*တောက်..တောက်*
ရိပေါ်တို့ အိမ်လေးဆီမှ ထွက်ပေါ်လာသော အသံဖြစ်သည်။ ရိပေါ်က ပန်းအိုးလေးတွေကို အိမ်ထဲအလှစိုက်ထားချင်၍ နံရံမှာ သစ်သားပြားလေးတွေကို ရိုက်နေခြင်းဖြစ်သည်။
ထို သစ်သားပြားလေးတွေကလဲ ဆေးသုတ်ပြီးသား သစ်သားပြား အပြာအဝါလေးတွေဖြစ်သည်။ နံရံအပေါ်နည်းနည်းမြင့်မြင့်မှာထားထား၍ ထိုပျဉ်ပြားလေးတွေကို ရှောင်းကျန့်က အောက်ကကိုင်ပေးထားရသည်။ ဝမ်ရိပေါ်ကတော့ ခုံပေါ်ကနေတက်ကာ သံဖြင့်ရိုက်နေခြင်းဖြစ်သည်။
*ရရော ရရဲ့လားကွာ*
ရှောင်းကျန့်က အားကြိုးမာန်တက်နဲ့ ကြိုးစားနေသည့် ရိပေါ်ကို မေးလိုက်သည်။ မရရအောင် ရိုက်နေသည့်ကောင်လေးက ရှောင်းကျန့် သေချာကိုင်ပေးထားတာကိုတောင် မရိုက်တတ်ပေ။
*ဦးလေးကြီးက သေချာကိုင်ထားပါဆိုဗျာ။ ဦးလေးကြီးကြောင့် ရွဲ့သွားပြီ*
*အေး အေး*
ရှောင်းကျန့်ကပဲ သေချာမကိုင်ပေးလို့ဆိုတာ ဖြစ်လိုက်ရသေးသည်။ မရိုက်တတ်ဘူးဆို မရိုက်တတ်ဘူးမပြောဘူး။
ရှောင်းကျန့်က ရိပေါ်လက်ကို တူနဲ့ထုမိမှာစိုး၍ လုပ်ပေးမည်ဟု ပြောတာကို လက်မခံပေ။ သူ လုပ်တတ်ပါသည်တဲ့။
*ဦးလေးကြီးက လုပ်ပြန်ပြီဗျာ*
*ဟ..မင်းကို ငါသေချာကိုင်ပေးထားတာပဲလေ။ ဖယ်တော့ ဆင်းတော့ ..ငါ လုပ်မယ်*
*မရပါဘူး..ကျွန်တော်လုပ်မှာ*
ရှောင်းကျန့် စုပ်သပ်လိုက်ကာ ပျဉ်ပြားကို လက်တစ်ဖက်ထဲဖြင့်ကိုင်ကာ ကျန်လက်တစ်ဖက်ဖြင့် ရိပေါ်ကို ခုံပေါ်ကနေအောက်သို့ ပွေ့ချီချပစ်သည်။
မျက်လုံးလေး ပြူးနေသည့် ရိပေါ်ကို ဂရုမစိုက်အား။
*ရော့ ကိုင်ထား*
ဝမ်ရိပေါ်ကို ပျဉ်ပြားအား ကိုင်ခိုင်းကာ ရှောင်းကျန့်က ခုံကို ဘေးသို့ရွှေ့လိုက်ပြီး ပျဉ်ပြားတွေကို သံနဲ့တေ့ကာ ထုရိုက်လိုက်သည်။ အောက်က ဝမ်ရိပေါ်ကတော့ သူ မလုပ်ရ၍ စူပုပ်လို့။
