Until I Get Over You

Chapter - 03

Pauline

Ilang araw ang lumipas at naging laman ng kwentuhan ng buong school ang pagkakaroon ‘di umano ni Freya ng sugar daddy. Nakadidiring pakinggan ngunit kung bakit ay tuwang-tuwa pa ang babae dahil doon.

“Hindi ko pa rin talaga ma-imagine si Freya na may sugar daddy...” naiiling kong wika sa mga kaibigan minsang break time namin.

“Oh, dear, hindi ka pa rin ba makapaniwala? With her reputation ay magtataka ka pa ba?” nakangising saad ni Ate Jen.

Bukod kay Emma na kaibigan kong matalik ay may barkada akong mas matanda sa akin tulad nina Ate Jen, Ate Roda at Ate Sheryl. Nasa 4th year na ang mga ito ng kolehiyo at close na close ako sa kanila.

Iyon nga lang ay ayaw nila kay Emma kaya kapag kasama ko sila ay wala ito. Ganoon din kasi ang mga kaibigan sa kanila. Aniya ay mga bad influence raw sina Ate Jen. Ayon naman kina Ate Jen ay hindi nila gustong makipagfriends sa tulad ni Emma. Medyo may pagkamatapobre ang mga ito pero hindi nila iyon idinerekta sa akin.

“But infairness, magaling pumili si Freya. Sabi nina Gab ay gwapo at macho raw iyong ka-date niya sa mall,” ani Ate Roda. Same sila ni Ate Jen ng course. Abogasya.

“Nakakabigla lang talaga. Bakit naman siya pumatol sa matandang guy?” nasabi ko bago bumuntong hininga. Natawa tuloy ang tatlo kong kasama.

“Ano pa bang dahilan kaya nagkaka-sugar daddy ang isang girl? E ‘di dahil sa pera!”

“Tama. Ayon pa sa balita ay may condo pala iyang si Freya noon pa. Baka bigay rin no’ng boyfriend niya.”

Pera? Imposibleng walang pera si Freya. Ayon sa daddy ko ay malaki ang parte nila sa VBC at bukod doon ay may malawak silang hacienda at farm sa province kaya papaano kukulangin sa pera ang bruhang iyon?

“Buti ka pa, Pauline, kahit hindi ka magka-sugar daddy ay may daddy ka naman na nagbibigay ng luho mo. Unlike us na tinitipid ang allowance. Hindi lahat ay katulad mong anak-mayaman.”

Tsk. Hindi yata alam ng mga ito na bukod sa amin ni Dale ay mayaman din sina Freya. Kaya napaka-imposible talaga na magkaroon ito ng sugar daddy.

“Kaya, Pauline, mag-ingat ingat ka sa mga kumakaibigan sa’yo. Maraming user ngayon sa mundo,” paalala pa ni Ate Jen.

Kumunot naman ang noo ko. So far ay mga mapagkakatiwalaan pa naman ang mga friends ko. Saka imposibleng traydurin ako ni Dale. Isang sugod lang ni Mommy sa bahay nila ay yari siya kapag inaway niya ako.

“By the way, birthday ko na next sunday. May pa-party ako sa Eco Bar. Punta ka naman, Pauline!” ani Ate Jen na ikinatigilan ko.

Eco Bar? Tiyak na may alak iyon. Tsk! Hindi ako pwede.

“S-sorry, Ate, pero hindi pa ako pwede sa mga ganyang lugar, e.”

“C’mon! Daddy mo ang owner ng bar na iyon at malapit ka nang mag-18 kaya bakit hindi pwede?” ang natatawang anito.

“Masaya iyon, Pauline. Imbitado ang lahat ng barkada. Kapag hindi ka um-attend ay maiiwanan ka ng ganap doon. Huwag mong hayaang makuha ni Freya ang award sa gabing iyon,” sabi naman ni Ate Sheryl.

“Award?”

“Yes. Pipili ako ng pinakamagandang bisita sa party ko. Enjoy iyon kaya sumama ka. Malay mo roon ka na rin makakuha ng sugar daddy mo?”

“A-ano?” ang nahihindik kong reaksyon.

PAGKATAPOS ng break time ay bumalik na ako sa classroom namin. Malapit na ako roon nang makita si Dale sa tapat ng pintuan niyon. As usual, pinagkakaguluhan na naman siya ng mga kaklase ko. Feeling famous kasi ang kaibigan porke’t captain siya ng basketball team.