهم .. تقابلك دار الياس يللي توا ترقد فيها زين وورد .. وجنبها داري انا .. ودار أمي وبوي تجي ع يسارك مدرقة .. وفي الجناح الصغير هدا في حمام بين داري ودار الياس .. ودار امي بحمامها .. والحمام الوسطي بين الصالة وغرفة المعيشة .. وطبعا المربوعة البرا ..
لقيت باب دار الياس مردود .. شفت من الشق الصغير .. بانت عليا ورد لابسة بدلة صلاة وردية .. وقايمة ايديها تدعي .. دفعني الفضول نعرف شن تدعي الصغيرة هادي .. سمعتها تقول ( يارب اشفي ماما .. يارب يروحو الاسبوع الجاي ويحضرو عيد ميلادي .. يارب والله معاد ندير شطانة ولا نزعلهم .. انا نبيهم جنبي بس .. يارب بالله عليك ياربي خليني نحلم بيهم ونعرف كيف حالهم .. ياربي انا نخاف بروحي .. يارب يروحو سالمين .. انا نحبه عمي ودادا لانهم يعاملو فيا زي بنتهم يارب احفظهم واحميهم وخليهم لولادهم .. ياربي حتي قصي ديما يحرقلي في دمي لكن نحبه .. حتي الياس ديما يشريلي في شكلاطة ويلعب فيا .. يارب نبي نروح لحوشنا مع ماما وبابا وزين .. ماما تقوللي ديما ادعي ربي هوا الوحيد بيساعدك .. ياربي انت تشوف فيا كيف مستاحشة ماما وبابا .. انا نحبك ياربي رجعهم لحوشنا .. والله ياربي لما نبدا نصلي كل يوم .. ومعاش اندير شطانة .. والله الله .. انا نحلفلك والله مانزعلهم ولا نضايقهم .. وح نساعدها ماما في الحوش وانضم دارنا ودارهم .. ونكنس ونتعلم انطيب .. ومشح نخليها تتعب بكل .. ياااارب <3 ) ,, مسحت وجهها بايديها ( آمين يارب العالمين ) .. وناضت اطبق في السجادة .. انا مشيت خشيت لداري .. سكرت الباب وقعد دعائها يتردد في وذني .. وصورتها كيف تدعي وتبكي لربي باش يستجيب دعوتها قاعدة قدام عيوني .. في حد يدعي لربي ويحلفله .. في حد يدعي لربي ويقوله ( بالله عليك ) .. برآءة الطفولة ماليهاش حدود .. ضحكت وين تفكرت كلمتها ( حتى قصي يحرقلي في دمي لكن نحبه ) .. قداش قلوبهم نظيفة وطاهرة .. قداش مانيتهم حسنة .. قداش قلوبهم ترفع من الطيبة لين تستحقر نفسك .. انا بكبري هدا عمري مادعيت ربي بالخشوع زيها .. تستنجد .. حسيت ببعدي ع ربي منها هيا .. هالبنت هادي علمتني هلبا حاجات رغم صغر سنها .. ( مش ح ندير شطانة ) كأنها تكلم في بشر زيها .. ماتعرفش انه ربي عالم بسرها وفي شني هيا تفكر .. بس هادي فطرتهم .. وهادي عفويتهم .. وهادي طبيعتهم .. خللي انوض ندوش ونصلي حتى انا وح ندعيلك من قلبي ياورد <3
>>>>>>>>>>>>>>>>>>>>>
حطتلي دادا الغدي .. قعمزت انا وزين عليها .. قعدت نوكل فيه بالشويا ..
