#الحضن_الدافي
الحلقة :: 32 ::
قصي: هههههههه نوض نوض بلا دراما خللي نمشو نعاونو أمي في عشي البنات
زين: آووووووووووف
شديته من ايده ورفعته للكوجينا ..وعاونا أمي في العشي ..
أمي: تي مش هكي ياقصي .. تي هادي سلاطة هادي ؟؟!!!
قصي: ايييح يمة كيف تبيني نديرها هي ؟؟
أمي: قرضها مربعات صغاااااار
زين: ماما فاطمة .. وتيت طواسي العصير
أمي: سلمه الشاطر .. طلعلي صواني السلاطة الصغيرات
( مااااشاااا الله بديتي تعلمي فيهم من توا هههههه )
صوت رزان قطع هدرزتنا .. مسحت ايديا ونضت
رزان: خليك قصي بنركب اصلا .. غير حبيت نسلم عليكم
قصي: لا عادي غير قلت بالك نعقدك بس .. كيف حالك انتي؟
رزان: الحمد لله ** خشت باست ايد أمي وباست زين ع خده ** .. كيف حالكم اليوم ؟. ومن عندكم ؟
أمي: الحمد لله .. ورد جايتها صاحبتها
رزان: آمممم ماشا الله .. هي نبدل ونرقد حمودي ونجي
امي: خودي راحتك
طلعت رزان .. أمي شبحتلي وقعدت تعلق عليها ( نبدل ونرقد حمودي ونجي )
أمي: آآآخ بس طووول اليوم مارفعتش تليفون سالت عليا وتوا زعميتك صاحبة واجب أأخ بس
رقصت حواجبي لزين مقابلني .. حط ايده ع فمه بيضحك .. وشوشتله ( قرمة فورية ههههه )
بعدين زين طلقها ضحكة قوووووية .. أمي شبحتله ( خيرك شن في )
زين: هدا قصي هههههههه
قصي: تو انت تضحك وادفها فيا ؟؟
نضت بنغسل ايديا وأمي شبحتلي شبحة وبعدين فاتتني وبدت تحرك في الرز وحطتله مكسراته .. وقفت ع اللافيندينو وغسلت ايديا وسحبت ايديا نشت صفرة الطواسي ويجو عرم لوطة مكسرات .. فنصت عيوني وشبحت لامي .. زين حط ايده ع فمه من الصدمة ..
أمي: قصي اطلع برااااااااااااااااااااااااااااا
قصي: باهي قصدي خللي نعاونك
طبست بنلم المرش طبست معاي أمي شدت ايديا قالتلي: غير حووول حووول
وبعدين بتقيم مرشة جرحتها ( آآآآي )
قصي: قلتلك يمة خليني نساعدك حولي حولي
أمي: غير اطلعووووو دهبتولي شيرتي
وزين هدا كله وحاط ايده ع فمه .. شاد ضحكته .. نضت من جنب أمي .. وقمت زين في غمري وطلعت بيه ..
قصي: سادنا هزايب ههههههه
زين: هدا كله من رزان .. اه قصي بنسالك سؤال
قصي: قول
زين: امك تعرف بخولة هههههههههههه
حدفته ع طول ايدي ع الصالون .. ونقزت عليه قعدت اندغدغ فيه وهوا صااايخ ضحك .. يحاول يهرب كل مايوقف نرده ع ظهره .. بعدين طحت جنبه وقعدت نضحك .. شويا وحسيت بيدين باردات ع خدودي .. ولفلي وجهي جيهته وبعدين مسح شوي ع لحيتي .. وحط عيونه في عيوني
زين: تشبه لبابا هلباااا
هادي مش اول مرة نسمعها .. سمعته قبل من وردتي .. ابتسمتله .. وبعدين نضت قعمزت .. زين ناض قعمز حتى هوا
زين: وين بتمشي ؟؟
قصي: قاعد .. بنشوف الاخبار
زين: حي حموووودي جي شكله ماصارش من النوم هههههههه
قصي: هههههههه لاقي من يسايرك وفوتني انا بالطووويل !!
