///بقلم هاجر صباح///
(لا تنسون التصويت حبابات❤)
الحلقة 7
تحديتك يا قدري اني سوف ارسم حياتي بيدي لكنك تغلبت علي وكسرت مرآتي واحلامي❤
______________________________
حتى ما احجي بابا شكو؟؟؟
شعلان: قابلني الشيخ يم محل ابو فرات وحاجاني
كالي:بقى اسبوع للمهلة الي انطيتك اياها يعني بعد اسبوع تشيلون واني خيرتك وانت بكيفك...
اني حاير كلش وخايف خاف نتبهذل بلشوارع ويصير عليجن شي ف كتلة"اني رايح اقنعها واردلك الخبر"...
وافقي بنيتي لخاطر شيباتي لا تذليني كدام اليسوى ولما يسوة نزلت دمعتي ودنكت راسي ورديت"الي تشوفة مناسب سوي وردت اكوم بسرعة وصلت للباب" كالي:يعني اردله موافقة" جاوبته بغصة وبلعت ريك "اااي بابا بس لخاطرك وافقت ترا"
درت وجهي وبسرعة ركضت للغرفة سمعتهن وراي يصيحن ماما وزينب :ولج شكووو احجي يااا شبيهة هاي خلي اروح لبوج وافهم ..جانت دكات كلبي سريعة كلش وتعتصر الم احس كلبي ينزف محد راح يحس بية ولا الي احس بيه تحطمت كل احلامي وآمالي انجبر على علية زين شنو يحس هسة من
دزيت الموافقة ما حس اني مجبورة اااااه يا الله دا احس نفسي داا امووت اختبارك صعب يا ربي هونها نوب ما بيدي شي دا اشوف احلامي جاي تغرق بنزيف قلبي مثل السفينة الي تبحر وما بيدك شي حتى توكفها تبقى تجر حسرات الى ان تختفي ضليت ابجي بقوة كلشي انتهى كلشي رااااح تدمرررررت اللله ليوفقك بجاه النبي ان شاء الله
تبين حوبتي بيك اااه يا ربي زينب وماما حاولو وتوسلو ان افتح الباب بس جنت بعالم ثاني تماما ودكو الباب على الغدة وما قبلت جانت حالتي اشبة بالميت جثة على قيد الحياة مالي خلك لكلشي ولا الي واهس للدراسة شكد جنت فرحانه لان قرب موعد المدرسة هسة كرهت نفسي وكرهتها وكرهت حتى حياتي وكلشي سود بعيني غفيت كعدت على صوت هوسة ودكة بالباب...
زينب:
بعد ما رحنه لبابا فهمت ان اجبرت وانطت موافقة لخاطر بابا ولخاطرنه ماما فرحت وكالت:تتعود ان شاء الله ..بس اني جنت كلش مقهورة عليها حسيت من اجت تركض ودارت وجها شفت بحر حزن بعيونها ما حجت شي بس عيونها شرحت المها شكد حاولنا اني وماما نفتح الباب ماكو متقبل وجانت بس تصيح بابا راح يوديله خبر الموافقة اني سويت زلاطة وكليت دجاج وسويت تمن ومركة بيضة كل
هاذا وهي بعالم ثاني بالغرفة حاولت اوديلها الاكل بس هي جانت اعصاب وبس تبجي اجه بابا وكعدنه على الغدة حاولت ابين الموضوع طبيعي ماما جانت هادئة بس مبينه مقهورة على حالتها وضايجة سأل بابا:وين سمارة ليش ما تجي تتغده؟؟
سمية:اكل معليك شوية تعبانه هيه تغدت قبلنا ونامت من تكعد تجي تكعد ويانه اكل..
حسيت بابا ما اقتنع او حاول يقتنع سمه بسم الله وبدينه ناكل بس بالاساس ننقش محد اله نفس ياكل بس بابا اكل لان جان تعبان وهم ممتريك كملنه اكل واني بس انقش شلت المواعين ماما سوت جاي
سمية:بس تكعد اختج وديلها اكل مو زين عليها ما تاكل يرجعلها الفقر الدم وكليلي حتى احجي وياها تنهدت والله موتتني هلبنية الله يوفقها ويهديها راح اكعد وي ابوج لان مبين تعبان حضرت الاكلاصات وخليت شكر وهي صبت الجاي وراحت ...
