موسوعة القصص من واقع العراقي ( قصص قصيرة بكتاب واحد )

قصة لا تيأس من رحمة الله

وأخيراً جتي بنتي للدنيا وصار عندي بنية
مساء الخير حبيباتي
اليوم أريد احجيلكم قصتي اني تزوجت قبل 18 سنة زوجي يحبني وإني أحبة والحياة تمشي
لكن بدون اطفال هواية محلوة أحس كأنما ماعندي أمل بالحياة. .....
وصار سنة علی زواجي قررنا نراجع دكتورة بعد ملحت الاهل والكلام المعسول الاسمعة من عمتي وحمواتي لكن هم حقهم لأن هذا ابنهم الجبير ويردون يصير عنده طفل رحت للدكتورة
الدكتورة نعرفها ورة التحاليل والفحوصات اقترحت نراجع مركز كمال السامرائي لأن التحاليل غالية جانت وبمركز كمال الأسعار رمزية وهناك هم يفهموني علی كلشي رحنا اني وزوجي وسوينا فايل ورسلوني علی دكتورة مسيحية ما أذكر اسمها بالضبط يمكن أبوها اسمه كوركيس. .وبعد الفحوصات والسونارات الدكتورة المسيحية قالت صيحي زوجج أريد أتكلم وياكم سوة وملخص كلامها جان ( زوجتك عاقر وميصير عدها اطفال لأن البيضة مالتها كوين ومتتقبل تلقيح حتی لو صناعي هم نسبة النجاح 5 بالمية ) شايفات الواحد اليكولولة انت باجر تموت هذا الإحساس الحسيت بي اما زوجي فوصلت بي الحالة دموعة نزلت والحمدلله علی كل حال. ...
رغم الوضع الاحنة بي اتفقت اني وزوجي منكول لأي شخص ومن يسألون الجواب يكون عندي حالة مرضية وأخذ علاج وان شاء الله يصير خير. .وعدت الأشهر والسنين
وتوصلت الی نتيجة أن الخلل بيه لازم اغير وضعي
اول شي لبست حجاب لأن اني جنت سافرة
وثاني شي بديت اجرب كل صلاة لطلب الذرية وبصراحة مابقيت لا نبي ولا ولي ولا أمام ما طلبت منه يصير عندي طفلة
ردت طفلة ماردت ولد ما اعرف ليش وبواحد من الكتب الدينية لكيت هذا الدعاء ( الاستغفار 70 مرة و9 مرات سبحان الله ومرة واحدة استغفر الله والآية القرآنية بسم الله الرحمن الرحيم. ....استغفرو ربكم انه كان غفارا يرسل السماء عليكم مدرارا ويمددكم بأموال وبنين ويجعل لكم جنات ويجعل لكم انهارا. ..صدق الله العظيم ) هذا جنت اقراه ورة صلاة الفجر والمغرب واستمريت عليه سنوات. ...
يأست ويأست. .لكن ما تركت الدعاء
الله شكد يأذي ويجرح كلام الآخرين ليش ما عندج اطفال وشكد حسيت حماتي حقيرة من كل متشوفني تسألني شلون تبقين هيج أخوية الأصغر أتزوج وصار عندة ولد وانتي بعدج زين أخوية ساكت ومتحملج
.......
اني ما مقصرة وي زوجي وخالته بعيوني وهو يحبني هواية وقانع بقسمة رب العالمين
.........
وتقريبا راح يصير 5 سنوات علی زواجي
.الدورة تأخرت عليه اتصلت علی اختي حتی نروح للدكتورة ليش الدورة صارلها أكثر من شهر ماكو المهم للآن كلام اختي يرن بإذاني. ..
......كل عقلج تصيرين حامل. ....
الدكتورة فحصتني خارجي وكالت سوي تحليل شوفتها فحوصاتي وتحاليلي قالت أشك عندج حمل
سوي تحليل وبلغتني أم المختبر. ..
انتي حامل
والله ما فرحت
ولا صدكت
ورحت سويت تحليل بغير مختبر مرة ثانية
ونفس الكلام انتي حامل
اخذتني اختي ورحنا لدكتورة سونار وسويت دوبلير ....اني حامل
ومن عرف زوجي سجد لله شكر
والله بنات هاي الدنيا كلها متوسعني من الفرح
وبالرغم من حملي الجان كله مخاطر والضغط مرتفع لل19 والعلاج الاخذة
وأول ما دخلت شهري سوتلي الدكتورة عملية لأن وضعي ميتحمل
ودخلت غيبوبة ورة العملية لأن ضغطي ورة ما طلعو الطفلة هبط فجاءي والحمدلله

حسيت اني بغرفة المستشفى وكل الاهل يمي
حتی حماتي الجان كلامها قاسي. ..هم حسيتها فرحانة
وزوجي كاعد عالكاع ممصدك صار اب وممصدك حبيبته نجت من الموت

الحمدلله على كل حال
والله بنات دموعي تنزل وإني اكتب هذا الكلام
هذا الواقع الآني عشته

وأخيراً جتي بنتي للدنيا
والبارحة احتفلنا بعيد ميلادها ....
يا ربي لا تحرمني من شوفتها العمر كلة

ياربي لا تحرم أي وحدة من الذرية بحق محمد وآل محمد

ولو ابقی العمر كلة اشكر الخالق قليلة علی كرمه ورحمته الي

ادري طولت عليكم
ما ادري شنو الخلاني أذكر قصتي
يمكن من الفرح
من شعور ما أعرفه شنو
الحمدلله