زين جي باسني ع خدي : تي انت الكل الكل ياعم ههههههه
قصي: شوف وجهي ولّا أحمر هههههه
وشديت خدودي ورمشت عيوني بسرعة .. ضحك زين عليا وبعدين قال: امالا كان تسمعها من خولة شن ادير ههههههههههههههههههههه
انتفضت من الكنبة وقعدت نجري وراه ... ونخشو لدار ونطلعو من دار .. لين وصلنا للمطبخ قعدت أمي تعيط علينا .. ( اعقلوووو ) ( نهاري حرش حتي الخايب يلهد ؟ ) ( زيييين بطل ياولدي اطيح الماعيين ) ( قصيييي بلا هبال )
مشي لبد ورا أمي وطلعلي لسانه ويعجب .. وقفت قدام أمي
قصي: تي كانك راجل تعالالي
وأمي شادة زين ورا ظهرها : تي شن جاكم اللطف ؟؟
زين وهوا يضحك: ماما فاطمة .. بنحكيلك راهو قصي
قطعت عليه: آسسسس والله نقتلك كان تقولها
يحرك في صبعه السبابة فوق ولوطة قدامي : انت بتقتلني انا ؟؟!!!
أمي: شن في يازين شن دارلك ؟؟
زين: آمممم خليني نتفاهم مع ولدك قبل
ربعت ايديا لصدري وقلتله: شن أمرت حضرتك ؟؟
زين: تفاهم :)
أمي: تي خيرررركم ؟؟؟؟
زين طلع من ورا أمي وربع ايديه لصدره ويشبحلي : بنتفاهم معاك
أمي مستغربة تشبحلي وتشبحله .. وبعدين مشت جيهة طاولة الاكل وقعدت تستف في البوريك وقالت: والله حتى انا فاضية نسمع للصغار -_-
طبست لزين وايديا مربعات لصدري : شن التفاهم يللي معاك ؟؟
زين: اول شي نبي كل خميس نمشي للملاهي ونهييييج لين نتعب ومانروحش بمزاجك .. لا انا بنقولك ع المرواح
قصي: والله !! .. من توا التفاهم التغى
ميل فمه ورقبته يمين شوي وبعدين شبحلي: خلاااص .. خللي نقول لماما فاطمة
قصي: تهدد فيا !!
زين: شن نتفاهمو والا نقوللها؟
عدلت طولي وتنهدت : قول شني ؟؟
زين: تاني شي توا بتطلع وبتشريلي شيبس وكل شي انا نحبه انت عارفه
قصي: تالت شي !!
زين: تشريلي سيارة بالريموت
قصي: رابع شي ؟
زين: تشريــــ.......
قصي: خلااااااااااااص تي هذا شنو ؟؟.. تحسابني مقعمز ع بنك روماااا .. تي حتى من العمل لزووووووووووني
أمي كانت تشرب في مية طاحت منها الطاسة وشبحتلي : تدوي بجد انت ؟؟
تلفتت لامي وقلتلها: ايه لزوني ع خاطر تأخرت
أمي: وعلااااش تأخررررت ؟؟؟
وبدت امي تعصب وتعيط .. ** أمي من نوعها ماتحبش الفشل .. وماتحبش تشوفنا فاشلين .. وزمان نتفكر لما يكون عندنا امتحانات حتى ضيوف ماتستقبل .. تحبسنا في الدار وتجيبلنا شن نبو غير اقرو بس .. وبهكي نجحنا في قرايتنا من الابتدائي الي الجامعة .. والياس نجح في عمله ويخدم في الصحراء ومهني ع روحه .. بس انا كل عمل نخشله نفشل فيه .. ممكن نتضايق بس أمي تتضايق اكتر مني .. بوي عمره ماسألنا ع قرايتنا والا ع عملنا .. بس أمي كانت حريصة هلبااا .. وانا نحس بان لما سمعت سبب طردي التأخير بتبدا تنوضني هيا في الجديد هههه **
>>>>>>>>>>>>>>>>>>>>>>
صليت العشي .. بعد السلام بديت ندعي في سري ( ياااارب احفظ كل عيلتي .. يارب وفقني واعفوعني كان غلطت .. يارب يسر أمري .. وأصلح حالي .. يارب يطلع بابا من الحبس قريب ان شا الله .. يارب اجمعني بماما في الجنة .. ياارب )
قطعت عليا الدعاء صاحبتي ندى : ورررد هيااااا ولت تراويح هيا
ورد: آووووف ماتعرفيش ادب الصلاة بكل
ندى: هههههه هيا بابا قاللي ساعة تانية ونجيك
ورد: حي علاش ماتقعديش معاي نتسلوو
ندى: قولي والله !!