غسلت المواعين وبالي كله يم سمورة خايفة عليها وهم مقهورة لان حتروح من بيتنه هي الوحيدة الي تسليني وتفهمني والي اسولف واكضي وقتي وياها كملت المواعين ونظفت المطبخ ما ادري شوكت كملت كل هاذا رحت اتطمن عل سمارة وهم نفس الحالة بس تصيح وتطرد ولا تقبل تفتح الباب صار العصر بابا جان كاعد بالاستقبال هو وماما واني بالمطبخ اسوي كيكة اتعلم سمعته كال لماما
شعلان:اكلج اني خايف خاف ضلمتها لو جبرتها؟
سمية:لا هي الوافقت وهم لازم توافق لان قسمتها زينه الله يسعدها ويهدي وكون الها سند وخيمة الها
شعلان:ان شاء الله بس وينها هية ..
سمية:بالحمام تسبح يلا نام شوية اني هسة اجي..
اجتني ماما كالت رايحة للحمام اسبح لتكوليله على حالة سمارة ينقهر تره راحت ماما شوي وسمعت بابا صاحلي مشيت بخطوات بطيئة خايفة خاف يسألني على حالة سمارة...
شعلان:تعالي باباتي اكعدي
كعدت واني خايفة من هل سؤال لان اعرفة يحس اكو شي مو طبيعي خصوصا ان سمارة ما بينت كلة بغرفتها...
هاا ببابا
شعلان:اذا تحبيني سمارة شبيها شو ماكو لو بالحمام لو بالغرفة شنو سالفتها واذا ما حجيتيلي الصدك ازعل عليج...
زينب:خلاني بخيار صعب من جهة ماما ومن جهة هو ويحلفني اضطريت اكلة الحقيقة بابا اكلك بس اوعدني متضوج بابا سمارة من الصبح لحد هسة بغرفتها وبس تبجي ولا اكلت حتى ولا شي...
شعلان:اهاا يلا روحي كملي شغلج حبيبتي..
حسيته وجهة احتقن ودمعت عيونه انقهرت كلش وضليت الوم بروحي لان حجيتله طلعت ماما وراحت للاستقبال تغفى شوية واني هم رحت لان تعبت من التفكير غفيت شوية وسمعت صوت امي ولج زيييينب اكعدي فزيت بسرعة مرتعبة هاا ها شكوو سمارة صا شي عليها
سمية:ولج يا سمارة ابوج مدري شبي ولج بس لا ارتفع ضغطة جيبي حباية الضغط رحت بسرعة جبتلها حبوب الضغط وهم مصار زين كام يرجف خفت علي كلش ورحت لسمارة هي الوحيدة الي من يشوفها يرتاح دكيت الباب وكلت ولج سمااارة باباااا مدري شبي ولج فتحييي فتحت الباب بسرعة شهكت يمة الرحما شصاير بيج ولج جانت عيونها منفوخة كلش ووجها محتقن وتحمر
سمارة:احجييي شبي باباا احجي
زينب :بس يرجف يمكن ضغط تعالي بسرعةةة رحنه ركض واحنه مفزوعات
سمية:ولج سمارة لبسي وجيبي فلوس ابوج صاعد الضغط لازم ناخذة للمستشفى تخبلت من سمعت هيج رحت بسرعة لبست مدري شنو وجبت فلوس ورحنه وصلنه للشارع وبابا بلكوه يمشي اجرنه تكسي وطول الطريق ادعي واقره آيات يااا رب احفظة الي اذا صار بي شي ما اسامح نفسي كلة بسببي وصلنه وشكلوله مغذي كال الدكتور:ضغطة صاعد كلش انطانه ادويه لازم راحة تامة يرادلة خلص المغذي طلعنه واني كلبي يرجف وصلنه للبيت لكيت زينب تاكل باضافيرها من القلق..
