تسرح إعيوني إبجمالك ... عودتني
من يسد خلت وصالك... لو عفتني
صبري بعدك مستحيل... و إنت ناوي إعله الرحيل
عودتني عودتني
كحّل إجفوني الأمل ... من شفت بدرك كمل
ما جنت أدري الأجل... يخطف أحلام العمر
قلبي أمّن من صرت... آنا غيرك ما ردت
أحسب أيامك جنت... ليله ليله و أنتظر
يبني يبرالك حناني ... من صيارك
آنا يا زهرة زماني... بإنتظارك
ردتك العمري خليل ...و إنت ناوي إعله الرحيل
عودتني عودتني
حلوه عندك كل صفه... رابي بأحضان الوفه
ليلي يظلم لو طفه... وجهك المثل البدر
طولك المثل الغصن... شمعه يشعلها الحسن
قلبي كل ليله التجن ... يستعيذ إمن الهجر
فتّحت وردة وجودك... من شفتها
روحي من وحشة صدودك... طمأنتها
للأمل ما ظل سبيل... و إنت ناوي إعله الرحيل
عودتني عودتني
حسرة الأم عالولد ... تبدي من عمر المهد
تطرد إعيون الحسد... ويه طلعت كل فجر
ما يمر بيها الوسن... تحسب إحساب الزمن
ليلة السار الضعن ... لاحت إنجوم الصبر
لو قضت رحلت عمرها... وي حزنها
ما ظن إيضمد صبرها ... جرح إبنها
صاحت إشعندي بديل... و إنت ناوي إعله الرحيل
عودتني عودتني
ويه كل خطوه الدهر ... يرسم إبدرب السفر
صورة أشباح الخطر... منحر و دم ينهدر
عمري ليل إبلا صبح ... هذا مو أول جرح
أنتظر سيف الذبح... يترك إجروح إشكثر
لو رحت بعدك نهاري ... تطفه شمسه
من تصير الغربه داري ... يبني شنسه
نوحي ما يشفي الغليل... و إنت ناوي إعله الرحيل
عودتني عودتني
جم ضلع مني إلتوه ... من شفت طولك هوه
يا قمر ينزف ضوه... صابته إسهام الغدر
يبني جانت منيتي... لمن إتحل ساعتي
تحمل إنت إجنازتي ... و قبلك إيضمني القبر
و الزمن غيّر حسابي... هذا حالي
لو أبث شكوة عتابي... و الجرالي
حصتي دمعي اليسيل... و إنت ناوي إعله الرحيل
عودتني عودتني
ويه كل نسمه التهب ... يبني أقول إبيا ذنب
تنحرم من العذب ... و القلب قطعة جمر
ضامي للحومه رحت ... إيحرسك الباري صحت
من ظهر مهرك طحت... عالأرض مثل البدر
والدك لمن إجالك... يجري دمعه
و بقلب ينعه إعتنالك... لو تسمعه
معتني إبنوح و عويل... و إنت ناوي إعله الرحيل
عودتني عودتني
صوره من سيد البشر... جسمك إمقطع وذر
يا علي قلبي إنكسر... و الحشه ظل يستعر
حسبت دهري إشتفه... من حنه ظهري إكتفه
يبني عالدنيه العفه ... و الله اليعظم الأجر
من أرد لأمك شقلها...يا ضمدها
إنت الوحيّد أملها ... غالي عدها
كالغصن قامت تميل... و إنت ناوي إعله الرحيل
عودتني عودتني