كلمات لطميات باسم الكربلائي وغيره من الرواديد ٢

٩٥.عاشور

عاشُور عاشُور
ما يرتاح گلبي الآخر انفاس
عاشُور عاشُور
ظل دوم بخيالي الرمح والراس
**********************
آنه الجواد وقصّتي عمّاتي راحن أسْره
والمِختنگ منّ اليسر ما تكفي عنده العَبره
والدنيا معروفه جرح واحسين جرحه اِبظهره
راسه انرفع فوگ الرمح والخيل سحگت صدره
مكسُور مكسُور
ماهَمني الذبح بس صدرك اِنداس
عاشُور عاشُور
ظل دوم بخيالي الرمح والراس
**********************
غمّضت عيني وما نمت بعيوني صار المنظَر
كل شيب أبيض بالوَجِه بس شيب ابويه أحمر
ريحانة الزهْرة إجه ذبلان يا ابو الأكبر
والرمح نايم بالنحَر ماخِذ مكان الأبهر
معذُور معذُور
من الخَولي شالك مات الاحساس
عاشُور عاشُور
ظل دوم بخيالي الرمح والراس
*****************
كبري ابكُبر إبنك علي بس الفرق يا مولاي
ذاك لِسانه چن خشَب وآني لساني بي ماي
مسموم صح فوگ السطح ومحّد سحگهن اعضاي
ولا خُنصري امْن ايدي اِنبتر ولا أختي ركضتلي اهواي
منحُور منحُور
ما ينداس نحرك والله ينباس
عاشُور عاشُور
ظل دوم بخيالي الرمح والراس
************************
يحسين أتصوّر صرت اتمنّيت مَيْسلبونك
واتمنّه كون ابجانِبك وامسح تراب امتونك
آني انرفس يا سيّدي وما خلهم يرفسونك
وابدال زينب عمّتي بيدي ألمّ اِسنونك
مفطور مفطور
من سهم البحِنكك حارت الناس
عاشُور عاشُور
ظل دوم بخيالي الرمح والراس
************************
غمّضت عيني واسْمعك إتنادي الا من ناصر
اتمنّيت اصير ابجانِبك لكن اشبعده العاشر
أنظر الراسك عالرمح منهو الشفافك فاطر
مسلوخ خدّك عالرمح هاي الشمس لو حافر
مسطُور مسطُور
بعيونك اصابع أثر حُرّاس
عاشُور عاشُور
ظل دوم بخيالي الرمح والراس
***********************
يحْسين بعيونك جرِح وصورة إلي تعرضها
ركضن بناتك بالسبي ركضه الزلم تركضها
مثلك أموتن بالشمس وانفاسي كون الفُضها
ولا أسمع ابزينب بقت بالشام مِن ترفضها
مأسُور مأسُور
عن خدِر العقيلة وينه عبّاس
عاشُور عاشُور
ظل دوم بخيالي الرمح والراس
**********************
اني ادري محسوب العمر واعرف تره تاليه
المن يعيش الي يحس زينب مشت مسبيه
من لاگي محبس والدي منهو الگه الترچيه
بعيوني انظر للظعن بس لاتطيح ارقيه
مجرور مجرور
ياعمه رقيه القرط حَساس
عاشُور عاشُور
ظل دوم بخيالي الرمح والراس
***********************
شتان اني وكربله بس اشحلاته اونيني
ياربي كون ابخنصره هيج ويغمض عيني
ما ادري بس ادري الوجع مايوصلك يحسيني
ولا راسي شالوه ابرمح ولا حجر صاب اجبيني
مشكور مشكور
ياراس الرمح بالآه تنقاس
عاشُور عاشُور
ظل دوم بخيالي الرمح والراس
*******************