٢ ...
من مأساة انترنيت
بقلم وئام علي ( نور القمر )
الكروبات و البيجات نشرت الفيديو ...
كل كروب يخمطة من الثاني ...
كروبات فضائح ..
و لايكات طكت وتعليقات غلط وشتم و فشاير ع صاحبه الفيديو ...
" غدير "
جان دوامي عصري شفت المعلمات يباوعلي بنظرات وغير الحجي والبسامير وحدة من المعلمات كالت
- ولج ولج عين ومداومة شكد جنت احبج بس وكعتي من عيني هاي تاليه الدياحة و النقالات عفية اهل متابع بناتهم..
صفنة خذتني و نزلت دمعتي
- ست شنو شصاير ممسوية شي ...
- عيني انت هاي لو غيرج..
طلعتلي نقالها وراوتني الفيديو ضربت خدي هي صرخة هي بجية هي انهياري ورافكني خوف دمرني ..
- لااا فدوة ست مو انة النشرت شلون اسوي هيج هاي بحفلة ببيت صديقتي جميلة ..
صديقاتي عافني و بنات المدرسة تبسمرني ، بقت الي بس مريم
الولد الناشر الفيديو كاتب حجي مو حلو علي و ملمح انو بحفلة خاصة وانو اني على علاقة حميمة بيه
جان يتباهة بمنشورة متصور الرجولة من يهتك ستر بنت ...
اجتني مريم للبيت واني بحالة انذار وخايفة لا اهلي يعرفون
بوووية لو يوكع بيد اخوي نهايتي يعني وصلت ..
باوعتلي مريم وهي تمسح وجهها متوترة ...
مريم : غدير جميلة دازة الفيديو او هي ناشرتة عن طريق ولد ما اعرف بس ....
قاطعتها
غدير بسذاجة : شلون بية ولج شسوي هيج الناس ما تخاف الله .
مريم : سمعي ...
سكتت ورجعت تحجي بس صوتها مثل المبلوع و ترجف الموضوع صار خطر ...
- لج الفيديو وصورج الي طكتهم الج اعتقد منطتهم لولد لان صاحب المنشور كاتب هذي حبيبتي شنو رأيكم بركصها ، شوفو هل جسم كل شبر اني ملكتة .
من راحت مريم اني حيل انهاريت حبست روحي وابجي و الوم نفسي هذا الي يمشي وي بنات مو خوش و ما يحترمن اعراض الناس هذا نتيجة الثقة الزايدة بصديقة سيئة ما عدها اخلاق ..
جنت ادري بيها شلون مشيت وياها وصادقتها شلون وثقت بيها واخذت راحتي ببيتهم ..
مر ثلاث ايام اني خايفة خواني الولد زغار وابوية على كد تعليمة هو وامي ما الهم خلك برامج تواصل ...
ما عدنا قرايب اغلبهم بعيدين ما النا تواصل وياهم ...
بس بقيت على نار ما خليت دعوة ما خليت اي امام ما نخيتة ...
اي نذر ما وعدت ربي بيه اوفيه
فدوة الك ربي طلعني من هاي المصيبة لا تفضح اهلي بيه مالي ذنب و تعلمت من غلطتي بعد ما امشي وي هيج بنات بس كون تفوت سلامات .
الخوف خلاني مثل شبح يكمز ع اي دكة باب او رنة جرس ...
بقيت خايفة من اخوي الجبير لا يعرف وجان اخوي بالجيش ، تركت الاكل وضليت بس افكر شأسوي حتى اخلص نفسي ، فكرت بأمي اكللها ، بهيج امور لازم البنت تصارح امها ، لان الام ما تأذي البنت ،
صارت سمعتي موزينه وادمرت حياتي بسبب بنت متحررة عبالها كل العوائل عادي تنشر صورتهم .
بس حظي واعرفة باليوم الي قررت اصارح امي بيه دخلت امي ترجف لان جانت متعاركة وي الجيران و معيرتها بيه لا ومراويتها الفيديو انضربت بذاك اليوم وذنبي الوحيد وثقت بحفلة صديقة ...
هواي بنات يصاحبون يجيهم شاب بحلو الكلام يقشمرهم ، ترى مو كل واحد يكول احبج يعني يحب ، اكو شباب عدهم عرض الناس مستباح
والبنت بطبعها تحب غزل وحجي عاطفي تحس ملكة ، بس ماتدري هذا الامير وفارس الاحلام ما هو الا وهم .
اخذتني امي لفحص العذورة واخذت تقارير طبيه بهذا الشي وقررت تكعد تحاجي ابوية حتى يلكون حل للموضوع .
اني اعترفتلها صديقتي صورتني وما عندي شي لا يوم صاحبت ولا احب هاي السوالف .
طبعا اخوية عرف وقرر يغسل العار بالدم ، بس اني شعلي وشنو ذنبي ، ذنبي الوحيد اول مرة احضر حفلة بنات و ذنبي ما اختاريت صديقتي زين
مريم اضطرت ترسل رسالة الي قراها اخوي لان نقالي انسحب عندة .
" اعرف مو ذنبج وكله من جميلة الي صورتج ودزت الصور لصاحبها بس يا غدير اهلي وخطيبي منعوني منج خطيبي حيعوفني اذا بقيت صاحبتج يكول نفسخ ويكول سمعتج صارت بالطين وما يصير امشي وياج سامحيني "
صارت عيون اخوي حمر من العصبية شرفة انهان وما يغسلة غير الدم ...
شفت الرشاشة موجهة علي باوعتلة بدموع وتوسل لان اني عار لازم يغسلة بدم حتى لو اني مالي ذنب
اطلق اخ غدير رصاصات على جسد غدير ليرديها قتيلة.....
