" أتوق إلى السير فوق العادات ودهسها، العادات التي يعتقد الآخرون أن الإلتزام بها يجعلنا على طريق الحق. "
شنو شنو !! دا كلام شنو يا خالتي ؟
__ السمعتيهووو ! عشان انا يوم دقيت صدري و وقفت ليها قدام أبوها و قدام اعمامها و خيلانها و ناس الحلة ديل جت عليهم ، كنت على رجا انها تحقق لي حلمي الما قدرته احققه انا ، لما وعدتني و قالت لي يا يمه بقدر احقق ليك حلمك و بقدر اشتغل في المركز و اساعد المحتاجين ديل ! ماعندنا مرة في القرية دي بتقيف ليها قدام راجل و تكسر كلمتو و تقول ليهو انا دايرة و لا كلمة لأ ، لكن انا سويتها ! ووقفت بدل قدام الواحد عشرة ،
كان نفسي ما تمشي على نهج العرس و مسكة البيت و تمشي في دربنا ! لكن ما باليد حيلة يا سلوى!!
مروقكم و طلوعكم الكتير دا جاب الكلام و الناس بتتهامس و ما بترحم و انا خلاص بعد دا ما بقدر اضيع مستقبل رُقية اكتر من كدا !
لان سمعتها كل ماليها ماشه تخرب عشان كدا اخير لي استر بتي و اعرسها للزول الشاريها دا !
دقيقه دقيقه يا خالتي كدي وحدة وحدة !؟
انتي واعية حقيقي لي كلامك القاعده تقولي فيهو دا ؟؟ خالتي ، ا نحنا فضل لينا اقل من سنة و نتخرج دايرة تضيعي سنوات من عمرها هدر عشان كلام الناس و العادات و التقاليد التفاهه الحتفضلو مسيرين بيها طول عمركم !!
يا خالتي انتي الوحيده الكنت بحسك متعلمة و فاهمه رغم ان الظروف ما سمحت ليكي ! لكن ما كنت بتعب لمن اجي اوصل ليك كلام و لا فكرة و اخر همك العادات دي ! الليله مالك ؟ حصل ليكي شنوووو ؟؟؟
__ مهما اعترضنا و مهما وقفت ليها قدام ابوها يا سلوان الواقع حيفضل واقع و حيفضل فارض نفسه علينا ! كل زول ليهو حد ! و دا حدي لاني تعبته !؟
انا ليه ما حاسه ان الكلام دا ما كلامك !! في شنو انتو مالكم من امبارح لليله ما قادرة افهمكم في شنو حاصل عليكم شنو و لا انا الغريبه و القاعد يحصل دا شنو بالضبططط !! خالتي ! صلي على النبي !
__ عليه الصلاة و السلام !
دا كلامك ولا كلام رُقيه ؟
__ كلام رُقيه ! و انا شايفة ان ....*قاطعتها !!
( و بقيت اكورك لي رُقيه )
رُقيه ... يا ررررُقيه !! قووومي (مشيت لحد سريرها ) قووومي ! اقعدي لي هنا انا دايرة اتكلم معاك !
__ سلوان ! اطلعي براا ( و جرت الملايه واتغطت ) !
( جريت منها الملايه و جريتها هي زاتها من يدها ) قوووووومي بقوليك انا !
__ ما تكوركي فيني ! و من هنا و لي قدام ما حسمح ليك تنهريني و لا تكلميني بي اسلوب مافي محلو ! انا اصلاً من وراكي ما جاياني غير المشاكل و السمعه و الكلام الشين !!
الكلام دا لي انا يا رُقيه !؟
__ شايفه في زول تالت معانا هنا ؟؟
لا !
__ يبقى الكلام دا ليكي ، و اذا خلصتي كلامك اتفضلي اطلعي براا !!
رُقية في شنو انتي حاصل عليكي انا ليه حاسه نفسي ما بعرفك ليه بتتكلمي معاي كدا ! وريني الحقيقه لانه دا ما اسلوبك ولا كلامك ، انتي في زول ملا ليك راسك دا بي كلام تجاهي عشان يوقع بينا و يخرب علاقتنا و انتي لانك عويرة صدقتي و اكيد دي زفت الطين كان ما سهام يبقى امها ! وريني ياتو يوم كانو عايزين مصلحتك و لا قالو ليك كلمة كويسه !؟ رُقية عليكي الله لو في شي واصلك غلط خليني اوضح ليكي انحنا مالينا غير بعض و طوالي بنتشاكل و نتداقق عديل بس م حصل شلتي مني قدر دا !؟
__ سلوى ! انا تعبته منك بجد ! و نفسي ارتاح منك و من مشاكلك و امورك ! خليني في حالي !
لا ما حخليك في حالك لانك عويرة ! قومي عديل و اقعدي و خلينا نتكلم زي الناس ! و ما تخلي الزعل يضيع مستقبلك انحنا تعبنا سنين عشان نصل للانحنا وصلنا ليهو دا و ما ممكن قبل الامتحانات بي ايام تجي تقرري تخلي الجامعه و في اخر سنة ! البتعملي فيهو دا ما منطقي ولا صح يا رُقية عليكي الله ما تضيعي حلمنا !