ورد: ايه والله
ونحيت بدلة الصلاة وقمت السجادة .. وشبحتله: شن فيها يعني ؟؟.. خيرك تشبحيلي ؟
ندى: مايخلووونيش .. انتي يخلوك ؟؟
ورد: مستحيييل
ندى: تي انتي امك توفت الله يرحمها وبوك مش معاك علاش ماتجيش يعني مني بيقولك لا ؟؟
ورد: عمي مستحيل يخليني يقول ان انا أمانة لين يطلع بابا
ندى: يطلع بوك ؟؟؟... هوا وين خش اصلا ؟؟
فنصت عيوني واستوعبت شن قلت: وااااااك اسألتك هلباااا .. اسمعي شن رايك نلعبو بلاي ستيشن
ندي تشبحلي باستغراب : كل مانفتحو سيرة بوك تهربي .. خيره بوك؟؟
طق طق طق
فرحت يللي الباب طق باش هربني من سؤالها .. وأنقذني قصي من مشكلة تانية
ورد: مني !!!
قصي: انا جايب العشي افتحيلي نحطهولكم
لبست بدلة الصلاة وفتحت الباب وشبحت لندى: البدي في داري
خشت لداري .. وخش قصي حطلي الصفرة .. وقاللي: زين موتيلك هزايب باهيات ههههه
ورد: ههههه معاك ولاه ؟؟
قصي: ايه اطمني .. آهو تليفوني معاك .. لما تكملي اتصلي بأمي نجي نرفع الصفرة اوكي !!
ورد: بارك الله فيكم .. حاااضر
خديت منه التليفون وابتسمت .. طلع وسكر الباب .. وانا رتبت الصواني ع طاولة الاكل .. نديت ( ندى ندى ) ماردتش عليا .. فتحت باب داري لقيتها شادة مذكرتي الحمرا .. ارتبكت وسكرتها .. فكيتها منها وقلتلها: حاجة مش ليك معاش تقربيها فهمتي والا لا !! >_<
ندى: اسرارك بدسيهم عليا انا صاحبتك ندو ؟؟
لما حسيت روحي تعصبت عليها وهيا فعلا صاحبتي يللي وقفت معاي في كل كبيرة وصغيرة .. حطيت المذكرة في درج الشكماجة .. وتلفتت لقيت دموعها في عيونها .. قعمزت جنبها وطبطبت ع ظهرها بالخفيف ( آسفة مش قصدي بس والله مذكرتي هادي مانبي حد يقراها )
ندى: ياهبلة انا مانبكيش ع خاطر كلامك
استغربت : امالا ع شني ؟؟
ندى: قريت الكلام يللي كاتبتيه لامك وانتي صغيرة بجد بكيت الله يرحمها
ورد: تعيشي وتترحمي :(
ندى: انا لو ماما تغيب عليا يوم بس نحس روحي نضيييع .. تصدقي ورد بعد ماعرفتك حسيت بنعمة الأم يللي انا مش حاسة بيها .. كنت نتعصب لما ماما تقوللي ديري حاجة يركبني ستين عفريت .. ونقعد نقول علاش عيشتي هكي ومش عارفة شنو ؟؟.. بس والله قلبي وجعني وين تخايل ماما تموت
وحطت ايديها ع وجهها وقعدت تبكي .. تأثرت بجد بكلامها .. فعلا في ناس مش حاسين بالنعمة يللي هما فيها .. مش حاسيين بنعمة الأسرة .. مش حاسيين بنعمة الأم .. طبطبت ع ظهرها بالخفيف
ورد: بعيد السو عليها .. ** بصوت متقطع بسبب عبرتي يللي خانقتني ** .. انا لو ماما عايشة كنت نقعمز قدامها ونقوللها اضربيني هزبيني احرميني من كل شي بس ماتحرمنيش من طلتك عليا .. ماتحرمينيش من كلامك .. صوتك .. وضحكتك .. حبيبتي ندى احمدي ربي ان باب من الجنة قاعد مفتوووحلك .. انا تسكر من نعومة اظافري .. من وانا صغيرة ومرفوع عليا القلم .. انا ياندى كل ماتتكلمي ع أمك كان قلبي ينزف ودموعي نخبي فيها عليك مانبيكش تشكي باني حاسداتك .. لاني انا بجديات حاسداتك ع أمك كيف مهتمة بيك .. واداوي في جروحك .. وتحس بيك
تغمرتني وقعدنا نبكووو .. شويا وباعدت عن حضني ومسحت دموعها .. وشدت ايديا بقووة
ندى: صح احني مازلنا صغار والعمر طوويل قدامنا .. بس صدقيني مش ح نتخلا عنك .. ح نوقف معاك وقت تبيني تلقيني .. صدقيني ياورد انا مانقدرش نعوضك عن أمك .. بس ح نكون اختك اوكي !!
