Golden Age: Semideus Specials

messages... and names...

Cesia's POV

Itinapat ko ang camera ng phone ko sa salamin at nag-picture nang naka-peace sign. Saka ko ito sinend kay Art na hiningan kami ng pictures dahil kabibili lang niya ng bagong cellphone niya. Kararating niya lang din kasi sa mortal realms.

Napangiti ako pagkatapos makatanggap ng selfie mula kay Art. Sa tabi niya naroon sina Matilda at Kaye na katulad niya ay nakangisi nang malapad, halatang sabik na sabik sa pagkikita naming lahat bukas.

'Andito na yung mga taga-Underworld!'

Napatango-tango ako pagkatapos mabasa ang caption nito, at nag-reply:

'Mabuti naman. Excited na akong makita kayo bukas.'  tapos isang heart emoji sa dulo.

Nagpatuloy lang ako sa pag-aayos ng sarili ko habang tini-text si Art na di mapagkailang nawiwili sa bagong phone niya.

Kung anu-ano nalang kasing litrato ang ipinapadala niya sa'kin. Lahat na ata ng nakain niya sa araw na'to ay kinunan niya ng picture, pati na rin yung bagong Powerpuff Girls stickers niya.

'Tapos ka nang kumain?'

Kumawag-kawag ang aking labi habang nagta-type ng reply, nang biglang may kumatok sa pinto.

Binaba ko ang phone ko sa mesa at binuksan ito.

"Papunta na raw dito si Aphrodite," pagbibigay-alam sa'kin ni Auntie.

"Okay, Auntie." Nginitian ko siya. "Bababa na po ako."

Hinatid ko siya ng tingin hanggang sa makababa siya ng hagdan, bago ko sinarado yung pinto at bumalik sa harap ng vanity table.

'Hindi pa ako nakakain, eh, mamaya pa.' sagot ko sa huling mensahe ni Art.

Pagkatapos, tinali ko yung buhok ko sa isang ponytail. Narinig ko ang paghinto ng kotse sa labas kaya napatayo na ako.

Nakatanggap ako ng notification na agad ko namang binuksan.

'It's already late. Why?'

Kumunot ang aking noo nang mabasa ang pangalan ni Trev.

'Trev? napatext ka?'

Nag-reply din naman agad siya.

'You just told me that you haven't eaten yet.'

Nanlaki ang aking mga mata at binuksan ang conversation namin. Saka ko nakitang sa kanya ko pala naipadala ang text na dapat sana'y para kay Art.

'Wrong sent, Trev, sorry.'

Typing...

Humibi ang aking labi at nag-text ulit.

'Para kay Art talaga 'yon.'

Panandaliang nawala yung typing symbol sa pinakaibaba ng messages niya, dahilan na mapatitig ako sa conversation namin.

Saka ako nakatanggap ng isang thumbs up mula sa kanya.

Napakurap-kurap ako.

Yun lang?

Bigla akong nagkaroon ng ideya kaya dumako ako sa harap ng mahabang salamin na nakasandal sa tabi ng vanity table ko at itinapat ang camera ko rito.

Dalawang kamay ang ginamit ko sa paghawak ng phone at ngumiti ako, kahit alam kong bahagyang natatabunan nito ang mukha ko.

Sinend ko ito kay Trev nang walang kasamang mensahe.

Wala akong natamong reply mula sa kanya kaya napakibit-balikat nalang ako at lumabas na ng kwarto. 

Bumaba ako sa sala kung saan sinalubong ako ni Aphrodite nang isang mahigpit na yakap.