You're Not My Brother (On-Going)

Gabriel Robles (10)

You're Not My Brother

Episode 10

Gael

Nagpahinga ako sa clinic matapos na magamot ang mga sugat ko. Dahil may quiz pa kami ay iniwanan din ako doon ni Kazu.

Sinundo naman kaagad ako ni Kevin nang malaman niya ang tungkol sa nangyari.

Hindi na niya pinasukan ang susunod na klase niya. Doon niya ako pinatuloy sa apartment na tinutuluyan niya.

Maliit lang iyon pero dahil mag-isa lang siya at wala pang masyadong gamit ay nagmumukhang maluwang.

"Baguhin mo na kasi yung ugali mo. Yung pagiging suplado mo at pag-aangas. Nasa Maynila na tayo. Maraming gago sa lugar na to." sermon niya sa akin.

Hindi ko na lang siya sinagot at ibinagsak ko ang katawan ko sa kama niya. Ngayon ko nararamdaman ang pananakit at gusto ko na lang ihiga ito magdamag.

"Pero hindi pa rin tama yung ginawa nila sayo. Subukan lang nilang ulitin ang ginawa nila. Makakatikim talaga sila sakin."

Pumikit na lang ako saka ko dinama ang ginhawa na nararamdaman ko dahil nakahiga na ako ng maayos ngayon.

"Dito na lang ako matutulog." sabi ko.

Napailing na lang siya saka na siya nagsimulang magbihis. "Mas mabuti pa nga. Pero aalis ako. May pasok ako sa trabaho. Maiiwan ka muna dito." sagot niya habang nagpapalit siya ng damit.

Nnag makapagbihis siya ay bumili siya ng pagkain sa labas. Inihatid niya iyon sa akin bago siya muling lumabas.

Madaling araw na nang makauwi si Kevin. Nahiga na lang siya sa tabi ko hanggang sa makatulog na siya.

Hindi ako nakapasok sa sumunod na araw dahil nananakit pa rin ang buong katawan ko. Dito na rin muna ako pansamantalang tumuloy sa apartment ni Kevin sa loob ng maghapon na iyon.

Gabi na nang magpasya ako na umuwi sa condo. Naabutan ko si Red na nakaupo sa sofa. Tila ba napakalalim ng iniisip niya. Nakatanga siya sa labas ng glass wall.

Marahas pa siyang napalingon nang maramdaman niya ang pagpasok ko.

Natigilan naman ako nang makita ko ang mabalasik na anyo niya habang nakatingin siya sa akin.

"Saan ka nanggaling?" galit na galit na tanong niya.

Mabilis siyang tumayo mula sa kinauupuan niya. Ilang hakbang lang ay nasa harapan ko na siya.

"Ano na naman ba ang problema mo?" patamad na angil ko. Humakbang na ako patungo sana sa silid ko ngunit marahas na hinatak ni Red ang braso.

"Kinakausap pa kita!" galit na hiyaw niya.

Gumalaw ang mga labi ko saka ko siya patamad na tinitigan. Nakikita ko ang inis at galit sa mga mata niya habang nakatitig din siya sa akin.

"Alam mo, magpalamig ka muna ng ulo. Masyado ka na namang hyper." sabi ko saka ko binawi ang kamay ko mula sa pagkakahawak niya.

"Binalikan kita sa clinic kahapon pero wala ka na. Magdamag akong naghintay sa pag-uwi mo dahil nag-aalala ako sa kundisyon mo. Maghapon akong nag-stay dito sa unit sa pag-aakala na maaga kang darating. Putang-ina! Ngayon na tinatanong kita kung saan ka nagpunta ganyan ang iaasta mo sa akin? Nabugbimog ako dahil sayo..."

"Hindi ko sinabi na makipagbasag-ulo ka kahapon. Ginusto mo yun. Doon ka magaling diba? Sa pambubully at pakikipag-away." putol ko sa sinasabi niya.

"Kung hindi kita tinulungan ay baka hindi lang sakit ng katawan ang inabot mo. Malamang ay nakaratay ka na sa ospital ngayon. Hindi mo kilala sina Jojo. Kaya ka nilang lumpuhin kapag ginusto nila." galit pa rin na hiyaw niya ngunit sa huling mga kataga ay nahimigan ko ang concern sa tinig niya.