زين: آين ماما؟؟
ورد: تو تجي حبوبي
زين: آبي نني :(
ورد: تي كيف نضت انت ؟؟.. حقااا قولي وين مشيت اليوم ؟
زين: ديمة :)
ورد: لعبت معاها ؟؟
زين: ايه
ورد: شااااطر زوني .. هي ممي توا هي
زين: آآآآآآآآآآم
ورد: شااااااطر :)
وكلته غداه وناض مشي لدادا بيغسل ايديه .. وانا كملت غداي .. خش عليا قصي
قصي: ماشا الله ماشا الله .. تو تسمني هههههههه
ورد: عادي :)
قصي: تبي تتفرجي ع رسوم ؟؟
ورد: ايه .. افتحلي سبيس تون :)
قصي: اوكي
فتحلي ع سبيس تون .. وكانت رسوم ( ريمي ) المعروضة .. قعد نتفرج عليها
قصي: تتفرجي عليها ديما ؟
ورد: مش هلبا
قصي: اممم ع شن تتفرجي قبل ؟
ورد: كاكنتش نتفرج هلبا
قصي: علاش ؟؟
ورد: ماما ماتخليناش نفضو الا في الليل .. تلعب فينا وتساعدني كيف نكتب قصة :)
قصي: آها .. وشن تكتبي ترا !!
ورد: آمممم .. كتبت قصة ع بنية تكسر في العابها وبعدين بتبدا تحافظ عليهم وتهتم بيهم
قصي: آها كملتيها ؟
ورد: لا لا .. خللي تروح ماما نكلمها :)
قصي: باهي ماعندكش الا قصة وحدة ؟
ورد: لا عندي .. قصة الغزال وأمه
قصي: ترا كيف االغزال ؟؟
ورد: زيك انت :)
قصي: شكراآآ <3
ورد: لا قصدي شطااان هلباااا .. ويدير في المشاكل لأمه .. بنتقده امه من فم الذيب
كان مقدم بحماس .. وخر ع الجلسة بقوة وشد الريموت
قصي: حتي انا حرت كيف تقولي كلمة باهية فيا
ورد: ههههههههههههه .. الحمد لله
مسحت فمي في الفوطة وجيت قعمزت جنبه ..
قصي: التقعميزة هادي معناها تبي شي !!
ورد: ترفعني لحوشنا بس :)
قصي: اوكي شن تاني !!
ورد: وشكرا بس :)
اسندت طهري ع الجلسة وقمت عيوني في التلفزيون لقيتها ريمي بتم وجايبين أغنية
( انتي الامان .. انتي الحنان .. من تحت قدميكي لنا الجنان .. عندما تضحكين تضحك الحياة .. تزهر الامآل في طريقنا نحس بالأمان .. أمي أمي .. أمي نبض قلبي نبع الحنان )
>>>>>>>>>>
قصي يتحدث ::
قعدت نشوفلها .. كيف تسمع للاغنية وعيونها يلمعو .. الاغنية هادي تأثر في النفس هلبااا .. مرات تحس في روحك بار بأمك .. بس وين تسمعها تحس كأنك مازال مادرت شي .. نظرة عيونها للشاشة واحساسها يللي كان باين عليها .. أثر في نفسي أكتر من الاغنية بهلباااا .. شوي وبدت تغني معاها .. وانا عيوني ماتحولوش من عليها .. الدمعة نزلت وخانتها وبدت تمشي بالشوي ع الخد الوردي .. وكأن هادي اجرء دمعة بين دمعاتها .. لأن اول مانزلت دمعتها نزل وراها سيل من الدموع .. الصغار ماليهمش وسيلة لتعبير عن ما داخلهم غير الدموع .. يللي قطع تفكيري وتأملي فيها خش علينا زين .. واول ماشاف ورد تبكي .. قعمزت ع ركابها يشوفلها .. ومن دمعاتها يللي غطت وجهها ع زين تحاول تخفيهم باش مايحس بشي .. بس زين كان اذكى منها . وتغمرها وقعد يبكي .. الطفل يحس وقلبه ضعيف .. احنى كبرتنا الدنيا وقست قلوبنا ووسختنا ..
الموقف هدا من بين المواقف كلها ماقدرتش نتحمله .. نضت وسيبتهم بعد ماغيرت ع براعم يللي كانت اكتر قناة بعيدة عن الحزن وكلها طفولة وعفوية ..