بسرعة كالت :ها بشرو بي شي بابا احجو
كلتلها:لا بس ضغطة صاعد هسة حيصير زين وديناه للاستقبال فرشناله صاح سمارة بابا تعالي اجيت متلهفة ودموعي برموشي متعلكة هاا بابا حبيبي شلون صرت
كال:اذا انتي بخير اني بخير انقهرت كلش من سمعت حالتج اذا ترديني بصحة زينه اكلي زين ولا تخليني التفكير وتأنيب الضمير يموتني قاطعناه :اسم الله عمرك طويل ..حسيت بدوخة قوية لزمتني زينب ورحنه للمطبخ حمت الاكل كعدت اكل بشراهة لان ميته جوع كلما ارفع راسي الكة زينب تبتسم اخر شي كالت:شبيج ملطلطة
خلينه لكمة وياج ضحكت عليها وتدنيت حتى اسويلها مجال كامت تاكل شوي تغير مودي رغم باقية هل الام بقلبي مرت الايام واني صامدة لخاطر بابا حددو موعد العقد بعد باجر ماما اخذتني ورحنه للسوك افتريناه كلة جبنه كلش هوااااي غراض معطرات ومكياج وفساتين وملابس نوم حاولت اقنعها ما نشتريهم بس هي اصرت كالت ميصير كل عروس تلبس هلملابس باليل استسلمت للامر الواقع وبعد مناقشتها رجعنه هلكانين تعب رجلينه خيوط لكينه زينب منظفة البيت كلة رتبنه الغراض بجنطة للعصر اجت سهاد وضحى وميعاد سلمت عليهم وتباركلي ضلينه نسولف ونضحك كلش فرحت بلمتنه بس خربوها الجهال كلساع كاتلة واحد اختي الجبيرة ما اجت لان بغير محافظة الوحيدة الي مرتاحة....
'سمية؛اكلج سهاد شخبار زوجج شلونه وياج؟
سهاد:لا الحمد لله كلش مرتاحة وياه ويحبني ومدللني..
سمية :هاا ولجن كافي سوالف ولن سون اكل وكثرن لهلفروخ المفجوعة كلنه ضحكنه كامن سون غدة الكل فرحانه الا اني ابدااا احس نفسي كلما يتقرب الوقت يتقرب اعدامي تغدينه وهن تكفلن بكل الشغل لان عروس اااه شلون عروس احس دا الف حبل المشنقة على ركبتي ......
كضه اليوم كله ترتيبات وتنظيف للعصر اجن اخواتي كالت بابا يريدج رحت وانصدم بالشيخ جاي احس جمدت ولا كدرت حتى احجي كال بابا:سمورة روحو اختارو الذهب
كتلة :بابا خلي هو يختار اني ما اروح
كال:لا ميصير بنيتي لازم ترحين
الشيخ رافد:لا عادي اذا متريد تروح ما اجبرها اني اروح واختار يلا اودعناكم حجي في امان الله دخلت للغرفة بسرعة وجهي محتقن لزمت نفسي كدام اخواتي وما بجيت رحت للحمام بجيت كلش هواي متحملت كلبي كلش يوجعني صعب ياا ربي صعب اختبارك اجه يوم العقد جابلي فستان ماروني(احمر غامق) اخواتي حفن حواجبي ووجهي وشلت شعر جسمي لبست الفستان جان شعري طويل كلش لناهاية ظهري او اطول بشوي واشقر وبي خصل بنية جانت حماة سهاد واخواتها وعمتها كلهم موجودين خلولي مكياج باوعت بالمراية ما صدكت هاي اني جنت طالعة اميرة بس بداخل هل اميرة حزن عميق حاولت ابتسم ولو شوي ماما والبنات كل ساعة يصلن على النبي ...
عمة سهاد:خية سمية وين ضامتها هاي اللعابة علينه جان اخذتها لابن اختي بس بعد راحت الله يهنيها..
امي حسيتها ضاجت بس غلست وما جاوبتها هناك واسمع صوت الهلاهل تركع وكف كلبي يااا الله صبرني هونها علية ...سمعت البنات اجوو اجه العريس صاحولنا نعقد عقدنه واني انطق كلمة واسكت وارجع اكمل ل اخر شي اجه يلبسني الذهب البنات والكل انصدم من شافة صح جان كبير بالعمر بس جان بي هيبة مو طبيعية وهم جان جسمة رياضي ما عندة كرش لبسني سيت كامل ذهب وحزام من ذهب وترسني ترس ذهب احس روحي صرت ثكيلة كلش ضجت ما ادري ينتقص منه لان حالتنه فقيرة لو يبين للناس عود ادللها كلش كرهته
...ودعت اخواتي بس ما اتأثرت بكد ما ودعت زينب متت بجي هي الوحيدة التعرف شنو بداخلي صعدنه السيارة تقيدت كلش جان كاعد يمي شوي وحسيت ايدة تخلت على ايدي جمدت وتقيدت كلش صرت خشبة بس قاومت وسكتت.....يتبع