حاليا هناك جلسات عشائر بين اهل البنت التي قتلت وبين اهل البنت التي صورت واستطاعوا الوصول للولد الذي نشر الفيديوا ولازالوا الى الان اهل غدير يطالبون بقتل الشاب الذي نشر الفيديو
*الشاب تم تهريبة لمكان ما
* بيت اهل جميلة تم هدر دمهم وهددوهم ترك بيتهم والرحيل بعد ان اخذوا فصل منهم
* اخو غدير لازال ينتظر حكم القاضي ولا اعرف ان كان سيحكم غسل عار لمدة ستة اشهر ، او حكم الاعدام لان بالتشريح البنت عذراء
هذي قصة مقتبسة من قصص حصلت بالنت كثير ، و بالعراق البنت تقتل حتى وان لم تكن مذنبة لأن عندما تتلاقف صورها الشباب يعتبر عار
الكاتبة : اللهم استر علينا وعلا بناتنا وسائر المؤمنين والمؤمنات
* اذا تردون تتناقشون بيناتكم حول المواضيع بالتعليقات لان هذا كتاب مو رواية وايضا ً قابل للنقاش .
* ايها الاب الاخ او اي ولي امر قد تبيع نقال ابنتك يوما او قد يضيع منها ، فتنتشر صورها لان هناك برامج تعيد الصور المحفوظة ، ثم تريد ان تصبح رجلا يغسل عاره والذنب ذنبكم بالاساس ، هناك مختصين يقدرون محي الصور بصورة دائمة لذا اعرض النقال على متخصص موثوق به ليمحوها امامك بصورة دائمية يعني يرجع النقال كأنما توك مشتريه .
* الافضل عدم التقاط صور خاصة داخل النقال او احتفاظ بالصور به لانه معرض لكل شيء
* اصحاب المحلات اخواني الشباب قد.تشترون نقال امرأة او بنت او قد تجدون نقال ضائع دع شرف واعراض الناس امانة لديك كي يحفظ الله شرفك من كل سوء ، هاي ضاهرة انتشار الصور ترى زادت عن حدها .
* ياشباب بطلوا زحف باعراض الناس وتذكروا عدكم خوات ، لادكول اختي مترباية مو مثل ذول صدك ورب الخلقك الله ينتقم بعرضك باي وسيلة حتى لو اختك ما تتقشمر وصاحب يسلط عليها خاطف مغتصب او بأي وسيلة ينتقم الله منك فكما تدين تدان ، لاتدع دم بنت قد تقتل بسببك ذمة برقبتك الله لن يغفر لك التلاعب باعراض الناس ،.
* يا بنات مو كل كلمة حب تجي صادقة الي يحبج يخاف عليج ويدك باب اهلج ويواصلج بالحلال ، جربي اختبري حبيبج وكليلة يابة بعد ما نتراسل ولا نتخابر تجي تخطبني ، اذا شفتيه يمسلت اعذار ويتحجج عوفيه هذا يريد يكضي وقت وبلكت يحصل منج صورة شي يجمع لايكات اذا مو يقنعج هم تطلعين وياه ....الخ يعني بالقلم العريض يدور علاقة جنسية وياج ...
* حب الانترنيت كذب لا تصدكيه .
* امهاتنا الفاضلات البنت ان ربيتها واستقمت بتربيتها ستفتح لك ولابوها باب الجنة على مصرعيه ، اما العكس سيكون جحيم عليكما ، انتبهي للبس ابنتك ، مو ثلاث طعش ومكيجة عبالك عروس .
الام ذلك الصدر الحنون والصديقة الودودة ، ليس بالتخويف تكسبون بناتكم ، لاتدعي ابنتك تضم اسرارها اكسبيها لتعرفي كل شيء عنها حتى لاتقع ابنتك بقاع الانحراف ، الثقافة الدينيه مهما فالصلاة تنهي عن المنكر والفحشاء ، الدين ليس مجرد اداء واجبات فقط بل ازرعي بداخل ابنتك ان الله يحب امته طاهرة مطهرة من كل ذنب الخ
* ياشباب هسة كفشات و مكانيس جنها فرچه الغسل على روسكم قبلنا لو جنكم بنات تحفحفون وخلطات يلة ميخالف عود تطور ، تحفرون شوارع بروسكم جنها شوارع البصرة كلها حفر وطسات اوكي خوية على كيفك لاضوج مني هم ميخالف رضينا بالواقع ها نسيت شنو فلم احرف اساميكم بالزيان تسونها بشعركم ، يعني مثلا هاي ماركة مسجلة الكم ، لو حتى لاتضيعون اسمكم مكتوب بشعركم لا اكيد استفزيتكم وعصبتكم اوكي اعتذر بس كل الي اطلبة منكم انتبهوا لدينكم قبل دنياكم الاسلام مايقبل بهاي الصياعة والاستهتار ترى الموت صار بالجمله باجر شتكل ربك جنت اكبسل واشرب والعب بشرف الناس هسة اذا البنت قشمر وتصدكك صير انت خوش وليد وحباب وفكر تحافظ على شرف غيرك .
هذي ملاحظات صارت طويلة والله هاي قليل على الي دنشوفة
وهاي قصة بسيطة كدام قصص النت الدنشوفهة
م/ لا اقصدكم كلكم لاتغضبوا مني لكن ملاحظاتي تخص فئة معينه اعتبروها نصيحة .
لاتنسوا التصويت. والتعليق ليرتفع الكتاب لمستوى يراه الكثير من بالواتباد
شكرا لكم
اختكم وئام (نور القمر )