__ شوفي يا سلوى ( بي صوت مكسور ) انحنا هنا و في المكان دا بالذات محصورين جوا اطار معين مهما عملنا ما حنقدر نتخطى الاطار دا !
يعني بي اختصار شديد كدا ، ما كُلنا مدثر اخوووك !!!
رُقية !!
__ ما رقيه عشان حتى لو زعلتي دي الحقيقه و مفترض بعد دا تتقبليها لانه مهما طلعنا و اتعلمنا ولو لفينا الدنيا دي كلها مصيرك لي ولد عمك و مصيري لي ولد عمي ! و يمكن انتي اخف قدراً عني بكتير على الاقل انتي بتحبي احمد و دايراهو لكن انا قلبي مع واحد برااا اطار قريتنا و برا اطار مجتمعنا دا كلووووو و مهما رفضته في النهاية مصيري لي ولد عمي الدلاهه داك ، زي ما بتقولي ليهو !
الفرق البيني و بينك حالياً اني واااقعية شديد و ما واهمه نفسي بي حاجة خلاف كدا ! لكن انتي لا يا سلوان ! مُصرة ترهقي نفسك و تعيشي حياة لا هي شبهنا لا هي واقعنا !
( بقيت بمسح في دموعي لان كلامها حسيتو مُر و حار شديد و ما استحملتو ) !
تمام ! عرسيهو بس اذا بتحبيني و اذا لسه لي مكانه جوااكي ! خلينا نتم السنه دي و نتخرج و واوعدك اني م اتدخل في قرارتك ! وووعد !!
__ممكن اسألك سؤال ؟
قولي
__ انتي ليه م عايزاني اعرسو ؟ هاه ! عشان وضعو المادي احسن من احمد اخوه ؟؟
رر رقيه ! دا كلااام شنو ؟ دا شنو دا البتقولي فيهو دا ! انتي جنيتي ولا شنو !! عيب عليكي يا رقيه حتى لو زول وصل ليك فهم زي دا ، انتي ما عندك عقل ؟
__ما حا ارد ليكي يا سلوى ! بس بالنسبه للوعد، كان نفسي اوعدك ! بس للأسف ! انا اديت أبوي كلمة !
كلمة ! كلمة شنو دي يارقية !! ( مسكتها من اكتافها و بقيت اهز فيها ) كلمة شنوووو دي ! نعلو حتعرسي الدلاهه اخو سهام واحمد !!! لااااااااااااء لاااا لا يارقية لا ( و بقيت اكورك ) لااااا ! مستحيل ! طيب و محمود ! ما فكرتي فيهووو يا رقيه ! رقيه بالله عليكي اصحي و فوقي ! عليكي الله ! ياارب ياربي انتي حصل ليكي شنو ؟
مستحيل انا حا اكلم محمود و حا اخليهو يجي يحلها حتى لو يحصل زي م حصل مع مدثر مستحيل اقبل انك تعيشي حياة زي دي !!
__ ( رجعت رقدت و اتغطت بي ملايتا )
لمن تجي مارقه ، اقفلي الباب وراكي !
اول مرة احس اني عاجزة و ما قادرة اعمل حاجة ! وين رقية صحبتي واختي و حبيبة قلبي اللي مالينا غنى عن بعضنا !؟ انا القاعد يحصل معاي دا شنو ؟ ليه حاسه اني قاعده اخسر اقرب اتنين لي في حياتي ! ؟
#في_جانبي !
بعد صراع مع النوم ! صحيت مفجوع بي صوت
حمودي ولد اخوي ! قاعد يقول لي :
عمو عمو اصحى ! اصحي ( و قاعد يهز فيني ) بابا قاليك قوم حبوبه تعبانه و حيودوها المستشفى ! قووووم يا عمو !
كنت حاسي ان صوتو دا بعيد شديد و ما بين حلم و حقيقه او داير استنكرو ! ما عارف حقيقي !
قمت مخلوع ! و بقيت بعاين فيهو ! و عادتا انا لمن بتخلع م بعرف اتعامل بقعد او بقيف في حتتي مسافه حتى اقدر اتعامل مع الوضع !!
بقيت بعاين ليهو لمن سمعت صوت اخوي بينادي علي من تحت و بيقول لي انحنا طلعنا على مستشفى الحياة حصلنا هنااااك !
حتى ياداب قمته و لسسه طاشي ، و بقيت بقول ليهو انتظروني ، و امي مالها ! انا لحد الفجر كنت معاها و خليتا كويسه !