ضحكت ضحكة خفيفة وشديت اكتر ع ايديها : وانا واثقة من هالشي
قامت ايديها لعيوني ومسحتلي دموعي وقالتلي : اختي ورد مش ناوية تعشيني ؟
ورد: هههههههه حتى وانتي تبكي تفكري في بطنك
حطت ايدها ع بطنها وشبحتلي: البطن قبل الوطن ياحبيبتي ههههه
ورد: نوضي قصي جابلنا عشانا
ندى: ولك يؤبرني الرجاااال
ورد: شن معناها ؟؟
ندى: هكي الاتراك يقولو
ورد: والله !!
ندى: ايه تو نعلمك كلمات تانية
ورد: باهي نوضي جعت حتى انا
قعمزنا ع طاولة الاكل .. ناكلو ونضحكو .. قطع علينا تليفون أم ندى والمتصل بوها .. ردت عليه
ندى: آلو بابا .. قريب توصل ؟.. باهي خلاص رن عليا وننزلك اوكي !! .. باهي في حفظ الله سلام
شبحتلي : بابا قريب يوصل
ورد: باهي عاونيني في غسل الماعيين قبل مايجي
ندى: آوووف ياورد ابعتيهم لمرت عمك
وانا نقيم في الصواني لللافيندينو : مصح وجهك .. ماسد بعتتلنا ماسد نردلها الماعيين هكي .. عيب عليك
ندى: شويا وتضربيني كف ** قامت الطواسي ولحقتني **
>>>>>>>>>>>>>>>
قصي يتحدث ::
بعد مااطمنت ع بنت روحت .. اتكيت ع سريري نبي نرقد بعد هاليوم المتعب ..وامي طبعا عصبت عليا ومعاش تبي تكلمني لين نحصل شغل تاني .. مانعرفش امتى بترضى عليا بس .. هذا ماشاغل بالي .. شويا وسمعت صوت حركة البرا .. الساعة 1:00 مني بيجي توا ؟؟
نضت من سريري ومشيت بخطوات خفيفة .. فتحت باب الخلفي لقيت ورد لابسة بيجاما لونها أحمر وحاطة وشاح لونه ابيض .. لما فتحت الباب انخلعت .. وقعدت واقفة ومغطية عيونها بايديها
قصي: هههههه خلعتك !!
نحت ايديها بالشويا وشبحتلي : ايه .. ءءء قصي تليفونك نسيته عندي
مدت ايدها بالتليفون .. خديته منها .. وقلبته وشبحتلها : نسيته بكل
ورد: اوكي تصبح ع خير
وكيف وخرت ثلاث درجات فوق .. نبهتها بصوتي: ورد .. زين رقد؟؟
ورد تلفتتلي : ايه رقد
قصي: اوكي تصبحي ع خير
راجيتها ركبت وفتحت باب شقتها وسكرتها .. خشيت وسكرت باب الحوش ..وفتحت تليفوني مالقيتش فيه لا مكالمات ولا رسائل .. وليت لداري ورقدت
>>>>>>>>>>>>>>>>>>>
خشيت لشقتي سمعت صوت زين يبكي .. فتحت باب داره لقيته مقعمز ع السرير وحاط صورتي انا وياه بين ايديه .. قعمزت جنبه ونحيت الوشاح .. ومسحتله دموعه
ورد: خيرك زين تبكي ؟؟
زين: شي شي
ورد: خيرك شن في؟؟
زين: نبي نسألك سؤال ؟
ورد: ايه تفضل !!
