يا كواكب نور...ترحل بعاشور
في أمان الله ...سعيُكم مشكور
يالغوالب بهالعمر مالي سواكم
ولدي بس رب السمه يدري بغلاكم
لو هوه الدنيه خلص أشتم هواكم
يا كواكب ضحوا لحسين بضواكم
يا أُباة الضيم...جدكم إبراهيم
دمعه يجري و صاح ...سعيُكم مشكور
انت أول من أكلمك يبني يا عون
أدري بيك بجلمه مني تقلب الكون
و الله يعيوني رحيلك عني ميهون
لاجن الخاطر حسين اتهون العيون
الخاطر المصباح...نرخص الأرواح
و عالضعن مكتوب ...سعيُكم مشكور
انت يا عبدالله آيه امن الصميده
و آنا ربيتك على هاي العقيده
حسين أريدك يبني تصبح من عبيده
من يكلمك تنحني و اتقّبل إيده
لمن ايناديك...اتجاوبه بـ لبيك
اتبشرك الآيه ...سعيُكم مشكور
يبني جعفر يا نبض قلبي و حنانه
الغالي انت اليبقه بعيوني مكانه
هذا خوك و نصرته بذمتك أمانه
اليرضه عنه حسين سلطان بزمانه
و الينول ارضاه...ينحشر وياه
ايخاطبه المصحف ...سعيُكم مشكور
انت يا عباس الي يمك وصيتين
امروتك بيض لي وجهي يم الحسين
يبني عن زينب أبد لا ترمش العين
هالعلم ما يوقع إلا و فوقه جفين
يا بو فاضل هاي ...أُمنيه بدنياي
فاطمه اتناديك ...سعيُكم مشكور
لو وصلتوا الكربله أمكم طلبها
بالنيابه عني شموا لي تربها
عنها قالوا يدخل الجنه اليطبها
كربلاء الغاليه روحي تحبها
و العشق لحسين...من أصول الدين
يا ليوث الغاب ...سعيُكم مشكور