موسوعة القصص من واقع العراقي ( قصص قصيرة بكتاب واحد )

٥- الاخير من على ضفاف ضمائرنا

خلص الليل كله وروان وسوزان يتوسلن بحيدر. .وحيدر قافل كلش. ..ويريد ينشر الصور. ..
سوزان بحالة ذهول وصدمة من موقف حيدر. ..لأن هو طول سنة كاملة كان يمثل عليها دور الحب والعشك. ..
روان: معقولة انتي جنتي تحبين هذا  ؟ انتي شنو ما عندج عقل. ..شلون ما كشفتي. ..انتي لهلدرجة غبية ؟ انتي تتصورين شنو راح يصير بينا اذا حيدر نفذ تهديده. ..الله أعلم شراح تسوي بيج منال وشراح يسوي بيج عمي....واني شلون. ..شنو راح يصير بيه ...فضحتينا الله لا يوفقج. .
اني احجي وسوزان ساكتة. ..ومنال كل شوية تجي تطل علينا. ..حسيتها حست صاير شي. .
كعدنا نصلي اني وسوزان وندعي بكل الأنبياء والرسل ..ما ظل دعاء ما كلناه. .

( اللهم استرني فوق الارض وتحت الارض ويوم العرض اللهم لا تشمت فيني لا عدو ولا حاسد ولا قريب ولا بعيد)
وظلينا على هالحالة لحد ما غلبنا النعاس ونمنا. ..كعدنا الصبح وجوهنا مخطوفة وندعي من الله سبحانه وتعالى يستر علينا. ..ومتصيرلنا فضيحة كدام الناس من ورى بنية طايشة ما فكرت بعقلها ولا بنفسها ولا باختها. ..ومن ورا شاب ناقص ونذل. ..

أول ما كعدت أخذت التلفون وظليت ادور بالفيس واشوف نشرهن لو لا ...ما شفت شي ارتاحيت وكلت الحمد لله ما نشرهن. ...

العصر قريب الفطور اندك بابنا جان منال تكلي
روان  روحي فتحي الباب شوفي منو. .اني رحت امشي بخطوات بطيئة خايفه ومرعوبة أخاف حيدر جايب الصور لأهلي أو أي شي ثاني يخص الموضوع

فتحت الباب واثاري هذوله جيرانه مسوين ثواب وجايبيلنه بيد بتهم الزغيره....جانت شكد حلوه وبريئة ومسوية كصايب اثنين باوعتلها تنطي شبه لسوزان من جانت بكدها. ..كلتلها انتي شنو اسمج
          

جان تضحك وتكلي اني اسمي بنين. .كلتلها بنين ظلي هيج حلوه وبريئة حتى من تكبرين. .وسمعي كلام اللي أكبر منج. ..اني احجي ودموعي وصلن للكاع ما حاسه على روحي والبنية تباوعلي ومداتفهم كلامي. ..فجأة قاطعتني وكلتلي خالة تردين الثواب لو لا ؟
  

كلتلها أي أريده بس مال شنو ؟ شنو المناسبة
بنين: اليوم أستشهاد الإمام علي  ( عليه السلام )
روان: اني فدوه اروح لاسمه علي. .انطينياه. .شكرا
يالله شكد فرحت وحسيت انو هاي بشارة من رب العالمين وانو الله راح يستر علينا. ..بهذا اليوم المبارك هم رمضان وهم استشهاد الإمام. ..صح إحنا سنة ومنعرف بهالشغلات بس أحب أهل البيت وما نفرق. ..

دزيت رساله لحيدر. ..وكتبتله. ...
حيدر احلفك بستر خواتك. ..وبكل غالي عندك. ..
احلفك بشهر رمضان ...احلفك بالإمام علي بن أبي طالب. ..استر اختي سوزان ولا تفضحها. ..هي حبتك وامنت بيك. ..اعتقها بجاه هالشهر الفضيل. ..
أنساها وعوفها. ..لا تدمرها

رسلت الرسالة واني كلبي مرتاح من كثر الأدعية اللي دعيتها.....
تفطرنا وكعدنا اني وسوزان نغسل المواعين بعد الفطور. ..بس ما اعرف ليش كلوبنا ارتاحت. ..حسيت الرسالة الأخيرة أثرت بي. ..
بينما كاعده بغرفتي اقرأ قرآن. ..جتي سوزان و وجهها عبالك وحده ميته. ..ما بي نقطة دم. ..
سوزان: ر   ر   وان. ...شوفي. ....دخلي. ...عالفيس. ..
صور. ...صوري ناشرهن. ...هنا اغمى عليها