زين: بابا وين ؟؟
صدمني سؤاله .. ومعاش عرفت كيف نهرب من ملامح وجهي البائسة .. وابتسمت ابتسامة مصطنعة
ورد: حبيبي زين ..** بصوت مقطع شوي ** بابا ..ء ء .. سافر .. ءء .. وماهوش معطل علينا
زين: بس هوا عطل ياورد .. ليه سنة ونص ره
ورد: ايه وكان .. بابا صارتله مشاااكل هلبا يازين واحني لازم مانوقفو معاه بالدعاء
زين: بس هوا خلااااانا ياورد .. كل صحابي آبهاتهم معاهم وربوهم وكبروهم باش يكونو رجالة .. وانا تقول قصي بوي :(
شديت ايده .. وايدي التانية ع خده .. وابتسمت
ورد: زين .. بابا سيد الرجال .. ** قمت عيوني فوق ** ربي فوووق عالم شن قاعد يصير معاه ** نزلت عيوني ليه ** واحني صغاره اقرب الناس ليه .. تتذكر لما ماما توفت شن دار معانا ؟ .. ماباش يتزوج باش مايبعد علينا .. وقعد يخدم ليل نهار باش يوفرلنا كل شي .. واذكرت لما ماما مرضت وسافر بيها .. وتعب من سفرته هلبااا .. بابا مافيش منه .. أحن من قلبه مافيش .. بس الظروف هيا يللي جبراته يبعد علينا .. زين نسألك سؤال !!
نزلت ايدي وحطيتها ع ايدي التانية يللي شادة ايده .. شبحلي ببراءة وقال: نعم !!
ورد: انت تحب بابا ؟؟
زين قعد ساكت وطا عيونه لوطا ..
ورد: جاوبني ؟
زين: ايه نحبه هلباااااااا بس ..........
قطعت عليه وقلت: لا بس لا شي .. يللي علينا لازم انديروه باش نرجعو احلا واحسن عيلة في العالم كله
زين: شن بنديرو ؟؟
ورد: قيم ايديك فوق وادعي ربي يكون مع بابا ويعاونه ويرجعله سالم ومعافى
زين قام ايديه فوق وقال: آمين
ورد: خلاااس توا تغطى وارقد وارتاح غدوا ورانا مدرسة
زين شد في ايدي وبعد عليا شوي لطرف السرير التاني وقاللي: خليك معاي لين نرقد
ورد: حاااضر .. هات الصورة ندسوها
عطاني الصورة .. حطيتها في الدولاب وخشيت لسريره وخديته في حضني وقعدت نقرا عليه في قرآن لين خداه النوم ورقد ....
( وووووووووووورد .. ياورد )
الساعة 2 الظهر .. وانا نضم في الصالون سمعت صوت زين ينادي من الشارع ع اسمي .. قربت جيهة الروشن لقيته يجري للحوش .. مشيت نجري لباب الحوش فتحته وقفت ع الدروج
زين: نجحت ياورد نجحت
حطيت ايديا ع فمي : بجديااااات ؟؟
جاني داهش وكلمة نفهمها وكلمة لا .. مدلي الصحيفة .. وسمعت صوت باب حوش عمي انفتح طلعت منه ماما فاطمة وركبتلنا
ماما فاطمة: خيرك يازين العفو !!
انا كنت شادة الصحيفة ونقرا في درجاته يللي كانو كلهم في الامتياز .. شبح لماما فاطمة وقاللها: نجحت الاول ع فصلي
تغمراته وقعدت تبكي من الفرحة وتقوله: مبرووووك ياوليدي مبرووووك
وانا دموعي نزلو بلا رادة .. كيف حاضنين بعض تمنيت ماما يللي كانت مكان ماما فاطمة .. تمنيت بابا هوا يللي جاب زين من المدرسة مش رجليه ..