جت الساعة 7:00 .. فقت ع منبه تليفوني .. سكرته وليت رقدت ماوراي شي .. بس سمعت الباب يطق .. ( ادخل ) .. توقعتها امي
ورد: قصي مش قلتلي بترفعني لحوشنا ؟؟
قصي: باهي تو نرفعك غدوا
ورد: لا نبي نمشي توا :(
قصي: الصبر ياربي ..تي شني انا بوك !!
ورد: :(
سكرت الباب بقوة وطلعت .. انا شن قلت وشن قاعد ادير ؟؟.. تي ليش قلتلها هكي تو تفتح السايرينا معاش تسكرها .. خللي انوووض انراضيها ونرفعها ومنها نهيج بيها للملاهي .. المهم تسكت .. وبعدين ماتدعيش عليا لربي .. والله دعواتها حرفيا ونوعها تعنكش هلبااا لين تصيرلي فالطة عارفها انا ..
بدلت حوايجي وطلعت لوسط الحوش .. لقيت الحكاية مهبية .. تي وين العيلة ووين الناس ؟؟
قصي: دوووووودي .. زينوووو .. يمة .. بووووووي .. وين مشو هادم ؟؟
شويا وحسيت بحد نخصني ..
قصي: آآآآآآآآآآآآآآآآآآآه
انخلعت وين تلفتت انخلعت احرف لين وخرت .. كان قناع الغول لابساته ام شبر ونص .. الفرحة ورد .. نحاته وقعدت تضحك عليا .. طبعا انا في موقف لا يحسد عليه .. عقابها عمري 26 سنة وتخلعني الدرية هادي .. حطيت يديا في نصي وكملت مراقبتي ليها يللي صااايخة ضحك
ورد: هههههههههههههههههه انخلعت يانااااااري .. ههههههههههههه تقعد تحلم بيا في الليل هههههههههههههههههه
لبست القناع مرة تانية وكملت برادتها .. وهدا كله مغمض عيوني ومانبيش نتعصب عليها
ورد: وووووووووووه جاتك الغولة ههههههههههههههههههههه
قصي: ورد ياسر -_-
ورد: انيااااااااااااااع .. انت خوااااف هههههههههههههههه
قصي: ورد ياسر -_-
ورد: باهي خلاص هههههههههههههههه ياريتني صورتك
قصي: ورررررررررررررد قلنا ياااااااااااااسر >_<
ورد انصمتت مع بعضها . فتحت عين وسكرت عين .. بنشوف ردة فعلها .. اكيد بتبكي .. لا لا .. المرة هادي قاعدة تشبحلي بكل صحة وجه
قصي: في شي !!!
ورد: قصي
قصي: همممم
وفتحت عيوني وقعدت نشوفلها شن بتقول من كارتة
ورد: انت تشبه لبابا هلبااا
قصي: :o
ورد: والله الله
قصي: ايه تقول عمي ولاه !!.. عبيطة انتي والا تستعبطي ماهو عمي .. غبية -_-
ورد: انا بدلت حوايجي هيا نمشو :)
شدت ايدي وبدت تكر فيا لباب الحوش ..
قصي: غير لحظة لحظة .. وين زين قبل !!
ورد: البرا يراجي فيك :)
قصي: كيف عرفني بنرفعه هي -_-
ورد: انا قلتله .. هيا عاااد
قصي: وانتي شن عرفك !!
ورد: عارفة قلبك طيب ههههههههههه وخوااااف
قصي: خززززي -_-
ركبتهم السيارة وفتحتلهم دسكة طيور الجنة يللي عطاهالي عمي لما سافر ع اساس عندهم اذن موسيقية وبيمسعو للاناشيد .. هي ورد بروحها تكسر الراس بنزيدها حتي المسجل .. مشي سكرته
ورد: علاش سكرته :(
قصي: انتي والمسجل هلبااا والله
ورد: نحبها اغنية مرة طلعنا ومشينا :)
قصي: باهي اسمعيها وماتغنيش معاها راااااسي حسي بيا
ورد: هآآآ
ربعت ايديها واتكت ع كرسي.. زين خداه النوم ..تقول السيارة فيها منووم .. كملت طريقي والمسجل ع الهادي .. واحسن شي ورد ع الصاامت :)
#Dudu
