Unicode
Chapter 32 – ဘေဘီယွဲ့၏ပြန်လည်သုံးသပ်မှု
_________________
ဤသို့ဖြင့်ရက်အနည်းငယ်ကုန်လွန်သွားပြီးနောက် သူ၏ဖိအားကိုသည်းခံနိုင်စွမ်းသည် တိုးတက်လာပုံရကြောင်း ချင်ကျုံးယွဲ့ခံစားလိုက်ရသည်။
အနည်းဆုံးတော့ သူ့တွင် မနက်လေးနာရီခွဲတာနှင့်နိုးသည့်ဇီဝနာရီတစ်ခု ဖွံ့ဖြိုးလာသလိုပင်----ရှဲ့ကျုံ့ရှင်း၏အိပ်ရာနှိုးပေးသည့်ဝန်ဆောင်မှုကို သူထပ်မံသည်းမခံနိုင်တော့။
ရှဲ့ကျုံ့ရှင်းက အမြဲလိုလိုအချိန်မှတ်နာရီကို ကိုင်ဆောင်ထားတာကြောင့် သူ၏အချိန်နှင့်ပတ်သက်သည့်သဘောထားဟာလည်း အများကြီးပိုတင်းတင်းကြပ်ကြပ်ရှိလာသလိုပင်။ သူ သတိထားမိသွားချိန် သူ့ဖုန်းကို မထိတာတောင် အချိန်အတော်ကြာခဲ့လေပြီ။
“မင်းရဲ့အခြေခံလုပ်ဆောင်ချက်တွေက အခုအများကြီးပိုကောင်းလာပြီ။ ပြီးခဲ့တဲ့ဒီရက်အနည်းငယ်အတွင်း အဲ့သဘောတရားတွေကို အလွတ်ကျက်မှတ်တာက အသုံးဝင်သွားပုံပဲ”
ရှဲ့ကျုံ့ရှင်း လွန်စွာကျေနပ်နေလေ၏။
တစ်ဖက်လူက သူ့အားဆုပေးချင်လာမှာကို ချင်ကျုံးယွဲ့ကြောက်တာကြောင့် သူခပ်သွက်သွက်ပြောလိုက်သည်
“ငါက အရမ်းလိုနေတုန်းပါပဲ၊ ငါဆက်ကြိုးစားရအုံးမယ်!”သူ၏ဤသို့သောနိုးနိုးကြားကြားရှိမှုကြောင့် ရှဲ့ကျုံ့ရှင်းအံ့သြသွားရသည်။ သူ ချင်ကျုံးယွဲ့အားကြည့်ကာ လေးလေးနက်နက်ဆိုလိုက်၏
“မင်းဆီကနေ ဒီလိုကြားရတဲ့အတွက် ငါအရမ်းဝမ်းသာတယ်။ ဒီရက်အနည်းငယ်အတွင်း မင်းအရမ်းကြိုးစားခဲ့တယ်။ အခု မင်း နောက်လေးဆယ့်ခုနှစ်ရက်အတွက် ဒီလိုဆက်ထိန်းထားဖို့ပဲလိုတယ်၊ ပြီးရင် မင်းရဲ့အားထုတ်မှုအားလုံးက အကျိုးခံစားရလိမ့်မယ်”သူပြောလိုက်၏
“စကားမစပ်၊ ဒါက ငါ့ဆီကလက်ဆောင်”သူပြောရင်းဖြင့် ဘူးလေးတစ်ဘူးကို ထုတ်ယူလိုက်သည်။
ချင်ကျုံးယွဲ့ : “………”
ယင်းပုံသဏ္ဌာန်ကိုမြင်လိုက်တဲ့အချိန် သူ့တွင် ဆိုးရွားတဲ့ခံစားချက်တစ်ခုရလာခဲ့လေသည်
“အထဲကဘာလဲ”
YOU ARE READING
ရူးကြောင်ကြောင် အထက်ပုဂ္ဂိုလ်လေး ပြန်မွေးဖွားလာပြီ// Myanmar Translation//
RomanceNovelနှင့်သက်ဆိုင်သည့်အချက်အလက်အားလုံးကို Description တွင် ထည့်ထားပါသည်။ Start Date - 9.12.2022 End date - ~Just Fan translation ~