زين: علاش تبكي ؟؟.. انا نجحت والله الاول
تغمرته ع طووول .. وضحكت وقلتله: من الفرحة يازين والله .. مبرووووك الف الف مبرووووك ياروحي
>>>>>>>>>>>>>>>>>
قصي يتحدث ::
قصي: قولي والله !!
أمي: ايه والله ماشا الله عليه رغم كل شي صار معاه ونجح ماشا الله
قصي: ههههههه خلاص انا مروح تو نجيبله هدية معاي
أمي: ايه وجيبله تورتة خللي نفرحو ورد معاه
قصي: تمام
كنت في السيارة لما اتصلت بيا أمي .. قدام المحكمة نراجي في ميس تطلع بنوقفها ونكلمها .. بس فرحتي بزين خلتني ننسى ميس ومايجي منها .. ولعت سيارتي وتوكلت لاقرب محل حلويات شريت منه التورتة .. وحطيته في الكرسي الخلفي .. كيف سكرت الباب وصلني مسج ع تليفوني من ميس ( قصي كيف حالك ؟.. ورد كلمتني وقالت ان زين نجح ياريت نستاذن من بوك بناخدهم العشية انطلعهم اوكي !! )
سكرت قفل تليفوني .. ومادرتش اهتمام ليها نهائي .. ركبت سيارتي وتوكلت لمحل الالعاب .. قعدت اندوور في المحل من جيهة لجيهة اندور شي مناسب لطفل عمره 10 سنوات .. بعدين تفكرت انه طالب مني سيارة بالريموت .. وازيت سيارة لونها أحمر .. ومشيت خلصتها .. وانا طالع وندور في مفتاح سيارتي في جيوبي .. اصدمت في وحدة ( آسف بجد )
ميس: قصي !!!!
قصي: ميس !!!
ميس: شن ادير هنا ؟؟
قصي: شن تشوفي فيا شاد ؟
ميس: آآآه شريتها لزين
قصي: لا انا بنلعب بيها
ميس: خيره عيونك يلفو يمين يسار ماتبيش تشبحلي متلا ؟؟
قصي: لا بطلنا حركات مراهقة
ميس: آآآآآووووف ياقصي بتشدها عليا ؟؟
قصي: مش فاضي عندي ماندير
ميس: وقف بنقولك كلمتين بس
قصي: ع موضوع عمي ؟؟
ميس: لا طبعا
قصي: انتي اصلا نسيتيه عمي .. بالله ياميس ماتخلينيش نتفجر عليك
ميس: انا شهر الجاي مسافرة لايطاليا باعتيني دورة تدريبية
قصي: والله !! .. وأمتي صار القرار هدا ؟؟
ميس: ماليشي هلبا تقريبا اسبوع اسبوعين
قصي: واثقة صار من انه شي عادي ؟؟
ميس بدت تلف بعيونها ومش عاجبها كلامي .. قبضت ع ايدي وشبحتلها: تبيني نقرا عليك الفاتحة ونمشي معاك محرم متلا !!
شبحتلي ع جنب .. وربعت ايديها وقالتلي: لا طبعا .. ماشيين قرووب كامل بنات و** سكتت **
قصي: ايه قوليها .. قروب كامل بنات وشباب .. ديري رايك ياميس ..سلام
مشيت وخليتها واقفة .. هيا مش جاية تاخد رأيي أبدا .. جاية تعطيني علم بس .. وتستفز غيرتي .. بس مستحيل نبينلها شي من هذا القبيل .. لانها الفترة يللي فاتت كلها هاملتني اهمال مش طبيعي .. ويقولو فيها ( الاهتمام يولد الحب والاهمال يقتل كل الحب ) .. ركبت السيارة .. وانا قابض ايدي وحاطها بين سنوني .. فشيت غلي كلها في عضة ايدي المهم مانوضحلها اني مهتم بسفرتها اصلا يللي كلها غلط في غلط .. رن تليفوني ولقيتها مكتوب اسمها ( ميس <3 ) .. أول حب ليا .. من نظرة بس حركت كل مشاعر الحب فيا .. من بسمة أعجب بيها .. ومن كلمة حبيتها .. هل نقدر نهملها زي ماهملتني وننساها ولو لدقيقة مانفكرش فيها ؟؟.. مستحيييل :(
روحت .. وركبت لشقة ورد طقيت الباب مرتين فتحلي زين وعيط عيطة قوية ( هيييييييييييي قصي ) .. ونقز لحضني ..
