واجب يمسلم نعلن البيعه ...
أمر الإله و لازم إنطيعه
إترك خلافاتك...
و إحجيها من ذاتك
واجب يمسلم نعلن البيعه
منهو الرفع إيده النبي و ناده ...
هذا الأمير و سيد الساده
حيدر ولي من الله تنصيبه ...
مأواه جهنم كلمن إتماده
يا ربي والي كلمن يواليه ...
يا رب محمد عادي من عاده
يوم الغدير القصه مشهوده ...
عندنه الأدله إهوايه موجوده
عندك دلالاتك.
و إحجيها من ذاتك
واجب يمسلم نعلن البيعه
الله و محمد يعرف أسراره ...
حامي الحميه و الحمه جاره
إسأل بدر و إسأل أحد عنه ...
و إسمع بعد بالخندق أخباره
منهو البرز للعامري غيره ...
قص راسه بيده و جاب البشاره
خاف الجميع ولاذوا إبسده ...
و الكل ينادي وين أبو الشده
وضّح قراراتك...
و إحجيها من ذاتك
واجب يمسلم نعلن البيعه
إسأل بعد خيبر عله إفنونه ...
مرحب وقع من خزرة إعيونه
منهو القلع باب الحصن بيده ...
لو ما علي منهو اليقلعونه
و القّبله راحوا عافوا الرايه ...
ما ينتصر جيش النبي إبدونه
حيدر تلوق الرايه بيمينه ...
يستاهل إنقله تهانينه
قرب مسافاتك ...
و إحجيها من ذاتك
واجب يمسلم نعلن البيعه
راية محمد بيده لازمها ...
و المعركه إبفقاره يحسمها
منهو الينحره لو شهر سيفه ...
طول و عرض عدوانه يجسمها
ناده المنادي لا فتى إلا ...
حامي الحمه و فارس هواشمها
نفّذ أمر بارينه سبحانه ...
و أركب سفينة حيدر إويانه
تخلص معاناتك...
و إحجيها من ذاتك
واجب يمسلم نعلن البيعه
يوم الحشر حيدرنه ننتظره ...
راعي الصراط و ينسمع أمره
هو الأمير و يحكم إبكيفه ...
واحد يرجعه وواحد إيعبره
عاشق علي يتدلل إهناكه ...
و الما يوالي ما نفع عذره
الفرصه مره و بالك إتفوتك ..
محد ينفعك لو قرب موتك
دقق حساباتك ...
وإحجيها من ذاتك
واجب يمسلم نعلن البيعه
نسّم يشوقي و إغفه بعيوني ...
مالكني حبه و هاجت إجنوني
سيطر عليَّ و شاغل أفكاري ...
حيدر حبيبي و لا تلوموني
حالف أحبه و غيره ما ريده ...
باقي الخلايق ما يهموني
أتمنه مثلي يشغل أفكارك ...
إبهذا العشق خلينه نتشارك
صحح رواياتك...
و إحجيها من ذاتك
واجب يمسلم نعلن البيعه
أهل العشق تتغنه بإحساسي ...
كلي عشق من جدمي الراسي
صبح و مسيه ألهج بإسمه ...
و آنا أذكره حته لو ناسي
من الله هاي بإسمه أتنفس ...
يعني بغيابه يقطع أنفاسي
إسقيني كاسي و إنت خذ كاسك ...
خل نرتوي بإحساسي و إحساسك
مفهومه نظراتك...
و إحجيها من ذاتك
واجب يمسلم نعلن البيعه