بقيت م عارف اعمل شنو بس غسلت وشي و جريت
لمن طلعته الشارع لقيتهم فاتو !
بقيت بتلفت و م لقيت حل غير عربية وفاء اختي ، شلت مفتاحها و حصلتهم !
طلعت خليتها لانه بالجد حسيت ان كلامي انتهى في وقتها ،، و جريت على بيتنا ، رفعت مرتبتي و شلت التلفون تحت التوب ، و طلعته تاني و بفتح فيهو لمن وصلته رقيه !
و طلعت رقم محمود و جيت قلت بيها !
رقية ! اتكلمي مع محمود !!
__ ( م بترد علي ) !
رقييية بتكلم معاك انا ! مش كنتي بتحنسني عشان تتكلمي معاهو و انا كنت بتغاتت عليكي و بقوليك لا ! اسي اها انا جبت ليكي التلفون ! اضربي ليهو اتكلمي معاهو عليكي الله !
__ م دايرة اتكلم مع زول !
ولا محمود حتى !؟
__ ( فجاة صوتها بقى عالي او شبه بتصرخ ) ! انتي ما بتفهمي ! ما بتفهمي ؟ انتي بعد اللحظه دي ما عندك اي صلاحيه تدخلي في قراراتي ، دي حياتي و انا حُرة فيها ! فاهمه و لا لا ؟
!!!!! ( انصدمت ) كل العملتو صريت توبي و طلعته برااا !!
مشيت البيت شلت لي اقرب سير و مرقته !
الغضب الدخل فيني يومها ما مرق ، لأن ما عندي استعداد اخسر صحبتي مهما كان الفروقات اللي بينا !
و " مشيت بيت عمتي ! "
سهااام .. يا سهااااام ... يا زفت يا اللي اسمك سهام ، امرقي تمرق روحك بركة الله و مولاي ! امررررقي و حاة الله في سماهو و عزة لا اله الا الله العملتيهو دا الليله بطلعو من جواا عيونك !
__ ( طلعت لي اختها الاصغر منها ) سهام دي فاتت على تحت قُرب المظله !! ( قبل تتم كلامها ، جات دافرة الباب و داخله ) !
سهام : يا ساتر يا ستار ! ارادة ربك اصطبح بي وش زي دا ! اوففف !
ارفعي صوتك دا و سمعيني ( و جريت عليها قبضتها من شعرها ) شفتي شعرك دا ! الله بعدمك ليهو ، شفتي قلة ادبي القاعدين تتغنو بيها في نص الحلة دي الليله بوريك ليها على اصولهاااا ! و جبتها الواطه و مسكتها من رقبتها !
سهام : فكيني فكيني يممممممة يمةة فاطمة (اختها) ارفعيها مني ، والله اكلم ليك احمد و احمد دا تاني تحلمي بيهو حلم يا صايعه !
كلمي الدايرة تكلميهو ما بخاف غير من الخلقني انا ! انا ما عارفه انتي عملتي شنو ولا قلتي شنو لي رُقية ! لكن كان اكُرك كر لحد بيتهم الليله يا سهام تمشي معاي و تصلحي الفتنه الفتنتيها بينا دي ! يا اما اخلي سيري دا يشتغل فيك و غير العلامات ما حتشوفي في جسمك دا و ابقي مرة بعدين قولي سلوان الحمطتتني و كل ما القاك بزيدك ! فاهمة ولالا !! كم مرة كلمتك انا ان رُقية دي خط احمر !؟؟
__ مم م مابمش معاك ! و انا ما قلت ليها حاجة و هي كذااابه انا م مشيت ليها و لاقلت ليها حاجة !
** عشان تعرفي روحك كضابه كيف ! اها رايك شنو رُقيه ما جابت سيرتك ! عشان تعرفي غبائك كيف ! قومي قومي على حيلك تقوم قيامتك !
#في_جانبي !!
وصلت المستشفى ! و بقيت جاري بين الممرات !
بفتش ليهم ! لمن لمحت اخووي ! و وحدة من اخواتي ! والتانيه وصلت بي وراي !
وصلتهم بي نفس ضيق و حاسي انه قلبي في اضنيني قاعد يدق ! مع فتحت خشمي كدا بسأل فيهم بقول ليهم حصل على امي شنو ؟؟؟
اختي : انحنا زينا زيك يا عزو !
قلت ليها : كييف يعنــ*** قبل اتم كلامي ! قاطعني صوت من وراي بيقول :
" لها الرحمة مدراراً من فيض ربي " !
يتبع ....
#استككانة 💁🏽♀️
( مش قلنا ليك قوي قلبك و اقرأ للنهايه ! و قصتنا لسه ما بدأت )
#سحر_سمير
#فاطمة_قسم_الله .