قصي: مبرووووك والله طلعت منها ماشا الله
نزل من حضني وهوا فرحان ويضحك : جبتها الاول ع المدرسة كلها :)
قصي: ايه شوف شن جبتلك ؟ ** وقمت الكيسة يللي حطيتها في جنبي ومديتهاله ** .. قوللي رايك فيها !!
فتح الكيسة وطلع السيارة وعيط باعلى صوت : واااااااااااااااااااااااااااااااااو مش عاااادية .. شكرا بابا
تلاشت الابتسامة لما قالهالي .. ولانه فرحان بلعبته ماركزش ع الكلمة يللي قالها .. ع طول صنعت لوجهي ابتسامة .. :) :) :)
قمت عيوني لباب الشقة لقيت ورد واقفة ومتكية ع الباب تشبح لخوها كيف فرحان قد تكون ركزت في كلمة #بابا ..
درناله حفلة كبيرة زين وحضرتها معانا حتي ديمة يللي تقرا معاه ونجحت تقريبا الترتيب التاني .. وكانت الفرحة تلمع في عيون زين وورد ..
بعد أسبوع لقيت مسج من ميس تقول فيه ( قصي انا مسافرة طيارتي تطلع مع الساعة 7 .. نرجع ان شا الله حياتنا تكون احسن بس تفائل بالخير .. ح نكونو ع تواصل سلام )
شفت المسج الساعة 7:10 اتصلت بيها لقيته مقفل .. تعصبت هلباااا وبديت نفك في بطم سوريتي يللي لابسها عندي مقابلة عمل .. هديت ع سريري وبديت نمسح ع وجهي ولحيتي وشعري بتعصب .. مش قادر نفهم شن يللي قاعد يصير معاي .. خطيبتي دارت مافي راسها ومادارتلي قدر ولا قيمة .. رن المنبه الساعة 7:30 .. وكاتب عنوان المنبه ( مقابلة العمل ) .. وقفت ع المراية نساوي في حوايجي سمعت طقة الباب ..
( ادخل )
فتح الباب وخشت أمي .. وقفت جنبي وقالتلي ( ماشا الله ع ولدي زين وشخصية .. ان شا الله نشوفك عريس ولا يحرمني من طلتك ياااارب .. ربي يحميك ويوفقك ويكتبلك الخيرفي حياتك )
ابتسمت ابتسامة مصطنعة وقلتلها: هي يمة ماتبي شي !!
بوستها ع يدها .. ابتسمتلي وقالت : ربي يوفقك .. لما تكمل طمني عليك بس
قصي: ان شا الله :)
طلعت .. ولعت سيارتي وتكيت راسي ع الكرسي ..نفتح المسجل ع أغنية جتني ع الجرح .. وغمضت عيوني وتفكرت كل شي معاها .. تفكرت اول مرة شفتها جاية تزور في زين وورد ..وقتها في حفلة تخرجها ودرتلها حركة عبيطة وين قربت وجهي للمرش باش نركز ع بدلة التخرج .. تفكرت وين وقفت بيها السيارة كيف كانت مبتسمة .. ابتسامتها يللي تأسر العالم بيها .. تفكرت كلماتها ورقتها واسلوبها .. معقولة نستني !! .. معقولة خدعتني!! .. معقولة ميس تهملني لدرجة هادي ؟؟.. قد أكون انا السبب .. 4 سنين معلقها معاي .. آآآه اذكرت لما كان عمي بيتزوجها كيف هبلت .. كيف اضايقت وتعبت .. واذكرت وين فسخ كل شي معاها كنت فرحان للدرجة لا يمكن تصورها .. وين خطبتها كان اسعد يوم في حياتي <3 .. اذكرت كل شي حلو معاها .. عصرت عيوني أكثر أكثر .. وين اذكرت موقفها قبل اسبوع :(
#Dudu
